مراهقة والاربعيني بلهجة جزائرية

56

#المراهقة و الأربعيني:

#الجزء56:

غدوا منداك كنت قاعدة فالهول لفوق حاكمة التلفون و صراع ما علابالوش بلي عندي تلفون.. جا من الخدمة و كان رايح يدخل للشومبرة شافو في يدي جاز و ما هدر والو، بدل حوايجو و عاود حبط.. شويا و طلعت لعندي نور قالتلي ليليان قالك صراع ابعثيلي التلفون.. عطيتهولها..
حبطت لتحت صبتو قاعد مع نائل فالصالون.. الحاجة ما تهدرش معايا و هو ما يهدرش معاها و نور من الجو تع الدار كي كان مقلب حكمت ولادها فالشومبرة.. حرت وين نروح كلشي صامط و التلفيزيون ما فيه والو و التلفون نحاهولي و الرقاد شبعت منو.. رحت للجنان و قعدت فالجعلولة نلعب و نخمم شويا هكدا جاز عليا علي و موراه هيام و بناتها.. علي دخل قبالة و هيام جات لعندي قالتلي خير علاش راكي قاعدة هنا؟ قلتلها يمال وين حبيتيني نروح؟ قعدت فالجعلولة و قالتلي وش صرا؟ قلتلها راهو يقول مانيش حايبك كامل، قالتلي من حقو، قلتلها أنا ماكانش قصدي باش نآذيه و ما كانش علابالي بلي هاد الشي رايح يجرحو.. كنت نخمم برك باش نتهنى و نعيش مع خويا في تركيا، قالتلي و آخرتها كيفاش؟ قلتلها أم علي كل ما نجي نصلح حاجة نزيد نعميها، قالتلي لي يشاور ما يضيعش ليليان.. لوكان سمعتي لكلامي ما توصليش لهاد الشي كنت قادرة نقنعو يديك لدار خالك بلا مشاكل حتى تتهدن الأمور و تعاودو حساباتكم بصح انت درتي وش كاين في راسك، مادام ما تعرفيش تتصرفي شاوري الانسان لي تعرفيه بلي ما يآذيكش حتى هو لوكان هدرتي معاه بلعقل و الله غير ينصحك لروحك.. هو انسان متفهم و ماشي أناني.. قلتلها و دوك كيفاش ندير؟ قالتلي خليه على راحتو بصح ما تهمليهش اهتمي بيه ملبعيد لبعيد باش ما يحسش بلي ما راكيش سامعة بيه و بلي صح ما تحبيهش.. و دوك نوضي ندخلو نڨصرو شويا وش فايدة القنطة و الزعاف اضحكي للدنيا تضحكلك، قلتلها كيفاش نضحك ياك يقولك المنحوس منحوس  حتى و لو يحطو فوق راسو فانوس.. ضحكت و قالتلي نوضي نوضي أنت وحدك ههههه..
دخلنا، هو كان قاعد فالهول، درنا لاتاي عطاتلو هيام شد عليها الكاس بلا حتى ردة فعل كان كاااااالم بزاااف.. حسيت روحي عاودت رجعت للزيرو نتبع فيه غير بعينيا و نراقب في حركاتو و نستنى النظرة منو و هو جبل ما يهزو ريح تقول ما راني قدامو نفس البرود تع زمان..
حبت هيام تلطف الجو قالت لوليدها علي كاين وحد الناس كانوا يحلفوا فيا قالولي خلاص ما بيناتنا منبعد بزوج دمعات حن القلب.. قالها علي يما حصلنا فيكم نتوما النسا واحد ما يقدرلكم سيدنا آدم و خرجتوه من الجنة حبيتينا حنا ما طيحش قلوبنا بزوج دمعات؟! قالتلو استغفر ربي الله لا تربحك ههههه..
تبسمت و انا نشوف فيه و هو تقول ما راهم يهدرو قدامو غالط على روحو في عالم وحدو حاط اللابتوب قدامو و يخدم بيه..
جازت يمات و هو على نفس البرود.. قلت نهتم بيه ملبعيد بلاما نتقرب منو و لا نفورصيه باش نتصالحو خليتها للوقت بالاك يخف الزعاف ما بيناتنا و نرجعو كيما كنا من قبل..
وليت نوجدلو الدوش و حوايجو قبل ما يرجع من الخدمة، و كاس ما بارد و الغدا و وليت نهتم بأدق تفاصيلو بصح قعد مبعدني عليه..
خطرة حطيتلو لاتاي قدامو ما خزرش منبا في وجهي.. خلاه في بلاصتو حتى برد منبعد قال لنور وجديلي واحد جديد هدا برد
هنا تقلقت و قررت باش ما نزيدش نخدمو و نستعمل معاه نفس الأسلوب علبالي بلي هو ما يحملش كي نتجاهلو يمال خلي نشربو من نفس الكاس...
جازت زوج سمانات و أنا رامياتو فلاتوش ماشي كامل سامعة بيه تقول براوية على بعضانا كاس الما ما نحطهولوش.. و هو كان يخليلي كل يوم مصروفي عند الحاج كي يضيق خاطري نخرج مع هيام للسوق كي تشاورو ما يقوللهاش لالا.. بديت نتقنط من وضعنا.. حسسني بلي صح ما رجعتش على جالو إنما رجعت لخطر ماعنديش وين نروح.. حرمني منو و وفرلي كلشي و ما قصرش في واجباتي.. حرت كيفاش ندير معاه كيما جيتو ما رضى حتى كي نبعث هيام تهدر معاه يقولها ختي الله يسترك اغلقي هاد السوجي..
وحد النهار جانا مع صباح ربي خبر وفاة مرت عمهم كان عندها سرطان و توفات فالسبيطار.. غلقنا الدار و رحنا للجنازة.. الحس و الغاشي و أنا ما نعرفش الناس حسيت روحي غريبة.. حلا كانت حكات لإخلاص بلي صراع ما راهوش حايبني و إخلاص سمعت بيا كامل أمة لا إله إلا الله.. تقلقت و كنت نستنا غير وقتاش نرجع للدار و نخبرو بكلشي..
مع العصر كانو يوجدو فالعشا و أنا كنت مع هيام و إخلاص فالكوزينة  و هي تكيل فيا ملفوق لتحت بصح ما قدرت تهدر والو قدام هيام.. دخل سليمان و صراع يهدرو مع نسا عمومهم على شحال يطيبو باش يوجدو.. صراع طلب لاتاي سرباتلو هيام واخلاص قالتلها اعطيني أنا نديلو، قالتلها هيام لالا مرتو لي تديلو و تعنكرت فيا قالتلي هاكي ليليان.. شديتو عليها و رحت للڨاراج صبتو قاعد مع مرت عمو تحكيلو و هو مبرونشيلها.. مديتلو يدي و ما هدرتش معاه ما دارش منبا و كمل يسمع حتى مرت عمو تقلقت قالتلو شد لاتاي ديالك.. زعما لعبها شغل ما انتبهليش.. شد عليا الكاس و قالي ما تخرجيش للڨاراج اقعدي لداخل.. عمري خرجت من تصرفاتو معايا .. كي دخلت قالتلي إخلاص علاش راكي تفورضي في روحك عليه ما راهوش حايبك.. علاش بالسيف؟ قلتلها هدا لي راكي تقولي ماراهوش حايبني طلق زوج نسا غير باش ما نزعفش و نخليه.. بصح كاين شي نسا ما عندهمش كرامة و قاعدين يلصقو في رواحتيهم على راجل متزوج باش برك ما يقولوش عليهم بايرات.. قالتلي تع وجهك إدا أنت توصليني يا كدا يا كدا.. دخلت و خليتها و هيام رجعتلها..
كملنا العشا و قعدنا نستناو في صراع باش يجي يدينا للدار.. كنت قاعدة قدام الباب تع الصالوم و وحد المرا تهدر لداخل مع الحاجة قالتلها ربي يهديك يا أم صراع وليدك راجل طول و عرض و هيبة، هادي مرتو؟!! حتى صوتها قريب ما ينسمعش.. زوجيه و جيبيلو مرا بالطبع و الشان توالمو و جيبلو دراري.. هادي عندها سنين معاه ما جابتلوش حتى واحد، قالتلها الحاجة و أنا وش راحلي فيه هو يحبها.. قالتلها وش يحب يرحم والديك، ما تشفايش وجدان كيفاش كانت طول و كور تع ملكة تاكلك بالسلام، و الله يا أم صراع غير راكي ظالماتو بهاد الطفلة وين علبالك لوكان جيب منو طفل إدا تربيه على المسيحية و لا على الاسلام، الام عندها دور كبير ما تخليهش هكدا.. قالتلها هو راضي بيها و غير هي لي معمرة عينو ما قبل حتى مرا و هي تان طفلة مليحة و  تنحب و مشاكلهم ما بيناتهم..
ولات تقلقني هاد الهدرة.. كي نروح عند خوالي يقولولي مايوالمكش، انت زين ڨاوري و شقراء و هو عربي و كبير عليك كيفاش راضية بيه، و كي نجي لهنا يرجعوني زيرو و ما نوالموش..
بعثت وحد الطفل قتلو روح لعمو صراع قولو قالتلك ليليان ارواح تدينا من الجنازة  و لوكان ما جيش تولي جنازة ثانية هنا.. راح الطفل و أنا قعدت نستنى نص ساعة باش شرف الموسيو عيط من الباب ام عليييييي يلا ختي قولي للجماعة يوجدو رواحتيهم عيينا.. أنا كنت واحدة خرجت بلخف، كي شافني شرلي باش نمشي، مشيت و هو مورايا وصلت للطونوبيل طلعت و هو بقى واقف عاطيني بالظهر و حاط يديه في جنابو يستنى فيهم.. جات الحاجة طلعت معاه ملقدام و هيام و بناتهم طلعو معايا ملور.. حطيت راسي على الكارو و قعدت نخزر في عينيه فالمرايا و أنا نعسانة.. ما شافش كامل فيا.. صراع لي كان كي نطلع موراه الطريق تتلفلو و هو يسرق فالنظرة ليا، حسيت بحبي ليه نقص كي ما رجعش يهتم بيا.. 
كان حكم طريق وحدوخرا لخطر في الدخلة تع الحومة كانت حواجز تع أشغال ما يقدرش يوصل حتى لدار هيام بالطونوبيل.. قال للحاجة يما احبطي وصلي أم علي و البنات راهي ال10 تع الليل ما تخليهمش وحدهم..
حبطت الحاجة ما علباليش وش صرا لقلبي كي بقيت غير أنا وياه وحدنا ساكتين.. قعدت نخزر في عينيه ما شافش فيا حصلتلي الدمعة في عينيا غاضتني عمري.. دورت وجهي و أنا نخبي في دموعي باش ما يحبطوش، سمعتو جبد النفس و يتنهد تع واحد عيان.. درت ليه صبت عينيه عليا كي طاحت العين فالعين دور وجهو عليا بلخف.. قتلو صراع لوقتاش؟ قالي انعم؟ زعما كي شغل ما فهمش.. قتلو لوقتاش نبقاو هكدا و الله غير قتلتني.. فتحت الحاجة الباب و طلعت.. ديمارا غير وصلنا و ڨارا الطونوبيل حبطت نجري رحت قبالة لشومبرتي قعدت نبكي في فراشي.. شويا و سمعتو دخل لشومبرة حلا وليت نبكي كثر ما عرفتش كيفاش ندير معاه خلاص ما قدرتش نزيد نحمل كثر بلا بيه..
في آخر الليل رحت لعندو و أنا نبكي، فتحت الباب كان مطفي الضو و راقد، خليتو و رجعت بقيت نبكي حتى للفجر..
الصباح جات نور نوضتني و أنا ماشي شابعة رقاد قالتلي قالك صراع وجدي روحك باش نروحو للجنازة.. قلتلها قوليلو ما تروحش.. قالتلي رايح يغلق الباب نوضييي.. قلتلها قوليلو ما ترووووحش مانيش حايبا و درت للجيهة لوخرا و تغطيت
شويا و سمعت الحاجة تعيطلي لييليااااان.. رميت الغطا و طليت عليها قلتلها يما روحو أنا ما نروحش.. قالتلي راجلك راهو واقف خفي بنتي.. قلتلها ما نيش حايبا يمااااا.. قالها صراع يما مانيش قاعد قيس التكعرير هيا باش نغلق الباب راح الحال.. قلتلها يما اغلقوا الباب و روحو.. قالتلي احبطي يا بنتي كيفاش ما تروحيش.. قلتلها الروبة ديالي قصيرة ما نقدرش نحبط و ما نبدلش أصلا فاميلتكم ما نحبهمش علاش نديرونجي روحي باش نسمعهم يقولو شوفو ما يهدرش معاها ما يحبهاش علاش ما يتزوجش.. روحوووو قلتلكم ما نروحش.. قالها يما خلاص امشي نديكم..
هوما راحو و أنا رجعت للشومبرة شعلت التلفيزيون ماصبتش حاجة تعجب وليت حبطت لتحت كنت جيعانة قلت ندير كايك.. جبدت الدوزان و بديت نوجد حتى سمعت باب الڨاراج تفتح جوايه ال14.. كنت غالقة كامل البيبان، سمعت الدقديق فالباب طليت من التاقة صبتو صراع شافني فتحتلو الباب دخل للكوزينة حط صاشي بيضة فوق البوطاجي و راح للهول.. فتحتو صبتو جابلي ماكلة اونبورتي من كل حاجة نحبها فرحت، كملت الكيك و خبيتها فالفريجيدار، حطيت الماكلة لي جابها في سنيوة و رحت للهول صبتو متكسل فوق الكنابي يشوف فالأخبار.. قعدت ناكل كان حاط تلفونو فوق الطابلة جبدتو ما هدر والو.. كان أخر مرة دارلو الكود كي طلبت منو يزيدو مع البصمة.. دخلت تاريخ ميلادي تفتح التلفون يعني ما بدلش الكود.. درت فيلم عربي و قعدت نتفرج و ناكل.. 
كملت رفدت الماعن غسلتهم و عاودت رجعت للهول جبدت مخدة و تكسلت رقدت ما فقتش حتى سمعت صوت الحاج كان يهدر مع صراع.. صبت روحي مغطية بكوفيرطة و التلفون قدامو فوق الطابلة.. الحاج واقف و انا لابسة روبة قصيرة و هو ما يحبش نمشي قدام الحاج لابسة هكدا.. شفت شفت وليت غطيت روحي بالكوفيرطة و نضت بلخف باش نروح لشومبرة الحاجة تعكلت و طحت قعدو يخزرو فيا.. صراع تبسم و دور وجهو و الحاج قالي وش خداك يا بنتي زايضة انت بفراشك..  طسكت و رحت قبالة لشومبرة الحاجة فرحت كي شفتو تبسم و فوقها مغطيني يعني مازالو يحبني.. لبست من حوايج الحاجة و طلعت لشومبرتي بدلت حوايجي..
صراع راح و فالليل رجعو عيانين كلما دخلو لشنابرهم، و هو دوش و دخل لشومبرة بنتو رقد.. انا بقيت نايضة لخطر شبعت رقاد فالنهار.. قعدت نطلع و نحبط و نتفرج فالتلفزيون، راحت التريسيتي و ما عنديش تلفون باش نشعل لاتورش، خفت من الظلمة بقيت نمشي مع الحيط حتى لحقت للشومبرة لي راقد فيها صراع بقيت نتلمس بيدي حتى وصلت للبونك مشيت يديا حتى توشيت وجهو قفز و حكم يدي قال شكووون؟ قتلو راحت التريسيتي خفت.. قعدت فوق البونك دنا روحو بجيه باش يخليلي بلاصة تكسلت و هو تخشب في بلاصتو النفس و قطعو منبعد ولا كسل يدو حطيت راسي عليها و يدي على صدرو نحس طريقة التنفس ديالو تخربطت.. شويا و جات التريسيتي.. كان مطفي الضو تع الشومبرة بصح دخل ضو خفيف ملبرا.. خزرت فيه كان مغمض عينيه بصح علبالي ماكانش راقد و تهولت حوالو.. بست دراعو و تحركت همستلو قتلو وشبيك توحشتك.. خزر فيا شويا منبعد قرب بدا يبوس فيا بلهفة حتى حسيتو متوحشني كثر ملي كنت متوحشاتو.. و رقدت على يدو حتى للصباح مرتااااااحة..
غدوا منداك كانت الثلثيام تع الجنازة راحو كامل من غيرو هو لخطر كان يخدم فهداك النهار.. هو راح و أنا نضت مورالي طالع دوشت و جبدت شعري و ماكييت.. درت الغدا و سنيتو حتى جا فتحتلو الباب.. دخل و ما خزرش فيا استغربت هدا وشبيه مازالو زعفان؟ يمال لي صرا مابيناتنا لبارح وشنو؟! راهو يلعب بيا هدا؟!!  رحت ليه قتلو صراع.. ما واجبنيش.. حكمتو من يدو قتلو حبس دقيقة وشبيك مازالك زعفان؟! قالي و شكون لي قالك راني زعفان؟! قتلو يمال وشبيك؟ قالي كيفاش وشبيا؟ ما فهمتش.. قتلو ماشي لبارح تصالحنا؟ علاش مازالك ما تخزرش فيا؟ قالي و شكون قالك راني زعفان؟ انا راني بعيد عليك لخطر انت ماراكيش حايبتني.. قتلو كيفاش ماشي حايباتك؟ قالي رجعتي لعندي كي ما عندك حتى واحد نسيتي ولا نفكرك؟ قتلو وشنو هاد الكلام يمال الشي لي صرا ما بيناتنا لبارح وشنو؟! قالي انت لي جيتي ليا و طلبتي حقك الشرعي و عيب عليا نرجعك بلاش و أساسا حرام نخليها في قلبك..بصح ماشي معنتها نرجعو كيما كنا من قبل.. أنا ماشي لعبة عندك.. تهربي وقت لي تقرري.. و ترجعي الوقت لي تحتاجي.. و تطلبي كي تقوم نفسك عليا و تحسي روحك محتاجة قربي.. يعني ماشي حبا فيا برك تقضي بيا الصلاح.. قتلو وشنو هاد الكلام؟ كيفاش أنا لي جيت ليك؟ راك تهين فيا؟ قالي انت لي جيتي و طلبتي و أنا كرمتك.. رفع حواجبو و راح.. خلاني في موقف محرج مع روحي.. دوك هدا بنادم؟!!
طلعت ليه فتحت الباب و أنا مقلقة صبتو يبدل في حوايجو قتلو أنت انسان مستفز و أصلا ما تستاهلش حبي و غير ماكالاه دير في بالك بلي جيت لبارح باش نصالحك.. كمل يلبس ما دارش منبا ليا و لا عبرني رجعت نصوطي وحدي وحدي طلعلي الڨاز.. خرجت و خبطت الباب مورايا.. رحت لشومبرتي قعدت ندور كي الزربوط و نهدر مع روحي.. أنا لي بهلولة قاعدة فرحانة و نوجد في روحي ليه.. وش راهو حاسب روحو هدا؟! بصح معليش دوك تشوف ادا نزيد نشوف في فيڨورتك و دمعة ما نزيد نطيحها عليك لخطر ما تستهالش..
شويا و سمعتو نوض الطونوبيل و راح و أنا قعدت ناكل في روحي على الموقف لي حطيت روحي فيه..
فالليل جاو كامل مع نائل و جات حلا معاهم ما سلمتش عليا منبا و تشوف فيا بنص عين.. قعدت معاهم شويا و طلعت لشومبرتي مازدتش حبطت حتى غدوا منداك جوايه ال11.. ما كليت والو ما قدرتش.. خرجت للڨاراج و بديت نسيق فيه.. سمعتو كي جا و بدا يفتح فيه بصح غلقت راسي و كملت نغسل خلي نشوف وش يدير.. رديت روحي ما علاباليش كامل.. قالي ادخلي للدار.. ما واجبتوش .. غلق الباب و جا لعندي حكمني من دراعي قالي مارانيش نهدر معاك؟! قتلو مارديتش بالي.. وش تحتاج؟ قالي قتلك ادخلي باش ندخل الطونوبيل.. قتلو ماراكش تشوف بلي راني نسيق؟؟ وين دخلها؟! قالي ليليااااان.. سكتت عليه و زدت زرزقت الدنيا مليح بالما.. قالي أنت وجهك صحيح و ما تحشميش..
عاود خرج ڨارا الطونوبيل برا غلق الباب و دخل و انا كملت باش دخلت للدار.. صبتو قاعد فوق الكنابي و حلا قاعدة قدامو و هو يبوس و يقولها هدا وين نورت الدار يا بتتي كي جيتي و قعدتي دوري قدامي.. رحت قابلتهم و قعدت و هو يهدر معاها.. قالها كيفاش راكي معاهم ياك ما دارولك والو؟ قالتلو لالا بالعكس بصح خالتي شويا مشحاحة ما تخلينيش نطيب كيما نحب و مور العشا ممنوع ندخلو للكوزينة كاش ما نطيبو.. و أنا و وسام كي نسهرو نجوعو و إدا كاش ما جاب حاجة نجوزو بيها السهرة تحاسبو و تقولو رايح تكمل دراهم في هاد التفاتف لي ما يسواوش.. ناض صراع يضحك قالها يا بنتي خالاتك هادو هوما منهارهم الشر يا الشر مشحاحين للطرف.. البخل و الخبث.. لي راح لعندهم غير المدعي بدعوة الشر.. و بشر على أم سعد و هي دايرة لاتية تهدر مع الحاج.. تعنكرت فيه الحاجة.. قالها ما تعمريش راسك بنتي أنا نشريلك فريجيدار حطيه في شومبرتك و كل سمانة نقضيلك وش تتشهاي و نجوز ليك نعطيهولك.. ماديريش معاها المشاكل التهاي براجلك و خلاص لتم تحبس.. و هي تبوس فيه و تقولو بابا حبيبي ربي يحفظك ليا.. قالي دوك نوضي جيبيلي ما بارد و وجديلي لقمة ناكل راني ميت بالجوع.. نضت من بلاصتي جبدت التلكومند و هي راحت جابتلو يشرب شدو عليها و هو مدور وجهو يهدر مع الحاجة.. قلقني يخزر فيهم كامل غير أنا لالا.. هو رفد الكاس باش يشرب كنت قريبة منو رفدت التلكومند و درت بلخف خبط فيه تدفق الما عليه و هو يشرب قتلو اسمحلي ما شفتكش.. تعنكر فيا علبالو درتهالو بلعاني.. عطاتلو الحاجة الطرشونة قالها ماكالاه.. قعد يتعنكر فيا رحت للكوزينة خفت منو.. لحقني حكمني من يدي و قالي تزيدي تعاودي جاست كيما هدا تشوفي وش ندير فيك.. قتلو قتلك ماشي بلعاني..قالي عاوديها و تشوفي كيفاش نعلقك.. قتلو أنت وش كاين ما بيني و بينك باش أنا تضربني و تعلقني و غيري تحضنها و تبوسها و حبيبتي و بنتي.. قالي لخطر أنت وحدة ماشي دايرا قدر لا لروحها لا لغيرها..كي تسڨمي روحك ارواحي تهدري..  دخلت نور طلقني و خرج.. قالتلي وش زدتي درتي؟ قلتلها ما درت والو هو مقلق و كي ما يصيبش وين يفرغ زعافو يجي لعندي..
قعدت نخدم فالكوزينة و هوما يهدرو على قضيان رمضان كان قعدلو يومين..
حطينا الغدا و قعدنا و أنا نتبع فيه بعينيا ماشي بغرضي جات فوق يدي.. نشوف فيه يحكي معاهم و يضحك و أنا تقول مارانيش نبان.. تقنطت بزاف.. نضت من الطابلة و جيت رايحة.. قالتلي الحاجة يا بنتي وين نايضة ما كليتي والو ليليان.. قلتلها راني شبعانة يما و طلعت فالدروج.. سمعتها تقول الطفلة هادي رايحة تهبلني حتى الفطور و ما فطرتش.. ما تاكلش حتى تضر روحها و طيح و نوليو نجريو بيها فالسبيطارات.. قالتلها حلا خليك منها جدة علاش راكي معمرة راسك بيها..
دخلت للشومبرة مقنوطة علاش ما حبش يسامحني ألف مرة قتلو غلطت..
قعدت حابسة روحي فالشومبرة و نتفرج فالتلفزيون حتى دقدقت عليا هيام و دخلت.. نضت من فراشي رحبت بيها و فرحت كي جات لخطر نحبها نحسها كي يما و لا ختي الكبيرة.. شفتها جايبة معاها ماكلة اومبورتي قلتلها وشنو هدا؟ قالتي علي جابهولنا و لتحت صبتهم كامل تغداو قالتلي يما ادي لهديك المخبوطة لي راهي لفوق تاكل راهي من الصباح ما ذاقتش اللقمة.. ريحي ناكل أنا و ياك [ الماكلة ما شراهاش علي.. صراع كي شافني تقنطت و طلعت حبست روحي و ما كليتش راح شرا الماكلة و جاز على هيام جابها معاه قالها لدي لليليان تاكل بصح ما تقوليلهاش بلي أنا لي جبتو باش ما ديرش في راسها راني متساهل معاها و عاونيني فيها عقليها شويا]
قعدت أنا و ياها ناكلو و نڨصرو قالتلي علاش راكي عازلة روحك؟ قلتلها و كي نحبط وش ندير؟ بنتو تغزل فيا و هو ما يخزرش فيا نزيد غير نوجع قلبي.. قالتلي مازال ما تصالحتو؟ قلتلها مازالو مخشن راسو كيما درت ما حبش يرضى.. قالتلي هو راهو حايبك تعرفي غلطتك.. قلتلها ألف مرة قتلو علابالي بلي أنا لي غلطت.. قالتلي أنت عرفتي غلطتي بصح مازال ما صلحتي روحك.. ريحي مع روحك و حاسبيها.. بينيلو بلي راكي ندمانة و تسڨمتي بتصرفاتك ماشي بالكلام.. قلتلها كيفاش محسوب؟ قالتلي يعني حبسي الطيش و تصرفاتك تع الدراري قدامو ما عندها حتى معنى بطليها، اهدري بلعقل.. رزني روحك..اوزني كلامك و تصرفاتك.. هدا ماراهو طالب منك.. قلتلها درت كامل وش راكي تقولي بصح هو ما يفيد معاه والو.. قالتلي راكي سور؟ حبطت راسي..
قالتلي حاسبي روحك بنتي ما تقعديش تقولي غير ظلمني.. شوفي الحوايج لي درتيهم باش ظلمك بسبتهم و اقعدي مع روحك علميها ما تعاودش نفس الغلطة تفرحي و تفرحي غيرك.. شوفي هو حاجة ما راهي ناقصاتو.. مرتاح ياكل يشرب و يخرج و انت راكي تغلي وحدك بصح كي تسڨمي روحك ترتاحو في زوج و تبعدو المشاكل على حياتكم.. درتلها براسي إيه.. كملنا الماكلة قالتلي ما تقعديش وحدك هنا احبطي لتحت..
حبطت لتحت كان لتم شفتو مازالو رافد نيفو حاسب روحو حاكم السما عليا زعما ما يتنازلش وش رايحة نديرلو يروح يرنك على روحو علاش راني قاتلة روحي عليه...