LOVE WITHOUT BOUNDARIES

CHAPTER 62

Masaya kong pinanood sina Bree at Kuya Kev na paulit-ulit sa pagpupunas ng sasakyan. Paroo't parito sila na para bang may ikikintab pa ang sasakyan. Pinanood ko rin silang buuin ang silong para sa sasakyan, para raw hindi maarawan 'yon ani Kuya Kev. Magkakasabay kaming nananghalian at nagkuwentuhan nang bumalik sa ginagawang silong. Nilutuan ko sila ng maruya noong hapon, magkakasama uli kaming nagmeryenda. Bago dumilim ay nagpaalam kami kina nanay at tatay na maggagala gamit ang sasakyan sandali.

Dahil sa bonding naming iyon, nalimutan ko kung bakit ko nilapitan si Bree Anabelle.

Nakapanlulumong dumaan ang buong linggo na hindi ako binigyan ng pagkakataong mag-usisa nang tungkol doon. Maging si Maxrill Won, mabagal kung sumagot sa mga text ko. Nakontento kami sa kumustahan, at halatang pareho kaming sabik sa mahabang usapan.

Ibinuhos ko ang mga dumaang araw sa school at pagre-review. Finals na, kailangan kong paghandaan iyon. Gusto ko ng magandang record, makatutulong 'yon sa application ko sa pagkuha ng specialization.

"'Tay?" Lumapit ako nang maratnan ko ito sa sala isang tanghali ng weekend. Sigurado akong hindi siya abala dahil palipat-lipat siya ng channel sa TV, mukhang walang mahanap na panonoorin.

"Oh?" naro'n pa rin sa telebisyon ang paningin ng aking ama.

Ngumiti ako at naupo sa tabi niya. "Busy po ba kayo?"

Nakakunot ang noo ni tatay nang lingunin ako saka muling tinuon sa telebisyon ang paningin. "Hindi, naghahanap ng ako ng mapapanood. Hanapan mo nga ako ng action," inabot niya sa 'kin ang remote.

"Action...?" usal ko habang nililipat ang channel.

"Oo, at pakitutok mo sa 'tin ang electric fan, napakainit."

"Opo." Mabilis ko siyang sinunod. "'Tay?"

"Oh?" naroon din sa TV ang paningin ni tatay.

"No'ng nakaraan pong nasa ospital tayo...si Kuya Bentley po ang tumingin sa 'tin."

"Sino naman 'yon?"

Napabuntong-hininga ako. "'Yong gwapo pong doktor na tumingin sa atin?"

Natatawa niya akong nilingon. "May iba palang guwapo sa paningin mo maliban sa nobyo mong ungas?"

Ngumuso ako. "Tatay naman, eh."

"Oh, ano naman ngayon kung 'yong doktor na 'yon nga?" napakaistrikto talaga niya.

Napabuntong-hininga ako, mainit agad ang ulo ni tatay. Siguro, dahil hindi agad ako nakahanap ng action.

"Ano po kasi..." Hindi ko alam kung paanong dederetsahin si tatay. "Tinawag niya pong...Miss Park si nanay," mayamaya ay patuloy ko. Hindi umimik si tatay. "Ang alam ko po kasi...Del Valle si nanay."

"Si Maximor ang Del Valle. Iyon ang apelyidong gamit ng mga Moon sa bansang 'to," mahihimigan ang inis sa tinig ni tatay. "Hindi kailanman naging Del Valle ang nanay mo." Naroon pa rin sa TV ang paningin niya bagaman sumasagot sa 'kin. "Maghanap ka ng action, Dainty."

"Pulos pambata ang palabas, 'tay, eh."

Bumuntong-hininga siya, inis talaga. "Hindi ba't may pelikula ng ganitong oras? Tsk." Binawi niya ang remote sa 'kin at siya ang nagpatuloy sa paghahanap.

"'Tay, 'yong tungkol po sa pagtawag ni Kuya Bentley ng—"

"'Yon ang apelyido ng nanay mo, Park. Iba ang lahi niya, gano'n sa nobyo mo."

"Kung gano'n po...taga-North Korea rin po si nanay?"

Nilingon ako ni tatay. "Alam mo ang tungkol doon?" bakas ang gulat niya. "Alam mong taga-Norte ang ungas na 'yon?"