الخوف من المجهول

الحكاية التالته رياح الصداقة

الجزء التاني
وزي ما شوفنا في الجزء الاول النوع الحلو من الصحاب بس دول قليلين اوي انا مقولتش انه مفيش علشان بس منظلمش حد ،بس الحياة مش كلها وردي ولا الناس كلهم حلوين لازم كده حبة إثارة وخذلان لو مكنش من الغريب فيبقى من القريب ،تعالوا نشوف قصتنا هتتكلم عن ايه
■■■■■■■■■■□□□□□□□□□□□□□□
حكايتنا انهارده مختلفة نوعا ما ،وغريبة ومش متوقعه بس عادي احنا بقينا في زمن نتوقع فيه اي حاجة،هنتكلم عن عيلة كانت بتظهر الود والمحبة لبعضها لمده طويلة من الزمن ،وحياتهم كانت جميلة وكانوا كلهم أصدقاء في بعض
قصتنا بقى مع اتنين من العيلة دي،كانوا بيعتبروا بعض أصحاب واخوات وطبعا مش هننسى نقول انهم أكلوا مع بعض كل حاجة مش عيش وملح بس ،اسرارهم مع بعض وحاجة في منتهى اللطف
كانوا في يوم قاعدين مع بعض
تارا:ياه يا بت يا ريم مش مصدقة اني خلاص هبقى مع اللي بحبه واللي قلبي اختاره
ريم:حبيبتي ربنا يفرح قلبك بس يالله مش هنتكلم كتير ،انهارده قرايت الفاتحه بتاعتك مش عايزين نتأخر
تارا:خلاص يا ستي متزوقيش بس ،
ريم:لا هزوق براحتي مش كفاية اني اللي هظبطك وهحطلك المكياج وهلف الطرحه ويالهوي انتي لسه واقفة
تارا:خلاص ماشية اهو
وبالفعل بدأت تجهيزات بسيطة لقراية فاتحه تارا ،وساعدتها ابنة عمها ريم
وبالفعل أتى الشاب وتحدث مع عائلته والد تارا وكل هذه التحضيرات كانت في وجود ابنة عمها ريم وعائلتها أيضا، وتم الاتفاق على كل شيء وكان هذا في وسط سعادة من تارا
وانتهى اليوم على خير مع الكثير من الفرح من العائلتين
وفي صباح اليوم الثاني
ريم:اصحي يا عروسة ،علشان خطوبتك اخر الاسبوع عايزين نشتري اللازم بقى
تارا:الواحد نفسه ينام شوية من غير ما تيجي وتزهقيني
ريم:قدرك ونصيبك يا اختي ،يالله اخلصي
وقامت الفتاتان وبالفعل ذهبا لشراء الاشياء ولاحظت تارا ان ريم مهتمة بنفسها وشراء اشياء لنفسها اكثر منها
تارا:اللي يشوفك يقول ان انتي العروسة مش انا يا ريم
ريم:وانا وانتي ايه يا تارا ،بطلي بس كلام كتير علشان مننساش حاجة
تارا:خلاص انا خلصت انتي لسه عايزة تجيبي حاجة
ريم:انا مجبتش فستان لسه
تارا:انتي مش قولتيلي انك عندك واحد جديد ومش هتجيبي
ريم:حسيته صغر عليا ،تعالي سيبك من القديم ونشوف الجديد،لسه شايفة فستان في المحل ده تعالي بس
وسحبت ريم تارا وبالفعل اشترت فستان اجمل من فستان تارا ،ولكن تارا ظنت انها سعيدة لها ،لا تعرف ماذا سيحدث في الأيام المقبلة
وبعد عدة ايام ،زيارات ريم قلت عن السابق لابنة عمها تارا ولم تكن مهتمة بها مثل السابق ،ولكن عللت هذا بأن كل شخص مهتم بحياته واشغاله ولم تهتم ولم تعطي للموضوع أهمية
واذا هي تفكر دق هاتف تارا واذا هو خطيبها
تارا:ازيك يا كريم
كريم:انا الحمد لله ،انتي عامله ايه
تارا:الحمد لله ،طنط أخبارها ايه
كريم:طنط وعمو وابنهم كويسين
تارا:طب يا عم الحمد لله انكم بخير
كريم:فطرتي؟؟
تارا:لا لسه ،وانت
كريم:لا برضوا تيجي نفطر سوا
تارا:تعالي عندنا وانا هدوقك اكل عمر في حياتك ما دوقته
كريم:خلاص يا ستي انا جاي اهو
تارا:توصل بالسلامه ،وقامت بإغلاق الخط وجهزت كل الاكل واستنت خطيبها يجي واذا بالباب يدق
تارا:اكيد هو ،ثواني جاية اهو
ريم:تارا حبيبتي ،عامله ايه سامحيني والله ساحليني في الشغل جامد وماما تعباني في البيت
تارا:ريم،لا عادي يا بنتي ،في حاجة ولا ايه
ريم:لو مش عايزاني خلاص همشي ،بس انتي شكلك محضرة فطار ،خليني افطر معاكي بقى
تارا:لا الفطار مش ليكي
ريم:اومال لمين؟؟
كريم:ليا انا
تارا:كريم،انت هنا من امتى،تعالى خش ماما مستنياك جوا
كريم،وانا جاي علشان ماما
ريم:ماما برضوا ،يا طنط انا جيت
الام:ريم ازيك يا حبيبتي
ريم:انا كويسة الحمد لله
تارا:ماما كريم جيه
الام:تعالي يا حبيبي، عامل ايه
كريم:الحمد لله ياست الكل ،انتي صحتك عامله ايه
الام:انا بخير طول ما انتم بخير
ريم:مش هنفطر ولا ايه يا جماعه ،تارا معلش ممكن تجيبي مياه
تارا:ايوة طبعا يا ريم اقعدي افطري انتي يا حبيبتي
وبالفعل ذهبت تارا لإحضار المياه وعندما عادت وجدت ريم جالسةعلى المقعد بجانب كريم،
تارا:المياه اهيه يا ريم
ريم:شكرا يا تارا ،وأخذت كوب المياه من تارا واصطنعت رعشة يدها واوقعت المياه على ملابس كريم
ريم:يا خبر انا اسفة اوي بجد اسفه ،ثواني همسحها
تارا بعصبية:خلاص يا ريم همسحها انا ،خد يا كريم المناديل اهيه معلش ،
الام:تعالي يا كريم يا ابني الحمام من هنا
كريم:عادي يا جماعه بتحصل كتير محصلش اي حاجة، حاضر يا طنط جاي معاكي
وذهبت الام وكريم وبقيت تارا وريم معا
تارا:ريم ،انتي بقالك قد ايه مش بتيجي عندنا
ريم:معلش يا تارا ماانا قولتلك السبب
تارا:وجاية عندنا في يوم ما خطيبي جيه ،صدفة دي ولا ايه
ريم:براحه على نفسك يا تارا هو لسه مبقاش خطيبك
تارا بعصبيه:وانتي مالك انتي ،اقوله خطيبي اقوله جوزي انتي مالك
ريم:بهزر معاكي يا بنتي في ايه اخدتي الموضوع جد ليه خلاص كلها يومين ويبقى خطيبك
الام:ايه يا بنات مش بتاكله ليه خلاص حصل خير
وبدأ الجميع بتناول الفطور في وسط عصبية من تارا
الام:الشاي بقى يا تارا
تارا:حاضر يا أمي،
ريم:هاجي معاكي يا تارا ،كام معلقة يا كريم
تارا:تعالي يا حبيبتي انا عارفة ،هبقى اقولك جوا
وبالفعل اعدت تارا اكواب من الشاي مع بعض المعجنات بجانب الشاي
وجلس الجميع إلى أن قام كريم ليذهب لعمله،ومن بعده بلحظات ذهبت ريم أيضا مصطنعه ان والدتها تريدها
الام:مالك يا تارا يا حبيبتي
تارا :سلامتك يا ست الكل مفيش حاجة
الام:على ماما برضوا
تارا:مش عارفة حاسة ان ريم فيها حاجة،دي مش طبيعتها اللي انا كنت عارفاها
الام:انتي تلاقيكي علشان متوترة علشان الخطوبة قربت شايفاها متغيرة
تارا:يالله ربنا يهديها ويبعدها عن سكتي علشان انا مش عايزة اخسرها
ومن بعد زيارة كريم لتارا، الاتصالات بينهم قلت اوي وريم مبقتش بتيجي عندها ،وانهارده يوم خطوبة تارا وصاحبتها المقربة وبنت عمها مجتش عندها ولكن بنات خالتها قاموا بما يجب فعله وجهزوا تارا وجعلوها أجمل عروسة ،وعند وصول كريم لاسفل منزل تارا ليأخذها ويذهبوا للقاعه،أتت ريم
ريم:الف مبروك يا عريس ،بس ايه الجمال ده كله
كريم:الله يبارك فيكي، مفيش حد حلو هنا غيرك
ريم:بس علشان تارا جات
وأتت على أذن تارا هذه الجملة
كريم:بسم الله ماشاء الله، زي القمر يا نور عيني
تارا:شكرا،بس ايه البدلة الحلوة دي ،اي ده ريم انتي هنا من امتى
ريم:لسه جاية يا حبيبتي ،يالله هسبقك انا على القاعه
وذهبوا للقاعة وكانت تارا تفكر في جملة ريم طوال الطريق ولكن قطع حبال هذه الأفكار وقوف السيارة معلنه عن وصولهم للمكان المطلوب
ونزلا العروسين من السيارة وكانت ريم تحاول أن تظهر نفسها اكثر من العروسة فكان فستانها اكثر جذب من تارا والمكياج اكثر إثارة وكانت مهتمة بنفسها على حساب تارا وهذا أثار من غضب تارا ولكنها حاولت تجاهلها
وبدأت الخطوبة والاغاني والرقص وأنقضى اليوم بسعادة تارا وأهلها وكريم أيضا وأهله
وعاد كل منهم لمنزله
ومر ٦شهور على اخر مرة شافت تارا ريم فيها بالأخص من يوم الخطوبة
واليوم كريم وتارا خارجين مع بعض بعد اصرار من كريم على تارا
كريم:اخيرا يا ستي وافقتي تخرجي معايا
تارا:اي خدمة اهو شوف هتوديني فين
كريم:احسن مطعم لأحسن تارا في الكون
تارا:ربنا يخليك ليا
ووصلا إلى المطعم،وجلسوا وطلبت تارا عصير وكريم قهوة
كريم: ثواني وجاي
تارا:ماشي
ووصل اشعار على هاتف كريم، معلن عن وصول رسالة من تطبيق الواتساب
وزي اي ست مصرية عندها فضول قامت تارا بفتح الرسالة وكانت الصدمة القوية لها
ولكنها رأت كريم اتِ فتركت الهاتف وتعاملت بطبيعتها
وجلسوا سويا وتحدثوا عن أمور الزواج الذي سوف يتم بعد شهر من الان ،ولكن في بعض الأحيان كانت تارا تسرح وهذا آثار فضول كريم
كريم:ايه يا بنتي مين اللي واخد عقلك
تارا:لا مفيش بفكر في الحاجات اللي مش هلحق اجبها في شهر بس
كريم:ربك كريم يا بنتي وهيحللنا كل حاجة
تارا:ونعم بالله يالله نروح بقى
كريم:ماشي يا ستي يالله
وحاسب كريم وعادت تارا لمنزلها وكانت صامته تحاول أن تمنع نفسها من الفهم الخاطئ
الام:مالك يا بت ساكته ليه
تارا:ايه يا ماما بتقولي حاجة
الام:ايوة ياروح ماما بكلمك ،مالك
وهنا ام تتمالك تارا نفسها وبدأت في البكاء
الام:لاحول ولاقوة الابالله مالك يا حبيبتي اهدي بس
تارا:كريم بيخوني يا ماما
الام:انتي بتقولي ايه ،اكيد انتي فاهمه غلط
تارا:انا شوفت بعيني يا ماما
الام:شوفتي ايه فهميني بس
تارا:شوفت رساله مكتوب فيها وحشتني انت فين ،وكاتبها حبيبي
الام:براحه، اتصلي بيه وافهمي منه
تارا:انا مش عايزة اكلمه خلاص يا ماما
وهنا وصل اشعار رساله على هاتف تارا من ريم
ريم:تارا باركيلي انا اتخطبت
الام:مين يا تارا
تارا:دي ريم بتقولي انها اتخطبت
الام:كده من غير ما تقولك
تارا:الف مبروك يا حبيبتي بس ايه المفاجأة دي
ريم:لا مش مفاجأة ولا حاجة انا بتصل علشان اعزمك يا بنتي بكره الخطوبة الرسمي
تارا:هاجي طبعا من غير عزومة
ريم:لازم تيجي طبعا
الام:بصي يا بنتي اهدي كده وروحي فكي بكره في الخطوبة وتعالي فكري في اللي هتعمليه
تارا بحزن:حاضر يا ماما،تصبحي على خير
الام:وانتي من اهل الخير يا حبيبتي
وخلدت تارا للنوم حزينه على ما رأته ولكنها لاتعلم ماذا يخبئ لها القدر
وفي اليوم التالي ،قامت تارا واستعدت لارتداء الملابس ولكن قبل ذلك كانت بتحاول تكلم كريم علشان تقوله ييجي معاها ولكن مش بيرد ،فبعتتله فويس نوت وقالت فيه انها رنت عليه بس هو مردش، وقالتله كمان انها رايحه خطوبة ريم بنت عمها
واستعدت تارا وايضا والدتها وذهبوا للحفل،كان الطريق مزدحم للغاية، وطوال الطريق كانت تحاول الاتصال ولكن دون جدوى
وصلوا اخيرا للعنوان المطلوب ،ودخلت والدة تارا اما تارا فذهبت للحمام
ثم عادت مرة أخرى للقاعه تبحث عن والدتها ولكنها وجدتها متجمدة في مكانها من هول الصدمة
تارا:ماما،مالك كده حساكي مصدومة
الام:تارا انتي شوفتي عريس ريم
تارا:لا لسه رايحه اشو.....، وهنا لجمتها الصدمة ،ماذا لابد وانها تتخيل ،مستحيل انه هو،الشخص الذي كانت ستتزوج به بعد شهر ،مهلا ،انا اتخيل ولكن لا انه هو
تارا:ما..ما ..مش هو ..صح
الام:انا مش مصدقة اللي عيني بتشوفه
تارا:طب وانا ،........
الام:تارا انتي رايحه فين
تارا:مش هنبارك ولا ايه يا ماما،تعالي بس
الف مبروك يا حبيبتي، تتهني بيه
ريم:تارا حبيبتي الله يبارك فيكي ،وحضنتها وقالت:اخدته منك يا روحي ،شوفيلك غيره بقى
تارا:ماانا متعودة اديكي البواقي بتاعتي ولا انتي نسيتي،وبعدين زي ماخني معاكي هيخونك مع غيرك
الف مبروك يا عريس
كريم ببجاحه:الله يبارك فيكي عقبالك
تارا في المايك:معلش يا جماعه هقاطع فرحتكم شوية،اصل بنت عمي وصاحبة عمري ملقتش حد تبصله غير خطيب بنت عمها ،ولا الخاين التاني ،حقيقي انا مش مصدقة بس نعمل ايه الطيور على أشكالها تقع ،وخلعت دبلة خطوبتها ،ودي اهيه دبلة خطوبتي ولا تلزمني من شخص زيك انا طول عمري بحلم اتجوز راجل بس معرفش ايه اللي حصل،ورمت الدبلة في وشه وجرت برا القاعه
وعادت لمنزلها وارتمت في حضن والدتها :ليه يا ماما ،ليه انا ومن مين اكتر اتنين بثق فيهم بنت عمي اللي عمري مااعتبرتها غير اختي والراجل اللي كان هيبقى جوزي بعد شهر
الام:نقول الحمد لله يا بنتي ان ربنا كشفلك حقيقتهم قبل ما يحصل حاجة وبعدين تتحسب عليكي،كان عندك حق لما قولتي ان ريم متغيرة
تارا بدموع:يا ترى بيتكلموا مع بعض من امتى ،تعرفي مش بعيد يكون من يوم ما عزمناه على الفطار قالها انه جاي ،وكانوا عايزين يتقابلوا في بيتي ،قد ايه انا مغفلة ولا يوم خطوبتي سمعتها بتقوله خلاص علشان تارا جاية
الام:ربنا كبير اوي يا بنتي وزي ما عملوا معاكي هيتعمل معاهم،الدنيا داين تدان يا حبيتي وكل ساق سيسقى بما سقى،قومي اتوضي وصلي ركعتين شكر لربنا انه عرفك حقيقة التعابين اللي كانت في حياتك
الام:ونعم بالله ،حاضر يا أمي
ومن هذه الساعه التي تحدثت فيها تارا ووالدتها وخيانه ريم وكريم لها ،وتارا فقدت الثقة في اي حد ماعدا مامتها هي اللي كانت السند ليها في وقت ضعفها ،مرت السنين وريم وكريم اتجوزوا،وكمان تارا لقت ابن الحلال اللي يصونها ويحبها ،
ولفت الايام ومرت السنين وريم اكتشفت خيانه كريم ليها وافتكرت جملة تارا لما قالتلها زي ماخني معاكي هيخونك مع غيرك، وحست بالندم علشان فقدت اعز صاحبة ليها ومفكرتش غير في نفسها بس يفيد بأيه الندم
على عكس تارا اللي جوزها عيشها احلى عيشة وهي كبرت في شغلها وبقت ناجحه في مجال الإدارة وحياتها مكنتش تحلم بيها في أحسن أحلامها
هي الدنيا كده تفضل تخطط تخطط على مليون حاجة وفي الاخر تحصل حاجة واحده بتدبير من ربنا حاجة واحده بس بالمليون اللي كنت بتحلم بيهم
صفوا نيتكم يا جماعه محدش واخد منها حاجة
اللي عملت حيل علشان تاخد شغل مش بتاعها ربنا مش هيبارك فيه
واللي سرقت علشان تعيش زي فلان ربنا مش هيعيشها زي فلان بالسرقة ولا النهب
واللي يبص لعيشة غيره تهون عليه عيشته
واللي تاخد حبيب غيرها هتيجي اللي تاخد حبيبها
حب الخير لغيرك دي هي دنيا والدنيا فانية يعني كده كده هتخلص، عيشها بالحلال والقلب الأبيض احسن من الحقد والكلام اللي مش لطيف ده
آخرها متر في متر وهتتحاسب على الصغيرة قبل الكبيرة
وبس كده خلصت حكايتي وعايزة اقول حاجة معظم احداث القصة حقيقية باختلاف الاسامي وبعض المواقف لازم نفبرك علشان منتكشفش🤣😂