روح في بحر الظلام

الحلقة الثانية عشر

:. تحجين صدك هاي عود انتي العاقلة المتدينة، شالمنطق الغبي،

مرض السرطان حالة حال باقي الأمراض هو ابتلاء من رب العالمين، رب العالمين يختبر قوة صبر الانسان وتحمله، يشوف المؤمن يبقى على ايمانه لو يكفر،

و انتي انسانه مؤمنة والمؤمن مبتلى، وربج اختارج لهذا البلاء، مايحتاج اوصيج اعرفج صابرة محتسبة

لا تسمعين لكلام هيج بشر، هي لو تعرف عقاب شماتتهه من رب العالمين ماكان نطقت هالكلام، ولو فعلا عقاب مو ابتلاء، لعد ليش يصيب الاطفال، تلكين اطفال رضع صايبهم هالمرض هذول شنو ذنبهم حتى يتعاقبون،

جميلة::والله انا ماردت اهجم بيتهه ولا ردت اوافق بس انت شفت معاناته وياها، وهم تركته ولا اصريت علي يبقى وسنين هاجرنه وابد ماتدخلت بقرارة والله

ماما تحجي وتجهش بالبكاء، وبشرتها صفراء ك الموت، واكفة قرب الباب بعيد عنهه بس روحي حاضنتهه

ابو مرتضى::اللي صار انتو تزوجتو وهذا شرع الله ، معقولة رب العالمين ينزل الشرع ويعاقب اذا نفذنا، وانتي ماخربتي بيتهه، بيتهه كان خربان اصلا

امرأة سليطة لسان، متباهية، حتى تطلع بلا اذنه، انا ما احب احجي بعرض العالم بس سولفلي سوالف عنهه واصلة مرحلة من انعدام الخلق، حجة عن معاناتة وتعبة ومحاولاته بأصلاحه بس فشل

جميلة::ما ادري شسوي شحجي كل تفكيري راح والله تعبت ماعندي قدرة حتى للصبر، شوف بنيتي شحالهه، خايقة اموت واتركهه لهل ذيابه وخايفة من نهايتي

ام مرتضى::استهدي بالرحمن خية والله اذا وصلوج بعد نروح نشتكي بس لا تضوجين نفسج مو زين عليج، شوفي بنيتج خطية خايفة عليج

تحجي وتبجي، گام مرتضى كعد يمهه حضن كتفهه ويبوس براسهه

مرتضى::عمه بعمري ماتوقعت اسمع هيج كلام منج، بس واضح شكد تعبانة،خلي ثقتج برب العالمين تتغلب على خوفج وبدل متحجين بالموت احجي بالشفاء، رغم الالم والتعب لا تيأسين والله هاي عيونج الحلوة الذابلة فوقها رب يخبئ لها الأجمل، رجعي بقوتج

جميلة::والله ياعمة لو تشوف الموقف اللي نحطيت بي ذاك اليوم اخذ نص حيلي

قبل الجلسات رحنة نشتري اشياء محتاجتهه من السوگ، وشفت صديقاتي بالدوام، سلمت عليهم حيل جنت مشتاقتلهم ماعندي مشاكل وي اي احد بالدوام

::شلونج گلبي والله مكانج خالي ليش هلأجازة الطويلة، انوب حيل ضعفانة سلامات

::يبوو وين عايشة انتي لعد غير طلع بيهه ذاك المرض خطية باع شصاير بيهه

كلمة عابرة، بس شكد وجعت كلبي، والله مثل سهم

مرتضى::صغار عقول يعني شتسويلهم اغبياء علأساس اذا ذكرو اسمه لو كالو سرطان يسوولهه استدعاء اي مو هو بوكيمون