الجمجمة الذهبية

النَدْوَة الثَالِثة

فهو شرحلي كلشي بخصوص هالموضوع، جانت سيارة مفخخة واگفه بباب المستشفى وجان بيها تقريبًا تلث اشخاص ومات جراء الأنفجار هذا 11 شخص و 23 اصابة..

ودكتور سالم هو الي خابر أخويه والي اصلًا جان بطريقه للموقع واني جنت مصابه لأن انرجع راسي بحافه حاده وفقدت الوعي

تلمست راسي واللفاف السميك الي يحيطه بعنايه، مر يومين من الانفجار

-لا حول ولا قوة الا بالله بالعلي العظيم.. الله أكبر
گلت بخوفٍ واني امنع نفسي بصعوبة من البچي..

يوم بعد يوم الوضع يسوء أكثر من هذي القوات الي دخلت علينا ودا تتجذر بينا وتقتل وتذبح بالأبرياء.. يا ربي سترك..

وحسب ما سمعت انو هذول الجماعة يستهدفون اي شخص مو مسلم وحتى الشيعة والأكراد..
رجعت راسي ع المخده بخيبة، شكله وضعنا تحت الخطر هم كُراد وهم شيعة بنفس الوقت

اذا لزموني شيسوون بيه؟
يشگوني شگ..

ضحكت بسخرية وابعدت الفكره التافهه عن بالي، اكيد مستحيل تصير..

"نادِ عليًا مُظهر العجائب.. تجِدُهُ عونًا لكَ في النوائب
يا علِي يا علِي يا علِي، الغوث الغوث الغوث"

يوم الصبح هاڤال طلعني من المستشفى وراح هو بطريقه لشُغله، بدت تتحسن حالتي وصحتي كلش زينه وشلت اللفاف الحمدلله
ودكتور سالم ظل يگلي لتجين ولتجين ظلي ارتاحي، بس اني اصرّيت اروح.. شعندي ابقى بالبيت وحدي، حتى هاڤال راح لشغله گال الوضع متوتر ولازم يكون متواجد بصفته عنصر مهم..

گلبي وياه، اخويه هذا ما عندي غيره أقرب الي من أمي وهو ماخذ دور أبويه الراحل..

"يا صاحِب الزَمان، أخويه بأمانتك"

اليوم هم عندنا جلسه وي المريض استاذ أيليا.. واني بمكتبي چنت گاعده وصافنه باللا شيء..
جنت مقررة انو بس تهدأ الاوضاع بالبلد ابدي ادرس ماستر واصير استاذه جامعية بعلم النفس..

لأن اني اصلًا طبيبه بس فضّلت لفترة وجيزة اجرب العمل واشوف شلون يصير واكسب خبرة اولًا يلا اشوف افتح عيادتي الخاصة لو اصير استاذه..

صحاني من غفلتي دكتور سالم وهو واگف گدام مكتبي ولازم موبايله وواضح عليه التوتُر!
وگفت واني ملامحي يعلُوها الأستغراب والتساؤل..

"هيلين.. ممكن اليوم انتِ تتولين جلسة المريض أيليا؟
لازم ضروري كلش اطلع هسه واني بلغته وهو وافق وگال ماكو اي مشكله.."

هاه!

: : : : :

تحمحمت بتوتر طفيف واني امثل البرود.. اني شورطني!
مجان گدامي اي قرار ثاني غير انو اوافق..
اني ما احب الانطباعات المسبقة عن شخص بس كلش واضح شگد هو صعب التعامل ويمكن راح اعاني وياه شوية..