• الرياض تحديداً عند بيت رزنه ( ام لزّام ) |
في المطبخ ترتب المواعين الجديده اللي اشترتها الا دخلت معالي وتناظر بالاكياس والكراتين المرمية بالارض وفوضى المطبخ وقالت : لا اله الا الله وش هذا يا يمه متى رحتي تشترين مواعين جديده !
رزنه : العصر قلت ضايق صدري وفاضيه وناقص المطبخ اغراض ورحت اشتريهم
معالي : والله اني اعرفتس يايمه تروحين على اساس تشترين قدر وملعقة وترجعين بمواعين كامله
رزنه بحنقة : وش عليتس مني يا تساعديني يا فارقيني وراتس
تقدمت تشيل الاكياس وتحطهم بالزبالة (اكرمكم الله)
جُمانه اللي نزلت من غرفتها وتوجهت للمطبخ ، شافتهم يرتبون واردفت تقول: شسالفه يمه بيجينا احد ؟
رزنه : يعني اذا رتبنا معناه بيجينا احد ! لا كذا نرتب بدل ما نجلس على الفاضي
حز بخاطرها اسلوب والدتها وراودها شعور وتفكير ؛ لهدرجة صرت حساسه ! او صدق اسلوب امي يزعل ، التزمت الصمت ورجعت لـ غرفتها
لاحظت معالي اللي حصل بـ جمانه وكونها عارفه ايش جمانه تمر فيه ، اردفت بضيق : يمه وش هالاسلوب اللي تعاملتي به مع جمانه !
رزنه : لا وش رايتس تعالي اضربيني
معالي بتحكم بأعصابها وهي عارفه تماماً ان هذا كله من تحت رأس عفايف : يمه ليش كذا ابي افهم وش له داعي كلامتس يعني حنا ما سوينا شي ممكن إنتس تعصبين منه ، وحالة جمانه وانتي عارفه وش تمر فيه ومفروض كلنا نكون حنونين معاها ،، طلعت لـ غرفة جمانه ولا سمحت
لـ والدتها تتكلم لانها اختارت الصمت
جلست على اقرب كرسي وقالت بينها وبين نفسها : غلطتي يا رزنه يوم سمعتي كلام عفايف غلطتي وجدا
,,,,
• الجبيل | عند بيت جملا |
جالسين يتقهوون الا اردفت الجوهرة بترجي: يمه تكفين متى نروح لـ خوالي
جملا : مسعود انت خلصت شغلك لان ماحد موقفنا غيرك
مسعود : اي خلصت ولكن متى تبون نمشي !
الجوهرة بحماس : بكرا !
مسعود بوهقه : وين يابوي انتي ! انا مابعد جهزت شي ويبي لي اغراض
جملا : اسمعني من بكرا تشتري اغراضك لان العصر بنمشي
نقزت من مكانها وقالت : يلا بروح ارتب نفسي واتجهز
مسعود بضحكة : والله المهبوله
جملا ببتسامة : خلها على هواها
—
عند غرفة جمانه ، دخلت عليها وشافتها على سريرها مستلقيه قربت لناحيتها وقالت : جمانه بخاطرتس نطلع نغير جو ؟
قامت وتنهدت وهي تقول : العله داخليه يا معالي انا تعبانه وصلت مرحلة التعب اللي يهد حيلي مليون مرة
معالي : قولي لاحول ولا قوة الا بالله اذا ما ساعدتي نفستس ماحد بيساعدتس والله العظيم مااااااحد
جمانه بتردد : في وحده من البنات قالت لي احجز جلسة اونلاين ولكن انا متردده وخايفه
مسكت يدها واردفت بتفاؤل : اسمعيني زين حاجز الخوف هو سبب كل شي يعني سبب خسارتس سبب المشاكل اللي تواجهينها ، وش بيصير اذا تقدمتي وكسرتي هالخوف ! بيضرتس شي ! اكيد لا عشان كذا احجزي
جمانه ببتسامة يغشاها الحزن : تمام
——
• ديرة هياما | تحديداً موقع الحدث
الجد برّاك تقدم واردف يقول : ونعم ولكن وش تبون بديرتنا وش القضية ؟
لزّام : القضية ثنتين الاولى خطف بنت والثانيه ترويج مخدرات
انصعقوا والكل بدا يلتفت لثاني بدهشة ، العم عايض تنحنح وقال : وهل القيتو القبض على اللي سوا هالفعيله!
لزّام : للحين ندور عليهم اللي نبغاه منكم تعاونكم معانا اي طرف خيط يدلكم للمجرمين اعطونا اياه
حسين ( ابو قوت ) : حنا معاكم واللي تبونه ابشرو
رفع يده بمعنى التوديع: نستأذنكم
حسين ابو قوت : الله يقويكم ،،
رجعو لجلستهم والكل يتكلم مابين الخايف و المندهش و المصدوم الا يقطع حسهم صوت الجد برّاك وهو يقول : اذكرو الله يا جماعه واللي حصل عز الله انه شي يسود الوجه والله يسود وجه كل من تعاون مع هالمجرمين
ابو متعب : اي والله يا برّاك الله يسود وجيهم
رجع من مطبخ الذبايح ووقف واردف يقول : اقلطوا يالربع العشاء جاهز
الكل بدا يقوم ومابين اللي يقول بسم الله ومشينا واللي يقول توكلنا على الله وتوجهوا يتعشون ،،
-
•حوش الجدة شيخه | الكل مجتمع البنات والامهات يتقهوون الا يسمعون صوت المداهمات والشرطة ورا البيت وبضبط عند موقع بيت المهجور الشعبي ، فزت من مكانها تركض فتحت الباب الخلفي بشكل خفيف تشوف وش صاير الا تنصدم المداهمه اللي حصلت والعسكر والمباحث ازفرت براحة ان كل شي تم ورجعت لمكانها ، هيا ام زينه اللي كانت خايفه وتتصل على فهد ولا رد اردفت بضيق وخوف : يالله اني استودعتك عيالي
قوت : تطمني مهوب حاصل لهم شي
ام قوت : يابنت انتي من وين لتس هالقلب ثلاجة الدنيا قايمه وانتي بارده
قالت بغمغم: لان كل شي تمام يعني الحمدالله ابوي وعمي والعيال مو راعين بلاوي عشان نقول بيجيهم شي
زينه بتأييد : صادقه يايمه وياخالتي لطيفه كل شي كويس معليكم
كانت بتتكلم الا قاطعها صوت جوالها اللي رن ورفعته لناحيتها تشوف مين المتصل ! الا رقم مو مسجل ، ردت والتزمت الصمت اردف صاحب الاتصال وهو يقول : اذا حولتس احد قومي لمكان بعيد ابي اتكلم معاتس على انفراد ، ارتعشت خلايا جسمها اول ما ادركت صوته وعرفته
قامت من مكانها وابعدت عنهم
اردفت بصوت متذبذب : ايوا نعم ايش بغيت ؟
لزّام : اتمنى انتس فكرتي بكلامي اللي قلته لتس بالشرطة ، لذلك اتمنى تساعدينا باقل الاشياء
قوت بإنكار : اللي عندي قلته بالشرطة
لزّام متاكد انها تعرف شي ولكن تخبي ، قال : اللي حصلناه بالبيت كميات بالهبل ولا ينعدون اللي ابغاه تفكرين باهل ديرتس وعيالهم كم بيت انخرب وسبب ! هالمجرمين وترويجهم
قوت بتردد ولكن فكرت بأهل الديره وفعلاً كل بيت وفيه مشكلة وسبب هالسم اللي يروجونه ، اردفت تقول : سمعت ان عندهم غار او جبل صغير ينخشون فيه وقت يكون عليهم بحث من شرطة ودايم يهربون له ، هذا اللي سمعته بس والله لو فيه شي زياده لا قلت لكم وساعدتكم ولكن مافيه
ابتسم وحس بالانتصار لان وقع التوقع اللي كان حاطه بباله ، اردف وقال : يعطيتس العافية يابنت ديرتي ،، قفل المكالمة ولا سمح لها ترد
قوت اللي توجهت للجلسة وتتكلم مع نفسها تقول : وش سمعته بنت ديرتي!! انهبل ذا على طول حس بالانتماء لديرة ؟ اقول شكلي سامعه غلط ولا وش يجيب واحد بالرياض هنا لهياما
زينه اللي حست على قوت تكلم نفسها وقالت : بسم الله عليتس عسى بتس عقل !
قوت بضحكة : تعالي تعالي تخيلي من اتصل علي
زينه : مين
قوت : الملازم لزّام تكفين جتني ام الركب
بشهقه وهي تقول : يويلي ويلاه وش يبي
قوت : ابد يبي يتزوجوني ، شرايتس اكيد يبي معلومة عن المجرمين الله يسلط عليهم
زينه بخوف : خوفي ان يطري اسمتس عند احد من اهل الديره وعاد ديرتنا ماشاءلله بخورر يذيع صيته
خافت من الفكرة اللي راودتها وقالت : لا ان شاءلله هم اصلاً محافظين على سرية المعلومات لذلك ارتاحي
زينه : مدري ليش احس قلبي قارصني بيصير شي
قامت من مكانها وقالت : اقول تعوذي من الشيطان وامشي نروح لعندهم
..
الشرقية | جالسه مع والدها يشربون شاهي وسوالف
وضحكات تشرح الصدر
فارس : يابوي انتي وعدتيني الصباح ان ماعلى قلبتس شي ؟
وجد بقهر مكبوت داخلها : يابوي اللي بداخلي مستحيل اتخطاه ولكن اذا ودك نروح لعندهم زياره ابشر عشان خاطرك
فارس ببتسامة وهو يرشف من الشاهي : اللي ودتس واذا على زياره باذن الله قريب بالاول اتواصل مع حسين واضبط الامر
وجد بضيقة وقالت : ابشر الحين بطلع لغرفتي اخلص اشغالي وارجع
فارس : اخذي راحتس ياحبيبتي ،،
راحت لغرفتها جلست على الكنبة ، حست دنيا ضايقه عليها اخذت الجوال واتصلت على صديقتها المقربه سلوى '
ردت واردفت : هلا وجد
وجد بضيق ودموع تجمعت بمحاجرها: سلوى
حست سلوى بصوت وجد الباكي والضيق اللي اجتاحها ،، وقالت : بسم الله اشبك يابنت ايش صاير ابوك فيه شي !
وجد : بروح للي كانو سبب كل ألم لامي ولابوي
سلوى بتنهيده : يابنتي قولي لااله الا الله وبعدين روحتك عشان خاطر ابوك مو عشان اي احد
وجد : ادري ولكن انا اكرههم ولا اطيق حتى اسمع طاريهم
سلوى بطبطبة: طيب ابيك تردين على سؤالي بكل صراحة طيب!
وجد : تمام
سلوى : خالتي ابتهاج ايش قالت لك اخر مرة !
وجد بعبرة : قالت سامحي اهل ابوك وتعايشي معاهم مو عشانهم عشان ابوك لانه ترك اهله وديرته عشاننا وضروري حنا نترك رضانا وكل شي عشانه ،، بكت بكاء يكسر القلب ، مابين حقد انتقام البُعد ومابين فكرة ترك هالشي لاجل خاطر والدها ورضاه كونه عاش كل المعانات والالم وباخر الاواني من عمره تعبت صحته ونفسيته ،،
ازفرت بضيق وقالت : وهذا اللي بسويه بترك كل شي عشان رضا ابوي وسعادته ولكن مستحيل اسامحهم
سلوى : لاتسامحينهم ولكن تصنعي الرضا عشان ابوك وبس
وجد : باذن الله انا بقفل تامرين على شي
سلوى : سلامة قلبك
قفلو المكالمة ورجعت وجد لابوها وبدت تسولف معاه وتاخذ وتعطي ،،
••
استراحة ال برّاك | بعد ما خلصوا الضيوف والكل راح ومابقى الا العيال
تركي بتعب : يويلي ويلاه يا عظامي راحت فيها
فهد بحلطمة: احمد ربك انا خلوني امسك القهاوي طول الليل واقف ،،
جرّهد اللي جايهم وضحك على حالتهم اللي منسدح على بطنه والثاني ماد رجلينه بالطول ، قال : قومو يلا بنتوجه لاستراحتنا
تركي : خلوها بكرا اليوم مافيني حيل
جرّهد يصفق بيدينه الثنتين ويقول : يلا مافي قومو اشوف
قاموا وشيكوا على الاستراحة وكل شي واتجهوا للسياره ،،
YOU ARE READING
قوت القلوب اللي من الزمن مبليه
General Fictionان ما لزّمت عهد الهوى والمحبة عقبيني الفنجال من بين الرياجيل - ماكن جيتك لديار جدي وعماني الا قوت القلوب اللي من الزمن مبّليه
