حب نتيجة خطا طبي (تتمة)

الجزء المئتين و اثنين

حب نتيجة خطأ طبي
#بارت202♡♡

داز الوقت وتعاشات العشية ومعاذ يالاه رجع من الخدمة مشا دخل سلم على ماماه وعلى رانيا وجلس مجمع مع ماماه ويضحك معاها ناسي كاع واش رانيا كاينة.. اما رانيا لي شافت خنزرات فيه وطلعات لبيتها نيشان تلاحت فوق الناموسية كتبكي اصلا من الصباح كتحس براسها ماشي هي هاديك وطايح عليها الضيم وهاد التصرف لي دار معاذ بحال الى عطاها الضو الخضر باش تبكي وتخوي قلبها...

بقات شحال على داك الحال حتى سمعات الباب تحل عرفاتو غيكون معاذ مشافتش فيه.. معاذ قرب عندها لقاها خاشية وجهها فالمخدة وناعسة على كرشها حط يديه على ضهرها كيدوزها عليه بحنان..

معاذ: رانيا واش نعستي. ؟

رانيا(بصوت مخلط بالبكية): لا منعستش..

معاذ(قرن حواجبو): واش كتبكي ولا شنو..
هزها دورها عندو لقا وجهها فازك بالدموع..

معاذ: رانيا مالك.كتبكي واش شي حد دار ليك شي حاجة؟!

رانيا(كتهضر منفخة): ممالي والو واصلا فاش كيهمك نتا.؟

معاذ: رانيا شهاد الهضرة كتقولي درت ليك شي حاجة؟

رانيا؛ قلت ليك والو رجع عند ماماك ياك خليتك مجمع معاها!

معاذ: شنو دبا واذ نتي كتبكي حيت هضرت مع الوليدة نتي منيتك ولا شنو؟

رانيا: لا اسيدي من حقك تهضر معاها وتجاهلني انا بحال الى مكايناش اصلا شكون انا جينا لهنا غير يوماين هادي ودغيا تبدلتي وليتي من الخدمة للدار وحتى إلى جيتي الوقت كامل مع ماماك ولا زينب...

معاذ(بعصبية): بنتي ليا حماقيتي ولا شنو راه عائلتي هاديك علاياش كتهضري مغاديش نخليهم باش نتي تكوني على راحتك ..

رانيا: اسيدي مقلتش ليك خليهم سوقك هداك ضبر راسك..
ناضت من فوق ناموسية كتمسح دموعها خرجات وزدحات الباب خلاتو كيتعجب لأمرها مالها دغيا تبدلات وهو لي كان جاي باش اعلمها بلي اليوم فالليل كاين افتتاح المشروع الجديد ديال إياد وبلي خاصهم امشيو حيت عرض عليهم ولكن على مبان ليه مبقات لا حفلة لا والو.. تنهد بسخط وناض رما جاكيط ديالو ودخل يدوش يحيد عليه العيا بينما تهدنات شويا تيهضر معاها...

عند منصف سالا الخدمة حتى هو بكري وخرج ركب طموبيلتو نيشان للدار.. وصل وتم داخل لبيتو عند زمرد..

لقاها غارقة وسط الوراق والبيسي الوسط وشعرها جامعاه كعكة مهملة شاداها بقلم.. ومربعة رجليها كتكتب ومركزة..
حتى قاطعها منصف مشا جلس حداها فلارض وجرها من دراعها عنقها بجنب..

منصف: اشنو كديري..
اما زمرد لي مركزة مع قرايتها حتى حسات براسها مجرورة غير من ريحتو عرفاتو بتاسمات بشويا وقالت..

زمرد: خدامة على البروجي لي كنت قلت ليك عليه خاص من هنا يوماين يكون واجد..

منصف: اليوم إياد عندو افتتاح ديال المشروع جديد..
زمرد بعدات عليه وشافت فيه..

#يتبع...