لو البُعد يجي على قد الاشواق كان شوقي تعدى بعدك وجابّك.

البارت ٦٧

ام بدر ناظرت زوجها وبدور وهزت راسها باسف ولفت على البنات وابتسمت:انكسر الشر روحو ارتاحو ياحبيباتي ماصار شي
البنات وقفو وهم يرجفون من عصبية بدر اول مره يشوفونه كذا
ام بدر ناظرت زوجها:عاجبك الي صار؟؟
ابو بدر يناظر القزاز الي متناثر وساكت
ام بدر ابتسمت بسخرية:معد صرت اعرفك يا عبدالرحمن موب انت الراكد العاقل الي يقول كلمة الحق صرت مختلف مو انت الي حبيته ووقفت وراحت لغرفتها
بدور ابتسمت بخفوت وسوت نفسها مسكينة:شفت ياخوي كيف يعاملوني ولدك وزوجتك كله من ذيك الحيه الي دخلت حياتنا ابوي بالاول والحين بدر الي حسبت ولدي وزوجتك الي ما اشوفها غير اخت لي ووقفت تطلع من غرفة الطعام وهي الابتسامة شاقه وجها
ابو بدر طلع جواله ورسل لهيام تعالي الكافيه ... الساعه ١١ استناك هناك ووصله رد هيام بعد عشر دقايق تمام👍🏾
ووقف يروح الغرفه بعد ماشاف العاملات يشيلون القزاز وينظفون
مكتب الجد هزاع
تركي ابتسم:ياجد احنا جاينك ومتعنين
الجد هزاع ضحك:وش متعنين توكم قدامي على الطاوله يالكذوب
غيث ومطر كاتمين ضحكتهم
تركي:مشى ياجدي كذا علوم قبايل وكذا يعني
الجد هزاع هز راسه:زين ياعلوم القبايل وش عندكم؟؟؟
مطر بتردد:ياجدي احنا جاينك بنفتح مشروع على قدنا ونبيك تساعدنا فيه
الجد هزاع:وش المشروع؟؟
مطر ابتسم:تبي نفتح مقهى ونحتاج راس مال الافكار موجوده والخطط كلها والاغراض لقينا محلات تبيعها بس ناقصنا الفلوس يعني
الجد هزاع هز راسه يفكر:اييه طيب بفكر وارد لك بس ابي ورق ابي اشوف كيف التخطيط حقكم
تركي طلع الورق الي سهرو عليه من امس وحطها قدامه:سم ذي كل المعلومات والتخطيط وكل شي احنا نبي الفلوس سلف يعني بنرجعها اذا وقفنا على رجلينا
الجد هزاع ابتسم وهز راسه:خلاص براجع الموضوع وانتو شوفو موضوع الرخصة وهذا الاشياء لازم يكون كل شي قانوني عشان توقفون على رجولكم صح
مطر ابتسم:ايه كلمنا شوي من الي نعرفهم ونشوف كيف نطلع ذي الامور بس قلنا نسالك اول وكذا
الجد هزاع ابتسم:على بركة الله ابدو بالاجراءات واذا خلصت ولقيتو المحل الي تبونه علموني عشان نروح البنك
مطر وتركي وغيث استانسو وقامو حبو راسه وطلعو طايرين من الفرحة انه بيكون لهم شي يشغلون نفسهم فيه وطلعو للمجلس يكملون شغلهم ماستغربو من الهدوء الي بالبيت عشانهم تعودو انه الكل يروح دوامه الحين
نروح لبدر وصقر ومناف الي كلهم راحو بسيارة وحده رغم عدم موافقه بدر بس ركبو
مناف يشوف يد بدر مدميه:تروح المستشفى؟؟
صقر لف على يد بدر:بدر رح المستشفى
بدر مارد عليهم ويسوق
صقر رفع جواله وحط السبيكر:الو
:اهلين صقر
بدر لف علي الصوت وهدا من سرعته
صقر ابتسم:هيام وينك؟؟
هيام استغربت:بشغل توني طلعت وش فيه؟؟
صقر ناظر بدر كيف هدت اعصابه:لا بس اسال ماشفتك اليوم وقالو انك نايمه
هيام بشك:وش صاير؟؟
صقر ناظر بدر يقول لها وهز راسه بلا:مو صاير شي
هيام بتاكيد انه فيه شي بالاول ابو بدر يطلبها خارج البيت والحين صقر يدق عليها :صقر وين بدر؟؟
بدر تكلم يطمنها:هنا معاه مافيه شي
هيام ارتاحت:اوك خلاص بخلص شغله وارجع تمام؟؟
بدر عقد حواجبه:ماخلص شغلك؟؟
هيام:خلص بس ذا موضوع خارجي
بدر :تبين اجيك؟؟
هيام:لا بيخلص بسرعة وارجع اذا خلصته كلمتك
بدر ابتسم:انتبهيلك
هيام ابتسمت:ان شاء الله وانت بعد وقفل
صقر لف على مناف:عرفنا نقطة ضعف اخوك
مناف ضحك وهز راسه:ايه
بدر ابتسم:هذي مو نقطة ضعف هذا حب ياجاهل انت وياه وين تبون نروح؟؟
مناف وصقر بصوت واحد المستشفى
بدر ضحك:ابشرو وتوجه للمستشفى عشان يشوفون يده ونزلو
بدر راح للاستقبال:لو سمحت ابي اعالج يدي ورفعها
حق الاستقبال انصدم من منظرها:تفضل الطواريء ودخلو وجاء الدكتور على طول
الدكتور ببتسامة:عسى ماشر متهاوش انت والمدام
بدر ابتسم:لا والله ضربت يدي بطاولة و هثنين غثوني نروح المستشفى يشوفونها
الدكتور صار يفحصها:لا ان شاء الله مافيها شي نسوي لها اشعه ونشوف وش الاجراءات
بدر ابتسم:تمام واخذوه للاشعه وجلسو ساعه لين تطلع النتيجة
بدر لف عليهم:انا اذا سمعت كلامكم ثاني مره اجلدوني
مناف وصقر ضحكو
ودخل الدكتور:لا الحمدالله مافيه اصابات بالاعصاب ولا الاوتار بس فيه شعر بسيط وبنجبرها حق اسبوع او اسبوعين
بدر:دكتور عرسي بعد اسبوعين لو ما فكيتها بالاسبوعين الجاي كم بتجلس؟؟
الدكتور ابتسم:لا ان شاء الله من ١٠ ايام ل١٤ يوم بالكثير وانت شايلها ان شاء الله
بدر هز راسه:شكرًا دكتور
الدكتور ابتسم:العفو هذا شغلي بقول للممرض يجي يجبرها لك وبنحط لك موعد بعد ١٠ ايام
بدر ابتسم:تمام وطلع الدكتور
صقر ناظره:الحين كيف بتقول لهيام؟؟
بدر صار يفكر:عادي اقول طحت عليها
مناف ضحك:وش انت نسيت انك كسرت الطاولة قدام البنات؟؟
بدر حط يده على جبينه:يووه ما اقول غير حسبي الله عليك ياعمه بدور ودارين
صقر ابتسم:عادي عادي تعيش وتاكل غيرها
بدر ناظره بطرف عين:ياشينك ياشيخ
ضحك مناف ورفع جواله يرسل كيفك؟؟
سيرين كانت مرعوبه وردت عليه وش تتوقع؟؟
مناف رسل لا تخافين من شي وانا معاك
سيرين ابتسمت بسخرية ورسلت هذا اكثر شي يخوفني انك معاي شافته مارد ورسلت لو سمحت لعد ترسل لي وقفلت جوالها
مناف قفل الجوال ومرت نص ساعة وطلعو من المستشفى وساق صقر بدال بدر عشان يده
نروح للكوفي الي فيه ابو بدر وهيام
هيام تقدمت لطاوله وجلست:السلام عليكم
ابو بدر ناظرها:وعليكم السلام بدخل بالموضوع على طول
هيام استغربت:تفضل
ابو بدر بحده:كم المبلغ الي يطلعك من بيتنا؟؟
هيام رفعت حاجبها:كيف يعني؟؟
ابو بدر ابتسم بسخرية:كلنا عارفين انك جايه عشان الفلوس كم المبلغ الي يخليك تبعدين عن ولدي وعايلتنا؟؟
هيام طلعت جوالها وفتحت حسابها البنكي وحطته قدامه:تتوقع ابي فلوسك ولا فلوس ولدك؟؟
ابو بدر ناظر المبلغ وانصدم
هيام ابتسمت:هذا اقل مبلغ بصرفاتي كلهم وشف كيف تغير وجهك انا اقولك يابو بدر اذا كنت منتب مرتاح لوجودي قل لولدك بدر يطلقني بس لا تتوقع اني اختفي عشان مبلغ او فلوس ولو سمحت معد يكون بيننا اي حوار الا اذا فيه بدر لانه اتقرف منك صرت ووقفت وطلعت من الكافيه
وابو بدر صار يناظر كرسيها ورفع جواله:ابيك تدور على عايلة هيام بنت تركي باسرع وقت وقفل
بسياره بدر
مناف ناظر الكوفي:خلنا ناخذ قهوه لنا وللبنات
صقر ببتسامة:لنا وللبنات ولا للمدام؟؟
مناف ابتسم:كلهم
بدر ضحك:ماتوقعت اخوي خروف
مناف ناظره:خف علينا من اليوم معصب يوم سمعت اهلين ذبت
صقر مات ضحك عليهم
بدر عطاه نظره:وانت استنى دورك بيجيك الدور بعد
صقر تذكر سماء وتنهد وهمس:يارب ووقف عند الكوفي
مناف عقد حواجبه:هذي هيام؟؟
بدر لف على الي يقصدها:ايه والله ونزل لها هيام
هيام لفت على الي يناديها:بدر؟؟
بدر ناظرها ولف على الكوفي:وش تسوين هنا؟؟
هيام توترت انه يشوف ابوه:جيت اخذ قهوه وشربتها وخلصت كم ورقة
بدر ابتسم وهز راسه:ايه زين ترجعين معانا؟؟
هيام ابتسمت:ايه يلا
مناف وصقر دخلو يطلبون
مناف عقد حواجبه:هذا ابوي
صقر لف عليه:انت وش فيك هذا وهذا ولف على الي يقصده ايه والله نروح؟؟
مناف تقدم:يبه؟؟
ابو بدر خاف انهم سمعوه:نعم؟؟
مناف لف على بدر وهيام الي عند الباب:جاي مع هيام؟؟
ابو بدر ارتاح انهم ماسمعوه:لا ماشفتها بعد بعد عندي شغل بروح البيت ومشى وتركهم مصدومين
صقر لف على مناف:ابوك بدا يخبط
مناف عطاه نظره وراح ياخذ الطلب حقهم وطلع ولحقه صقر معاه الدفعه الثانيه
وركب صقر ومناف قدام وهيام وبدر ورا
هيام ناظرتهم:وش مطلعكم الحين ماعندكم دوامات؟؟
مناف:والله البركه برجلك
هيام لفت على بدر:وش فيك؟؟
صقر ابتسم:انا اقولك الي جنبك ذا خبط طاوله الاكل وتكسرت وانكسرت يده
هيام شهقت ولف على بدر الي يرسل نظرات حاده لصقر:صدق ذا الكلام؟؟
بدر ابتسم لها يهديها:مو كسر شعر فيه فرق
هيام بخوف عليه:ان شاء الله مخش ليش تسوي كذا صاحي انت لو صار بيدك شي او نزفت لا قدر الله وش اسوي انا بحياتي ما اقدر اعيش بدونك بدر
بدر وصقر ومناف مصدومين انها صرحت كذا انها ماتقدر تعيش بدونه
هيام استوعبت:قصدي وسكر فمها بدر وقال حلفتك بالله تخلينها نفس ما سمعت ولا تعدلينها اذا عندك تعديل
هيام ناظرت ومسكت يده المجبرة وشال يده عنها:تعورك؟؟
بدر يناظر عيونها:لا والله كان اول يعورني بس الحين اختفى
صقر يستهبل:احس بستفرغ
وهز راسه مناف:وانا معاك وضحكو
هيام ناظرت صقر :انا اقول ياصقر سماء وشددت على الاسم اليوم صافيه صح
صقر ارتبك انها تعرف:ايه ايه صح
بدر استغرب تغير صقر:وش فيك ياصقر؟؟
صقر هز راسه:لا ابد مافيني شي
هيام لفت على مناف:سمعت حماتك ماتحبك تبيني ازيد النار حطب واخلي العرس السنه الجايه؟
مناف لف جسمه كله عليها:الله يرحم والديك خليها نفس ماهو محدد لاني ماصدقت على الله ترضى
بدر ضحك:خرووف
هيام ناظرته بحده:وانت لاتسوي نفسك طالع منها حركتك الغبيه ذي بتتحاسب عليها بس مو قدامهم عشانك كبير مابي يضحكون عليك
بدر ابتسم:ابشري تعالي اي وقت لغرفتنا وحاسبيني مره مرتين ثلاث متى ما طاح الي براسك من الحساب انا بزيدك حساب عشان ماتطلعين من الغرفة
هيام استحت انه مناف وصقر يسمعون كلام بدر ولفت راسها لدريشه وحطت يدها على جبيرة بدر تحسبه انه ماشافها بس ابتسم يوم شاف يدها تتسحب لين جبيرته
مناف تذكر ابوه:صح هيام انتي شفتي ابوي بالكافية؟؟
هيام توترت وانتبه بدر:لا ماشفته ليش كان موجود؟؟
صقر ابتسم:ايه شفناه وعصب علينا وطلع
هيام هزت راسها:اووككك لا ماشفته
بدر رفع حاجبه عرف انها تكذب بس ليش مايدري وصار يتاملها وهي تفكر ولافه لدريشه وصلو البيت بنفس الوقت الي وصل فيه ابو بدر ورمق هيام وهيام سوت نفس الشي ومشت تدخل
وقف بدر وصقر ومناف بعد الموقف
بدر استغرب:وش فيهم ذول؟؟
مناف:مدري بس اتوقع صار بينهم شي بالكافي
صقر بستهبال:تخيل قال لها تطلع من بيتنا
بدر لف عليه وجلس يفكر بكلام صقر:يلا انا بدخل تبون شي؟؟
صقر هز راسه وابتسم:لا سلامتك ودخل بدر ورا هيام
مناف ابتسم:يلا نودي القهوه
صقر رفع جواله:لا بدق على نجد تاخذهم
مناف هز راسه:لا لا انا اوديها
صقر:قل عشان تشوف المدام تبي توديها
مناف ابتسم:والله ودي اشوفها بعد الي صار
صقر ابتسم:رح نجد تقول انهم بغرفتها بس سيرين راحت غرفتها
مناف استانس انها لحالها:تمام واخذ قهوه وحده ومشى
صقر ناظر الكاسات:ياكلب انا بشيل كل ذا؟؟
مناف ضحك وهو يمشي:ايه
صقر ابتسم وشال شوي ودخله المطبخ ورجع شال الدفعه الثانيه وحدها بالمطبخ ورسل لنجد تعالي المطبخ
بغرفة سيرين كانت تشوف كيف ترتب الكوشة لانه قالت لامها يجون بس شوي من صديقاتك عشان تراضي امها وامها رضت تعزم بس صديقاتها الي برياض
سيرين تاففت وتكلم نفسها:ياربيه انا وش خلاني اوافق استغفرالله ولفت على الباب الي يطق وقالت طيب اصبر واخذت شالها وفتحت الباب
مناف استغرب انه عرفته:كيف؟؟؟
سيرين عقدت حواجبها:وش الي كيف؟
مناف ناظرها لابسه الشال:كيف عرفتي انه انا
سيرين:عرفت لاني قلت لا ترسل قلت اكيد بيجي
مناف ابتسم:يعني انتي كنتي تبيني اجي؟؟
سيرين ناظرته وابتسمت بسخرية:ايه مره ميته على جيتك
مناف ابتسم:باخذها انك تبين جيتي صدق مو سخرية
سيرين هزت راسها:تمام تبي شي ثاني؟؟
مناف مد قهوه وكوب
سيرين:وش ذي؟؟
مناف ابتسم:قهوه عشان تروقين وتخططين زين كيف بيكون عرسنا والكوب عشاني كسرت حقك بالمزرعة يوم سباق بدر وهيام اذا تذكرين
سيرين هزت راسها:اووك بس انت قلت بتجيب لي عشره هذا واحد باقي تسعه
مناف مبتسم:ايه التسعه الباقي تلاقينهم بمطبخنا الخاص بجناحنا
سيرين توترت ماتدري ليش:اوك وسكرت الباب بوجه مناف الي ضحك بخفوت وقال بتجنني والله
عند هيام كانت بتفتح باب الغرفة بس سحبها بدر ولفت عليه خايفه:وش؟؟
بدر ابتسم:تعالي معي وشد على يدها وسحبها معاه لين الغرفه
هيام وبضحك:من كثر مادخلت الغرفة ذي قبل العرس بيصير شي شين
بدر لف عليها بحده:مو صاير شي ان شاء الله لاتقولين ذا الكلام
هيام ابتسمت:ان شاء الله وشفيك؟؟
بدر ناظرها:انتي شفتي ابوي ابي الحقيقة؟؟
هيام تنهدت:لا ياخي ماشفت ابوك
بدر رفع حاجبه عارف انها تكذب:هيام
هيام ناظرت عيونه ولفت على طول
بدر تنهد:وش قال لك؟؟
هيام هزت راسها بنفي
بدر رفع يده وحطها على دقنها ورفع راسها:هيام
هيام ناظرت عيونه وهمست:بتكرهه
بدر ابتسم:مراح اكرهه علميني وش قال
هيام :قالي قولي المبلغ الي تبينه عشان تبعدين عن بدر وعننا
بدر انصدم من ابوه وانه كلام صقر صدق:عرض عليك مبلغ؟؟
هيام هزت راسها:ايه بس رديت عليه وقلت له من اليوم ورايح انت بنسبه لي ابو بدر غير كذا ماعندي
بدر عصب وكان بيروح لابوه ومسكته هيام وقالت:بدر لا تروح
بدر معصب:كيف يقولك تبعدين عني من سمح له يتحكم بحياتي ويدخل من يبي ويبعد من يبي لا ويعرض مبلغ يبي يشريك
هيام شدت ذراعه:بدر خلاص راح الموضوع لاتخرب علاقتك بابوك
بدر بعصبية زياده انها ماتبيه يخرب علاقته:بس علميني من سمح له يبعد البنت الي احبها عني
هيام بصدمة:بس مو انا الي تحبها
بدر صرخ فيها:هيام استوعبي انا احبك وابوي يبي يبعدك عني
هيام مشت لين الباب وطلعت من الغرفة بصدمة وراحت للمجلس الي فيه العيال وكان فيه العيال كلهم وابو صقر
هيام ناظرتهم:ابي مفتاح
ابو صقر ابتسم:هلا ابوي مفتاح البيت قصدك مفتوح الباب ادخلي
هيام ناظرت مطلق:ابي مفتاح سيارتك القديمة
مطلق استغرب:ليش؟؟
هيام ناظرته:ابيه ومده لها واخذته وتوجهة لسياره ولحقها ابو صقر وناداها ولفت
ابو صقر عقد حواجبه:وش فيه صاير شي؟؟
هيام هزت راسها:لا بس نسيت شغله وبروح اجيبها
ابو صقر بتشكيك:تبين اجي معاك؟؟
هيام تبي تركب وبس:تفضل
ابو صقر ركب جنبها وحركة السياره لنادي ووقفت
هيام لف عليه:تبي السياره انا يمكن اطول
ابو صقر استغرب من المكان:بنزل معاك اذا عادي
هيام هزت راسها ونزلت ونزل معاها ابو صقر ودخلت وكانت كل مامر من عندها احد يدق لها تحيه وزاد استغراب ابو صقر ودخلو مكتب
هيام ابتسمت:خذ راحتك بالمكتب واذا تبي تشوف النادي تفضل واذا احد قالك شي قل انك معاي
ابو صقر مصدوم من الي قاعد يصير وش ذا النادي وش ذول الناس ليش يدقون لها تحيه وش صاير مايدري
هيام:اذا تبي تطلب اي شي هذا التلفون اضغط رقم واحد واطلب منهم وخلهم يجيبونه مكتبي
ابو صقر لف عليها:وين احنا فيه؟؟؟
هيام اخذت نفس:هذا مكتبي بخلص شغلي وارجع واذا طولت اسال عني بيدلونك وهز راسه وطلعت هيام
هيام راحت غرفة الملاكمة وغيرت ملابسها وطلعت تلاكم كيس الملاكمه ومشغول تفكيرها بالي صار اعتراف بدر لها وابوه مايبيها والي صار الفجر
| فلاش باك للفجر |
هيام طلعت من البيت وتوجهت لسياره الي تستناها وركبتها وحركة لمكتب العميد ابو بندر
العميد جالس يرتب اغراضه لانه بيطلع من المكتب بيرجع البيت وسمع دقت الباب:تفضل
هيام دخلت:السلام عليكم سيدي
العميد بخوف:هيام وش تسوين هنا بهاذا الوقت
هيام ابتسمت:جايه ابي شغله
المعيد:اجلسي اجلسي
هيام جلست:سيدي اكيد عرفت قضية هزاع ال هامي
العميد هز راسه:ايه وصلني والله قضيته مو سهله
هيام :سيدي احس انها توريط
العميد عقد حواجبه:كيف يعني؟؟
هيام:انت قريت الملف صح؟
العميد طلع الملف:ايه هذا هو
هيام اخذت الملف وصارت تقراه ووصلت عند ورقه:هذي الورقه غير مو نفس الي عندي ومدت الملف الي كان معاها
العميد اخذه:وش تقولين انتي وصار يقرا وعقد حواجبه ايه فيه معلومات ناقصة عندك من عطاك الملف؟؟
هيام ناظرت عيونه:الامير ناصر
العميد بصدمة:الامير ناصر صاحيه انتي؟؟
هيام ناظرته:مابي اشك فيه بس كل الادله ترسلنا له
العميد وقف وراح للكرسي الي قدامها:هيام انتي تتكلمين عن امير
هيام ابتسمت:ادري ولفو على دقت الباب وقالت تفضل
العميد مصدوم ولف على الي دخل ووقف يوم دخل الامير ناصر
هيام وقفت ودقت تحيه:سموك تفضل
الامير ناصر ببتسامة:وش قلتي له اني المجرم
هيام ابتسمت:ايه للحين مصدوم
العميد يناظرهم:وش تقولون انتم يعني تعترف صدق
الامير ناصر ضحك:لا مو انا المجرم حتى انا شكيت معاها فيني
العميد ناظر هيام:طيب من المجرم؟؟
هيام ناظرتهم:المجرم بمكتب الامير ناصر محد يقدر يوصل للاوراق والمعلومات ذي الا شخص قريب وبالمكتب
العميد ناظر الامير ناصر:قصدك السكرتير
الامير ناصر هز راسه
العميد:خلاص نمسكه ويعترف
هيام هزت راسها:لا هو يبي يطيح الامير ناصر والجد هزاع بس ليش للحين ماعرفنا
الامير ناصر:لازم نعرف باسرع وقت لانه موعد المهمه قاعد ينتهي وناس مراح تستنى مجرم بهذيك الفظاعة يكون طليق
هيام ابتسمت:يعني اذا اثبتنا انه السكرتير هو ورا كل ذا راح يطلع الجد هزاع برىء؟؟
الامير ناصر هز راسه:ايه لانه يكون ماله ذنب بذا كله
العميد يشوف كيف ارتاحت انه بيطلع برىء ويقول بينه بين نفسه انه نفس الشخص الي ضيق على امك وابوك حياتهم وسجنهم بظلمه وكلام الناس وتنهد
هيام لف على العميد:عندكم افكار؟؟
العميد ابتسم:ايه نروح نفتش مكتب الامير ناصر عشان يحس انه انتصر وبنحط مايك بمكتبه وبمكتب الامير ناصر اكيد من الوناسه بيزل وينفضح
هيام هزت راسها:تمام تبون نمشي الحين
الامير ناصر وقف ايه يلا وراحو المكتب مع عسكر ثانين ويفتشون المكتب وحطو المايك بشكل خفي
الامير ناصر مسوي معصب:وش انتم ماتعرفون من انا؟؟
العميد ناظره بحده:الا نعرف انت مجرم متعاون مع هزاع ال هامي بالجريمه البشعة ولف على العسكر امسكوه وراحو يمسكونه هذا كلها خطه عشان يفضحون السكرتير
هيام ناظرت السكرتير كان مبتسم على جنب كانه خطته قاعده تنجح
ورفعت جوالها وعقدت حواجبها انه ابو بدر راسل لها ورسلت تمام👍🏾 وقفلت جوالها ورفعته ثاني مره على اتصال صقر وطلعت تكلم برا ورجعت دخلت
هيام عين على السكرتير وعين على العميد:سيدي مسكو هزاع ال هامي ويحققون معاه
الامير ناصر والعميد استغربو بس عرفو انه جزء من الخطه
العميد ابتسم:ايه هذا مصير الي يسوي جرائم يحسب بينفذ منها وسحب الامير ناصر معاه وهيام طلعت وركبو السياره الي كان فيها اجهزه توصل للمايك الي زرعوه بالمكتب وجلسو يسمعون
بالمكتب
السكرتير يضحك بصوت عالي:اخيرا افتكينا منهم خلني اكلم امي واتصل على امه وحطها سبيكر
امه:هلا وليدي وش فيك؟؟
السكرتير بضحك:يمه خلاص افتكينا من الي قتلو ابوي يمه رسلتهم لسجن بيعفنون فيه
امه شهقت:ليش سويت كذا ياخالد ابوك شهيد مات بمهمه مالهم ذنب مالهم ذنب ابوك هو الي وافق
السكرتير بعصبيه:لو ما ارسله ناصر ذا كان ماراح كان ماصرت يتيم الاب بسببهم وهزاع لانه قال لابوي يشتغل ذي الشغله هو الي جاب له هل وظيفه الي خسرته حياته وخلتك ارمله وانا واختي يتامى كلهم الحين بيعفنون بسجن وهزاع بينحكم بالقصاص لانه المعلومات الي انا حاطها توديه ورا الشمس مراح يشوف الشمس بحياته
الام تبكي:يا خالد الي سويته خطا لا انا ولا ابوك بنرضى عليك ابوك هو الي قال لعمك هزاع يتوسط له هو الي حاب الشغله ذي يمه بتضيع حياتك وبتضيعنا معاك انا واختك
السكرتير بعصبيه:يمه لاتدافعين عنهم لاتكذبين عشانهم
امه تبكي:والله يا يمه ما اكذب ابوك هو الي قاله
السكرتير لف على الي واقفين على الباب
العميد:خالد انت متهم بتزوير معلومات وتضليل رجال الامن ولف على العسكر امسكوه
السكرتير بصدمة:ماعندكم دليل كيف تمسكوني
هيام شغله تسجيل اعترافه وصرخ زيفتو صوتي
العميد:تفضل معانا
السكرتير يكلم امه الي تبكي:يمه لا تبكين باخذ حق ابوي منهم الحين ولا بعدين حق ابوي مراح يضيع
امه تبكي:قلت لك يمه ابوك يبي ذا الشغل شف وش سويت بنفسك وقفلت واخذت هيام جواله واخذوه الشرطه معاهم
هيام لفت عليهم ببتسامة:كذا خلصت مهمتي
العميد ابتسم:تقدرين تطلعين من بيت ال هامي الحين
هيام تلاشت ابتسامتها يوم تذكرت انها بتترك بدر
الامير ناصر لاحظها:كيف تترك بيت ال هامي وهي متزوجه ولدهم ولف عليها انتي وش تبين تبين تروحين لامك ولا تجلسين هنا؟؟
هيام:ابي اجلس هنا
العميد:بس امك
هيام ابتسمت بضيق:وينها لا ترد على ولا تكلمني حتى عرسي يوم الخميس الي بعد أسبوعين مدري اذا بتجي ولا لا
العميد ابتسم بحنيه:اكيد زعلانه انك تزوجتي كذا بدون علمها بترضى ياهيام اكيد
هيام ناظرت الساعة:عن اذنكم عندي موعد ثاني لازم اروح له
الامير ناصر والعميد:اذنك معاك ودقت التحيه لهم وطلعت تقابل ابو بدر
|نرجع للواقع|
هيام كانت تلاكم ومو حاسه بالي حولها الي يحاولون يخلونها توقف بس ماتسمعهم غارقه بتفكير
ابو صقر ركض لها بعد ما جاء له واحد يعلمه بحاله هيام:هيام
هيام لفت على الصوت:عمي عبدالعزيز وش جابك هنا؟؟
تقدم ابو صقر ومسك يدها وطلعها من القفازات وشاف يدها كيف تغير لونها للون الدم:ليش ليش تسوين بنفسك كذا وش فيك ياهيام ووش ذا المكان؟؟
هيام توها تستوعب انها جابته معاها وناظرت يدها:كم لي؟؟
ابو صقر ناظر ساعته: الحين ٦ المغرب
هيام عقدت حواجبها انها من الساعة ٣ وهي بنادي لهدرجة بدر اثر فيها واعترافه كيف الحين بتقول له انه خلصت مهمتها ويمكن يطلبونها باي مهمه
أبو صقر لاحظ سرحانها:هيام خلنا نطلع من هنا
هيام مشت معاه بعد ما اخذ عبايتها واغراضها من الموظف وطلعو من النادي وركب هيام جنبه وساق هو لين المستشفى يعقمون جروحها ونزلو ودخلو الطوارئ
ابو صقر لف على الممرض:لو سمحت ممكن تكشف على يدها
الممرض تقدم ومسك يدها ويشوفها سرحانه مو معاهم ابد:لو اوجعك علميني ماردت ولف على ابو صقر الي رفع كتفه بمدري
ابو صقر رفع جواله كان فيه اتصالات من بدر بس مارد ودق عليه
بدر رد بسرعة:قول هيام معاك
ابو صقر تنهد:معاي معاي
بدر ارتاح بس مو كثير لانه صوت ابو صقر مو مطمن:...

تفاعلو حبايبي😢🤍
(احمال اخذ يومين راحه للدراسة)🤍