وانا في درب الهلاك ظهرت لي يا ملاك

27

في الجهه الاخرى ينتقل صوته بالسماعه :اي بخير يا عم معليك
ابو سطام :شكلك بتفضفض ؟
وافي تنهد واختفت ابتسامته :ايه
ابو سطام :وش صار ذي المره ؟
وافي :صار كثير مدري من وين ابدا
ابو سطام :مزاجي اليوم يبيك تبدا من النص
وافي ضحك :طيب ببدا من النص
ابو سطام :لحظه بس خلني اصب الكاس
وافي :عشان ارتب الكلام
ابو سطام :يلا قل
وافي :خمن ؟
ابو سطام :ملاك ؟
وافي :واثنين معاها ،مدري يعني وش صار بعلاقتنا كنا ننحرج من بعض وكانت بيننا حدود بس فجأه مدري وش صار يعني بعد الي صار بالمستشفى صارت ما تخاف مني ومن اول كانت تخاف
ابو سطام ضحك :ايه
وافي مبتسم بحزن :وش يضحك ؟
ابو سطام :كمل بس
وافي :وصارت كذا شخصيتها فوضويه يعني ...مشكلجيه صح مشكلجيه تبي اي فرصه تسوي معاي مشاكل كل ما زانت الجلسه قالت ليش تشوفني بالعرس ليش تدخل وليش وليش وانا طفشت يعني قلت لها ترا عيني ماهي عليك واحب وحده ثانيه وتذكرت صديقتها الي جتني بالمحل وقلت لها اسمها سحاب وهي قالت وانا اساسًا بنخطب قريب راشد بيخطبني ...راشد اخو نسيبك وهي ماشاء الله مثل الببغاء كل مره تعلق على موضوع الحين راشد وراشد واذا قلت سحاب زعلت ،انا ما احس بشي لسحاب ولا احس بشي لها بس مدري وش صار تغيرت علي
ابو سطام ضحك :يا وافي ترا ما بينقص منك شي اذا صدقت نفسك
وافي :انا متأكد من نفسي
ابو سطام :لا مو متأكد تعرف ليش صارت مشكلجيه على قولك ؟
وافي :ليش؟
ابو سطام :لأنها صارت تحس بأمان معاك
وافي :وليش يعني ؟
ابو سطام :يا انت صرت غبي ولا تستغبي ولا جاك زهايمر وش سويت بفيصل ذاك اليوم عشان مين ؟
وافي :مو عشانها عشاني اكرهه
ابو سطام :متأكد
وافي :متأكد
ابو سطام : طيب يقولك الشاعر :اهلي ما تقرب لهم خصوصًا ذي البنت
وافي ضحك :يا الله ياعم كيف تفهمني انت وانا مو فاهم نفسي؟
ابو سطام :ببساطه عشت عمر اكثر من عمرك وشربت شاهي اكثر منك
وافي :انا مستحيل احد ينافسني بالشاهي
ابو سطام :اسأل ابوك كم كاس كنت اشرب باليوم
وافي :واسأل ابوي كم برادي اشرب
ابو سطام ضحك:الحين وش بيصير على كذبكم ؟
وافي :انا اكذب بس هي مدري عنها
ابو سطام :حتى هي تكذب ...يا وافي طاوعني البنت تبيك وانت تبيها مستعد الحين اجي واكلم عمك تاخذها
وافي ضحك :ترا ابوي باقي حي لو ابي خطبتها بس باقي مو متأكد من نفسي
ابو سطام :اذا تأكدت من نفسك رح اخطبها قبل ما تسوي اي شي
وافي :انا لو جلست بالرياض احسن لي
ابو سطام :كان صرت تفكر فيها وجيت الديره من ورانا صدقني
وافي :اقصد اول مره
ابو سطام :لا الامنيه بغير محلها كان قلت انا لو ما تعاطيت احسن لي
وافي :الحين تدري ان هيئه التشبيك اتصلوا علي وقالوا ليش تروح لوحده غير ملاك
ابو سطام :يووه الله يعينك ،اشتكت عندهم ؟
وافي يقلد نبره الهنوف : احنا نسوي تحقيقات دوريه واخذنا الكلام منها بقدراتنا
ابو سطام ضحك :ان كان صادقين باخذهم للتحقيقات بالمركز
وافي :ياخوفي بس الهنوف تترك حياتها بالدمام وتجي
ابو سطام :ما استبعد انها تسويها وحتى خذها مني بتمر ريوف وتجيبها
وافي :يا الله الكذبه كانت صغيره شلون وصلت لذي المواصيل
ابو سطام :عواقب الكذب
وافي :الحين بيجون يقومون الدنيا ويقعدونها استغفر الله ما استبعد انهم يحبسونا بغرفه بعدين يدخلون عمي علينا ويقولون شف ولله وافي اختلى ببنتك وسوى فيها كل شي ولازم تزوجهم
ابو سطام :لا ذي استبعدها ما بيقربون للحرام
وافي :اهلها راحوا باقي هي
ابو سطام :خلها تمشى حلال ابوها ماهي قاعده على قلبك
سكت شوي وكمل :يمكن قاعده بقلبك
وافي :استغفر الله بس
ابو سطام :عاد انت تقرر ذا الشي
وافي:جايه ياعم وش اسوي ؟
ابو سطام :وش تسوي يعني تضمها ولا تضربها خلك مكانك
وافي :معصبه تمشي بسرعه
ابو سطام :عطني اياها بكلمها
ملاك :وش تسوي ؟
وافي مد لها الجوال
ملاك :مين ؟حبيبتك ؟
وافي :مدري انتي خذيه
ملاك اخذته :نعم
ابو سطام :يا الله حيها ملاك
ملاك :عمي
ابو سطام :على كيفك تبيني عمك ولا لا ؟
ملاك :طبعًا ابيك عمي ياحظي بعم مثلك بس
ابو سطام :كيف احوالك
ملاك :بخير بس فيه طاقه سلبيه حولي
ابو سطام ضحك :فيه دراسه تقول ان الانسان يروح للطاقه السلبيه برجوله
ملاك :اذا تسمح يا عم عندي حسابات بصفيها وابرد خاطري
ابو سطام :براحتك بس بدون ضرب وتلامس
ملاك :معليك اعرف حدودي
وافي :خلصتي ؟
ضربت الجوال بصدره :قلت لك حسابنا طويل بالبيت بس قررت اخليه هنا مكان واسع
وافي :وش سويت ذكريني ؟
ملاك :كهل
وافي :ايش؟
ملاك :انت كهل تعرف وش يعني كهل
وافي :لا
ملاك :توقع
وافي :يعني ذكي
ملاك انفجرت ضحك
وافي :لا تضحكين
ملاك :ما اضحك اجرب اسناني
وافي :اجل علمينا يا معجم اللغه
ملاك :كهل يعني عجوز قلت لك عجوز لأنك نسيت وش صار الصباح
وافي :اجل ذكريني يالكهله
ملاك :خليتني اروح مع راشد واحرجتني معاه و وجود حبيبتك بمحلي ما يرضيني
وافي :متى صار محلك
ملاك طلعت ورقه من كمها :صك جدي المرحوم مع وصيه كل ما في الديره لياسر واولاده
وافي :بس قال لسميي
ملاك :الاوراق تثبت عكس كذا
وافي :اكيد مزورتها
ملاك :اي طبعًا انا اسمم اكلك وازور ورق عشان تموت وارتاح منك
وافي :عطيني اشوف
ملاك :لا
وافي :عطيني ما باكلها بشوفها بس يمكن اكتشف ان معاك حق واعطيك نص المحل
ملاك :ابيه كله
وافي :لا
ملاك :ولا اخذ نصه بس حبيبتك ما تجي
وافي :ولا خطيبك
ملاك :اتفقنا
وافي :اتفقنا
ملاك بعد ما لفت لتذهب عادت
وافي :وش نسيتي ؟
ملاك :علمت عمي كل شي صح ؟
وافي :وانتي علمتي هيئه التشبيك كل شي
ملاك :وش ذي ؟
وافي :توقعي
ملاك :ريوف والهنوف
وافي :لحول
ملاك ابتسمت :تحسب انك بتعجزني بشي وتضحك لا ياعمري ما قريت خمسميه واربعه وستين كتاب عبث
وافي:طيب ؟ وانا قريت ستين كتاب
ملاك :ذا الشهر ؟
وافي :من يوم ولدت
ملاك :توك بأول المشوار عمرك ثمان سنوات
وافي ضحك
ملاك مستغربه :ليش تضحك المفروض انا الي اضحك
وافي :وجهي تشنج
ملاك :عساه دوم
وافي :وش قررتي الحيوان الي يذكرك فيني ؟
ملاك :ما فكرت تكرم الحيوانات عنك
وافي :اخ يا راسي امسكوني دخت اعمتني ملاك بردودها
ملاك :يمكن مفعول السم بدا
وافي :حتى لو حطيتي سم الشاهي يبطله
ملاك :القهوه افضل
وافي :الشاهي
ملاك :القهوه
وافي :الا بسألك سحاب وش تحب ؟
ملاك :مشتريه من عندك كيلو قهوه وتقول اسبرسو وانت ما تدري وش تحب عرفت وش الحيوان الي يشبهك
وافي:ايش
ملاك :الذبان ينسون ذاكرتهم كل ثلاثين ثانيه
وافي وهو ينظر لعينيها :انسى الاحداث الي ما احبها بس اللحظات الحلوه ما انساها مثل المطر
ملاك انحرجت وحاولت تخفي :والطين
وافي يستفزها:وحبال الغسيل والاعراس وكميرات المراقبه
ملاك :انت حيوان ...
وافي قاطعها وهو يعيد كلامها الذي يتوقعه:ليش تدخل ذاك اليوم ما كان مفروض تشوفني انا اعرف كيف اتصرف
تنهد واكمل :ما ودك تعترفين
ملاك بلعت ريقها :ايش ؟
وافي :ان راشد كذبه
ملاك :وكيف حكمت انه كذبه ؟
وافي :المواقف الي بيننا اكثر من الي بينكم
ملاك :وانت اول مره تشوفها قررت انك تحبها على طول
وافي تنهد :اعترف ما احبها بس اعجاب لا اكثر
ملاك ونبضاتها بدأت تضطرب :ما يهم
لفت ظهرها لترحل ووقف امامها :اعترفي
ملاك :بيننا ماضي وطفوله واسأل اهل الحاره
وافي ابتسم :طيب
ملاك :ابعد
وافي :اذا بعدت بترضين ؟
ملاك :انت تحسبني لعبه لك تزعلني وترضيني على كيفك وانت اساسًا تراضيني عشان تأنيب الضمير بس
وافي :يمكن لأني انسان اخطئ كثير واكتشف خطأي بدري واعدله ؟ ما عمرك كنتي تأنيب ضمير
ملاك :الا صرت لك تأنيب ضمير من بعد المستشفى صرت تحس كذا عشان كذا كل شوي تعتذر
وافي تنهد:وانتي عمرك ما تبين تحسنين الظن فيني وتصدقيني
ملاك :انا ؟ الله يعلم الي بداخلي يوم شفتك تكلم من بعيد قلت يمكن يكلم سحاب بس قلت لا احسني الظن يا ملاك يكلم امه اكيد
تكتف وابتسم :لحظه انتي تراقبيني ؟
ملاك :لا بس عيني طاحت عليك
وافي مبتسم :تكذبين على نفسك بذا المكان الواسع ما طاحت عينك الا علي
ملاك :قاعده احاول اعرف اي فصيله من الحمير انت
وافي :وانا ابي اعرف اي فصيله من الكذابين انتي
ملاك :ما اكذب
وافي :الا تكذبين عيونك تفضحك
ملاك اغمضت عينيها :ما اكذب
وافي استغل اغماضها وحمل غصن صغيرًا من الارض ووضعه على كتفها :وش ذا يتحرك بكتفك
ملاك :وش ابعده ابعده
وافي :غصن
ملاك :ليش ؟ الحين بتجيني حساسيه منه
وافي :ماشاء الله الريحان والمبيد ما تتحسسين
ملاك :ذا سمر انا اتحسس من السمر
وافي :طيب والحل ؟
ملاك :الحل برجع البيت وانت عسى الذيابه تاكلك
وافي :اذا مت قولي لسحاب اني احبها كثير
ملاك :معليك بتلحقك هي ما احب افرق العشاق انا بذبحها وراك
وافي :شكل اخوك صادق
ملاك :ايش
وافي :يقول قرا روايه معاك واحد سكن عند اقاربه وكل يوم اخر الليل يسمع صوت ضحك طلعت بنتهم تحد سكاكينها شهر كامل عشان تذبحه
ملاك :انا لو بذبحك بذبحك بدون ما احد السكين عشان تتعذب
وافي :اول مره اشوف ملاك بذا الخبث
ملاك :على اساس قد شفت ملائكه من قبل يقول الرسول صل الله عليه وسلم لا تدخل الملائكه بيت فيه كلب
وافي ضحك :برافو تستغلين كل حوار لطرفك فعلًا ما قريتي خمس ميه واربعه وستين كتاب عبث بس فيك مشكله
ملاك :ايش؟
وافي قرب منها وهمس :كلمه توديك وكلمه تجيبك
ملاك :رأيك ما يودي ولا يجيب
وافي :بس كلمتي توديك وتجيبك مثلًا لو قلت اني ما نسيت شكلك يوم العرس بتتوترين
ملاك تحاول تخفي توترها :كذاب
وافي :او اذا قلت ...
ملاك رمته بالحصى :اسكت
وافي :شفتي تحكمت بمزاجك
ملاك :وانا بتحكم بمحلي من بكره بتفضي نص المحل وبجيب عمال يبنون جدار بيننا واخذه لي
وافي :طبعًا النص الايمن لي
ملاك :لا غلطان لي
وافي :على كيفك ؟
ملاك تنظر لعينيه بحده :اي على كيفي
وافي :طيب
ملاك ابتسمت
وافي :وش فيك ؟
ملاك :انت فيك مشكله
وافي :ايش؟
ملاك وهي مثبته نظرها على عينيه :نظره تجيبك ونظره توديك
لف وجهه للجهه الاخرى واخذ نفس عميق :استغفر الله
...
ريوف :بتجين ؟
الهنوف :اي وبتعدى الديره الليله
ريوف :انا معاك عندي اوف يومين واساسًا بعد ذي اليومين الويكند يبدا
الهنوف :اهلك بيسمحون ؟ انا ما عندي مانع
ريوف :معليك بيسمحون بس زوجك...
الهنوف :زوجي يسمح وحتى اسمعيه صبر بس ...عادي ريوف تجي معانا ؟
غازي :عا...عادي اي عادي بس لازم اهلها يسمحون
الهنوف :سمعتيه ؟ جهزي شنطتك واقنعي اهلك قولي لهم بنروح عند ملاك عشان اهلها بيروحون عمره وما يبونها تجلس لحالها
ريوف :طيب ما بيروحون هم
الهنوف :الا عمي كلم ابوي بس اجلوها الاسبوع الجاي نقول لهم روحوا معليكم احنا بنجلس عندها
ريوف :طيب انتي يا اختي بتجيبن زوجك يعني ما بترتاحون تجلسون عند ملاك وين بتجلسون ؟
الهنوف ضحكت :ومين قالك بنجلس عندها ؟ انا وياه بناخذ بيت ابوي الي بالديره وانتي بتجلسين عندها بس اختفي تبخري لا تصيرين موجوده اذا شفتيهم تقابلوا
ريوف :يعني تقولين نسوي لهم صدف ؟ جويي
الهنوف :عندنا ذي الاربع ايام نخليهم يتأكدون من مشاعرهم بنفس الوقت نبين للكلبه الثانيه انه ملاك محجوزه لوافي وانا بنفسي بروح اسوي نفسي اسير واقول لهم احنا جينا بنخطب ملاك لوافي بس نبي نايف يخلص ذا الترم ونجي كلنا مع اعمامي ونسوي خطوبه كبيره وحبهم اكبر حب بالعايله ومن الطفوله مكتوبين لبعض ووصيه جدتي وجدي قبل يموتون نزوجهم
ريوف :بس جدي ما وصى وجدتي بعد
الهنوف :حبيبتي ريفو الكذب يجوز في حاله اصلاح ذات البين
ريوف :اجل خلاص انا بروح اجهز شنطتي وارتب افكاري الجهنميه
الهنوف :اذا ما اقتنعوا اهلك هدديهم بالسكين المسأله مسأله حياه او موت
ريوف :معليك بيقتنعون مع السلامه
الهنوف :مع السلامه
غازي وعينه عالخط :متأكده انك مو قاتله متسلسله ؟
الهنوف :انا بسم الله علي
غازي :تقولين لها هددي اهلك بالسكين ليش؟
الهنوف :لأن المسأله مسأله حياه او موت انت تعرف وافي صح شفته بس انا اعرف وافي وملاك ما يصلحون الا لبعض لو يجوز وصفت لك ملاك
غازي بسخريه :لا ماشاء الله عليك تعرفين حدود دينك
الهنوف :وش مسويه ؟
غازي :تبين اخوك يختلي ببنت عمك
الهنوف :مو خلوه ريوف بتكون بينهم وتراقبهم بدون ما يدرون انا مدربتها من الطفوله
غازي :اخر شي ملاك تتزوج سطام مدري شسمه ووافي يتزوج وحده ثانيه وخلاص
الهنوف :الله لا يقولها فال الله ولا فالك
غازي :زعلتي؟
الهنوف :ودي ازعل بس مافيه وقت
غازي ضحك :لا تنسين علاجك باقي نص ساعه
الهنوف :انا اكثر وحده اكره الاسنان والامها وربي ابتلاني فيها
غازي :قصدك انا بلا ؟
الهنوف :لا اقصد ضروسي من يوم خلقت وانا من مستشفى لمستشفى
غازي :اجل انا ايش تعتبريني ؟
الهنوف ابتسمت :عندي لعبه اقول مشاعري لك ولازم استخدم اسمك او معناه وقبل كل شي نقول لك من اسمك نصيب
غازي :ما فهمت
الهنوف :انا ببدا عشان تفهم
غازي :يلا
الهنوف :بفكر شوي بس واكتبها بالملاحظات
غازي :يلا
الهنوف :نقص صوت الراديو
غازي :نقصت
بعد دقائق
الهنوف :جاهزه بقوله
غازي :يلا ننتظر
الهنوف :غازي ولك من اسمك نصيب ،غزوت قلبي ولكن بالحُسنى واحتليت عقلي ولكن برضاي ،أسمعت غزوًا بهذه السهوله غزوًا بهذا السلام أو بإحتلالًا بهذا الجمال أسمعت بمن يسلم مفاتيح قلبه برضاه ؟ إن لم تسمع فأنها انا
التفتت اليه بأبتسامه:وش رايك ؟
بقي ينظر اليها لوقت طويل
الهنوف :غازي طالع بالخط
غازي :الحين انا بحلم ولا حقيقه ؟
الهنوف مبتسمه :حقيقه بس طالع بالخط عشان ما تصير ما تفرق بين الحلم والحقيقه
اوقف السياره بجانب الطريق ونزل
الهنوف بأستغراب :شفيك ؟
سجد على الارض بينما الهنوف تراقبه بصمت
فتحت الباب ونزلت :غازي
وقف بالقرب منها وهي تنفض التراب عن جبهته :مو منجدك
غازي :جتني لحظه ادراك ان دعوات الوتر تحققت وقلت اشكر ربي
الهنوف بسخريه :دعيت ربي بالوتر اني اوصف لك مشاعري بالسياره ؟
غازي ضحك وهو يحضنها :دعيت الله انك تكونين من نصيبي بكل لحظه كنت ادعي بذا الدعاء
الهنوف ابتعدت عنه :وانا ما كنت اعرفك بس كنت ادعي ان الله يزوجني انسان يحبني حب عظيم والحين اشوف دعواتي فيك
حضنها مره اخرى ولكن هذه المره اقوى وكأنه يريد توصيل حجم حبه لها وكأنه يريد الاحتفاظ بها داخله
الهنوف بضيق :تراك كسرت ضلوعي
غازي ابتعد وبقي يتأمل وجهها
الهنوف :يلا ورانا خط
غازي :وش رايك نكنسل كل شي ونجلس هنا بس اتأملك كذا وعاد اليوم القمر ١٤ بس طبعًا انتي بتنافسينه
الهنوف بأبتسامه :يلا غازي ترا باقي انت ما قلت دورك
غازي :لو بديت مارح اخلص
الهنوف :عادي ابي اسمع
غازي :اجل اطلعي السياره
الهنوف بعد ما دخلت السياره تضحك
غازي :عساها دوم وش السبب؟
الهنوف :الحين احنا وقفنا بنص الخط عشان بس نحضن بعض ؟
غازي :اي عادي الحضن من الضرورات القصوى والشوق محد يتحمله
الهنوف :يلا الحين رتب كلامك باقي ما سمعت
غازي :برتجل
الهنوف :يلا بس تعرف معنى اسمي؟
غازي :عرفته قبل ما اعرف معنى اسمي
الهنوف مبتسمه :يلا اسمعك
غازي اخذ نفس عميق :يقال في معاجم اللغه أن معنى أسمك الضحك او الضحك الذي فوق التبسم بقليل ،ولم يكذبوا بهذا فمنذ أقتحمتِ حياتي وأنا مُتبسِمٌ بوجع ولم يكن علاج ذلك الا لقياك يا علاجي ،يا بسمتي وسعادتي ،يا غناي وأغنيتي ،ياحياتي وأكثر من حياتي ،تغنى بأسمك الشعراء كثيرًا ولم يكذبوا ،لك اربعون شبيهًا ولم يصدقوا ،هذا الجمال ليس له اشباه وإنما هو واحد متفردُ كالاله شهدنا بتوحيده نشهدُ لك بجمالك الاخاذ ،فأشهد أن لا اله الا الله ثم أن حُسنك ليس بعده حُسن .
ابتسمت بتوسع وهي تنظر له والدمعه بعينها :غازي صدق انت حقيقه ؟
ضحك :شفتي قلت لك
وضعت رأسها على كتفه وهي تضم ذراعه :هذا ارتجال الحين
غازي :اي واحس مو مقتنع فيه لو رتبته بيطلع احسن
ابتعدت عنه وهي تقول :شكلك بتصير كاتب مثل سميك
غازي :مين سميي؟
الهنوف :غازي القصيبي
غازي :هو الدبلوماسي الشاعر الاديب الوزير الدكتور
الهنوف :وانت الدكتور الحبيب الاديب
قبل يدها واردف :الحبيب تكفيني وتغنيني عن الدنيا وما فيها
الهنوف :صدق ما قد فكرت تصير كاتب ؟
غازي :لا كنت دايم اشوف نفسي بالطب
الهنوف:انا مهندسه بس ما شفت نفسي فيها معرف ليش اخترتها
...
ريوف :يمه تكفين
ام خالد :البنت مع زوجها لو مع اخوها خليتك
ريوف :طيب بعدين هي بالديره بتجلس مع زوجها ببيت ابوها وملاك مسكينه بتجلس لحالها لازم اجلس معاها
ام خالد :بتضايقينهم يحتاجون خصوصيه
ريوف :يمه ترا بس بالسياره ست ساعات ما بدخل غرفه نومهم
ام خالد :لا
ريوف :يمه تكفين اشتقت لملاك حيل والديره امطار ابي اشوفها
ام خالد :لا
ريوف :يمه ولله بسوي لك كل شي بغسل المواعين واطبخ العشا وكل شي بس خليني اروح معاهم
ام خالد :اذا نظفتي السطح اخليك
ريوف :السطح ؟
ام خالد :اي
ريوف :السطح الي محد يطلعه من يوم سويناه ؟
ام خالد :اي ما قلتي بتسوين اي شي
ريوف :طيب ساعه بالكثير بخلصه
ام خالد :وترا بطلع اقيمه على حسب تنظيفك بقرر
ريوف :معليك ازهليها
ام خالد :بدون مساعده
ريوف :ابشري
صعدت الى سطح المنزل وهي تظن أن ما به قليل ،لكن كانت المفاجأه :ياربي وش ذا ما توقعت فيه قطع سيارات لو اركبها الحين تصير سياره
تمشت قليلًا ووقفت بالمنتصف :بس كل شي يهون عشان الحب
تنهدت :من وين ابدا الحين ؟
بدر :تحتاجين مساعده ؟
ريوف :بسم الله ،احتاج بس لا
بدر :كيف لا
ريوف :امي قالت بدون مساعده
بدر :تحسبين انك بجسمك النحيف واصابعك الرقيقه وبشرتك الحساسه بتشيلين ذي القطع ؟
ريوف :اي بشيلها تراني قويه
بدر :بساعدك عشان تخلصين بسرعه بعدين اذا باقي قليل بهرب وقولي لأمي انك سويتيه لحالك
ريوف :ليش تسوي كذا ؟
بدر :على قولك كل شي يهون عشان الحب
ريوف :يا حبيبي تحبها لذي الدرجه
بدر:بتساعديني ؟
ريوف :اي بس بالدور الحين فيه ناس قبلك
بدر :مين ؟
ريوف :وافي وملاك
بدر :طيب لو بتساعديني كيف؟
ريوف :ولله نشوف عاد بفكر بعدين الحين بصفي مخي لملاك ووافي قصتهم قصه
بدر :قوليها واحنا نرتب
ريوف :تخيل طلعت وحده دخلت بينهم اسمها سحاب و . . .
...
ملاك تنهدت :نعم
الهنوف :جايين بالطريق احنا
ملاك :الهنوف حبيبتي انا مو امك ركزي
الهنوف :وانا اعرف انك مو امي عشان كذا ابي ازوجك وافي
ملاك بلعت ريقها:وانا ما ابيه
الهنوف :بلا كلام فاضي الحين افتحي بيت ابوي وشوفيه اذا فيه غبار نادي وافي ونظفوه
ملاك :مسلسل تركي على غفله بننظفه ويطيح فوقي رف ويساعدني واقع بحبه
الهنوف :اتركي عنك الاتراك حبكم اعمق
ملاك :عمق طبقه المويا
الهنوف :اهم شي فيه حب
ملاك :طبقه المويا الفاضيه
الهنوف :الحين بنمر ريوف وبنجي عندكم بس عطيني امك ولا عمي ابي اكلمهم
ملاك :ماشاء الله شكلكم جايين تخطبون من الحين اقول لا
الهنوف :عطيني بسلم عليهم
ملاك :مافيه الا سيّاف
الهنوف :عادي
ملاك :اختي انتي متزوجه نسيتي ولا اذكرك ؟
الهنوف :ما نسيت وبعدين لا تكذبين اسمع صوت عمي عندك
ملاك :افف طيب ...يبه الهنوف تبي تكلمك
ابو سيّاف :هلا يبه الهنوف شلونك وشلون رجلك ؟ عساكم بخير
الهنوف :بخير الحمدلله وغازي يسلم عليك انت شلونك وشلون خالتي
ابو سيّاف :الحمدلله بخير بخير
الهنوف :وولدنا شلونه ؟
ابو سيّاف :وافي بخير شغله ماشي ماشاء الله على قد ما امر من جنبه القى عنده زباين
الهنوف تكتم الغيض :بنات ؟
ابو سيّاف ضحك :لالا شباب وعجايز البنات ما يروحون كثير اخوانهم ينفعونهم مغير ملاك تودي له الفطور سيّاف الله يهديه ما يجلس لين نحضر الفطور ويوديه له
الهنوف :لالا خله ياخذ راحته مع نياقه مسكين ...بغيت انسى يا عمي ترا حنا بالطريق جايين
ابو سيّاف :ماشاء الله حياكم الله
الهنوف :كلمت ابوي وقال ترا عمك ابو سيّاف يبي يعتمر بس ملاك ما تقدر تروح معاهم قلت له ازهلها يا يبه انا بجي وبجيب ريوف معاي وبنجلس عندها وانتم تروحون وحتى مروا المدينه خذوا اربع ثلاث ايام براحتكم
ابو سيّاف :ما تقصرين بس نبيها معانا ملاك
الهنوف :لا شدعوه يا عم هي قالت لي لو تجون عندي عادي اهلي يروحون
ابو سيّاف :اكيد ؟
الهنوف :اكيد حتى اسألها
ابو سيّاف :يا ملاك
الهنوف :ما اسمعك الاتصال انقطع
ابو سيّاف :هاك جوالك وبسألك
ملاك :اسأل
الهنوف ارسلت لملاك :قولي ايه ولا بقول لأبوك انك فردتي شعرك الحريري قدام وافي عند البير وهو خق عليك وجلس بالديره عشانك مو عشان الشغل وتتزوجينه غصب
ملاك تنهدت
ابو سيّاف :منجدها الهنوف تقول انتي تقولين لو جيتوا عندي عادي اهلي يسافرون
ملاك :اي يعني لو مره نفسكم بالعمره عادي
الهنوف ارسلت :وقولي له لو تمرون المدينه اذا تبغون وتجلسون ثلاث ايام عادي
ملاك :واذا نفسكم بالمدينه عادي
ابو سيّاف :اكيد ما بتزعلين ؟
ملاك :لا عادي يبه بعدين اروح برمضان زي ذي السنه
ابو سيّاف :اجل خلاص بكلم امك
ملاك مسكت جوالها وارسلت للهنوف :وش دراك بالي صار ذاك اليوم كان مغمي عليك ؟
الهنوف :شفتكم بطرف عين
ملاك :حسبي الله عليك بس
الهنوف :لا تزعلي يا حبي ما بتروحين العمره مع اهلك بس بتروحين مع زوجك الحبيب وافي ويمسك يدك بين الزحام ويقول عساك تكونين معاي بزحام الجنه
ملاك :الله يرزقني فلوس على قد احلامك
الهنوف :الله يرزقك تحقيق احلامي
ام سيّاف :ملاك
ملاك :جايه
ام سيّاف :ابوك صادق ؟
ملاك:ومتى كذب ابوي
ام سيّاف :متأكده ؟
ملاك :اي متأكده
ام سيّاف :اجل خذي مفتاح بيت عمك وروحي شيكي عليه وسيّاف بيلحقك بعد شوي
ملاك :وينه المفتاح ؟
ام سيّاف :شوفيه بالصندوق الي بدرج ابوك
بعد دقائق عادت :ما لقيته
ام سيّاف :اجل يمكن ابوك اخذه قبل شوي شفته طلع وشكلي سمعت معاه صوت مفاتيح
ملاك :اجل بروح اشوفه
ام سيّاف :لا تتأخرون شيكوه وتعالوا عشان العشا ...بس ولد عمك مدري وين مختفي
ملاك :خليه بقلعته
ام سيّاف :وش مسوي لك ؟
ملاك :بسببه صرت ما اطلع الحوش الا بالفروه ولازم اغطي راسي كنت اخذ راحتي زمان
ام سيّاف :السطح وش زينه الهوا يجيك ابرد
ملاك ضحكت :على اساس طلعت فوق جبل
ام سيّاف ضحكت :روحي بس شوفي بيت عمك وتعالي
ملاك :طيب
خرجت لبيت عمها القريب منهم وهي تغني ،لسعاده لا تعرف سببها ،او تعرفها قوله أن سحاب مجرد إعجاب دخلت البيت الذي كان مفتوحًا ومظلمًا بعض الشيء وتغني :جيتني صدفه انتظرها يا محاسن هالصدف اجمل صدوف الليالي الي مرت واعترف
ابعدت الطرحه عن شعرها ودخلت احد الغرف المظلمه تسمع بها صوت أحد وكانت تفوح بعطر سيّاف أقتربت من جسده وحضنته من الخلف :بطنك اليوم خالي بيشيلك ابو حصين
امسك يديها التي تحيط بطنه وابعدها بحرج والتفت :ملاك
بلعت ريقها :وافي
حك خلف رأسه :وش تسوين
انتبهت لشعرها الواضح وغطته سريعًا :جيت بشيك البيت امي قالت لي
وافي بحرج :عمي قال لي
ملاك وهي تحك رقبتها:شميت عطرك زي عطر سيّاف وقلت ...
امسك ثوبه وقربه من انفه يشمه :عجبني عطره وتعطرت منه الحين
ملاك وهي تحاول كسر الحرج :ليه ما عندك عطور ؟
وافي :عجبني وتعطرت انتهينا
ابو سيّاف بالخارج :وافي
وافي :عمي
ملاك :لو تقول نتخبى بالزاويه ولله اطعنك
وافي :انا عندي الحل بروح اطلع فوق واسوي نفسي ما ادري انك جيتي وانتي ما تدرين اني هنا
ملاك :اول مره تفكر بذكاء
وافي وهو خارج :على حسب الموقف والظروف افكر
صعد للأعلى ثم دخل ابو سيّاف :ملاك انتي هنا ؟
ملاك :يبه ؟ احسبك انت الي فتحت الباب مين فتحه ؟
ابو سيّاف :وافي جاني قال الهنوف ارسلت له يشيك البيت وعطيته المفتاح
ملاك بهمس :الهنوف انا اوريك
ابو سيّاف :ما لقيتيه ؟
ملاك تعلي صوتها ليسمعها :يمكن فوق انا ما شيكت فوق توني دخلت ذي الغرف
وافي نزل :هلا عمي سمعتك تنادي ...معليش
ابو سيّاف يضحك :انزل بنت عمك ومتستره
وافي بهمس :ولله لو تدري وش سوت قبل شوي
ابو سيّاف بسخريه:عسى بس محد شافكم وانتم تدخلون ورا بعض وقتها اذا سمعوا بذا الشي بزوجكم مالي دخل
ملاك بهمس :اعوذ بالله
وافي يتصنع الضحك :لا تطمن يا عم بنتك بالحفظ والصون وانا اراها مثل اخواتي هي والهنوف وغاليه واحد والي ما ارضاه على خواتي ما برضاه على بنات عمي وبنات الناس
ابو سيّاف ضحك وهو يربت على كتفه :متطمن اول شي لأني اعرف بنتي وثاني شي لأني اعرفك ...لا تفهم غلط بس بنتي انا مربيها
وافي :الله يخليها لك
ابو سيّاف :يلا امشوا العشا جا
رن هاتفها :روحوا وانا بكلم والحقكم
ينظر لها ولهاتفها احتمال كبير أنه من احبته وإلا لما طلبت منا الرحيل ،ماذا فعلت يا راشد بهذه الانثى ،كيف يسرقها بسهوله ويتلاعب بها أين رجولته ؟ أين عقلك يا ملاكي تصدقين من يتلاعب بك ولا نيه له بالزواج
ابو سيّاف :مين ؟
ملاك :ريوف
ابتسم ،أشكرك يا ريوف لولاك لكنت ركضت الى راشد لأكسر عظامه
ابو سيّاف نظر لهاتفه :يلا استعجلوا امك ترسل
ملاك ردت وهي تسير :نعم
ابو سيّاف :احد يرد على بنت عمه كذا ؟
ملاك :لا بيننا ميانه عادي
ابو سيّاف :ولو الصحابه رضي الله عنهم كانوا لو تفصل بينهم شجره وهم يمشون يسلمون على بعض
ملاك :ابشر يبه ...السلام عليكم يا اختي ريوف؟
ريوف وواضح بصوتها انها مبتسمه :وش صار ؟
ملاك بهمس :حسابك بعدين انتي ومديرتك
ريوف:اكيد صار شي ما تحاسبيني الا اذا صار وش صاار
ملاك :ولا شي ماشاء الله البيت نظيف
الهنوف اخذت الهاتف من يدها :ملاك تكلمي ولا ولله بعلم عمي انك فردتي شعرك قدام وافي
ملاك بهمس:امم الحين بقول لكم وانا امشي مع ابوي ووافي عشان يذبحنا
الهنوف :مع وافي اكيد صار شي وش صار
ملاك :اذا جيتي بقول لك
الهنوف تعض على شفتها السفليه وهي مبتسمه :يا عمري مستحيه تبي تقول لها وجه بوجه
ريوف :ياروحي اكيد سمعت اصوات مرعبه وجا برق كذا وخافت وحضنته
الهنوف :ملاك فيه مطر الحين ؟
ملاك :لا من يوم قلتوا بنجي المطر افلح
الهنوف :يابنتي وش ذا الحقد علينا اصرفي حقدك على سحاب
ملاك :حقدي على اخوك وعليك انتي وبنت عمك الثانيه سحاب صديقتي من قبل
الهنوف شهقت :لا انا مقدر اتحمل ريوف خذي
ريوف :وش سوت ؟
ملاك :اقول حقدي عليك انتي وبنت عمك واخوها سحاب صديقتي
ريوف :تؤتؤ تؤتؤ تبعينا عشان ذيك الكلبه ولله صراحه ما اتحمل اعطي الجوال مين
الهنوف ويدها على رأسها:عطي غازي
غازي بصدمه :وش اسوي فيه انا؟
ملاك :ريحوا انفسكم بقفل
ريوف :قفلي وراجعي كل كلمه قلتيها
...
اقفلت بوجهها وهي تنهدت وبسخريه قالت :سمعتي يا هنوف تبيعنا احنا وحب حياتها عشان سعاده البنت الي تتسمى صديقتها بس هي من تحت تس تس
الهنوف :ولله لازم نوعيها قد ايش هي تس تس
غازي :ممكن سؤال ؟
الهنوف :تفضل
غازي :وشو تس تس
ريوف :زوجك نيته طيبه ما يعرف بذي الاشياء
الهنوف تضحك:تشوفين
غازي :محسسيني اني بالروضه ومو فاهم شي درست طب سبع سنوات وش يعني تس تس
الهنوف :يعني ثعبان هو الثعبان يقول تسسس تسسسس والشخص الشرير نسميه تس تس كل الناس كذا ترا
غازي :ما قابلت اشرار بحياتي الحمدلله
الهنوف :ياروحي تشوفين ريوف
ريوف :اشوف اشوف
الهنوف :لو اعد لك الاشرار الي قابلتهم ما اخلص ابتداء من زينب الي تتسمى بنت خالي وانتهاء بسحاب
ريوف تنهدت :بدر يبي زينب
الهنوف شهقت :وشو ؟
ريوف :قصه طويله مختصرها شافها بفيديو القبول حقي وخق عليها مسكين حزني يقول احبها بس معرف اسمها ودمع المسكين وانا حنيت عليه قلت له خلاص اهم شي سعادتك وصدق يعني فكرت فيها نايف خاتم بأصبعي ما بتقرب له بس المشكله كيف بتقتنع ببدر
الهنوف :ياروحي بدر ما لقى الا هي
تنهدت واكملت :القلب من يلومه
ريوف :يارب ان كتبت فيها الخير خلها وان كان فيها الشر بدله بأحسن منها
غازي تنهد :قولي له يكثر من صلاه الوتر والدعاء
الهنوف نظرت له وهي مبتسمه
ريوف :لحظه ما اضيع ذي الابتسامات
شهقت وأكملت :غازي كنت تصلي الوتر وتدعي بالهنوف ...ياااا شوك رومنتك الله يديمكم بسم الله عليكم من الحساد ماشاء الله ماشاء الله ...امسكي زوجك بالديره لا يطلعون له بنات الديره ترا كلهم تس تس يتعلقون بأي واحد يجيهم من برا عشان
يخرجهم من ديرتهم شوفيهم كيف الحين هذي سحاب تعلقت بوافي المسكين وهو حمار يعني معليش بعد ما شاف ملاك بذاك الجمال يروح لسحاب
الهنوف :عادي قولي عنه حمار لأنه صدق حمار
ريوف وهي تنظر لغازي :انتبهي لحمارك بس لا يدور راعي غيرك
الهنوف :لا معليك ربطته من اذنه
غازي :انا وش مسوي لكم تضربون فيني الامثال ؟ الهنوف انا مابي غيرها وعيوني ما تشوف الا هي
ريوف ابتسمت :زين زين اختبرناه
الهنوف تربت على كتف غازي :كويس معليك
غازي :الحين ذا اختبار ؟
الهنوف تضحك :اي
ريوف :تصدقين زوجك ما منه فايده يعني كذا طويل وعريض وبس جالس يسوق خلينا تستفيد منه يروح يصفق راشد
الهنوف تتحسس عضلات غازي :ولله صدق معضل عالفاضي
شهقت واكملت :ولا لا خليه يضرب وافي ويشرد وبعدين ملاك تعالجه
ريوف تصفق :ولله ذكيه يجرحه بوجهه وملاك كذا تعالجه تحط المطهر ووافي يحرقه وهي تنفخ عليه افف احس جاني حر لو اني مكان وافي كان حضنتها وقلت تكفين حلفت عليك انك تتزوجيني ونهرب من سحاب وراشد ونعيش حياتنا ونجيب اطفال
الهنوف بحنيه:ما فكرنا بأسماء عيالهم
غازي بنفس نبرتها :فكري بنفسك اول
الهنوف :احنا نأجل كل شي لين نخلص وافي وملاك شوف ذي المسكينه من متى ما شفتي نايف ؟
ريوف بحزن مصطنع :شهر
الهنوف شهقت :شهر ما شافته هالاتها لين وين وصلت ما تنام تبكي مشتاقه له ...عشان كذا يا حبيبي مافيه اطفال واحنا اتفقنا خلنا الحين نفكر بأسماء عيال وافي وملاك
ريوف :تخيلي يجيبون تؤام بنات ويسمونهم ريوف والهنوف علينا لأننا جنود حبهم
الهنوف :لا احس خليهم يجيبون ولد ويسمونه غيث لأنه اول يوم جينا الديره يعني بدايه حبهم جا مطر خفيف حلو
غازي :يعني حتى لو ما درستوا طب المفروض تكونون عارفين ذا الشي مو احنا الي نحدد جنس الجنين وهل هو تؤام ولا لا كل هذي جينات من الام والاب
الهنوف تضحك :طب اسنان ويتكلم
ريوف :انا تركت كل شي وركزت على اخر كلمه ام واب وافي وملاك ام واب اخخ بس
الهنوف :تخيلي بس تتزوجين نايف وملاك تتزوج وافي وخلاص كلكم تعيشون بنفس البيت ويجون اطفال ملاك ووافي عندك يقولون خاله ريوف احكي لنا كيف ماما وبابا حبوا بعض
ريوف :بنهااار وانتي بيقولون لك عمه هنوف
الهنوف :ذوبان
...
ديم :وين ريوف
ريم تضحك :ما تدرين عن هوى دارك ريوف بطريقها للديره
ديم :كيف ؟
ريم :نظفت السطح وامي سمحت لها تروح مع الهنوف وزوجها بيجلسون عند ملاك عشان اهلها بيعتمرون وهي ما تقدر
ديم :ليه شفيها ؟
ريم :عليها الدوره
استرجعت أخر ما تسمعه من الدرس قبل أن تغط بذلك النوم العميق أخر محاضره وبعدها الى المنزل لتأخذني الاحلام قليلًا واغمض عيني لترتاح خمس دقائق فقط او حتى ربع ساعه ولتكن نصف ساعه ،أكتملت الساعه الاولى وتلتها الثانيه بدأت الثالثه وسارت لثمان دقائق حتى جاء ذلك الصوت الرجولي :ديم
فتحت عينيها ووجدت امامها مغطى بالسواد فركت عينيها ونظرت مره اخرى :انعميت يمه انعميت
يوسف :ما انعميتي انا مغطيك ما بشوفك بدون ستر
ابعدت العباءه عن وجهها وقد التصق بعض شعرها بوجهها
ابعد نظره عنها للجهه اليسرى :الناس طلعوا باقي انتي نايمه هنا
غطت شعرها مره أخرى :الساعه كم ؟
يوسف :الساعه ثلاثه العصر
شهقت وهي تبحث عن هاتفها :امي امي وين الجوال
يوسف :يمينك
امسكته ونظرت للمكالمات الوارده ١٥ بدر ٣٠ الغاليه و٢٧الغالي
اتصلت على بدر وكان مغلق :ياربي
يوسف بتردد :بوصلك انا اذا تبين
ديم وهي تبعد العباءه عن رأسها لتلبسها بشكل الصحيح ثم ترفع شعرها كذيل حصان متناسيه وجوده:لا بيرد بيرد بدق مره ثانيه
ابعد نظره عنها للمره الثانيه وهو يهمس :استغفر الله
اتصلت للكره الثانيه وكان نفس الرد "مغلق":باقي خالد ...ايوه خالد وينك ؟
خالد :بالمستشفى
ديم تتكلم بسرعه وهذا دلاله على توترها :عسى ما شر بدر ما يرد تكفى لا تقول صار له شي بالعمليات صح ؟ بياخذ كيماوي لا تكذب خالد
خالد :بسم الله عليك اهدي انا مع غاليه مراجعه دوريه
ديم :اها طيب متى بتخلصون ؟
خالد :ساعه تبين شي ؟
ديم :لا سلامتك
خالد :الله يسلمك
يوسف :بوصلك انا ...
ديم :باقي ابوي ...هلا يبه ولله نمت بالغلط وما حطيت منبه ما سمعت ولا شي والبنات الله يهديهم راحوا وخلوني محد صحاني تقدر تجي ؟
ابو خالد :خوفتينا عليك قلنا صابك شي ،ولله بجي بس السياره الكفر بنشر ان كان بتطلبين اوبر
ديم :اي بطلب اوبر صح ...يبه امي معصبه صح ؟
ابو خالد :يعني
ديم :افف ياربي اكره نومي ذا مدري ليش كذا انام بدون سبب
ابو خالد :كسل نومك ماهو مرتب
ديم :طيب انا طالبه طب لازم ادرس اربعه وعشرين ساعه
ابو خالد :امك جت انا بكلمها شوي الينها وانتي عاد سوي الي تقدرين عليه وتعالي بسرعه
ديم وهي تحمل حقيبتها :اي بجي بجي الحين اطلب اوبر مع السلامه حتى انا احبك
يوسف :خلصتي ؟
ديم :بتهزئني عشان الواجب ولا ايش ؟ احنا بجامعه
يوسف :بقول لك ان اوبر ممنوع يجي حول الجامعه اجراءات امنيه تعرفين يعني حالات خطف وكذا
ديم :عادي بطلبه اقرب مكان وامشي له
يوسف :اقرب مكان بعد اثنين كيلو
اكمل وهو يحك حاجبه الايسر :فكره انك تمشين اثنين كيلو بالشمس فكره محد يأيدها ونهايتها واضحه
ديم وهي تفتح الباب وتخرج:طيب وش اسوي
يوسف من خلفها خرج:قلت لك يمديني اوصلك
ديم :عشان يشوفونك الناس و...استغفر الله بس
يوسف :عادي يحسبوني اوبر
ديم :شكلك مو شكل واحد يسوق اوبر
يوسف :اجل شكل ايش ؟
نظرت اليه بحرج :شكل دكتور
ضحك منها وقال :انتي ببالك انك لو شفتيني بأي مكان بتشوفيني دكتورك بس الناس الي ما يعرفوني رح يحكمون علي بأي شي قاعد اسويه لو كنت اطلع الزباله الله يكرمك بيقولون ذا عامل نظافه لو وصلتك رح يقولون ذا اوبر
ديم :ولله ما يندرى عن اهل حارتنا يخزون الواحد لين يطلعون حتى الرؤوس السوداء الي بخشمه
يوسف يغطي انفه بيده:بس ما وصلني ذا الكلام عن اهل حارتكم
ديم :يا ساتر لا يكون حارتنا عباره عن تجربه نفسيه عشان كذا كلهم مرضى نفسيين
يوسف :اخوي كان جاركم وبس اقول كذا يعني منتم تجربه نفسيه ولا شي
ديم :متأكد ما بيلاحظون ؟
يوسف :حتى اهلك بيحسبوني اوبر
ديم :ما شافوك بعرس اخوك؟
يوسف :لا ما كان حضوري قوي لذيك الدرجه
ديم :طيب
بعد صمت لدقائق وهم يسيرون بالممرات الفارغه نطق :اخوك محارب ؟
ديم :هاه ؟ ...لا ،اي يعني اي زمان كان محارب وتغلب على المرض قبل عشر سنوات
يوسف :طيب ليش خفتي مع انه قد راح
ديم تنهدت :قالوا انه لو رجع بيكون اقوى وحتى رجع قبل عرس اخوك بأيام سوو التحاليل وكل شي واضح انه فيه دخلوه العمليه ونسبه نجاحها ٢٠٪؜ وخرج منها الدكتور وهو يقول مافيه شي
يوسف :يمكن غلطوا بالتحاليل؟
ديم ابتسمت :كلنا قلناها قلنا اكيد غلطوا بس الوقت والاسم كلها تثبت انه هو ،يعني احنا مؤمنين بالمعجزات الربانيه بس أنها تصير فينا شي ما تخيلناه ،بس مالنا غير نقول سبحان الله
يوسف ابتسم :سبحان الله ...يعني تقولين انك دخلتي طب بسبب الي صاب اخوك ؟
ديم :لا الطب هو حلمي من اول بس الي صار لبدر خلاني اتمسك فيه اكثر
يوسف :انا بعد ما دخلت صيدله حولت طب نفسي عشان شخص اعزه
ديم :قدرت تساعده ؟
يوسف مبتسم :اي الحين يعيش الحياه الي هو يتمناها
ديم تنهدت وهي بمتسمه :شعور حلو لما تعرف أنك بتكون سبب بعد الله بأنقاذ حياه الناس بس بنفس الوقت مسؤوليه مرعبه أنك تؤتمن على ارواح الناس ،خصوصًا مع نومي ذا
يوسف :جبرتي تحللين ؟ يمكن يطلع مرض او نقص فيتامينات
ديم :جربت بس مافيه شي ،اتوقع السبب ان المذاكره ما تحلو لي الا اخر الليل
يوسف :ما تقدرين تنظمين وقتك ؟
ديم :انا والتنظيم ما نلتقي عايشه على مزاجي
يوسف ابتسم :عكسك انا التنظيم اهم شي بحياتي وكل شي مخطط له
ديم :بس مع التنظيم فيه صدف تجي حلوه
يوسف :احنا ننظم قد ما نقدر بس التقدير الرباني فوق تنظيماتنا
ديم :وين السياره ؟
يوسف :هذي هي
ديم :وتقول انهم بيصدقون انك اوبر
يوسف :وش فيها سيارتي ؟
ديم :جي كلاس
يوسف :عادي ما سمعتي بناس اغنياء يقضون وقت فراغهم بأوبر ؟
ديم :كذابين الاغنياء يقضون وقت فراغهم بكل شي الا اوبر
يوسف ضحك :واضحه نظرتك عن الاغنياء ،تراني مو غني بس جمعت راتب على راتب وشريتها
ديم انحرجت :يعني مو كلهم نفس الشي
يوسف فتح باب السياره الخلفي :اطلعي
عادت لواقعها مع صوت ديم :نمتي اليوم بالجامعه؟
ديم :نمت
ريم تضحك :بمحاضره يوسف؟
ديم :يختي مقدر اتحمل صوته يجيب نوم
ريم :كيف صوته ؟
ديم :مسجله المحاضره صبر بجيب الجوال
ريم :اي ولله مرتب صوته
ديم :كل شي فيه مرتب حتى حياته
ريم :سولفتي معاه؟
ديم :لا كذا تعرفين نوعيته من النظره الاولى
ريم :يمكن يطلع عنده بتويتر خليني اشوف
ديم :ما اظن
ريم :الا ولله شوفي هذا هو ؟
ديم :اي هو
ريم :ماشاء الله متابعينه كثار
ديم :اكيد بنات الجامعه كلهم يلاحقون وراه
ريم :لاناس مشاهير يعني وزير الصحه يتابعه
ديم :وش يبي فيه ؟
ريم :شوفي حتى سوو معاه مقابله بأيام كورونا عن نفسيه المرضى وايش نسوي
ديم :مافيه الا هو دكتور نفسي بالمملكه
ريم :يا بقره يعني هو شخصيه مهمه بالمملكه اكيد انه فيه شي مميز ولا كان ما تركوا كل الدكاتره النفسيين بالمملكه واختاروه
ديم :الله يوفقه
...
العنود :وراحت مع خاله الهنوف
نايف :مع الهنوف وغازي ؟
العنود :ايوه بيروحون الديره عند ملاك وخالو وافي عشان فيه مطر
نايف :وش بيهببون هذولي روحي شوفي امك ...الو
الهنوف :هلا يا قلبي
نايف:وش بتسوون انتم مره وافي مره انتي تاخذون ريوف
الهنوف :اصبر يا حبيبي ترانا مو خاطفينها جت معانا بارادتها الحره
نايف :طيب ليه نا تعلموني
الهنوف :محنا فاضين لك روح تزوجها وبعدين قول ليش ما تعلموني
نايف :تغيرتي يالهنوف
الهنوف :انا ضامنتك بس وافي مو ضامنينه بنروح نحل اموره ونجي
نايف:وش مهبب؟
الهنوف:وش مو مهبب بس خلني ساكته معد باقي الا قليل ونوصل
نايف :بعدين قولي لي
الهنوف :زي ايام نطلع على الشجره ونسولف
نايف :لا تطلعين بس الحين يمكن حامل ولا شي تطيحين
الهنوف :باقي باقي مو الحين
نايف :ابي اصير خال استعجلي
الهنوف :غاليه جابت لك وحده والثانيه بالطريق ما يكفونك ؟
نايف :نبي منك عيال غاليه طفشنا منهم
الهنوف :حرام عليك تراها تعبانه من بعد العرس وحملها خطير
نايف :ادري ماشاء الله اليوم راحت قالوا لها وصلت الخامس وباقي لها اربع شهور والحمل خلاص تثبت
الهنوف :انا كان ودي امر عند امي بس بالرجعه ان شاء الله
نايف :زوجك الغثيث معاك ؟
الهنوف:اجل مين بيوديني الجن ؟ اكيد معاي
نايف :مدري ما ارتحت له
الهنوف :نايف خلاص تقبله ماسوى لك ولا لي ولا لأي احد شي وكل شي بالحلال
نايف :حتى خالد للحين احس انه غثيث مدري المشكله فيهم ولا فيني
الهنوف ضحكت :اكيد فيك
نايف :ولله صدق يعني ليش ياخذون خواتي نرفزوني
الهنوف :اجل الله يعينك اذا اخذت اخت خالد بيصير كره متبادل
نايف :الكره الي كرهني ايام ذيك السالفه يكفيني مدى حياتي باخذ اخته واهج ما بشوف وجهه ولا شي
الهنوف:اكيد نسيوا يا نايف لا تبعد البنت عن اهلها وتبعد انت عن اهلك
نايف :هو بس لو يترك هيبته المصطنعه ويخليني اصفقه هو والثاني الي جنبك برتاح وبتقبلهم
الهنوف :غازي يمديك تصفقه عضلاته عالفاضي ضربته بكتاب وحرقته وما قال شي
نايف ضحك :طلع كذاب ابو العضلات ذا
غازي :حرام عليك يالهنوف تحشين فيني جنبي وانا المسكين تقطع قلبي عليك انتظرتك توافقين علي اسبوعين وبالاخير تردينها كذا
الهنوف :بس تراه رجال يعني رجال بمعنى الكلمه ما يضرب الا الناس الي يستحقون الضرب يقول اختي واهلها مارح اقرب لهم بضرر ،بس الحين نقنعه يضرب وافي
نايف :وش مسوي وافي لذي الدرجه؟
الهنوف :يحب وحده غير الي اخترناها له وش نسوي
غازي :طيب انا حبيت وحده غير الي اختاروها اهلي
الهنوف :لحظه نايف ...ايش
غازي :اهلي كانوا بيزوجوني وحده غصب بس قلت لهم احب الهنوف
الهنوف :مع السلامه نايف فيه نقاش حاد الحين ...الوضع مختلف بينك وبين وافي وافي يحب ملاك بس انه ثور تعرف الثور هو مثله راح شاف اول بنت بالشارع ورسمته الحيوانه وعليه قرون شيطان وحبها يعني رساله واضحه ترا انا شيطانه باخذك
ريوف :وما استبعد انها مسويه له سحر البيوت ذيك كلها مهجوره تلقينها دافنه سحر هناك
غازي :بسم الله مو كنتي نايمه قبل شوي ؟
ريوف :صحيت على طاري انك بيزوجونك غصب قلت يمكن تجي هوشه واصلح بينكم
الهنوف:معليك احنا ما نتهاوش بس تصدقين نظريه السحر ممكنه ولله زي هذيك الي جت تبي تخطبك لولها ساحره
ريوف بأشمئزاز :ايوو لا تذكريني انا كنت شايله هم كرشه وش بسوي له اكل عشان يشبع
الهنوف ضحكت :وربي بس للحين مو مصدقه ان الي جو معاها جن
غازي بلع ريقه :وش السالفه ما فهمت
الهنوف :وحده جت ولدها صديق خالد اربعيني يبي يخطب ريوف لو انه متزوج كان جاب عيال بعمرها بس ما طاحت عينه الا عليها المهم امه جت شكلها غريب ومعاها حريم متغطين عيو يفصخون عبيهم بالاخير جو الشرطه قالوا تراها ساحره رحنا نناديها الي معاها اختفوا قلنا للشرطه قالت هذولا اخواني الجن
غازي :مو وقته ذي السالفه على خط اخر الليل
الهنوف :ترا وصلنا صح ريوف هنا ذي البيوت هي الديره
غازي :اي بس خليني ادور لفه
الهنوف :دقي دقي على ملاك
ريوف :ملاك فيه مفاجأه افتحي باب الحوش وشوفينا
ملاك :هذي مفاجعه ولله
ريوف :شدعوه ملاك احنا بنات عمك
ملاك :اعرف وش تبون تسوون
ريوف :طيب افتحي لنا الباب تكفين
ملاك :بفتح ماني لئيمه لذي الدرجه
غازي :يلا انزلوا
ريوف نزلت وحضنت ملاك:ملاكي
ملاك :ادخلي
ريوف :وين وافي ؟
ملاك :وش يدريني انا ؟
ريوف :اخ يا قلبي لا يكون عندها
ملاك :مدري
ريوف :لحظه ريحتك شي
ملاك :ايش؟
ريوف :عطر رجالي
ملاك توترت :عطر سيّاف
ريوف :شوفي وافي جا وافي شلونك
وافي :بخير بس يوم جيتم صرت مو بخير
ريوف قربت منه :تعال وين كنت
وافي :اتمشى
ريوف :ريحتك شي ...نفس العطر الي على ملاك نفسه وربي صار شي صح
حك خلف رأسه وهو ينظر اليها بينما هي تنظر الى الارض بخجل
ريوف نظرت لملاك :وربي صار شي بس خلو الهنوف تجي
وافي :ماني فاضي انا بنام
ريوف :لا ما بتنام تونا بدري الساعه ١٢ بنسوي شاهي الحين
وافي:منجد ؟
ملاك :لا روح نام
ريوف :يا عمري الي تهتم فيك تبيك تنام تشوف كيف تحبك طاوعني واترك سحاب
ملاك :ولا بكيفك اسهر لين تشبع
الهنوف دخلت:وين سحاب ؟
وافي :تبخرت الجو حار وصارت رطوبه
ريوف :هنوفي تحسينه كلام مبطن ؟
الهنوف :اي قصده قال لها شي خلاها تستحي وتحس بحر وش قلت ؟
ملاك :ما قال شي جالس هنا من الساعه ١٠
ريوف :ياعمري تشوفين الهنوف
الهنوف :اشوف اشوف تعرف وقته وحياته
ريوف :وترا حتى فيها ريحه من عطره
الهنوف :صدق؟
ريوف :جربي شميهم كلهم
حضنت ملاك وشمت رائحتها :عطر رجالي
حضنت وافي وهي تشم رائحته :نفس العطر الرجالي
ريوف مبتسمه :شكل ملاك الي تبخرت من الحر
وافي :لحول تراني تعطرت من عطر اخوها وهي مدري وش سوت مع اخوها وطبع فيها نفس العطر وانتهينا
الهنوف :لا اكيد صار شي
ملاك :حسبي الله عليكم بس
ريوف: ترا بعدين بتشكرينا
ام سيّاف :هلا وغلا حياهم الله اهل الشرقيه حياهم
ريوف :هلا فيك خالتي بس انا مو من الشرقيه
ام سيّاف تضحك :واهل الرياض بعد
وافي استغل الفرصه :نسيت ارحب بنسيبي بروح اشوفه
ام سيّاف :تفضلوا ادخلوا توني حاطه البراد
وافي وهو رايح:اذا خلص الشاهي نادوني
ام سيّاف :حاسبين حسابك اول واحد انت
ريوف:يلا يلا ورانا سوالف طويله
الهنوف وهي تمسك الهاتف :طيب بجي
في الجهه الاخرى
وافي :يا الله حيه العريس
غازي :الله يحيك ،تراني تحت التهديد
وافي :وش السبب ؟
غازي :يبغوني اطردك واصرفك
وافي :مهابيل ذولي محد يعطيهم وجه
غازي :مهايب بس ضربهم يوجع لو اعد لك اختك وش سوت بي خلال الشهر الي راح مارح اخلص
وافي:اكيد تستاهل
غازي :اي اول يوم كبت على يدي قهوه وانحرقت
وافي :وش مسوي انت ؟
غازي :ولا شي بس كانت تحسبني نايم وراحت عند النافذه ووقفت جنبها وشكلها خافت
وافي :اي صح مو انت قلت ما اقدر اخذ اجازه الا بدايه السنه وش صار الحين ؟ ولا كنت تكذب تبي تاخذها بسرعه
غازي :يارجال ما كذبت بس تراها غصبتني رحت فيها العياده عندها خراج بضرسها راحت تكلم الاداره انهم يعطوني اجازه اسبوع واقنعتهم
وافي :ما خصموا من راتبك ؟
غازي :ولا ريال
وافي :ولله شكله صادق عمي ياخذهم معاه بالتحقيقات
غازي :ولا يسكتون دقيقه يعني من اول الهنوف تتكلم بس عادي خلاص جت بنت عمك وزاد كلامهم صدعت
وافي :ريوف من يومتها صغيره هالطول ما تسكت
غازي :وازيدك من الشعر بيت يوم بناخذها دقت عليها قالت اذا ما سمحوا لك اهلك هدديهم بالسكين انا بديت اشك ان زوجتي قاتله متسلسله
وافي :العنف ذا ما طلع الا الحين
غازي :ويبوني اضربك بعد
وافي اخرج هاتفه :بروح اجيب الشاهي وابيك تكب عفشهم كله
غازي :بس لا يدرون ولله تذبحني الهنوف
وافي :ما بيدرون بشي معليك
دخل الى فناء المنزل وكانت موجوده وبيدها كأسان من الشاي
اقترب منها أخذ الكأس الذي في يمناها وشربه بسرعه بينما هي بقيت تراقبه بصمت
وافي :مسوينه بالورد ولا ايش
ملاك تهز رأسها بالرفض
وافي :شفيك ساكته
ملاك بحرج :بقول لك شي
وافي :قولي
ملاك :الكاس الي معاك
وافي :اي
ملاك :قد شربت منه قبل شوي
امسك على حلقه :تمزحين ؟
ملاك :لا منجد حتى شوف عليه روج
وافي :اكيد شربت من الجهه الثانيه صح ؟
تهز رأسها بالرفض
نظر للكأس الفارغ وعليه طبعه شفاهها ،شربت من نفس مكانها أي انني قبلتها قبله غير مباشره ،قبلت تلك الشفتين الورديتين ،قبلت ذلك الثغر الذي بطعم الورود ،ذلك الثغر الذي نطق اسمي كثيرًا ،الثغر الذي تمنيت لو يكذب حبها لراشد نظر لشفتيها التي كانت تغطيها يديها بحرج :وانتي ليه تحطين روج اخر الليل ؟
ملاك :اسوي ترند تيك توك
وافي :اي ترند
قربت الهاتف منه وشغلت الفيديو وكان عباره عن كأس به أثر شفاه وأغنيه تقول "وأحسد كاسات تقبلن ثغرها اذا وضعتها موضع اللثم في الفم " ،أي ولله إنني لأحسدها كم كأسًا ذاق حلاوة هذه الشفتين ،كم كأسًا حَسِب أنه أرواك ماءً بينما أنت من أرويته بنبيذ شفتيك ،كم كأسًا لم يتحمل مذاق شفتيك وتصدع ،أحسد تلك الكاسات كثيرًا
بلع ريقه وقال :طيب وين كاسي
ملاك :انت بيجيبون لك البرادي الحين
خرجت الهنوف وهي تغني :اشوف كلن مع حبيبه تهنى
تأففت من حضورها بينما هو مسح جبينه بتملل :نعم
الهنوف وهي تنظر ليده التي لا تزال تحمل ذلك الكأس:جبت لك البرادي كامل بس شكل كاس واحد أرواك
حمل الصينيه التي بيدها :ما تعرفين اخوك انتي كاس واحد ما يكفي ،وبعدين مين قال لك اني شربت ذا لقيته طايح بالارض ورفعته
الهنوف تتمعن بالكأس:ما ظنتي انه طاح نظيف يلق لق بس فيه طبعه شفّتي أنثى رقيقه
ملاك تعض على شفتيها بغضب :انا شربته وحطيته على الجدار لأني كنت اصور
الهنوف :اهاا تصورين وأحسد كاسات تقبلن ثغرها
ملاك :مالك دخل وش اصور لو اصور الكاس واكتب إنا لله وإنا اليه راجعون مالك دخل
الهنوف ضحكت :إنا لله وإنا اليه راجعون واحد فيكم بيموت يا انتي بتموتين حرج ولا هو بيموت من طعم الشاهي الي شربه من بعدك
ملاك :اي بيموت هو حطيت فيه سم ابي اقتله
الهنوف ضحكت اكثر وقالت وهي تلحن الكلام:عرفت ولله عرفت خدعتك وعرفت الحقيقه ،ما ودكم تتطورون اكثر وتصير بوسات مباشره بس طبعًا بالحلال
وافي بحده :هنوف لو ما تسكتين هبدتك بالبراد
الهنوف :خلاص بسكت
لفت ظهرها ودخلت وهي تغني :واحسد كاسات تقبن ثغرها اذا وضعتها موضع اللثم بالفم ليل ليل ليل يا ليل ياليل
ملاك لحقتها ووجهها تلون بالاحمرار من الخجل
الهنوف :وش طعم الشاهي ؟
ملاك :زقوم
الهنوف :اتوقع طعمه ورد ولا فروله
ملاك :تكفين خلاص اسكتي طفشت منكم
الهنوف :حبيبتي بتقابلينا اربعه ايام واهلك ماهم موجودين بس احنا
اقتربت منها وهمست بأذنها :ووافي
دخلتا الغرفه التي كان يجلس بها ريوف وأم سيّاف
الهنوف:ايه متى بتمشون ؟
ام سيّاف :الصباح ان شاء الله نفطر ونمشي ،مع اني كنت واعده وافي اسوي له برياني بس عمك يبينا نمشي من الصباح
ريوف وضعت الكأس بعد ان ارتشفت منه القليل :افا عليك خالتي احنا هنا بنسويه
ام سيّاف :تعرفين انتي ؟
ريوف :الهنوف وملاك يعرفون بيسوونه هم
الهنوف :نعلمها احنا يمكن الي بتتزوجه يحب البرياني زي اخواني اول مواصفات زوجتهم المستقبليه لازم تعرف تسوي برياني
ام سيّاف بحماس :مدري قالت لكم ملاك ولالا
الهنوف :ايش؟
ام سيّاف :نبي نخطب المياسه لسيّاف
ريوف :الله متى ؟
ام سيّاف :قريب بس نبي وضعها يستقر مع اخوها ونروح نخطبها
ملاك :استشرتيه ولا كل شي بالغصب ؟
ام سيّاف مبتسمه :استشرته وعلمته وشكله بيوافق قال بفكر من اول يوم اشير عليه بالبنات كلهم يقول لا على طول
الهنوف :خذيها مني يا خاله الصباح وهو عندك يقول موافق والعصر يدعي بالحرم انها توافق عليه
ام سيّاف :ان شاء الله
ريوف :وبالليل يرجع يحلم فيها
ام سيّاف ضحكت :ولله انتم موب هينات
الهنوف :بس ذكريه اسأليه مره ثانيه لأنه بيستحي هو يفتح الموضوع
ام سيّاف :ولله حلال فيك تسعه شهور الحين امك تنام وهي مرتاحه انك بتختارين لأخوانك احسن البنات
الهنوف رمقت ملاك بنظره بينما ريوف تبتسم بحياء :افا عليك يا خاله وافي ونايف بيتزوجون بنات زين فيهم لدرجه كل يوم بيدقون علي يقولون نشكرك يالهنوف على اختيارك
ملاك تنهدت :ما ودكم تغيرون الموضوع ؟شلون الجامعه ؟
ريوف :يعني ماهي ذاك الزود
ملاك :والصياح الي حطيتيه بذي الغرفه وين راح
ريوف :بللته بمويا وشربته
ملاك :عندك صديقات ولا انطوائيه
الهنوف :ذي انطوائيه ؟ مستحيييل
ريوف :تعرفت على خمس وحده ضياء الي قلت لكم عليها والاربع الباقيات كذا علاقه سطحيه ثنتين منهم دوافير عشان اضمن نفسي
ام سيّاف :وهذيك نسيت اسمها بنت خالك يالهنوف يقولون معاك
ريوف :اي معاي بس التخصص غير احسب اني ما بقابلها بس طلعت زميله ضياء بالسكن وصاروا صديقات
الهنوف :الله يعينك بس
ملاك :بتنامون ؟
الهنوف :انا بروح انام ببيت ابوي
ام سيّاف :الليله بس اقعدي عندنا
الهنوف:اغراضي نزلتها هناك بروح انام والصباح من بدري انا عندكم
ريوف :انا من الحين عندكم بس ما بنام الحين
ملاك :انا رايحه انام
ريوف :ولا اقول خلاص حتى انا بنام
خرجت الهنوف ووجدت غازي ووافي يجلسون سويًا ووافي ينظر لها بغرابه
الهنوف تهمس لغازي وهم يسيرون للمنزل :قلت له شي ؟
غازي :لا بس سولفنا طبيعي يعني زي الشباب
الهنوف :اجل شفيه يطالع كذا ؟
غازي :انتي وش مسويه له انا ما سويت شي وحالي حال نفسي مسكين
الهنوف :ما سويت له الا كل خير
غازي :هذا بيتكم ؟
الهنوف :اي
في الجهه الاخرى
ملاك :نمتي ؟
لم ترد عليها ريوف
خرجت من الغرفه بهدوء وذهبت الى الفناء ووجدته هناك
ملاك :يا الله انت اربعه وعشرين ساعه هنا ؟
وافي :اراقب درب المحبه
ملاك :درب المحبه بذيك الجهه هذاك بيت سحاب
وافي :وانتي ليش ما يجي راشد يخطبك ؟ ماهو رجال
ملاك :الا رجال ونص
وافي :ملاك صحصحي تراه ذاك اليوم قال انا اعتزلت الزواج ما يبي يتزوج يعني ماخذك لعبه وتلقينه يكلم مليون وحده غيرك
ملاك :بيجي يخطبني وتراه يحبني من زمان وبيننا ماضي وطفوله
وافي ابتسم:دام كذا الله يوفقكم
ريوف تراقبهم بهمس :لا يحمار
ملاك :بسألك سؤال يعني بس بدافع الفضول
وافي :واحنا نسأل لغير الفضول ؟
ملاك :لو كان عندك فرصه تقول غير الله يوفقكم وش بتقول
وافي :الله يوفقكم
ريوف بهمس :ياربي ذا الحمار بذبحه
ملاك :ليش؟
وافي :ما احب احلم وانا اعرف الواقع
ملاك :ممكن تكون حقيقه مشوشه ؟
وافي تنهد :ملاك انا تعبت اكابر على نفسي وعلى الناس تعبت اخدع نفسي واخدعك تعذبت نفسي وانا اخبي عليها بس اليوم خلاص تأكدت أني
ملاك بلعت ريقها :ايش ؟
وافي :أني احبك واكثر من احبك بعد
ريوف :يارب هذا حقيقه ولا حلم؟
ملاك بدأت تدمع :وسحاب
وافي :سحاب كذبه مافيه الا انتي حقيقه حتى بأحلامي شفتك
ملاك :ما اقدر
ريوف :هيا خذلك الحماره الثانيه مسويه تكابر
وافي :عطيني فرصه انتي بس قولي اي ولله اجيك بالحلال ما بتلاعب فيك
ملاك :اخاف منك
وافي :ليش ؟وش مسوي انا غير اني حبيتك ملاكي فكري بعطيك وقتك لو تبغين سنه عطيتك بس لا ترفضين
ملاك :بفكر
وافي :معقوله كل الي بيننا وباقي بتفكرين ؟
ملاك :احتاج افكر
وافي :اعطيك وقتك وتأكدي اني بأنتظارك ومحد بياخذ مكانك لا سحاب ولا غيرها
التفتت ملاك لتدخل فهربت ريوف قبل ان تراها...