Chapter-41.2)
လုံခြုံရေးအစောင့်မှာ တစ်ခုခုလွဲချော်နေကြောင်း အာရုံခံမိသဖြင့် ယန်သောလဲ့ကို ကာကွယ်မည်ပြုသော်လည်း ထောင်ကျန်းက ရုတ်ခြည်းဆန်စွာ ယန်သောလဲ့၏ ညာလက်ကို ဆွဲလိုက်ပြီး အင်္ကျီလက်ကိုလှန်တင်လိုက်သည်။ ထိုအခါ ညာလက်ကောက်ဝတ်ပေါ်မှာ မွေးရာပါ အနီရောင်အမှတ်က ပေါ်လာလေ၏။ထိုအခိုက်တွင် ဖြစ်ပျက်သွားသော ထောင်ကျန်း၏အကြည့်ကို သူအဓိပ္ပာယ်မဖော်တတ်ခဲ့ပါချေ။ သူ ရှင်းရှင်းလင်းလင်း မှတ်မိနေသည်က ထောင်ကျန်း၏မျက်နှာမှာ ဝိုင်သောက်ထားသည့်အလား နီရဲနေပြီး မွေးရာပါအမှတ်နှင့် ယန်သောလဲ့၏မျက်နှာကို တစ်လှည့်စီ ကြည့်ရင်း မျက်လုံးများက ရွှန်းရွှန်းစိုစွာ ပါးစပ်မှ “ငါ့သား” ဟု တစ်တွတ်တွတ် ရေရွတ်နေခဲ့သည်ကိုပင်။
ယန်သောလဲ့က ရုန်းသေးသည်။ သို့သော် ထောင်ကျန်း၏ရေရွတ်သံကို ကြားသွားသည့်အခါ မျက်နှာက ထိတ်လန့်တုန်လှုပ်စွာ ဖြူဖျော့သွားပြီး နှုတ်ခမ်းများလည်း တုန်ယင်လို့လာကာ ရုန်းကန်ဖို့ကိုပင် မေ့လျော့သွားခဲ့သည်။
လုံခြုံရေးအစောင့်မှာ ဤလူတော့ စိတ်ရူးဖောက်သွားပြီးတွေးကာ ထိုနှစ်ယောက်ကို ခွဲထုတ်ရန် ကြိုးစားသည်။ ထိုအခိုက် ထောင်ကျန်းက လက်ကိုပြန်လွှတ်ပေးလိုက်သည်။ သူက ယန်သောလဲ့ကို ခြေဆုံးခေါင်းဆုံးကြည့်ရင်း ရုတ်တရက် လက်ညှိုးထိုးကာ ပြောသည်။
“ ငါနဲ့ခဏလိုက်ခဲ့။ ငါမင်းကို ပြောစရာစကားရှိတယ်…”
လုံခြုံရေးအစောင့်က ယန်သောလဲ့ကို သူ့အနောက်တွင်ထား၍ ကာကွယ်လိုက်ပြီး ထောင်ကျန်းအား ဒေါသတကြီး ပြောလိုက်သည်။
“ ခင်ဗျားက ထောင်ရှီးကို လာတွေ့တာမလား…။ သူ မကြာခင် ထွက်လာလိမ့်မယ်။ ဒီကျောင်းသားက ခင်ဗျားနဲ့ ဘာမှမဆိုင်ဘူး…”
ထောင်ကျန်းက စိတ်မရှည်လက်မရှည်နှင့် စီးကရက်တစ်လိပ်ကို ထုတ်လိုက်ပြီး ဒေါကန်စွာပြောသည်။
YOU ARE READING
လမင်းသော်တာ လှမ်းလို့လာ
PoesiThis is not my own story. English Title - The Moon is coming to me Author- Bo An Bian 泊岸边 Translator- IQ Team