وصلنه لبيت حجية بدرية جانت محظرة المواد و المكص طبعا بيتها قديم كلش و بس هي عايشة بيه طبعا شكله يخوف كلش دخلنه اني و امي امي كلتلي :
_ انزعي عبايتج و اكعدي
نزعت العباية و اني جنت ميتة خوف عافتني امي و كعدت وحدي هواية ردت اروح و انهزم بس جانو راح يلكوني و ميعوفوني بحالي سمعت صوت حجية بدرية كالت :
_ يلا نريد نخلص من وكت
طبعا اريد رجليه تشيلني مشالتني جنت خايفة كلش شلون يصير هيج ليش يسون هيج بالبنات ؟؟ اريد بس اكول انو عادي و ماكو شي بس مجان ينفع جنت ارجف .. دخلت حجية بدرية ويه امي عطت بوجهم :
_ مااااريد .. مااتسوولي هل شي لو تموتون
طبعا انهاريت من الخوف و صرت عصبية كلش و جنت بس اعيط و ابجي طبعا امي جانت تبجي عليه و تقربت يمي :
_ يمة يلا الله يهديج
ضاجت حجية بدرية و كالت :
_ ااااف شلون بينه بدلع البنات
اني جنت بزاوية الغرفة و جان يمي بطل مي شلته و شمرته ع حجية بدرية وره مكالت هيج هي ضخمة كلش و سمينة و اني جنت ضعيفة وزني 50 كيلو صارت عصبية و اجتني ركض و سحلتني من شعري و كالت لامي :
_ تربعي تربعي حطيها بحضنج
امي ع سريع كعدت و شمرتني بحضنها حجية بدرية طبعا اني جنت بس اعيط و ابجي اريد افلت من ايدهم بس مخلوني جانو اقوى مني .. امي لزمت راسي و حطته بحضنها و لزمت ادية مخلتني اتحرك و حجية بدرية كعدت و فتحت رجلية اني من كد مجنت اعيط و ابجي نهاريت و اغمى عليه مكعدت الا و كلشي منتهي فتحت عيوني لكيت نفسي بعدني بيت حجية بدرية بس شنو ملابسي و اديه كلها دم و المكان بيه دم هواية مجان بيه حيل حتى احرك اصبعي من الوجع جنت احس نفسي مخدرة حتى مجنت اشوف زين سمعت وحدة دتحجي يمكن امي :
_ يلا جيب السيارة و تعال ملابسها كلها دم
_ جاي يمة
_ منتظريك وليدي
اجه ادم علمود دياخذني جنت ماكدر امشي منتهية و نمت قبل ميجي ماريد اشوف وجهه هم حاسب نفسه اخ .. اجه و شالني لان جنت شبه فاقدة الوعي و نمت كعدت ثاني يوم ساعة 10 الصبح امي جانت مسبحتني طبعا نفسيتي جانت متحطمة كلش و مااكل و لا الي نفس اسوي اي شي بس جنت خايفة كلش ع عمار اريد اعرف شبيه شسوه شلون صار جنت بس صافنه من كعدت لحد مدخلت امي للغرفة :
_ فجر يمة لازم تاكلين
اني بس سمعت صوت امي بديت ابجي لان ممتحمله اشوف او اسمع صوت واحد بيهم :
_ فجر يمة بس باوعيلي اسمع شراح اكلج العصر راح يجن نسوان ويه شيوخ عشيرتنه علمود يتاكدون انو احنه سوينالج ختان و يجيبون عمار علمود يخطبج .
طبعا اني مسحت عيوني و كمت حجيت ويه امي :
_ صدك يمة
_ اي والله و يخطبج و تزوجيه
ضحكت و لدقيقة نسيت الوجع و اكلت و ساعدتني امي حتى اكوم و البس هدومي صارت ساعة 6 العصر و اجو شيوخ عشيرتنه و النسوان طبعا الفرع كله جان يحجي بفضيحة فجر و الحمدلله اني مااطلع خارج البيت جان متت قهر المهم دخلوو للبيت امي كلتلي :
_ اكعدي هسة اصيحهن
_ ماشي يمة
اجن النسوان و تأكدن انو اني مسوية ختان طبعا جنت مقهورة كلش بس كلشي غصب عني شسوي شبيدي ماادري .. خلصن النسوان و تأكدن و طلعن كالن لشيوخنه اني كمت ردت اشوف عمار .. رحت يم غرفة الخطار و شوية رفعت البردة و شفت عمار طبعا جان وجهه مبين مضروب قوي هو انتبه عليه و اني باوعت عليه و بتسمت شوية كل فكري انو راح يخطبني .. سال شيخ العشيرة عمار سؤال :
_ انت عندك استعداد تتزوج فجر و تستر عليها
باوع عليه عمار و كال :
_ لا .. مامستعد اتزوج وحدة تهدم مستقبلي بسببها شيخنا اني راح احجيلك السالفة فجر خابرتني و كلتلي اكو حرامي يم البيت و اني اجيت اشو لكيتها ...
_ خابرتك ؟؟؟ ليش عدها موبايل .. الظاهر جنه غلطانين بتفكيرنه بيك ادم
_ شيخنه والله هسة اموتها
عمار كام و كال :
_ اني اعتذر من ادم بس الصوج مو بيه هو مداير باله ع اخته اني اجيت و جنت ع نياتي شمعرفني اخته هيج
_ يعني متدري انت عمار لا شيخنه و اني حاط عيني ع بنية و اريد تخطبولي ياها و اني احبها للبنيه شلون اسوي هيج ويه فجر
_ ادم اختك نزوجها لواحد من ربعنه و نسترها و انت عمار مراح ناخذ منكم فصل و لا تعوف كليتك و عيش حياتك وليدي والله صدك كيدهن عظيم
_ يسر الله امرك شيخنه
كامو الشيوخ و كام عمار باوعلي بنظرة مال حقارة و راح يعني ليش هيج ليش طلع مو رجال ليش راد ينقذ نفسه بس ليش اتهمني هيج تهام و شوه سمعتي و طلعني ماعندي شرف طبعا اني ركضت بسرعة وره مطلعو لغرفتي و كمت ابجي ابجي حيل باوعت ع نفسي لكيتني دانزف قوي اغمى عليه .
