Let's Get Divorced! [Completed]

Chapter - 6

စင်စစ် မြတ်ဘုန်းခေါင်၏ တဖြည်းဖြည်း ပြောင်းလဲလာမှုကြောင့်လည်း ပါပါ၏။ သူတို့နှစ်ယောက်ကြား၌ မကြာခဏ ကတောက်ကဆ ဖြစ်တာမျိုးတော့ ရှိပါသေးသော်ငြား မြတ်ဘုန်းခေါင်ဟာ အစပိုင်းတွင်ကဲ့သို့ ရိုင်းစိုင်းမောက်မာခြင်းမျိုး ထပ်မရှိတော့။

သို့ပေသည့် အပြောမတတ်တာတွေကြောင့် အဆင်မပြေဖြစ်တာတွေ ရှိပါသေး၏။ ယင်းတို့ကြောင့် သူရိန်မင်းထင်မှာ ဒေါသထွက်ရတာမျိုး ရှိတတ်ပါသည့်တိုင် အဆိုပါ အပြောမတတ်ခြင်းတို့သည် စိတ်ပြေသွားချိန်တွင်တော့ ရင်ထဲ သိပ်မကျန်ခဲ့စေသော အရာများသာ ဖြစ်ကြသည်။

မြတ်ဘုန်းခေါင်တစ်ယောက် သူ့နံဘေး၌ ငြိမ်သက်စွာထိုင်နေသော ချစ်ရသူကြောင့် ရင်ထဲ တသိမ့်သိမ့် နွေးလာပါသလို။

ထင်းရှူးရနံ့နှင့် ပေါင်းစပ်နေသော မောင့်ကိုယ်သင်းရနံ့ဟာ သူ့အတွက်တော့ တန်ဖိုးကြီး ရေမွှေးရနံ့တွေထက် စွဲမက်စရာ ကောင်းလွန်းပါ၏။ သို့ဖြစ်၍ သူ့စိတ်အစဉ်က မတည်မငြိမ်ဖြစ်လာပြီး မောင့်ကို လှည့်ငေးချင်စိတ်များ တဖွားဖွား ပေါ်ပေါက်လာသည်။

သို့သော် မောင်နေရခက်သွားမည်စိုး၍ ဆန္ဒကို အသိစိတ်တို့ဖြင့် ထိန်းချုပ်ထားရ၏။

သူတို့နှစ်ယောက်၏ ဝတ်စားဆင်ယင်မှုသည်ကား ထုံးစံအတိုင်းပင် ဆန့်ကျင်ဘက် ဖြစ်သည်။ သူက အဖြူရောင် Formal shirt ကို နို့နှစ်ရောင် Pants နှင့် တွဲဝတ်ထားပြီး မောင်ကတော့ လည်ကတုံးရှပ်လက်ရှည်အဖြူ၊ ချည်ချောပုဆိုးတို့နှင့် ဖြစ်၏။

နှစ်ယောက်စလုံး၏ လက်ကောက်ဝတ်တို့ထက်မှ နာရီတန်ဖိုးတို့ကလည်း ကွာခြားလွန်းလှသည်။

"ဒီနေ့ရော အလုပ်များမှာလား"

မြတ်ဘုန်းခေါင် တိတ်ဆိတ်စွာ ဆက်မနေနိုင်တော့၍ မေးလိုက်ခြင်း။ ထိုအခါ မောင်က မှန်ပြတင်းပြင်ပသို့ ကြည့်နေရင်းမှပင် ပြန်ဖြေလာ၏။

"အခြေအနေအရပဲ"

"ပြန်ချိန်ကို မှန်းကြည့်လို့မရဘူးလား၊ ရရင် ငါ အပြန်ဝင်ခေါ်လို့ ရတယ်"

"မလိုဘူး၊ ပီတာနဲ့ ပြန်လိုက်လာလိုက်မယ်"

မောင်က ဤသို့ပြောတော့မှ မြတ်ဘုန်းဟာ ပီတာ၏ နေအိမ်နှင့် သူတို့အိမ်က သိပ်မဝေးမှန်း သတိရလိုက်သည်။ ထို့နောက် တစ်ဆက်တည်း တွေးလိုက်မိသည်မှာ ယခုတွင် သူမောင့်ကို ခေါ်မလာပါက မောင်က ပီတာ့ထံ ဖုန်းဆက်ပြီး အကူအညီတောင်းလောက်သည်ဟူ၍။