NotWithStanding...(မည်သို့ပင်ဖြစ်စေ... ) (Completed)

Episode - 50

'' ဟာဗျာ လိုင်းပေါ်ကဟာတွေက ပကာသနတွေပါ။ အခုပဲကြည့်လေ နွေရာသီရဲ့ရက်တွေကို တစ်ယောက်တည်းဖြတ်သန်းနေရတာ ။ ဘာဝါသနာ ဘာရည်မှန်းချက်မှလဲမရှိပဲ သူများလုပ်စာ ထိုင်စားနေရတာပျင်းစရာကြီး ''

တိမ်တိုက် စိတ်ပျက်သလို ထိုင်ခုံနောက်မှီကို ပစ်စလက်ခတ် မှီချလိုက်ပြီး ပြော​တော့ နန်းဆုက သဘောတကျနဲ့ ခပ်အုပ်အုပ်လေးရီတော့သည်။

'' ဖြစ်ရမယ် တိမ်တိုက်ရယ် ။ ''

'' ဒါနဲ့ နန်းဆု ကျွန်တော်တစ်ခုလောက်မေးဦးမယ် ''

'' အင်း မေးလေ ''

'' သူတို့ကို မုန်းနေတုန်းလား ဟင် ''

'' မုန်းတယ်ရယ်လို့တော့ မရှိတော့ပါဘူး တိမ်တိုက်။ ဒါပေမယ့်စိတ်တော့နာနေသေးတာပေါ့။ အရမ်းကြီးတော့မဟုတ်ပါဘူး။ ဟို တိမ်တိုက် တန်ဆောင်တိုင် တုန်းက တောင်ကြီးကို နန်းဆုတို့ နဲ့အတူသွားသေးတာမှတ်မိလား။ ''

'' အင်း မှတ်မိတယ် ''

'' အဲ့တုန်းက ကိုကိုကပြောတယ် ။သူက အားနည်းချက်ရှိတဲ့သူမို့ ရှန်မင်းခက်ကို သူ့ကိုပေးပါတဲ့လေ။ ရှန်မင်းခက်ကို နန်းဆုထက် သူက ပိုလို လို့ပါတဲ့။ သူပိုင်ပြီးသားပစ္စည်းတစ်ခုကို တောင်းသွားသေးတယ်။''

'' .... ''

'' ကိုယ်လည်းပြောလိုက်ပါတယ် တောင်းစရာမလိုအောင် ရှန်မင်းခက်ကို ကိုကို ကပိုင်နေနှင့်ပြီးသားပါလို့။ တကယ်တော့ ရှန်မင်းခက်က ကိုယ့်အပိုင် ဘယ်တော့မှ မဟုတ်ခဲ့ဘူးလေ။ အဲ့တော့ကိုယ်လည်း ဆုံးရှုံးသွားတယ်လို့တော့ မဆိုသာပါဘူး။ ဒီလိုပါပဲ အရာအားလုံးက အချိန်ကြာလာရင် သူ့နေရာနဲ့သူ နေသားပြန်ကျသွားမှာပဲလေ။ ပစ္စည်းတစ်ခုဆိုတာက ဖြစ်တည်လာတာ နဲ့ပိုင်ရှင်ဆိုတာ သတ်မှတ်ပြီးသားဆိုတဲ့သဘော ကိုတော့ နားလည်လိုက်တယ်''

'' ဘာပဲပြောပြော နန်းဆု အခုပုံစံကို ကျွန်​တော်အရမ်းသဘောကျတာပဲ သိလား။ နန်းဆုလို သန်မာချင်လိုက်တာဆိုရင်လေ မဟားတရားပဲ။ ခက်နေတာက ကျွန်တော်ကိုက နုလွန်းနေတာ ''

'' နုတယ်ဆိုတာကလည်း နုလို့ရတဲ့သူ ရှိလို့မလား ''

နန်းဆု မျက်စောင်းလေးခဲကာ တိမ်တိုက် မေးတော့ သွားတက်လေးတွေပေါ်အောင်ထိ စပ်ဖြဲဖြဲရီပြ​တော့သည်။ တကယ်လည်း သူက နုလို့ရတဲ့သူရှိတာမို့ သူ့စိတ်က ဘယ်​တော့မှ သန်မာမှာမဟုတ်။