ဗီလိန်ဖြစ်ရန် ကြမ္မာဖန် [Book 2]

(၂၂၁) ပဒိုင်းညို

Burmese Translation of "Doomed to be Cannon Fodder".

Translator - NC

(၂၂၁) ပဒိုင်းညို

သူမ ရိုက်ခံလိုက်ရတာနဲ့ ပိုင်ရှန်းရှို့ ပူထူသွားပြီး အသိစိတ်က လွတ်သွားလေတယ်။ သူမ ခြေထောက်က ပျော့ခွေကျသွားပြီး ပြန်ခုခံဖို့တောင် မေ့သွားမိတယ်။ ဒါပေမဲ့ သူမ မျက်နှာမှာ အေးစက်စက် အငွေ့အသက်တစ်ခု ခံစားလိုက်ရချိန်မှာ သတိပြန်ဝင်လာလေတယ်။ သူမ ညာဘက်လက်ကို အလွတ်ရုန်းလိုက်ပြီး အဲ့ဒီလူမျက်နှာကို ဖြတ်ရိုက်ပစ်လိုက်တယ်။ ကံဆိုးချင်တော့ သူက သူမကို အလွယ်တကူ ရှောင်လိုက်နိုင်တယ်။ သူက လှောင်ပြောင်ရယ်မောလိုက်သေး။ "ကောင်းတယ်၊ ငါကလဲ မင်းလို ခက်ထန်တဲ့ မိန်းမတွေနဲ့ ကစားရတာ ပိုသဘောကျတာ၊ ပြီးရင် မင်း ယဉ်ပါးလာအောင်လို့ ငါ ဘယ်အဆင့်ထိ လုပ်ရမလဲ ကြည့်ကြရတာပေါ့"

ပိုင်ရှန်းရှို့ သူ့ကို သိပ်ရွံတယ်။ သူ သူမကို ထိတာ ငြိမ်ခံနေမဲ့အစား သေသာ သေပစ်လိုက်ချင်တယ်။ ဒါကြောင့်မို့ သူမ အသေအလဲ ရုန်းကန် ရိုက်ပုတ်တော့တယ်။ မမျှော်လင့်ပါဘဲ အဲ့ဒီနည်းလမ်းက အလုပ်ဖြစ်သွားတယ်။ သူ သူမကို အတင်းအဓမ္မပြုကျင့်ဖို့ မလုပ်တော့ဘဲ ရပ်သွားလေတယ်။ "မင်းက မင်းရဲ့ ဖြူစင်မှုကို သိပ်တန်ဖိုးထားတာပဲ၊ ငါ မင်းကို လွှတ်ပေးလို့တော့ ရပါတယ်၊ ဒါပေမဲ့ မင်းရဲ့ မီးယမ်းမှုန့်ဗုံး လုပ်နည်းကို ရေးပေးမှ လွှတ်မယ်" 

"ကောင်းပြီလေ...! ကျွန်မ အားလုံး ပြောပြမယ်၊ ကျွန်မ ပေါ်က ဖယ်ပေး"

အဲ့ဒီလူ ထပေးလိုက်တယ်။ "ဖော်ထုတ်နည်း ချရေးပေး"

ပိုင်ရှန်းရှို့ ခေါင်းညိတ်လိုက်တော့တယ်။ အခန်းထောင့်ကလေးမှာ စားပွဲတစ်လုံးရှိနေတာ သူမ တွေ့တယ်။ အဲ့အပေါ်မှာ စာရွက်ရယ်၊ စုတ်တံရယ်ကို သပ်သပ်ရပ်ရပ်လေး တင်ထားတယ်။ သူ ဒါကို ကြိုပြင်ဆင်ထားတာ ဖြစ်ရမယ်။ သူမ ထိုင်လိုက်ပြီး ဖော်ထုတ်နည်းကို ချရေးတော့တယ်။ လက်တစ်ဖက်က ခေါင်းကို ထောက်ထားပြီးတော့ပေါ့။ 'ငါ ရေးပြီးသွားရင် သူ ငါ့ကို ဘာလုပ်လိမ့်မလဲ မသိဘူး' တော်သေးတာက၊ အဲ့ဒီ့လူက ဦးနှောက်နဲ့ စဉ်းစားဉာဏ်ရှိသူ ဖြစ်နေတယ်။ "ဒီဟာကို ထုတ်လုပ်ကြည့်ပြီး စမ်းဖောက်ပြီးမှ မင်းရေးတာ အမှန် ဟုတ် မဟုတ် ငါ သိနိုင်မှာပေါ့၊ ဒါကြောင့်မို့ လောလောဆယ်တော့ မင်း ဒီထဲမှာပဲ နေရမယ်၊ ထွက်ပြေးဖို့ စိတ်တောင် မကူးနဲ့၊ အပြင်မှာ စောင့်ကြပ်နေတဲ့ လူ ရှိနေမယ်"