ذاكرة الماء

الجزء الاول

اجاني اتصال من صديق
الو السلام عليكم مروان
اهلا حسن شلونك
حسن /الحمد لله
حبيب بعد يومين خطوبته حبيت تكون موجود..
مروان /على الخير يارب ان شاء الله اجي.. يايوم
حسن /الجمعه بعد العصر
عقلي رجع على الدوام وشغلي
كتله ان شاء الله سهله
وصلت للبيت
مديت ايدي افتح الباب بالمفتاح
اتفاجئت مفتوحه
ابتسمت عرفت رهف كاعدة اكيد
دخلت وودعت صديقي حسن وسديت الباب
كعدت نزعت حذائي..
و صحت رهف رهف..
ذبيت الغراض من ايدي ورحت لغرفه النوم
شفتها مموجودة
كلت اكيد تسبح..
رجعت للمطبخ اخذت القوري اسوي جاي
واحضر بيض..
اسهل ريوك وطيب..
بلشت..
حضرت الصمون والجاي..
وكنت اتصفح مواقع التواصل
كملت كل شي..
صحت رهف يلا حبيبي تعالي نتريك جهز كل شي

ماكو جواب
استغربت بالعادة تجاوب وتجي متتأخر
عفت كل شي واتوجهت مرة ثانية لغرفه النوم
ودخلت داخل الحمام..
شفتها ماكو
..
استغربت اكثر؟
وينها..
توجهت لغرفه الاولاد شفتها مرتبة وهي مموجودة
معقوله طلعت لمكان؟
اممم
احتمال بالحديقه
نزلت بالحديقة..
بسرعه
طيب اني ليش هيج.. قلق..
هه اني مو بالعراق حتى يراودني القلق..
تفحصت الحديقه ماكو رهف
صوتي بدا يعلى رهف رهف
يالله وين تروح..
ابتسمت اكيد بالورشة ترسم ومشغله كاظم الساهر وناسيه مروان
حسيت بغضب..
نزلت بسرعة للقبو الي هو جهزته ورشه للرسم
فتحت الضوء..
كل شي نفس ماهو.
الواحات و الفرش.. الالوان
؟؟؟
طلعت... وين تروح وهي قبل متطلع تكولي؟
اكيد..
من ترجع احجي وياها
المفروض متطلع الا تنطيني علم..
رجعت صعدت فوك
ودخلت للمطبخ..
صبيت الي جاي..
وبديت اتريك اخذت الفون واتصلت بيها
جان يرن وماكو جواب
؟
حجيت ويا نفسي بصوت عالي ميصير هالتصرف
راودني شك الاطفال بيهم شي
وطلعت..
اخذت الفون وطلعت رقم اختي
الساعه قريب ال ٨ اكيد نايمين
ماعرف اتصل لو لا
انتظر ترجع بلا ما اقلقهم
اكيد جان خبروني..
كملت اكلي..
بقلق لان اول مرة تطلع بدون علميى..
وشلت الاغراض وخليتها ع السنك
ورحت اغسل ايدي بالحمام الجوة
يصير من جهه اليسار من البيت بصف الدرج..
دخلت..
شفت بالكاع شبشب رهف واحد وتليفونها موجود ع الرف
اخذت الفون بي رمز بس اكو مكالمه
هاي اني اكيد هي وين راحت
استغربت..
فتحت الماء اغسل واطلع اشوف شكو
تراوالي خلف البانيو شخص
البردة بيضة
وكل شي ابيض السيراميك والفرفوري
مديت ايدي وسحبت البردة
هي ثواني وعقلي ميستوعب الي شفته
البانيو عبارة عن  لون احمر اول مرة عيوني مستوعبت المنظر ولا عقلي كدر يستوعب
اتذكر كلش زين
حسيت بشي يمشي من رجلي صعد لراسي بطئ خدر كل اعصابي
ممبينه ملامحها هي او لا ..
رهف.. و ماء احمر.
مديت ايدي بسرعه
طلعتها من الماء
وبقيت مهول مصدوم
كانت مذبوحه من نحرها.. وجهها اصفر ..مو هي مو هي
والماي واصل نص البانيو
طلعتها من البانيو وخليتها بالكاع بملابسها البيضة الخفيفه ..الي تحول لونها الى احمر
وبقيت اضرب على راسي ..اريد اصحى...
مصدوم حيل
كمت من يمها ورجعت
قربت راسي على صدرها ماكو نبض. هزيتها رهف رهف
لكن دمها ترس ارجاء الحمام
كأن نافورة تدفق
ماعرف شسوي والدم غطاني كلي
وزاد توتري وخوفي وضياعي
من داخل الحمام
حضنتها واصررخ ررررهف
رررهف كومي..
ماعرف شلون تمالكت نفسي واتصلت بالنجدة صوتي جان متقطع كوة ذكرت العنوان
واجتي الاسعاف والشرطه
بهاي اللحظات تخونك الذاكرة والتعبير
والحياه هم
كل شيء يخون حتى نفسك تخونك