" کاتژمێرێک لەنێو تاریکیدا "

هەندێک جار لە چاڵایی ژیانەوە قوڵتر دەکەوینە خوارەوە ، بەڵام هێشتا نینۆکەکانمان دەچەقێنینە دیوارەکان و هەوڵی سەرکەوتن دەدەین

چونکە لە سەرووی چاڵاییەکەوە ئێمە ڕووناکیەک دەبینین

بەڵام من...
من هیچ ڕووناکیەکم نەبینی
تەنانەت تروسکەیەکیش بوونی نەبوو

بەڵام هێشتاکە پەلەقاژەم دەکرد بۆ ژیان

بۆ هەناسەیەک

لە گوندێکی بچوک و جواندا ژیانم دەکرد لە کوردستانی باکور

دایک و باوکم خەڵکی سلێمانی بوون لە باشوور بەڵام بەهەندێک هۆکار لەگەڵ خێزانەکانیان هاتبوون بۆ ئێرە

ئەوە ساڵانێک بەر لە ئێستا بوو

گوندێک کە سەوزاییەکەی بۆ ساتێک بەهەشتی بیر دەهێنایەوە

وە ئاوە سازگارەکەی وای دەکرد بیر بکەیتەوە کە دەکرێ خودا پیرۆزیەکی پێ بەخشیبێت

لە زۆربەی کاتی ساڵدا ئاوهەوایەکی فێنک و دڵبەری هەبوو

دووربووین لە هەموو ئەو تەکنەلۆژیایەی ئێستا بوونی هەیە

ژیانێکی سادە و جوانم هەبوو
وە خێزانێکی ئارام و شیرین

ماڵێکی گەرم و پڕ لە هەست

هەموو ڕۆژانێک بەیانیان لەگەڵ ڕووناک بوونی ئاسمان من و خێزانەکەم دەستمان دەکرد بە کارکردن

ماندوو دەبووین
بەڵام ئاسوودە بووین

من هاوناز بووم
کچێک بووم لەم گوندە ژیانێکم دەکرد وەک هەموو یەکێکی تر

خێزانەکەم بریتی بوون لە دایک و باوکم و دووبرا و خوشکێکم

ئێمە خێزانێک بووین کە خەڵکی زۆر بە باشەوە باسیان دەکردین

هەموو چرکەیەک شانازیم بەخۆمەوە دەکرد کاتێک پێیان دەووتم تۆ کچی کاک مەحمودی ، باوکت پیاوێکی زۆر باشە

وە دایکم بە نەرم و نیانیەکەی ناسرابوو

لە هەموو ڕووێکەوە خێزانێکی تەواو بێکەمووکوڕیم هەبوو

وە منیش یەکێک بووم لەوان
منیش هەمیشە هەوڵم دەدا ناو و ناوبانگیان لەکەدار نەکەم و هەرگیز نەمکرد

ڕۆژانێک ماڵی پوورم لەنزیک ئێمەوە بوون
ئەوانیش وەک ئێمە بوون

تاکە شتێک لە نێوانمان جیاواز بوو هەبوونی عومەر بوو

عومەر کوڕە پوورەکەم بوو کە نەخۆشی دەروونی هەبوو، کە بە گشتی پێی دەووترا شێت

بەڵام کوڕێکی بێزیان بوو
وە خۆشەویست بوو

ئێمە هەرگیز جیامان نەکردەوە لە خۆمان

تەنانەت لەگەڵ گەورەبوونی تەمەنیشمان من و خوشکەکەم هێشتا وەک مناڵێکی بچوک سەیرمان دەکرد و خۆشمان دەویست