حواديت مالك البسمه 🤎🫀

٨

" كوبايه شاي بالنعناع في عز النهار .. صوت تواشيح النقشبندي خارجه من الرديوا تطبطب علي القلب ، كنت واقفه بحضر فطار ليا و لجوزي ..جوزي دي كلمه غريبه بحاول اتعود عليها "
- صباح الخير يا بسمه
- صباح الخير ، حضرتلك الفطار
- تسلم ايدك بس انا هاخده معايا اكله في السكه عشان متأخر .. و اه اعملي حسابك أن شاء الله بعد اما ارجع هنزل نشتري شويه حاجات عشان رمضان كمان يومين ، كل سنه وانتِ طيبه
- وانت بالصحه و السلامه ... تمام قبل ما توصل رن عليا عشان اجهز
- تمام مع السلامه

" بقالنا شهر متجوزين و قصتنا بعيده تمام البعد عن قصص الحب الاسطوريه اللي كانت في دماغي و اللي كان نفسي اعيشها ، جوازنا جواز صالونات عادي بحكم اني قعدت من الدراسه في الثانوي و مبقاش عندي حاجه اعملها فا بقا معندهمش غير اقتراح واحد " اقعدي في البيت لحد ما يجيلك عريسك " ، دا مش اللي أنا  كنت عيزاه ولا اللي اتمنيته بس اهو زي ما بيقولوا النصيب ، قعدت علي السفره قدامي كوبايه الشاي بالنعناع و السندوتش بتاعي بصالهم بس مش قادره اكلهم متعودتش اكل لوحدي ، اخدت نفس و قومت شغلت اغاني رمضان يمكن حاجه تغير مودي حابه " افرحوا يا بنات يلا و هيصوا ..رمضان اهو نور فوانيسوا " ..واقفت خلصت كل اللي ورايا و فضلت قاعده لحد ما جتلي مكالمه منه ، جهزت نفسي و نزلت ، الشوارع كانت جميله بشكل مبهج زينه متعلقه في كل شارع و فانوس متعلق في نص الشارع ... الناس فرحانه و مبسوطه لأن شهر الخير علي الابواب .. دخلنا السوبر ماركت اشترينا بلح و مستلزمات رمضان و طبعا هتجنب الكلام عن الزحمه ، و اشترينا زينه رمضان و فانوس كبير ، بس واحنا ماشيين وقفني فانوس صغير لونه ابيض جواه شمعه منوره شكله حلو اوي "
- وقفتي ليه في حاجه عيزاها من هنا
- ها...لا لا يلا كده خلاص
- اه تقريباً
" روحنا ناحيه العربيه و حطينا الحاجه فيها و روحنا البيت بدأنا نخرج الحاجه و قعدنا نتعشى مع بعض في جو من الصمت ...لسه مش عارفين نتعود علي بعض ... مهما حاولنا مش عارفين أو ...أو يمكن أنا اللي مش عارفه "

                                      ****
- صباح الخير
- صباح النور ... انت مش رايح الشغل انهاردة ولا ايه ؟
- لا هنبتدي نجهز البيت اكيد مش هسيبك لوحدك
- مش فاهمه
- أنا عارف انك بعد ما أنزل هتشيلي السجاد و تنفضي واكيد مش هسيبك تعملي كل دا لوحدك فا قررت أن هأجز انهاردة عشان اساعدك
- بس انت كنت قايل انك ليك يوم واحد بس تأجز فيه
- دي حقيقه
- يعني انت كده مش هتأجز اول يوم رمضان
- انتِ اضايقتي ؟
- ل..لا لا ...الاكل هيبرد
" برغم زعلي اني هفطر اول يوم لوحدي لا أن اليوم كان حلو ، ساعدنا بعض في كل حاجه ، احساس حلو أما تحس انك مش لوحدك أن فيه حد معاك عارفك و مش عايز يسيبك لوحدك ، نضفنا البيت كله سوا و جيه دور تعليق الزينه "
- هنعلقها هنا احلي
- لا هنعلقها هنا لحد اخر الصاله علي شكل زجزاج هتبقي احلي
- شكل ايه
- زجزاج
" ضحك و بعدها قال "
- اللي تشوفي دا بيتك اعملي فيه اللي يريحك
" الكلمه كانت غريبه شويه عليا .. خلصنا  و هو دخل ياخد دش و انا فضلت واقفه من بعيد ببص علي البيت و قد ايه شكله بقا مبهج ، اول مره اخد بالي أن بقا ليه مملكه خاصه بيا ، اول مره احس أن دا بيتي بجد و انا بزينه زي ما انا عايزه ، معرفش ليه بس حسيت اني فرحانه "
- نتفق اتفاق
- بسم الله الرحمن الرحيم فزعتني يا مالك
- اسمي طالع منك زي العسل
- ايه ؟!
- ايه في اي
- كنت بتقول حاجه اتفاق ايه
- اه نتفق اتفاق الفطار عليكي و السحور عليا مواعين السحور عليكي و مواعين الفطار عليا امين
- مفيش مشكله يعني أنا ممكن اعملهم كلهم
- لا طبعا ايه الكلام دا .. دا بيتنا و هنشيله سوا و مع بعض مينفعش تبقي واقفه في المطبخ تعبانه و صايمه و بتعملي اكل و تيجي انتِ كمان تغسلي المواعين  دا مش عدل
" فضلت واقفه قدامه بصاله بس مش قادره اتكلم بصاله و ساكته بس "
- ايه سرحتي في ايه ؟
- ولا حاجه
- خلاص اتفقنا
-  اتفضل بقا علي المطبخ
- ليه ؟
- هنتسحر ولا مش هتسحرني
- أنا قولت السحور عليا
- اه
- يقطعني ..اه صحيح استني عايز اديكي حاجه
" دخل الاوضه و بعد دقيقه خرج و في أيده علبه "
- ايه دا
- افتحي و شوفي
" فتحت العلبه كان فيها فانوس ..نفس الفانوس اللي شوفته و عجبني بصتله بفرحه  فابتسم و قرب مني لاول مره و باس راسي "
- كل سنه وانت طيبه و بخير ، اول رمضان لينا سوا و إن شاء الله مش الاخير
" قال كلامه و دخل المطبخ .. حركه بسيطه قدرت تحرك قلبي من جوا .. حركه بسيطه منه خلتني اشوفه بنظره تانيه ، قعدنا سوا نتسحر في جو جميل و هادي .. اذن الفجر لبست اسدالي و كنت هصلي "
- بتعملي ايه
- هصلي الفجر
- لا تعالي هنصلي جماعه
- حاضر
" صلينا سوا و بعدها قعد علي الارض و انا قعدت جنبه بدأ يقرأ قرأن بصوت عالي و صوته كان حلو و هادي يدخل القلب  ... حسيت بسكينه و هو بيقرأ ريحت قلبي ، ومعرفش ليه حسيت نفسي عايزه اعيط دقايق و دموعي مكدبتش خبر و نزلت و قف قراءه قران و بصلي "
- مالك بتعيطي ليه بس
- معرفش ..
- فيكي ايه قوليلي يمكن ترتاحي
- لما تدعي بحاجه و يكون نفسك فيها و متتحقش هتحس بأي ايه
- هزعل شويه عشان الحاجه دي نفسي فيها و بعدها هفتكر قول الله سبحانه وتعالى {وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ} .. ببساطه جدا الحاجه دي لو خير ليا ربنا كان ادهاني لكن عشان هي مش خير ربنا حرمني منها و بإضافة أن كمان لازم يكون عندي ايمان في قلبي أن اكيد ربنا هيعوضني بحاجه احسن منها تنسيني أنا كنت عايز اي اصلا ، أنا معرفش أنتِ كان نفسك في ايه و اتحرمتي منه لكن صدقيني ربنا احن علينا من نفسنا و عالم بالي في قلوبنا ربنا سبحانه وتعالي قالنا { يا عبدي لو علمت كيف ادبر لك امرك لعلمت يقيناً اني ارحم بك من امك و ابيك } ، قوي يقينك بالله خلي قلبك عمران بالإيمان و ثقه في الله
- ونعم بالله ، أنا هقوم انام
- بسمه
- نعم
- ابويا و امي و اخويا و مراته جايين يفطروا معانا بكره
- انت بتهزر صح
- لا ليه
- أنا خايفه أنا مش عارفه هتعامل معهم ازاي ... دول مجوش زارونا غير مره واحده
- خايفه ليه بس اهدي مفيش حاجه دول بشر عادي زينا مش زومبي
- مقصدش بس....
- اهدي مفيش حاجه مستاهله كل التوتر دا انا هبقي معاكي و بعدين لازم تتعودي علي التعامل معهم لأن هنروحلهم مره هما هيجولنا مره و بعدين انتِ لسه مشوفتيش لارا هتعشقيها ..اليوم هيبقي حلو و زي الفل تمام
- تمام تصبح علي خير
                                       ****
" فضلت واقفه في المطبخ متوتره كأني اول مره اطبخ كنت خايفه يطلع الاكل مش مظبوط ، كنت عامله صنيه بطاطس بالفراخ في الفرن و محشي "
- تسلم ايدك الاكل زي العسل
- انت بتهزر يا مالك انت دوقته عشان تقول زي العسل
- لا بس انا عارف ان اي حاجه ايدك بتلمسها هتبقي زي العسل
" كنت لسه هرد عليه لكن قطعنا صوت رنه الجرس ، وقفت عدلت نفسي بسرعه "
- في اي حاجه فيا
- ايه يا بنتي كل التوتر دا بس ليه كده
- مش عايزه اطلع وحشه قدام اهلك يا مالك عايزه اشرفك قدامهم
- والله أنتِ مشرفاني منغير ما تعملي اي حاجه
- ها
- بقول هيتحنطوا علي الباب يلا
" خرجنا و فتحنا الباب سلمنا عليهم و لكن الغريب سلامهم ليا كاني اعرفهم من سنين ، قعدنا سوا في جو عائلي اه ارتحت شويه بس كنت لسه متوتره مالك لاحظ دا و جيه جنبي و مسك ايدي بالراحه و فضل يطبطب عليها "
- لارا يا قلب عمو .. تعالي سلمي علي طنط بسمه
" بصراحه مالك كان عنده حق أما قال هتعشقيها ، قربت مني و فضلت قاعده في حضني و مش راضيه تسيبني جميله خالص في ملامحها و طريقه كلامها و تحس انك عايز تاكلها اكل "
- باين انك بتحبي الاطفال يا بسمه
- اه جدا مين مش بيحبهم
- يلا شدي حيلك عايزين نشوف عيالك
"  ابتسمت ابتسامه خفيفه و رجعت العب معا لارا  اتلهيت معاها لحد ما قرب اذان المغرب فا قومت عشان احضر الاطباق "
- بتعمل ايه
- بساعدك
- مالك
- نعم
- أنا خايفه
- من ايه
- ميعجبهمش الاكل
" سحب ايدي و طبع بوسه عليهم "
- هيعجبهم متقلقيش
" خرجنا و بدأنا نحضر السفرة سوا أنا وهو ... وبعدها إذن المغرب قومت وزعت تمر عليهم و بعدها روحنا نصلي الرجاله لوحدهم و الستات لوحدهم و بعد ما خلصنا روحنا نفطر ... فضلت قاعده باصه عليهم و بحاول اترجم ملامح وشهم "
- تسلم ايدك يا مرات اخويا بجد مدوقتش بطاطس بالطعامه دي قبل كده
- لا والله
- البس يا معلم
- لا يا حبيبتي مش القصد والله بس دا ميمنعش أن البطاطس حلوه بردو
- أنا هعفوا عنك المره دي عارف ليه
- ليه يا تري
- عشان فعلا الاكل حلو بجد تسلم ايدك يا بسمه
- بالهنا والشفا علي قلوبكوا 
" مالك قرب من ودني و همس "
- مش قولتلك اي حاجه بتلمسيها بتبقي زي العسل
" ابتسمتله و بعدها بدأت اكل و بعد شويه لقيته قرب مني تاني  "
- أنا ملاحظ انك مابتكليش فراخ
- مش بحبها
- لا مفيش الكلام دا هتحبيها و انا هفصصلك بايدي
" كنت مستغربه و مبسوطه في نفس الوقت اهتمامه بيا قدام أهله منغير ميتكسف ..حسيت لوهله اني بنوته صغيره و ابوها قاعد جنبها بيفصصلها الاكل ، اليوم خلص بسلام الحمدلله و بعد ما نضفنا البيت سوا عملنا كوبايتين شاي و دخلنا البلكونه "
- القمر مش باين صح
- اه
- طبيعي مهو عشان واقف هنا جنبي
" ضحكت علي طريقه كلامه و بصتله "
- انت كلامك غريب بس الأغرب انه بيعجبني
- طب والله دي حاجه كويسه جدا
- معندكش فضول تعرف أنا كنت بتمني ايه و ماخدتوش
- بصراحه الفضول قتلني
- من زمان وانا بحلم بحكايه حب اسطوريه زي اللي بتيجي في الافلام و الروايات كده الي هو البطل بيحب البطله و قصه حبهم تبقي علي كل لسان و ينقذها و الكلام دا
- اه اه دي افلام هندي دي حفظها صم و البطل يطير بالبطله و الكلام ده
- ههه اه بالظبط البطل يطير
- مهو طبيعي استحاله تاخدي اللي بتتمني مهو مفيش انسان بيطير في الحياه الواقعيه و الديناصورات انقرضت خلاص
- يا بني استني بس و سبني اكمل كلامي
- قولي يا ست الناس
- بس يعني فا أنا كان نفسي اعيش قصه حب كده يعني فهمني و اتجوز عن حب بس دا محصلش و اتجوزتك انت
- ايه اتجوزتك انت دي ليه حاسس ان الجمله فيها ذم
- لا والله مقصد ، بس الفكره اللي انا بتكلم فيها أنه معشتش قصه الحب الاسطوريه اللي كان نفسي فيها بس..
- بس
- بس انا عشت قصه تانيه .. قصه خاصه بيا انا وبس .. اخدت بالي أنا كل القصص شبه بعض لكن قصتي أنا مختلفه ... من ساعة ما اتجوزنا و انت صابر عليا و بتتقي ربنا فيا مجبرتنيش علي حاجه و لا مره اذتني في الكلام  كل دا غير فكرتي عنك و فتح قلبي اللي قررت اني افضل قفلاه
- من يوم ما شوفتك يوم الرؤيه الشرعيه و أنتِ ساكنه قلبي ... شوفتك و قلبي قالي بس هي دي ... هي دي اللي انت بتدور عليها ... عشان كده اي حاجه عملتها عشانك أنتِ تستهليها ... أنتِ غاليه بنسبالي
- حافظ علي قلبي يا مالك 
"ضم  ايدي لايده و بأسهم و ضمني ليه "
- قلبك دا غالي و اوعدك أني هحافظ عليه 
" قلبي فرح بعد فتره كبيره فرح ... حاسه اني عايزه اتنطط من الفرحه قعدنا سوا جنب بعض أيده حاضنه ايدي و ميله راسي علي كتفه"
- بسمه
- نعم
- أنا آسف عشان مبطيرش
" ضحكت و ضميت أيده جامد "
- مش بقولك كلامك غريب بس بحبه
- وانا بحبك أنتِ

" و تشاء انت من البشائر قطرتاً و يشاء الله أن يغيثك بالمطر "