الفرصة الأخيرة ( باللهجة الجزائرية )

الحلقة 4

الحلقة 4 ؛
زياد؛ آدم ؟
آدم؛ زياد جدي يستنا فيك في بيروه
زياد؛ دوك نهبطلوا .. اهيه واش الفاصمات هاذي سع
(قدم ليها )
آدم؛ زياد دوك

(تلفت غزرلوا )
زياد؛ قلت اني هابط منظنش راك ڨارد كور هنا

(غزرلوا من لفوق للتحت خرج و طربق الباب وراه )
زياد؛ وش كاين ..وشبيه يخزر فيك هكاك ؟! و واش لجراح هاذوا .. 

بيسان ؟؟
بيسان؛ انزل لجدي
زياد؛ اه ؟
بيسان؛ رايحة نرقد منيش قادرة نحكي زياد
(شاف معاها و دور عدا عينيه عالبيت )
زياد؛ محبستش الهدرة هنا ..
(خرج ..كبست على يديها .. رمشت بزربة متحبش تبكي .. حب حياتها واقف قدامها بعد سنين
. مي كلش تبدل مبقات حتى حاجة فبلاصتها .. قدمت تكات فبلاصتها .. تغزر للفراغ .. حتى دموعها و خانوها .. )

..
زياد؛ مفهمتش؟؟ كيفاه مكانتش عايشة معاكم  وين كانت عايشة ؟ و واش حكاية الجراح هاذوك ؟
المقصل؛ زياد وش سبب اهتمامك الزايد بالحكاية؟ قلنا كانت مريضة مكانتش فالدار
زياد؛ اهتمام زايد الطفلة هاذي تربيت معاها ..كيما ختي عام كامل .. نروح بعد سنين نلقاها هكا .. قد ما سييت نتواصل معاها والو .. تقولي مكانتش عايشة معانا  وين ؟!
المقصل؛ كانت فالمصح

زياد؛ فواش ؟ مصح ؟! علاه !!!
المقصل؛ شخصوها ب  اضطرابُ الهويَّة التفارُقي من 5 سنين
زياد؛ كيفاش كيفاش ؟؟! و انا علاه واحد ما حلبني بالحكاية هاذي ؟!
المقصل؛ مكانتش حاجة لازمة
(تنطر وقف )
زياد؛ مفهومنا للحوايج اللازمين يختلف جدي .. بيسان كانت و مزالت و راح تبقا أولوية .. آ على هاذي 5 سنين مقدرتش نوصللها ..

المقصل؛ على جال ردات فعلك هاذي مخبرناكش .. اركح
زياد؛ اللي عملتوه معندوش تفسير .. و انك تبعتني نحكملك شركاتك في فرنسا و تلهيني بالخدمة بش تغطي على واش قاعد يصرا فالدار هاذي متفوتش بالساهل مزلنا نزيدوا نهدروا ..
(جا خارج )
زياد؛ ايه و بعد آدم من طريقي خير و خير
المقصل؛  ولد عمك راهو
(ضحك باستخفاف و خرج )
كريمة؛ (ام زياد ) زياد هيا تتعشى
زياد؛ منيش جيعان
كريمة؛ زياااد كامل تلمينا علاجالك .. و درنا العشا. شوف كيفاه خلصت
زياد؛ بيسان لتحت ؟
كريمة؛ ب بيسان ؟
زياد؛ مكلاه تحصلك الهدرة او قالي واش صرا فغيابي
كريمة؛ طلعولها لعشا لبيتها ومع الدوا تكون رقدت
زياد؛ مالا تعشاو وحدكم كي نجوع نهبط ناكل
(تعداها و مشا .. نفخت )
كريمة؛ رجعت و رجعنا لنفس المشاكل ملقا يخليها تبقا...  غير كي رجع ولدي انا من يومها جرة كي هي كي مها

نفخت و نزلت..
طلع..  طبطب الباب و حلوا لقاها راقدة قدم ليها..  قعد على حرف السرير..  يغزرلها..  هز يدو عداها على فراشها كبست روحها بش متبانش بلي نايضة.. 
زياد؛ الشي هذا كامل صرا فيك و انا لاخبر؟  ..  لهاد الدرجة سيبت فيك؟  ..  واش صرا حتى وصلتي انك تدخلي المصح؟  ..  اضطرابُ الهويَّة التفارُقي؟  .. 
جبد تيليفونو دخل يحوس عليه.. 
فقدان الذاكرة لفترات زمنية، أو لأحداث، أو لأشخاص، أو معلومات شخصية.
الشعور بالانفصال عن النفس والعواطف.
تصور الأشخاص والأشياء المحيطة على أنها مشوهة وغير واقعية.
شعور غير واضح بالهوية.
وجود ضغوطات كبيرة أو مشكلات في علاقات العمل، أو المجالات المهمة الأخرى.
عدم القدرة على التعامل بشكل جيد مع الإجهاد العاطفي أو المهني.
مشكلات الصحة العقلية، مثل: الاكتئاب، والقلق، والأفكار والسلوكيات الانتحارية. 
إلى جانب التفكك والشخصيات المتعددة أو المنقسمة، قد يعاني الأشخاص المصابون باضطراب تعدد الشخصيات من عدد من المشكلات النفسية الأخرى، والتي تسبب ظهور الأعراض الآتية: