كتب وموسيقى ✋ممنوع دخول الرجال

من سوالف اهلنا الطيبين

قصص  من بلادي

يكولك .. جان أكو فد خاتون كلش حلوة والبياض يلالي🥰   وذاك الحسن والشعر الطويل الناعم اسمها (زكية) بس عيبها
غوارة وأنفه .. رجلها (رزوقي) عنده بستان نخل شكبره أشكال  أرناك التمر بي🌴وميكدر يرفضلها طلب يحبها .. 
وجيرانهم (حمادي) عنده بستان توت (تكي)🌳
وجانو اثنينهم صدگان .. رزوقي ينزل التمر ينطي گوشر مليان تمر لبيت حمادي ، وهذا هم كلما يلمون التكي الابيض الحلو والاحمر الحامض ينطوه لجيرانهم ..
فديوم العصرية كاعدة زكية خاتون تحوك الچتاية نمنم بالسنارة وضايجة تأفأف وتخرخش بيدها بتوت الذهب
سألها رزوقي وهو ياكل مربى نگوع ويمطگ :
_ زكية عيوني ألويش لابسة وجه الچينكو عليه مو تدرين بيه احب ضحكتج تدغدغ گلبي😘

جان تعدل الگذيلة وتجاوبه بدلع :
_ لع أنت متحبني🥺 لو تحبني جان زرعتلي بالبستان تكي
شنو قابل بيت حمادي احسن من عدنه؟! بالسنة مرتين محصولهم واحنه النخل بالسنة مرة يطرح تمر !
قابل همه أزگن من عدنه🤨 يبيع بالسنة مرتين ويشتري لمرته العوبة حجولة والگردان ذهب ..

_ يازكية يا فص گلبي أنتي غير هذا رزق الله من وعينه النخل محصولة نوبة بالسنة مو جديدة !

_ يا فص سويتني فصيص😢تالي وياك تره أشمر روحي من التيغة😡 سهلة انت هم ازرع شجرة التوت بالبستان ويصير حظنه احسن منهم ومحصولنه تلاث مرات بالسنة يعني مرتين من التوت ومرة التمر

رزوقي صعدت عنده الحماوة🙄وكام يهتف :
_ عيني وماي عيني زكية من باجر اروح للولاية وأجيب احسن الشجرات بله حس بيت حمادي واله حتى الابريگ
اصوغه ذهب الج ..
وصدك زرع بنص البستان شجرة التوت وكبرت الشجرة بس  متطرح اي ثمر لأن طلعت الشجرة فحل😶 وكال :
_ هسه رضيتي طلعت فحل ومحصلنه من الحسد والحقد بس تعب وسنين تركض وخسارة فلوس ..  
فجاوبته بنگرزة دتغطي على حقدهه :
_ ليظل دماغك چتين😒اصلا شوف شكد حلوة الشجرة وبعدين انت ليش ضايج فحل التوت بالبستان هيبة !!

فيكولك صار بذاك الوكت مثل شعبي متداول (فحل التوت بالبستان هيبة) إييييه جبناها على مدري منو😬...