كاتم ضمير

8

#كاتم_ضمير
((( بقلم زينب ماجد )))
الحلقة_٨
حلاتك مو سهل كلما تشح تنهاب
الماي البي حياه وكت الغرگ ينذم
(إيهاب المالكي)
مينا : باوعت ورا رابي مشى درت وجهي دا اروح
طلع بوجهي رجال ضام وجه، حجه :هلا بأبني البطل
عرفته صوت ابويه ، حجيت : بابا ؟
-ما عرفت ابوج يا سبع
- وين جنت هواية دورنا عليك
-امشي وياي واحجيلك كلشي ابني البطل .
ضليت اباوع ، هو مشى ، ورجع دار وجهه : امشي
- وين اروح
- تعرفين بعدين يلا امشي اليوم اوكلج باحسن مطعم على حسابي .
مشى وصاف سيارة بالفرع ، صعد بيها واني صعدت وياه ، اخذني لمطعم ونزل النا تشكيلة ريوك كاملة وبدا هو ياكل ، بس اني مستغربة الوضعية ، من جهة شارد ومن جهة ما مهتم ولا اباله كلشي .
شوية واجت مرة كعدت : هلو فضولي
- هلووو
كاملها باوسها من الخد وكعدت .. حجت : هاي مينو الحجيتلي عليها
- اي هاي البطل مالتي ، والراح اخليها فوك فوك بالعلالي
حجه وياها واندار عليه يباوع ويضحك
حجت : - الا اسويها مدير عام واخليها ادير الشغل كله
- طبعا
اني اباوعلها .. مرة يطلع عمرها بنهاية الثلاثين على الأربعين .. شعرها برغندي قصير ولابس تنورة جوة الركبة و بدي ابيض وفوكاه قميص .. مرتبة الى ابعد الحدود
حجيت : منو هاي
حجه ابويه : سناء ، صد.... قاطعته هي
- مرت ابوج
باوعلها : شوية شويه ع البطل مالي لا تصدمينها هيج
حجت : لا هي جبيرة وواعية وراح تفتهم اللي نكوله الها .
- وشتكلولي
حجت هي ورافعة حواجبها بضحكة : يعني موضوع ابوج متزوج ميهمج ؟
- معليه بيه حياته مو حياتي
اندارتله وهي تكوله : انت كلتلي هي بطلة بس ليش مكلتلي هلكد مثقفة ومتفهمة
- وراح تتفاجئين بعد بمواهبه ، مينا تربات ادي .. ماكو مثلها .
مدت ايدها وكالتله : متأكدة حبيبي
ظليت اباوعلها .. ابوية رجال ب٦٠ عمره .. قصير وضعيف هاكدة مو مبهذل ولا واحد مرتب يعني شكله عادي كلش شلون كدرت تحبه وحدة مثل هاي وشوراها ؟
حجيت : ليش جبتني يابه اكدر اعرف
- اني جبتج لإن تعرفين انت الوحيدة الاثق بيها من بين خواتج وامنج على اسراري ، بس راح تخلين هلشي سر بيناتنا
- ميخالف بس شنو السر
- اني وامج .... قاطعته
- ام وحدة عندي واسمها جنان
- صح ، بس سناء بمثابة امي الثانية
- ما اتشرف
سكتت هي وهو كال : لا راح تزعلني منك يا بطل
- بابا يعني ما افتهمت اني ليش جاية لهنا .
- خابرت اختج ايناس وكلت الها اريد بطاقة السكن بس ما اطتنياها واني محتاجها
- يعني اجيتني بس حتى اجيبلك بطاقة السكن
- لا اني رايدج عندي تظلين يمي
- اظل يمك شلون
- يعني تعيشين عندي
- وانت وين عايش
باوعلها ، ورجع باوعلي : كملي ريوكج واني اكلج وين عايش .
اكلت وكملت ريوك وكمنا اني وياه وهي صعدت يمه ومشت السيارة ، وصلنا لباب بيت جبير وراقي ، ما عرفت المنطقة ولا سألت بس ارقى من منطقتنا العايشين بيها بهواي .
دخلت ، حجت هي : اخليكم انت وبنتك بالبيت واني راح اخذ السيلرة ساعتين وارجع
ردها : على راحتج .
طبينا اني وياه البيت جبير : بيتمن
- بيت سناء
- وعايشة وحدها
- سناء ارملة وعدها املاك هواي
- اذا حلوة وعدها املاك شعجب تزوجتك ؟
- شقصدج يعني اني مو حلو
- اي وجبير وهي صغيرة وعدها فلوس هواي
ضحك ، وحجه : الحب ما يعرف عمر ولا جمال بنتي ، من راح تحبين راح تعرفين الأكوله
- وليش شارد ؟
- اني ما شارد بس حميد ورطاني بصفقة وشرد وذباها براسي .
- اهل حميد نكروا الكلام
- طبعا ينكرون محد يكول اني بكت
- يعني اذا جنت بايك مراح تكول انت بكت
ضحك وكال : انت صايرة ذكية حيل وردودج قوية ، عفية هيج اريدج سبع وما تخافين من اي واحد وادوسين على اكبر واحد
دخلنا اني وياه وكعد
اسمعي راح اكلج سر بس ما اريد امج وخواتج يدرن بيه لحد ما يصير
- شنو هو ؟
- اني بعت البيت الكاعدين بيه وراح ادخل شراكة بشغل لسناء ، بس راح اعوضكم وراح اخليكم تعيشون ملوك والمليون تشمرونه شمرت الربع .
- شنو بعت البيت الكاعدين بيه واحنا وين اروح
- انت تعاي كعدي عندي
- وامي
- امج راح تعاني هواي بس كتلج بعدين راح اعوضها عن كلشي راح اشتريلها مثل هذا البيت واكبر .
- انت بكت الناس وعفتنا وياهم يهددونا وهسه تبيع البيت
- اني ما عفتكم
- لا عفتنا ، امي خواتي وين يروحن من ينباع البيت
- امج ترجع لاهلها وانتن تجن عندي على ما اشتري بيت جبير اجمعكم انتم وامكم
- البيت امي مشتريته وهي سجلته بأسمك لإن تحبك وتثق بيك
- واني هم احبها، وراح اشتريلها بيت اكبر واسجله بأسمي واسمها بعد
- بعد!!؟ انت تزوجت عليها وبعت بيتها وراح تطردها لاهلها وتخلينا عندك وتكول احبها .. اني من هسه اكلك ما اعيش وياك راح اعيش ويا امي ببيت اهلها .
-مينو اني ربيتج حتى ما اخليج تعيشين مثلهم اني اريدج قوية والقوة ما تجي الا بالفلوس
- واعوف امي
- ايام
- اكلك يابه انت بيك شي .. هذا مو بطل عرك ، ولا وحدة خاين امي وياها ولا عركة ويا واحد من عمامي ، انت جاي تبيع كلشي تملكه امي وتطردها حتى انت تعيش
- تثقين بيه لو لا
- بسناء ما اثق قبل شوية كلت اشافت بيك بس هسه عرفت تريد تقفص عليك
- اني ابوج يتقفص عليه .. اني الاقفص عليها وتشوفين بالايام الجاية .. راح نعيش ملوك
- صير ملك لوحدك
كمت من مكاني : تعاي
- شرايد مني بابا
- انت لازم تساعديني
- وشسويلك
- اني رايدج اظلين بالبيت عندي موضوع ثاني
- وشبقى ؟
- اخو سناء
- شبي
- اني مفكر ازوج ايناس لاخو سناء .. اخوها مدير عام بوزارة .. وعنده تلال تلال من الفلوس واذا اني اخذت سناء وهو تزوج ايناس راح نصير فوك
- واني شعلي بهالموضوع
- ايناس تحب امها حيل وانت ذكية لازم تساعديني نلكه طريقة نقنع ايناس وناخذ هالفلوس كلها .
اباوعله مدنك ويحجي بسكوت حسيت ابوي واحد مخرف ، حجيت : اني معلي انت وايناس
- ايناس واعرفها ما راح ترضى
- وليش ما ترضى اذا رجال زين ويخطبها يمكن تقبل شمدريك
- الرجال اكبر مني بس متلتل فلوس
- اكلك بابا انت ليش هيج خابص روحك على الفلوس
- هاي فوك ما رايد اعيشجن ملكات ، الما عنده فلوس محد يحترمه احنا لازم نصير اذكياء بعد حتى نصير زناكين والعالم كلها تهابنا .
- بابا ما اعرف انت شجاي تفكر بس ما فكرت اذا بعت البيت امي شراح يصير بيها
- هم رجعت وكالت امي ، جاي اكلج راح اعوضها وارجعلها اكثر بس خل نستعجل اني ليش رايد ايناس تزوج اخو سناء حتى نسيطر .
- والناس الجاي يهددونا
- اني مو كلت الج اخو سناء واصل وراس جبير .. هو يتكفلهم ويسدها واذا حاولو يوصلولنا هو يردهم
- اذا هيج ليش متختل من عدهم
- مو شجاي اكلج ليش رايد ايناس تتزوجه حتى نسيطر وبعد محد يكدر النا ، هسه الرايده منج تظلين يمي اليوم عازمه على عشى حتى اتعرف عليه .
- يعني انت ما تعرفه
- لا بعدني
- مخطط وتريد تزوجه ايناس وانت ما تعرف
- احنا لازم نخطط حتى نربح اني شلون ربيتج شو خربانة ؟
- وشلون تزوج ايناس لواحد ما تعرفه
- مدير عام تعرفين شنو يعني مدير عام ، تاني اليوم يجي ع العشا ، لازم نسيطر بنيتي ، احنا لازم نطك ما نظل هيج امج تشتغل كيك و ايناس تبزز الناس ابر ، لشوكت نبقى هيج لازم نصير احسن الناس واذا ما نصف ويا ذوله ما نصير .
بقيت اباوعله شلون مدنك ويهمس ويحرك بيده ويحجي بحماس ، حجيت : هسه اني اريد اروح اذا تاخرت وامي عرفتني غايبة توكلني نعل .
- معليج ظلي اليوم هنا خلي نخططلها واني ادز رسالة لايناس واكللها مينا يمي .
عافني ومشى اخذ تليفونه
كعدت بملل : ابوي مدري مخرف مدري شصايرله شنو متزوج شنو مشروع وفوكاها بايع البيت، شكد احب ابوي بس مرات احسه ارعن على شوية مخرف .
فتحت البلازما شفت بيها نت واشتراك نتفلكس
فتحتها وكمت اباوع انمي .. حلقة ورا حلقة والشتا نهاره كصير ما حسيت الا الليل صاير .. ظليت اباوع للشباج : اني ما اكدر اعوف امي ، اذا ابوي باع البيت وراحت لبيت خالي .. اني راح اعيش ويا امي .
دخلت مرت ابوي : تكدرين تصعدين فوك لازم احضر الصالة اخويه راح يجي ، او اذا تحبين تساعديني .
ما رديت عليها
شمرت الريموت ع القنفة وكمت منها بتجاهل طلعت وكفت بالباب .. المنطقة ولا واحد طالع جنها مال موتى ، وين بالامين يمنا لل١ الناس طالعة والحياة حلوة .
صفت سيارة .. وطلعت مرت ابوي
طلع ابو التوصيل جايب الها اشكال الوان الاكل ، صاحت : ساعديني ندخل الاكل
شلت العلاليك وياها ريحته طكت بخشمي متعرف دجاج على سمج مشوي على قوزي ، حطته وصاحت : فاااضل ، فاضل نسيت الببسي دز على ببسي .
- انطي لمينا خل تجيب
- دكوم انت جيب شتندل
- اني ما عندي خردة انطي لمينا تجيب من راس الشارع
تنهدت وهي تنفخ و طلعت من صدرها فلوس وانطتني ٥ الاف : جيبي ٥ كزازات ببسي ، مو قواطي كزازة .
مشيت لراس الشارع واسولف
ابوي مو بس ويا امي بلا مسؤلية
حتى ويا هاي ، لو عنده فلوس الدنيا يصيح ما عندي .. مصيرها تمل منه وتشمره ويرجع لامي بس هي تتحمله .
جبت ببسي واجيت لكيت اخوها جاي مطبيت يمه
فتت للمطبخ ، هي مخبوصة بالعزيمة اخذت وتكلي : جيبي هاي صينية الدولمة للصالة بسرعة
جبت واجيت
حجه ابوي : هاي بنتي مينا
حجه : بنية لو ولد هاي
- بنية بس تربات ايدي مربيها زلمة بألف رجال
ابتسم وكال: والنعم
باوعتله شايب بعد اكثر من ابوي وهم كصير بس سمين مو ضعيف مثل ابوي وفوكاها يريد ايناس تاخذه ، هذا لو طلعلي بالجر واربح اذبه بالزباله .
بقى ابوي ومرته يسولفون ويا
واني كاعدة الاكل طيب حيل وهذا اهم ما بالسالفة .. كمت اكل ومتجاهله حجيهم .. لهناك يلا طلع ، اجا ابوي : شفتي شلون محترم
- اي
- لو تاخذه ايناس نطك فوك فوك
- اي
- يعني تساعديني
- بابا اريد ارجع للبيت
- اني وين احجي وانت وين ولج بابا هذا مدير عام شفتي سيارته وبيته بعد اكبر ، اذا تزوجته ايناس كل فلوسه تصير الها
- وهو ما متزوج
- لا متزوج بس مرته عجوز بكده وسناء حاجيه وياه وهو كايللها اسعيلي بالموضوع ، ما تسمعينه شلون يكول احنا اهل ان شاءالله
- وامي
- رجعت وكالت امي
دروحي
عافني ومشه لغرفته
بعد ظليت كاعدة ع التلفزيون لل٥ الصبح .. ما كعدت غير ب٢ الظهر .
......
عابد : اينااااس ، ايناااااس
جيبو مي بسرعة ايناااااس
ركضت ميس تجيب مي و وهو يضرب على خدها ، جابتله طاسة مي كام شيشيل مي وينكث بوجهه ويضرب بخدها ، صحت ... باوعت دارت عينها استوعبت الدنيا ، فزت من مكانها
- امي وينها ... وينها امي
- بس اهدي لازم نروحلها بسرعة بس اهدي
كمت من مكاني بسرعة فزيت .. دارت الدنيا براسي ، لزمني : كلت الج اهدي راح توكعين
رابي يصيح : عمتي وينها بيا مستشفى احجي .
- راح ينقلونها لمدينة الطب لازم نلحكهم
طلعت من البيت وميس تصيح وراها : انتظري اجي وياج ايناااس
- رابي جيب ميس والحكني
حجيتها وطلعت اريد امشي صاح عابد : اصعدي نروحلها ، امشي
- لا انت روح
- انت مخبلة ، دمشي خل نروح نشوفها شلونها
عفته وطلعت بهمة للشارع العام
ركب سيارته ولحكني : يولي بعقلج شي اصعدي
فتحت باب السيارة وصعدت بيها بس كلبي ملهوف ..وكلبي يدك وراسي هوسة صدمة بصدمة ما ادري افكر شلون راح نطلع من البيت لو امي شصاير بيها لو اختي وين لو بيش افكر ..
كاعدة بالسيارة بس الوب ، هو يحجي وياي من كد ما عقلي هوسة ما مركزة وياه شيريد وشيحجون هو وحمايته ..
وصلنا لمدينة الطب خابرت ع الرجال الكالي سوت حادث دلاني هي وين ، ركضت ع المكان .. خابرته ردت اعرفه منو طلع كبالي ، صحت : امي ويييين شسويتوا بأميييي
كمت ادفع بيه
- بالقران هي الطلعت كبالي والله ما متعمدها
- اليوم اذبحكم اليوم ، امي وينهااااااا
وصل عابد جرني واني ويا الرجاب وادفع بيه ، سحبني : اشششش ايناس مو هيج
- امي وينها كلولي
- اخذوها جوا
ركضت عليها مدخليها للعناية المشددة .. انطيت الباج مالتي ودخلت للعناية ، شفتها تخبلت كمت ادك على وجهي وابجي : ماما احجي ويايه ماما ، ابوس ايدج امي لتعوفيني، ماما حبيبتي فدوووووة حاجيني لتعوفيني دااااااية .
اديها مشخطة راسها ملفوف .. ووجها مشخط
فتحت عينها ، ظلت تباوع فوك ، لزمت ايدها : ماما حبيبتي احجي وياي ، اني انو ، داية فدوة لا تعوفيني ابوس ايدج .. كمت ابوس بأديها وابجي من كل كلبي .
حجت : رجلي ، ايناس رجلي ماما
وكفت الممرضة : حبيبتي ميصير راح تجي الدكتورة ملازم تبقين هنا
- اني اشتغل بمستشفى وهم بقسم العناية ، بس جاوبيني امي شبيها .
- خيطنا راسها ، وجروح ايدها ، بس الدكتور شاك عدها كسر بالساق
- يعني شنو ؟
- بعده نتيجة الفحص ما طالعة لازم يكملون الفحوصات بس ع الاغلب عملية لإن رجلها منتهيا .
ظليت اباوعلها ودموعي تجري ، لزمت ايدها : ماما كومي لخاطري والله اعوضج بمكان البيت بيوت بس لا تعوفيني .. ماما حبيبتي
- انو ماما رجلي ، راح اموت منها ولج ااااخ يمه بنيتي راح اموت .
حضنتها وكمت ابجي من كل كلبي
ظلت الممرضة تطبطب على ظهري : الله يعينج حبيبتي ، بس راح تجي الدكتورة ميصير تبقين بالعناية فدوة.
عفتها واني اكوللها : ماما امانه يمج عليج الله لتعوفيها
- بعيوني والله ما اعوفها بس ارتاحي برا
طلعت عابد منتظر برا العناية ، حجه : ها
- ماما حالاتها مو زينة
حجيتها وانتجيت ع الحايط وكعدت ابجي وحطيت اديه على عيوني
- ميخالف ايناس الله كريم صيري قوية ، امج راح تكوم
- وين الكا بابا واكله بسنوني ع السواه بينا وييين ، اكو اب يشمر بناته ومرته للنار مثلنا اكو اب يبيع بيت ويشرد عرضه بالشارع ولكم مفكر بينا مفكرررر
وصلت ميس ورابي ، صرخت ميس : ماما وين ، احجي ماما وين ، شصاير بيها ايناس امي .
- امي مو زينة ميس مو زينة
كامت تضرب على خدودها وتبجي وتصيح : معليه ايناس اريد امي ، شوفيني امي اريد امييي
كامت تصيح ورابي يجر بيها وتصرخ
دنكت وضميت راسي بديه وابجي .
وكف ضياء : سيدي
اندارله عابد : ها ضياء
- تأخرت حيل وخابرني العريف يسأل انت ما جاي ترد عليه .
هز راسه : ايناس اني صار لازم اروح بس راح ارجع ، طمنيني بالتليفون .
مسحت عيوني : لا كلفتك هواية وما قصرتك وكفن ويانا هواية اخذ راحتك
- لا بالعكس ، نعرف الحادث ومصيبته اتعرفين اخوي سبق امج بأيام وبنفس المصيبة نتشارك ، صيري قوية واي شي تحتاجي بغلاة امج لا تترددين ، ونبقى ع الاتصال .. يلا اودعناج
كام ، كمت وياه : اشكرك هواية مع السلامة
مشى واني فتحت ادية لميس وحضنتها : اني وياج لازم نصير اقوى من هيج كدامنا ايام سودة هواي ، لازم نلكى مينا ونوكف ويا ماما حتى ترجعلنا ، ومنكدر نسوي هيج اذا متقوينا ابعضنا .
حطت راسها بصدري وكامت تبجي ، رابي يفرك بوجهه وواكف على صفحة طلع حبوب من جيبه وحط بحلكه ، بسرعة فكيت عيوني ودفعت ميس من حضني : عزا رابي انت تريد تورطنا .
- ما اكدر ، اذا ما اخذهم ما اكدر اساعدكم بشي
- ومنو طالب منك مساعدة انت كفينا شر السم الدا تاخذه ومحد طالب منك شي مناقصة فوك مصايبي يلزمونا بممنوعات .
احجي ويا وهو عينه تباوع ليكدام ويرجف ويحاول يلزم نفسه : اني راح اوكف وياكم .
- اوكف لروحك بالاول وانقذها احسن من متوكف ويانا وتورطنا.
دار عني ووكف لهناك .. واني ظليت واكفة وميس كاعدة تبجي ، مسحت وجهي ورفعت عيني ليفوك : لا سهلا الا ما جعلته سهلا .. ربي سهل هالأيام عليه والله اني مو كد حمل كل هالمصايب هواية ، دخيلك ربي قويني وخليني اتحمل ... عيني ليفوك ودموعي تجري لجوا .
اجا الرجال الدعم امي : ها اختي
- كلشي يصير بأمي انت تتحمله ،ولو صار بيها شي اكلك بسنوني
- خادم ، بس والقرأن هي الطلعت فجاة كبالي ونزلت من الرصيف ع الشارع العام ما لحكت حتى ادوس بريك
حجه الثاني : امي اشهد والله ما اعرفه الرجال بس الحادث ما متعمد والله هي المرة ذبت روحها على الشارع العام بلا وعي
- اختي فدوة والقران اني مو حمل دعاوي وسجن
- اني ما اقيم دعوة عليك ولا اسجنك ، بس كلشي يصير بامي انت تتحمله .
- خادم ، بس لإن الضابط كبل شوي ما صدكاني يكلي اخيسك بالسجن ، واخذ رقم سيارتي ورقمي وشكد ما احلفله ما صدكاني .
عفته وانطيته ما رديت عليه
بقوا هم يحجون ورابي واكف على صفحة .. طلع رجال : منو ويا جنان
باوعتله : نعم
- تعاي
طبينا اني ورابي وميس .. كال : واحد منكم
باوعت لرابي وميس : انتظروني هنا
دخلت الدكتور شرحلي حالتها وكال : عدها تهشم بالساق يحتاجلها عملية فورا .
- راح تجري العملية ؟
- لازم احولها ع الدكتور المختص وشوف شوكت يوصلها السرا
- يوصلها السرا ، انت دا تكول لازمها عملية فورا دكتور
- وياج الف حالة تحتاج عملية احنا منكدر نسوي الف عملية بمكان واحد ، انصحج تنقلينها مستشفى خاص ، لإن اضمنلج بأقل ما يوصلها سرا العمليات، واذا ما سوت العملية بأقل من يومين تنكص رجلها .
- اوكي اوكي انقلها خاص
- براحتج كملي اجرائاتها وانقليها .
طلعت من عنده وصيت رابي يبقى ويا ميس
واني طلعت دا اروح ، طلع عمي وليث بوجهي : نخابر عليج ليش ما تردين
- مو اني بنص الخير وما ارد عليكم
- امج وينها
- اكول لو تسال على ابوي وتعرفلي وينه
- دكفي شوي وخل نحاجيج
ليث : شبيج ايناس امج شصاير وياها وشلون سوت الحادث
- احجيلك على حادث امي لو احجيلك شلون ابوي بايع البيت الاحنه بيه
فز عمي : يا حول الله .. شني بايع البيت
- مي فدوة عوفني لإن روحي واصلة لهنا
- دفهمينا هسه شنو حالة امج
حجيتله ، كالو ننقلها
ساعدوني ننقلها لغير مستشفى ، وابو الحادث اجا على عمي يشرحله ويسولفله وكاله : اني خادم شتحتاجون بالخدمة .
عمي من يمه تصرف وكاله : لا بويه روح الصوج من عدنا ، انت ياهو ماتك ، امشي ومبرية الذمة .
باوعت من ابعيد الرجال راح ، اجيته : عمو الرجال راح
- اي شلون امج هي الذبت روحها كدام السيارة .
- ابويه بايع البيت وامي راح انقلها خاص اقلها يشيل نص المبلغ ويانا .
- لا لا لا ، عيب زلمه ماله غرض الصوج من امج هي الغلط
شطت من تصرفه بس الوكت مو مناسب للحجي
عفته وصعدت بالسيارة نقلنا امي لمستشفى ثانية ، اطلع الدكتور على حالتها .. وكال : يحتاجلها عملية بلاتين بأسرع وكت .. سعر العملية ٩ ملايين .
صرخ عمي : كول يا الله بويه منيلنا ال٩ ملايين كول مليون ثلث ملايين ، تسعة منين نجيب
- تكدر تنقلها ع العام حجي وهم يسووها بلاش
- بس بالعام كالو تلزمون سرا اسبوع يلا يسوولها العملية
- هاي بعد يمهم انتظروا
- المرة تنكطم رجلها شلون ننتظر
- هاي بعد انتم يمكم شنكدر نسويلها
ايناس : سويها دكتور واني بأسرع وكت راح أمن المبلغ المه واقدمه
- ميصير نظام المستشفى لازم تسلمين الفلوس يلا تنفتح طبلة ونباشر بحالتها
- بس بهيج حالة تموت
- عزيزتي هذا نظامنا تكدرين تنقليها عام .
ظليت اباوع لعمي وهو يباوعلي : منين راح نجيب فلوس العملية بهالسرعة .
رد : والله يا عمي ما ادري
مشيت وخابرت اصدقائي وصديقاتي واحد واحد ، كل واحد بيهم يكلي : والله يا ايناس ما عندي .
رجعت عمي ماكو ، بس ليث واكف : عمي وينه
- راح ابوي
- والمبلغ شلون راح نامنه كولي
- والله خابرت اصدقائي محد عنده يدايني ، ابوي كال راح اروح على واحد صديقه بلكت عنده ، صدك ايناس نسيت اكلج
- شنو ؟
- مينا بالبيت ، جانت عد ابوج تكول وصلني ابوي
- يعني صدك جانت عد ابوي
- اي ، بس ما نازل بس موصلها وطالع ، ولحد هسه ما تدري بالصاير ابوي كايل الها امج وخواتج ابيت خالج .
عفته ومشيت لأمي طمنتها على حال مينا
وبقيت يمها وراسي مفتر اجا خالي رسول طب على امي سلم وكعد وياها ومن سمع بالعملية ، يحاجيني ما كأنها اخته يكلي : وهسه شلون راح تجيبين فلوس العملية
- اجيب .. خالي هي اختك المفروض تشيل عني حالك حالي
- واني منين اجيب ابوك لو ابيع بيتي
- اقلها اسعى وياي شوف منو يداين
- ان شاءالله اخابرلج واشوف منو يكدر يداينج
امي كاعدة ، حجت : لا تشيلين حملي ييمه عوفيني ، امداها رجلي التذلج وتخليج اطلبين من هذا وذاك عساها بالكص .
فز هو يكلها : جاي اسلم عليج وتكليلها هذا وذاك مو هذا فاضل الواكفتله سيف مو هذا فاضل العفتي حتى اهلج لخاطره وينه عنج ما يشيل مسؤلية مرته شو ذابج ذبة الجلب و جاية تلومين وتعتبين علينا
وكفت بعينه : مو امي التنذب ذبة الجلب ولا خلف الله عليك ولا على ابوي اني اشيلها وادري ابيع روحي وما اخليها تحتاج لا امثالك ولا امثاااال ابووويه .
حجيتها ضربني راشدي بسرعة وهو يصرخ : من ترفعين صوتج على خالج اكسرهااااا والله بت فضيل الك*** روحي كود*** مثل ابيج وجيبي .
- اذا انت خالي وتكلي هيج
تف لا بارك الله بهيج اخو
اني كلت هي لو هو هجم عليه مثل المخبل يفشر ويعيرنا بأبوي ويريد يكتلني ، ليث كام يدفع وذاك يفشر عليه .. واني اكله : اطلع برا .. اطلع حتى جيتك ما اريدها اطلععععع .
انداريت لأمي دموعها تجري ، لزمت ايدها : دموعج اغلى منهم كلهم ، اني وياج بألف زلمة والله ما اعوفج لو هسه اموت ، وعمليتج اسويها اخذيها مني وعد
حجت بصرخة بجي : عوفيني ولج ييمه خلي رجلي تنكص شنو البيه ما كصه وكسره ابوج حتى تظل على رجلي ، ولج عوفينييي
حظنتها وحطيتها على كلبي ودموعي تجري : اعوف روحي وما اعوفج ، والله ماما ما اعوفج .
هي تهتز من البجي واني ابجي صفت ميس ويانا وتجي على بجيتنا .. انداريت الها : ابقي يم ماما ، اني طالعة
مشيت لزمني ليث : شلون تتجاوزين عليه تخبلتي
- عوفني ليث
- كلنا وياج محد عايفج ، بس لا تبقين بهالتوتر ، ايناس دا احاجيج
جريت ايدي منه وطلعت ، خابرت على عمي ، يكلي : خابرت عليهم كلهم ما كدرت امن غير مليون ونص .
طلعت للمستشفى الأني بيها ..
دخلت الدكتور انيس ممداوم ، اخذت رقمه من الرسبشن وطلعت ، سجلت رقمه وايدي ترجف .
مستحيل مستحيل اعرف بطلبي منه راح يستغلني .
وامي ؟ منين اجيبلها ؟ اعرف محد راح يامن ٩ مليون بيوم واحد مستحيل ..
ردت اتصل بس مترددة الرجفة لازمتني ..
لازم اتصل .. خابرت : الو
- الو منو
- دكتور انيس اني ايناس
- ها ايناس شرايدة
- امي سوت حادث ويحتاجلها عملية ابلاتين بأسرع وقت
- الله يشافيها
- اني اعرف معارفك هواي بمدينة الطب ، اتمنى تتوسطلي هواك ويسوون العملية لأمي باجر .
- انت وين هسه ؟
- اني بالمستشفى
- تعاي للبيت خل نكعد نسولف ويصير خير
مسحت على وجهي وفركت عيوني ، الغصة وكفت ابلعومي ع الأني بيه : - اني بالمستشفى يمها محتاجتني ما اكدر .
- اي دتعالي مريلي حتى نروح اني وياج لإن بأتصال ما تفض اروح هناك وبنفسي اخليهم يدخلوها العمليات ، يلا متتضرج تعاي حتى نروح .
قفل الخط
سديته دنكت ابجي : الله لا ينطيك بابا الله يهدك مثل ما هديتنا ... كمت ابجي بعرفة .
طلعت من المستشفى ورجلية تجر ..
اذا ما اروح امي تنكص رجلها واذا رحتله اخسر روحي .. امشي ودموعي تجري ..
دز رسالة ع الواتساب اللكويشن مال بيته ..
ظليت صافنه بالرسالة ومترددة .. وكفت ع الشارع ،وكفت تكسي وطلعت .... يتبع
☆☆☆☆☆☆