မျောလွင့်နေသော ပြာမှုန်များ

Chapter 48.1

ယင်းက ယခင်ဘဝ၌ သူ့အတွက်အပျော်ရွှင်ရဆုံးနေ့များဖြစ်သည်။ သူ့ကိုယ်သူ အချစ်အကြောင်းသိလှပြီဟု ထင်ခဲ့မိကာ သူ့တစ်ဘဝလုံးကို ကျိုးကျင်ဟမ့်နှင့်အတူ ကုန်ဆုံးသွားဖို့ပင် တိတ်တဆိတ် ပြင်ဆင်နေခဲ့သေးသည်။ တတိယလူအတွက် ပျော်ရွှင်မှုမရရှိနိုင်သလို ပေးဆပ်ခြင်းကလည်း ကျိန်းသေပေါက် ဆုလဒ်မရရှိနိုင်ကြောင်းအား နောက်ပိုင်းစမ်းသပ်မှုများနှင့် ဆင်းရဲဒုက္ခများတွေ့ပြီးမှသာ သိရှိနိုင်ခဲ့သည်။

အတိတ်က အတိတ်မျှသာဖြစ်ပြီး ကံကြမ္မာကလည်း အခြေခံကျကျပင် ဦးရာလူစနစ်ဖြင့် သွားနေသည်ပင်။ ထိုအချိန်က သူခံစားရသောနာကျင်မှုမှာ အခြားလူ မခံစားနိုင်သည့်အရာဖြစ်ပြီး ယခု ထိုအမျိုးသားဆိုလာပါသည့် 'အချစ်'ဆိုသည်မှာလည်း သူ့နားစည်ကိုဖြတ်၍ နှလုံးသားထဲ မရောက်နိုင်တော့ပါချေ။

........

နောက်နေ့မနက်စောစောတွင် ကျန်းရွှယ်မေ့က Sမြို့ရှိ ကင်ဆာရောဂါကုဆေးရုံ၌ ကုသမှုခံယူခဲ့ပြီး တစ်ကိုယ်လုံးကို အသေးစိတ်စစ်ဆေးမှုခံယူခဲ့၏။

ရလဒ်မှာ သူမ၏နှလုံးတွင် ပြဿနာရှိနေဆဲဖြစ်ကြောင်း ပေါ်ထွက်လာသည်။ ဓာတုကုထုံးနှင့် လှုံ့ဆော်ပေးသည့် ဆေးဝါးအမျိုးမျိုး၏ အကျိုးသက်ရောက်မှုအောက်တွင် သူမ၏ ကိုယ်တွင်းအင်္ဂါများမှာ ခံနိုင်ရည်အားနည်းသွားကာ ရုပ်ပိုင်းဆိုင်ရာနှင့် အာရုံခံမှုဆိုင်ရာ အဆင်မပြေမှုအမျိုးမျိုးကို ဖြစ်စေခဲ့သည်။

ဆေးဝါးနှင့် ကုသမှုအစီအစဉ်ကို ချိန်ညှိပြီးနောက် သုံးရက်အတွင်း၌ပင် ရောဂါလက္ခဏာများ သက်သာလာခဲ့သည်။ ကျန်းရွှယ်မေ့၏မျက်နှာသည်လည်း သွေးရောင်သန်းလာသည်။ သူမရောက်သည်နှင့် အကူအညီဖြင့် လမ်းလျှောက်နိုင်နေပေပြီ။ ယခုဆိုလျှင် သူမက အိပ်ရာမှထွက်ကာ အနီးအနားတွင် လမ်းလျှောက်နေနိုင်ပြီဖြစ်သည်။

“သားသူငယ်ချင်းကို ကျေးဇူးတင်ရမယ်”

ကျန်းရွှယ်မေ့က ယီဟွေ့၏လက်ကိုကိုင်ကာ ပြောလိုက်သည်။