اسكريبت كانت الصدفة حياة ♥️

البارت الخامس (الخطوبة ج١)

انا: و يا دبلة الخطوبة عقبالنا كلناااا .. ونبني طوبة طوبة في عش حبنا .. لا نبني ايه انا مفرهدة اصلاً, انا هستلم متشطب جاهز
كنت عمالة اتحرك يمين شمال وانا بغني بفرحة وأعلق على اغاني الخطوبة المعروفة اللي مفيش خطوبة في مصر تخلو منهم لما سمعت ماما بتقول
ماما: يا بنتي اقعدي شوية ثابتة وبطلي تنطيط زي الفرقع لوز كدا خلي هبة تعرف تخلص الميكب
قالتها ماما وهي بتبص لـ هبة بنت خالتو اللي صممت تطلع روح الفنانة اللي جواها يوم خطوبتي وتعملي الميكب بنفسها .. اوعوا تكونوا فاكرين اني فضلت ازن عليها اسبوع كامل علشان تعمل حسابها اني مش هتخطب غير لما هي تتولى اللمسات الفنية البسيطة اللي قمر زيي مش محتاجاها اصلا بس حبة روچ خفيف على سحبة ايلاينر مايضروش يعني .. بصيت لـ هبة اللي كانت كاتمة ضحكها على عمايلي اللي مش عمايل واحدة خطوبتها النهاردة خالص وروحت قايلة وانا بشوح بإيدي كدا
انا: انا مش بعرف قعد ساكتة لازم اضيف جو .. ها عاجبكم ولا اروح وافركش الخطوبة؟
غرام: فركشي الخطوبة
انا: نعم؟!
غرام: فركشيها لو جدعة
قالتها غرام وهي بتبصلي بصة فيما معناها اني لو فكرت بس اعمل حاجة زي كدا هي عارفة وانا عارفة وانتم عارفين ان مراد هيعلقني على باب القاعة او هيحدفني في النيل أيهما اقرب خصوصاً بقا إن الحب بدأ يولع في الدرة بينا وفيه شوية مشاعر كدا صغننة سكنت العضو المهزأ اللي في الشمال دا واللي طبعاً حكيت لغرام عليها باعتبار إن الاخت سر اختها بس مع الاسف مع الألم طلعت واطية وبتذلني دلوقتي .. بصيت لـ هبة وقولت بهدوء
انا: سيبك منهم يا هوبا وكملي .. بس شغليلي حاجة الاول الله يخليكي ولا اقولك استني .. شغلي انتي يا روما حاجة من البلاي ليست اللي جهزتيها وحياتي عندك
ابتسمت غرام واتحركت ناحية موبايلها وثانيتين وصوت شيرين كان في الاوضة معانا ومش محتاجة اقولكم اني برضو فضلت اتحرك وانا بغني معاها بفرحة
انا: يعاملني بطيبة وإحساس .. يدلعني قدام الناس .. بيعرف إني رومانسية .. بيلعب ع الوتر الحساس
مر الوقت بسرعة وشوية ولاقيت دعاء وطنط آمال داخلين الاوضة اللي إدارة القاعة اللي حجزناها بتكون مخصصها للعروسة علشان تجهز قبل الخطوبة او الفرح .. ناس ذوق والله .. طبعاً مش محتاجة اقولكم إن اول ما شافوني انبهروا بجمالي .. بجد ربنا يحرسني .. أما بقا الزغاريط فملت الأوضة بطريقة تخطف القلب حرفياً .. وشوية تانيين ودخلت منى او زي ما بحب أناديها مني .. بنت خالتو برضو بس خالتو تانية .. ركزوا معايا علشان عيلتنا تتوه شوية .. المهم يعني اخدت من ماما طقم الشبكة وابتدت تحطه على صينية الشبكة اللي عملتهالي مخصوص باللون الاسود اللي بيلمع بلمعة بسيطة كدا واسمي انا ومراد مكتوبين عليها باللون الدهبي .. بذمتكم شوفتم جمال كدا .. احنا عيلة مبدعة اصلاً .. بس بجد كانت احلى مما تخيلت وعيني طلعت قلوب لما شوفتها زي توم وچيري وقولتلها بفرحة
انا: تحفة يا مني .. تسلميلي يا رب يا حبي
منى: حبيبتي يا نينو .. عقبال الفرح يا رب يا قلبي
ماما: عقبال ما تفرحي بولادك يا حبيبتي
قالتها ماما وهي بتطبطب على كتف منى قبل ما تبصلي وتقولي
ماما: يلا بقا يا بنتي الواد زمانه خلل برا
دعاء: هو خلل بعقل دا كان عايز يدخل ياخدك من الاوضة بنفسه بس انا قولتله يسيبلي انا وماما المهمة دي ويكمل هو وبابا وعمو استقبال الناس
هبة: انا خلاص خلصت والطرحة اتظبطت كمان أهو
قالتها وهي بتعدل الطرحة الستان البيبي بلو اللي بقالها ساعة مغلبانا علشان تظبط
انا: تحفة يا هوبا تسلميلي يا رب يا قلبي
قولتها وانا ببص في المرايا على الميكب الرقيق اللي عملتهولي والطرحة اللي لفتها لفة بسيطة ماشية مع الفستان اللي من نفس لون الطرحة واللي منفوش بخفة خلتني احس اني هربانة من ديزني سيكا
هبة: حبيبتي يا نينو عقبال ما اعملك ميكب الفرح يا حبيبتي
قالتها وهي بتتحرك ل برا الاوضة ووراها منى اللي سلمت صينية الشبكة لغرام وخرجت هي كمان والزغاريط مكملة برضو .. أحلى عيلة دي ولا ايه .. دقيقتين وخرجت طنط آمال بعد ما قربت مني ولاقيتها بتحط ايدها بحنان على راسي و بتقرأ المعوذتين علشان تحميني من الحسد .. بصيت في المراية ولمحت ماما اللي وقفت في ركن في الاوضة والمشاكسة اللي كانت فيها اختفت وعينيها لمعت بدموع وهي بتبصلي بتأثر خلت عيني انا كمان تدمع ودمعة تهرب من عيني لحقتها بسرعة وانا بقول
انا: جرا ايه يا ست ماما .. فيه حد يعيط في خطوبة بنته .. على فكرة لو عايزة تفركشي الخطوبة قولي عادي .. كله إلا رضا الوالدين دا أهم من رضا البحراوي
فلتت ضحكة من ماما وقربت مني وهي بتقول
ماما: مش قادرة اصدق انك كبرتي والنهاردة خطوبتك يا قلب أمك .. ربنا يكملك على خير يا بنت عمري
انا: وما يحرمني منك يا ست الكل
قولتها وانا بمسك كف ايديها وببوسه بكل الحب اللي جوايا ل ست لو اقدر أديها عمري هيكون شوية عليها .. طبعت بوسة طويلة على راسي وخدتني في حضنها شوية .. انتبهت لهمس جنبنا وطبعاً دول كانوا غرام ودعاء
دعاء: دي حاجة مؤثرة جداً
غرام: ربنا يستر ماما احمرت اكتر وشكل الليلة هتقلب نكد
ماما: كان نفسي ننا وخالتك سومة يكونوا معانا
غرام: مش قولتلك
قالتها غرام بهمس لدعاء وانا بصيت لماما وعيني دمعت اكتر وانا بقول
انا: ربنا يرحمهم
ماما: تخيلي لو كانوا شافوكي
طيب دلوقتي يا جماعة الست دي بتقول كلام ماينفعش يتقال في الخطوبة وهذا غير لائق .. انا بنسحب لأن الليلة قلبت نكد .. إلغي رحلتشي
غرام: جرا ايه يا ست ماما هتقلبوها نكد ليه بس .. وبعدين ما هما معانا وزمانهم فرحانين معانا .. بلاش تزعلوهم بقا وادعولهم ربنا يرحمهم
قالتها غرام وهي بتحاول تلحق الليلة قبل ما تبوظ .. كلنا دعينا في نفس واحد ليهم وقرينا الفاتحة وابتدت غرام ودعاء يفرفشوا ماما شوية ويفرفشوني شويتين .. دقيقتين ورجعت الضحكة على وشونا من تاني وخرجوا كلهم وسابوني لوحدي في الاوضة لدقيقة زي ما طلبت منهم .. بصيت لنفسي في المراية وانا باخد نفس عميق بحاول اهدي بيه نفسي .. انا داخلة مرحلة جديدة من حياتي .. منعطف تاريخي يا فندم .. انا هتخطب! .. هيكون عندي شخص في حياتي احب فيه وانكد عليه .. شخص بعد كام شهر إن شاء الله هيكون زوج ليا وأب لولادنا في المستقبل .. اللعبة كبرت ولا ايه .. ماينفعش ارجع في كلامي .. اصل يعني الواحد فاضله مرحلة واحدة وهيقابل الوحش ... سمعت صوت مسدچ وصلت لموبايلي .. مسكت الموبايل وكانت منه .. قريتها بعيني وانا ابتسامتي مرسومة على وشي
"اعطيني يدكِ؛ ليقولوا أتى والشمس بيمينه"
والنبي فيه وحش قمر كدا .. قولتها لنفسي وانا بقف واتحرك لباب الاوضة وانا حاسة براحة .. حاسة اني مش خايفة .. حاسة اني مبسوطة وقلبي .. بيرقص
فيه نصيب وبيتشال لينا .. مِش حب كلام في أغاني
فبنقفل بابنا عَلِينا .. نستنى النص التاني
كان صوت نداء شرارة حولينا بالأغنية دي وانا قاعدة جنبه في الكوشة بتاعة الخطوبة وورانا جملة " Just Engaged " كنوع من تمسكنا بالعادات والتُراث المُعتاد زي بالظبط اغنية شادية " يا دبلة الخطوبة " اللي أول ما دخلت القاعة مع بابا ابتدت تشتغل .. معروفة خطوبة يعني شادية
انتبهت لمراد اللي مال عليا شوية وهمسلي بنبرة غزل
مراد: شكلك زي القمر
طبعاً انتم متوقعين اني اتكسف ووشي يحمر زي البنات العاديين يعني واقلب چيلي بالفراولة وخدودي تطرح طماطم بس احب اقولكم لأ .. انا اتغيرت خلاص .. بهجت جديد بيتولد .. بصيتله وقولتله بكل غرور
انا: ما انا عارفة
مراد: أحبك وانت واثق من نفسك
قالها بغمزة خلتني في ثانية هوب دبل كيك وشي بقا فدادين طماطم ورجعت في ثانية لحنين القديمة .. اين الثبات عالمبدأ أنا لا أراه .. وديت وشي الناحية التانية وانا بحاول اني اخفي ابتسامتي اللي فضحتني دي وخلت العيلة وعيلة العيلة شاكين فيا .. طبعاً لو حلفتلكم ان الجوازة صالونات مش هتصدقوني .. اذا كان انا نفسي مش مصدقة اللي بيحصل دا .. بقا بعد ما قعدت اتريق على جوازات الصالونات اتجوز في الاخر صالونات .. وصالونات تقلب بحب كمان .. يعني 2 في 1 زي الشامبو والبلسم كدا .. بس سيبكم انتم .. البت غرام عاملة بلاي ليست جامدة .. انا ماسكة نفسي بالعافية ومش راضية اقوم اخربها من اول الخطوبة كدا قال يعني مكسوفة وبتاع .. مر شوية وقت ومعظم الناس وصلوا ودا معناه إن جه وقت تلبيس الشبكة .. قربت مني غرام بفستانها الاسود اللي فيه لمعة بسيطة مخلياها بصراحة زي القمر .. بصيتلها بابتسامة وانا شايفاها عمالة تتحرك يمين وشمال وبتاخد بالها من كل كبيرة وصغيرة هنا وهناك .. عمالة تتأكد إن الدي چي ماشي على البلاي ليست صح علشان الناس ماتنامش وتقرب تظبطلي الطرحة او تمسحلي عرقي وبعدها تتحرك علشان تتأكد من الأكل اللي أنا صممت مايكونش أوبن بوفيه علشان بصراحة مشهد البوفيه في فرح سنية في مسلسل لن اعيش في جلباب أبي مش بيروح من دماغي ومش عايزة اعيده تاني .. بس بجد يعني انا محظوظة بوجود أختي في حياتي .. شوية ولاقيت دعاء بتقرب وهي شايلة صينية الشبكة وغرام وراها وهي ماسكة الكاميرا بعد ما صممت انها هي اللي تصور اليوم وتعملنا فوتوسيشن كمان بالكاميرا بتاعتها.. مش قولتلكم إننا عيلة مليانة مواهب .. ماما قربت هي وطنط آمال ووقفوا جنبي انا ومراد أما بابا وعمو أحمد قدامنا وكل واحد منهم رافع موبايله يوثق اللحظة دي وعلى وشوشهم ابتسامة عاكسة السعادة اللي في قلوبهم .. شاورت غرام للدي چي علشان يشغل اغنية معينة اخترناها انا وهي ل وقت تلبيس الشبكة لأنها ببساطة واصفة كل اللي عايزة اقوله في اللحظة دي .. حسيت بكهربا في جسمي كله لما مراد مسك ايدي علشان يلبسني الدبلة والخاتم او في رواية أخرى "التوينز" اللي اخترناهم من اسبوع .. مش قادرة انسى شعوري يومها وجملته اللي قالها لما ماما قالتله يختار هو الشبكة "لو عليا هختار المحل كله لحنين .. وهيبقى شوية عليها" .. جميل احساس ان يكون فيه شخص شايف ان مفيش حاجة كتير عليك .. شخص يكون بيعمل كل حاجة علشان تفرح .. لبسني الدبلة والخاتم وفي الخلفية صوت نداء شرارة وهي بتقول
بطير وانا لسا في مكاني .. حياتي اتلونت تاني
ما بين وياك وبين قبلك .. فيه فرق كبير
بطير وانا لسا في مكاني .. حياتي اتلونت تاني
يا ونسي وناسي في الدنيا .. يا دخلة خير
رفع ايدي وطبع بوسة خفيفة ورقيقة على ايدي بعد ما لبسني الدبلة ولكم ان تتصوروا انا كنت عاملة ازاي في اللحظة دي .. رفعت ايدي التانية وحطيتها فوق قلبي اللي كان هينط من صدري من كتر ما كان بيدق جامد .. كمل تلبيسي الشبكة وسط فرحة أهلي وأهله وصحابنا .. ووسط الزغاريط اللي ملت الجو حوالينا .. مدت دعاء ايديها بالدبلة الرجالي الفضة اللي اسمي منقوش جواها علشان ألبسهاله وابتسمت بكسوف وانا بمسك كفه بين كفي وبلبسة الدبلة .. طبعاً في المواقف اللي زي دي المفروض ان فيه كلام رومانسي بيتقال فقربت عليه وهمستله
انا: لو في يوم لاقيتك مش لابس الدبلة دي .. قول على نفسك يا رحمن يا رحيم
انا كدا في الرومانسية ماعنديش ياما ارحميني .. مصدومين ليه .. فيه رومانسية في التهديد عادي .. ايش عرفكم انتم .. المهم اكملكم بقا .. انا قولت الجملة من هنا لاقيته بصلي لثانية بعد جملتي دي ورد بتلقائية
مراد: عمري
قالها وهو بيحضن كفي بكفه وبيضغط عليه برقة وشدة في نفس الوقت .. فين روح التهديد اللي جوايا؟! .. طب فين الثبات على الموقف .. يا جدعان .. يا جدعان بقا قلبي بيتسرق حد ينده حد .. عيني اتعلقت بعينيه لثانية وبان صوت نداء شرارة اكتر وهي بتقول

ومعاك .. دي الدنيا رايقه وضحكالي .. ويا رزق جالي واجمل غالي .. نورت دنيتي بيك
ولولاك .. ولا كان في حاجة تجبر خاطري .. خليك قصادي علشان خاطري .. خليني جمب عينيك

"اليوم بنيتُ لك بين ضلوعي منزلاً .. عسى المَقام بالمُقيم يليق ♥️ "

يُتبع ...