لمحةٌ من الماضي ...قبل ساعات
في قاعة الرجال
مصلح :عزيزه بدت تشك خوفي تعرف وتحكمها عواطفها وتشوف هيام
صقر :ما ودي الوضع يكبر أكثر روح لحمد وخلص عليها ذي الحيه
مصلح :متأكد أنها تحبه؟
صقر :حتى لو ما تحبه أنها تاكل تهزيء منه بيخليها تخاف ،الحساد دايم خوافين
مصلح :الكرسي الي جنبه فضى بروح
صقر :الله معاك
قام مصلح وجلس بجانب حمد :قد شفت محادثه مفبركه؟
حمد :مدري يمكن بس ما أعرف أميز هل هي مفبركه أو لا
فتح مصلح هاتفه ومده لحمد ليقرأ المحادثة التي صممتها ورد وبقي ينظر له
بلع حمد ريقه :وش ذي؟
مصلح :صاحبة الصوره مسويتها ،تكذب أن عندها شهادة هندسة بترول بس هي ماشاء الله عليها مبرمجه
حمد :وش دراني أنه مو أنت مسويها ؟ معرفك أنا
مصلح :بس تعرف صاحبة الصوره
...
في قاعة النساء
ورد :هيام أمي بتجي تاخ...
تجاهلتها هيام :الزفه الحين؟
مها :أي
هيام :أجل بروح أشوفها أكيد تحتاجني
تنهدت ورد فرن هاتفها :
حمد :ورد أنا برا بكلمك بشي
ورد :وش جابك؟
حمد :حضرت العرس والحين أبي أشوفك
إبتسمت فورًا ثم خرجت :جيت
حمد بإبتسامه :طالعه حلوه
ورد :حتى أنت...شكلك حلو
حمد :بس المظاهر خداعه تدرين؟
ورد :أي أعرف يعني ما أتوقع منك تكون بنفس الشكل ذا بالبيت
حمد :لين متى بتستغبين؟
شحب وجهها من الصدمه :ما فهمت؟
حمد :حفظت سرك يوم تفتشين كمبيوتر صقر وتسترت عليك رغم أنه كنت أسمع شكاويهم عن السارق وبالأخير تخليني مبتز ،برافو عليك!
ورد :مين قال لك ذا الشي؟
حمد :لا يغرك تعاملي تحسبيني غبي وتسترت عليك ،أنا حبيتك بس وعطيتك فرصه ظنيت فيك كل خير وطلعت مجرد درب لمبتغاك...
تجمعت الدموع في محاجرها وقاطعته :أنت مبتغاي
سكت قليلًا ثم قال:هذا لو قلتيه قبل كنت صدقتك ...
إبتسم بقهر : قبل شوي حتى أشوف العريس وهو ينزف وأقول يا الله متى ذا اليوم مع ورد لكن سبحان الله الي قدر لي أعرف طينتك بدري
ورد :حمد ! والله يوم سويتها ما كنت أحبك الحين حبيتك ،أنت قلت الي يكذب عليك وهو ما يحبك حاله ثانيه
حمد :تبين تعرفين الحاله الثانيه؟
ورد وهي تمسح دموعها :أي
حمد : كذب عليك وهو ما يحبك يعني من عوايده الكذب على الرايح والجاي ،لكن لو كذب وهو يحبك تقدر تعذر له بمحبتك له
ورد بتحشرج:طيب ما كان قصدي أذيك كنت بحذفها والله ...
قاطعها ببرود :ورد حبك ذبل بقلبي قبل أشمه
تركها تحت ظل ذلك الفرح العامر تبكي بحرقة عند بوابة القاعه ،هي من أشعلت هذه الشرارة وهي أول من أحترق بها أيضًا
خرجت حليمه تداري دموعها عن غيث :يارب لك الحمد والشكر أعنتني وحفظت أمانه أختي ذي السنين ،والليله زوجته يا الله أنك ترزقه الذريه الصالحه وتوفقه يارب وتيسر له دروبه
أنتبهت لورد التي تبكي :يا بنت ! تبكين ! عسى حبيبته يا بنت الذين شوفيني بهددك لأني أول مره أشوفك إن شفتك حول غيث ونجد منه ولا منه بنتف شعرك منه ،أساسًا مين عزمك؟
قاطعتها ورد :لا مو حبيبه أحد نجد عزمتني صديقتها أنا بس ...جاني خبر وطالعه الحين
حليمه :اها ،الله يعينك يا قلبي تبين أحد يوديك؟
ورد :لا بروح طلبت أوبر
حليمه :أنتبهي لنفسك مع ذا الفجريه
ورد :إن شاء الله
دخلت اليهم :هاه بتطلعون؟
غيث :أي بنطلع من الصبح وأحنا بذي القاعه معد بقى شي ما سويناه
حليمه :أقول أسكت الحين يحسبونك مغصوب
غيث :أني مغصوب
نظرت له نجد بحده :كيف مغصوب!
غيث :مغصوب أني أجلس بذي القاعه
نجد :أنت ما تبيني أعيش يومي على وش مستعجل تبي كل شي يخلص بسرعه؟تبي عيال تراهم ما يطلعون بيوم وليله
حليمه :بسم الله الرحمن الرحيم عليكم،لا تتهاوشون الليله الله يهديكم يلا بنطلعكم بس بدق على أبوك يجيب السياره قدام الباب
غيث:يلا بسرعه
نجد :شفيك غيث؟
غيث :مب عاجبتني فكره الجلوس بين الحريم
نجد :وش عليك فيهم ما ياكلون ترا خلاص !
غيث :كل شي لعيونك يهون
نجد :وين حجزت؟
غيث :بفندق ناسي أسمه
نجد :السفر أقصد
غيث :خليها سر
نجد :قول الحقيقه
غيث :ما حجزت
نجد :عادي مو لازم
غيث :أساسًا أنا أعشق نجد ليه أتركها وأسافر ؟
ضحكت نجد :صح والغيث ما يحلى إلا بنجد
ضحك وقبل يدها
حليمه :يلا السياره برا قوموا
غيث :وبتخرج كذا نجد؟
نجد :عند الباب عبايتي ...مع أبوي
حليمه :يلا استودعتكم الله
عند الباب استقبلهم والدها والبسها عبائتها :الله يوفقك ويسعدك ،والله أني أرتاح يوم أدري أنك تركتي الغربه وبتبقين هنا مع زوجك و ببيتك وإن شاء الله يرزقك ربي عيال ويجعلهم لكم بارين ،وعساني كل ذا السنين ما قصرت معك بشي
نظر لغيث :وعسى السنين المقبله ما يقصر عليك شي
عانقت والدها وقالت بتحشرج :ما قصر علي قاصر دللتني فوق الدلال وما عطيتني إلا الحب
أبعدها عنه عندما أحس بقرب بكائها :لا تبكين يا بابا !
مسح دموعها وقال بسخريه :يعني تحسبين دلالي لك أنتهى ؟ لا والله بدللك وبدلل عيالك بعد ومين يحق له يتدلل إلا نجد
ضحكت وبادلته السخريه :عيال نجد
التفت لغيث الذي قبل رأسه ثم صافحه فأمسك يده بشده :شوفنا نتكلم عن الدلال ،ما ظنتي تدللها مثل دلالي لكن أحفظ العهد الغليظ الي بينكم وعاشرها بالمعروف إن بغيت غير كذا ردها لي أنا أبوها وأحق فيها
إبتسم غيث :أبد والله يا عم بنتك بالحفظ والصون إن شاء الله وبإذن الله ما يقصر عليها قاصر
مسح على كتف نجد :يلا أستودعكم الله
قبلت نجد رأسه ثم شهقت :طبع روجي بغترتك !
ضحك أبو نجد :فداك
...
في صباح اليوم التالي أستيقظ ومسح عيناه ثم أرتدى نظارته ونظر لبطاقة التذكره مستذكرًا ما حدث بالأمس ...
صقر:تأكد من كل شي
غيث :يا رجال معليك كل شي تمام
صقر :ياخي ليه أنت العريس وأنا متوتر أكثر منك ! تأكد من كل شي أدخل القاعه وشوف عدد الكراسي كم وكيف صالة العشا وكيف المكيفات
غيث :أنا بروح للتصوير خل أحد يشوفها
أوس :أنا بروح معليك بس كم طلبت عدد الكراسي؟
غيث :ميتين وثلاثين
أوس :وشلون بعدها ذي!
غيث :الله يعينك عاد
دخل أوس لقاعة الرجال فكانت تجلس على أحد الكراسي وترسم بتركيز :وش تسوين هنا ؟
شهقت وغطت وجهها بالطرحه :أنا ...أنت وش تسوي ؟ جيت وفيه المصوره قالوا لي أنتظر هنا
أوس :ذي قاعة الرجال ،يقصدون غرفه ثانيه
بلعت ريقها :يعني الحين الرجال جو؟
أوس :لا باقي
جمعت أغراضها وقامت :معليش
إنتبهت أن أوس هو نفسه من قابلته في المحل ومدت له ورقه :من زمان قاعده أدور فنان وأعطيه ذي ،جت من نصيبك
أوس :وش ذي؟
:تذكره لملتقى للراسمين بلندن
ضحك أوس بتعجب :وش أسمك ؟
:توق
أوس بذات التعجب :كيف لقيتيها ؟ خلصت بيوم واحد التذاكر
توق وهي خارجه :عندي واسطات ماني طالبه تجمع مصروفها
تنهد أوس بعد خروجها بسعاده :نصيبي ذي التذكره
سكت قليلًا ثم أكمل :بس لو القى وحده لهيام ،بيكمل كل شي
YOU ARE READING
كُن بقربي فإن الروح هائمة
Romanceبعد سنوات من الغربه وسنوات ضاعت في الهروب من الأحزان،نعود لنفس الديار ظنًا منا أننا سنبدأ بدايه جديده ،أمل جديد،حياة جديده،أحباب جدد...ولكن ! يالعثرات الماضي تلاحقنا بكل درب ،وتهزمنا في كل كرب ،وتخيفنا مما هو مجهول ... ٢٠٢٣/٢/٢٦
