التقينا فأشرق الفؤاد بقلم / إيمان سلطان

الفصل الثانى عشر

*******************

فى مزرعة البدرى انتهى تجهيز المبانى وأصبحت مستعدة لاستقبال المعدات والأجهزة التى شارفت على الوصول

تجول جلال ويوسف داخل المبانى يتابعون كل صغيرة وكبيرة ثم خرجا ليتابعا المزروعات التى تم غرسها فى الأرض لتوفر الغذاء والعلف للحيوانات وبدأت رحلتها فى النمو

ابتسم يوسف بسعادة وربت على كتف ابن عمه مشجعاً

:- ماشاء الله كل حاجة بقت جاهزة ... أنا فرحان جداً بالإنجاز ده رغم إنى تعبت أوى الصراحة

مسح على مؤخرة رأسه مردفاً بمرح

:- أنا شغلى كله على المكاتب ومش واخد على المجهود اللى بتعملوه هنا ده

ضحك جلال وعينيه تمسح المكان بفخر وردد الحمدلله قبل أن يشاغب فى ابن عمه قائلاً

:- أجمد كده يا چو ... ده أحنا لسه بنقول ياهادى الشغل جاى لسه

فرك يوسف كفيه ببعضهما مردداً :- يامسهل

ثم استدار يواجه جلال :- بالمناسبة ياجلال .. أنا لازم أرجع القاهرة كام يوم كده ... فى حاجات لازم أخلصها هناك وأهو أتابع شغلى شوية ... بدل ما أنا سايب شغل المكتب كله فوق راس صفوان وعماد

أومأ جلال متفهماً :- طبعاً براحتك ياچو ... ناوى على أمتى!!

حرك يوسف رأسه نحو بعض العاملين القائمين برى الأرض أثناء ممارسة عملهم وقال بعفوية

:- يمكن الأسبوع الجاى ... نكون انتهينا من استلام وتركيب المعدات

هز جلال رأسه برضا قائلاً :- كويس جداً ... أنا فعلاً هكون محتاجك فى المزرعة معايا اليومين دول ... لأن موسم الحصاد هيبدأ والشغيلة هتبدأ تهل على البلد ولازم أوظفهم وأسكنهم

ضيق يوسف مقلتيه مستوضحاً :- شغيلة إيه!!

فسر جلال ببساطة :- دول عمال باليومية بيجيوا من كل القرى اللى حوالينا فى موسم الحصاد ... بيشتغلوا فى الجناين والحقول ويجمعوا المحاصيل حسب الموسم

أومأ يوسف متفهماً بينما واصل جلال يوضح

:- أغلب إنتاج البلد من المحاصيل بيتصدر لبلاد بره ... عشان كده بيكون بمواصفات معينة وبنفضل يتجمع باليد عشان ميحصلش أى ضرر للثمار

أشتعل الحماس بمقلتى يوسف وهتف قائلاً

:- هايل ... يبقى مكتب  الأستراد والتصدير بتاعنا هيتولى تسويق محاصيلنا من هنا ورايح

ابتسم جلال يستحسن الفكرة فبالطبع يوسف أكثر خبرة منه فى تلك الأمور ... هتف بحماس

:- ياريت ... السنة دى الحمدلله أنا متفق على بيع محصول الجنينة وهيتصدر عن طريق وسيط بينا وبين المشترى بره مصر