#البطل_المغمور2 "زهور القمر"
#جمان_فريد
#الجزء_الخامس_والثلاثين "راجعين ياهوى2"
رمضانكم مبارك..
قال رسول الله صلى الله عليه وسلم(ايعجز احدكم ان يكسب في اليوم الف حسنة؟فسألة سائل من جلسائه:
كيف يكسب احدنا الف حسنه؟..قال:يسبح مئة تسبيحه فيكتب له الف حسنة او يحط عنه ألف خطيئة)
صحيح مسلم..
💐💐💐💐💐💐💐💐💐💐💐💐💐💐💐💐
في الكوجينه..
واقفه تزين في التارت بشرايح الفراوله بتركيز...
وخرت شعرها للخلف بعد ماكملت ووقفت ع حيلها وقالت؛حلو...
بعدين التفتت لتليفونها وخداته وبدت تصور فيه التارت..
وبعد ماخدتله كم صورة...خداته وحطاته في الثلاجه...
رن تليفونها فتحت الخط وردت..
جنان:السلام عليكم سارة..
"وعليك السلام..بابا روح؟:
جنان؛لالا ماروح حد قاعده بروحي في الحوش..
"اهو اني وريحان في الطريق"
جنان؛تمام..بالله سارة ماتنسيش الشكلاطه..
"مش ناسيتها...سلام"
جنان؛سلام...
وبعد مانهت اختها المكالمه طلعت من الكوجينه ومشت بإتجاه دارها...
🍁وفي حوش الجيران...
"يام قولي باهي بالله عليك"
عفاف؛لايعني لا الهى بقرايتك ماعندك مادير بيها الخدمه..
عرفه؛يام افهميني متحشم واني في عمري هدا نمد يدي لجهاد..
عفاف؛معاش نخليك تمد يدك حاجتك تاخدها قبل تقول عليها..
ع خشة تهاني وهي تساوي في وشاحها؛يام ماتسكريش راسك الولد يبي يعتمد ع نفسه..
عرفة هز راسه وهو يوافق في تهاني رايها..
عفاف؛يعتمد ع نفسه في حاجات تانيه...
ع خشة بدر وخالد يجروا ورا بعض...
عفاف؛هني روحك انت وياه قعمزوا..
شدهم عرفه من قفاهم ووقفهم وهو يقول؛يام المحل في اول الشارع اهوا هني مش بعيد ماعندك من شني تخافي..
عفاف؛اطلق الصغار..
عرفه؛مش طالقهم لين تقولي باهي..
وخالد وبدر يشبحوا لبعض بغضب..
وتهاني تشوفلهم وتضحك..
عفاف؛عرفه..
عرفه؛يام اللي عندي قلته..
مطت شواربها بملل وقالت؛خلاص ياودي باهي..
عرفه؛كلمه...
عفاف؛كلمه ياودي كلمة...
هو ابتسم وطلقهم وهما طول علقوا في بعضهم...
عفاف؛بعدهم عن بعض بعدهم...
وعرفه يتفرج عليهم ويضحك...
"خالد"
خالد طول طلق بدر وبدر بعد عنه..
تهاني؛يعرفوا من مني يخافوا..
ع خشة نسيبه قال؛وين البطمه وينه...
خالد؛هني ماما...
رمت شبشبها وشداته وخشتله بيه وهي تقول؛من اللي مسحلي لعبة السنافر من التليفون..
هو هرب منها ويقول؛اسف ماما اسف..
نسيبه؛اسف ماما اسف... والمزارع اللي زرعتهم والفلوس اللي ربحتهم شن بيعوضني توا..
ولحقت عليه بتضربه..
هو هرب في اخر لحظه من الكوجينه وهي وراها بالشبشب:والله لما نعطيك بيه ع ظهرك يابطمه...
وفي الكوجينه يضحكوا عليها..
عفاف يضحكه:جو عليها هالنوسه..
عرفه بضحكه؛بالذات مغامراتها هي وخالد..
عفاف تبدلت ملامح وجهها للجديه وقالت؛اسمع جاي والله ينزل مستواك في قرايتك تشوف...راك تاني تانوي السني..
عرفه ابتسم وقال؛اطمني ياقلبي كل شي حيمشي تمام بعون الله...
تهاني:ان شاء الله..وتوا بالله عروفه نبي نبعتك للدكان تشري شيبسات ع شكاليط الليله سارة والبنات بيجوا يهدرزوا...
هو ابتسم من قلبه اللي بدي يدق بقوة وقال:وين فلوسك..
مدتله تهاني الفلوس وقالت؛فيسع فيسع..
خداهم منها ومشي طلع من حداهم..
عفاف:هيا ياللا ابدي ديري العشي قداش ليك ماحطيتي طنجرة ع نار..
تهاني؛باهي يام وانتي ماتصدقي..
فاتت من جنبها قرصتها من ذراعها وطلعت...
تهاني وهي تتحسس في ذراعها؛وواك يام شن هدا...ووك عليا بدمها..
"ياسر من غير كذب..."
ضحكت تهاني وهي تمسح ع ذراعها مكان القرصه...
🍁🍁🍁🍁
"شن جوك وشن جو القرايه قريب تكملي خلاص"
دانيه؛ايه قعدوا ثلاته شهور وخلاص..
رتاج بإبتسامه؛انتي غير تخرجي تلقي عيادتك تراجي فيك..
دانيه بضحكه؛عيادة مرة وحده!...لااني مازال عليا...ناخد خبرة بعدين نفتح عيادة...
رتاج؛في كل الحالات تراجي فيك..
ابتسمت دانيه وقالت؛شن جو عبدالحميد..
رتاج بإبتسامه:الحمد لله..قبل بيجي معاي بس الخدمه شداته
صفقات واجتماعات ولقاءات مايقعدش بكل..
دانيه بإبتسامه؛ربي يعاونكم...
رتاج:آمين...شن داير فيكم كنعوني..
دانيه:عسل ياعمري مامحلي حياتنا غيره..
رتاج؛تعرفي عبدالحميد قالي لماتروحي روحي بيه.
دانيه؛لالارتاج لا امي متعلقه بيه هلبه ماتقدرش تخليه..
رتاج بضيق؛واني مستاحشاته هلبه ونبيه معاي قلبي يوجعني وين نجي زيارة نشوقه متغير وكابر بعيد عن عيوني...
دانيه بحزن؛مش عارفه شن نقولك حتى انتي عندك حق..بس امي يارتاج ماتقدرش تتنفس من غيره..
تنهدت رتاج بحزن وقعدت ساكته..
ودانيه تشوفلها بحزن...
ع خشة سدينه ومعاها كنعان...
رتاج؛تعالى كنعوني حبيبي عطيني بوسه..
قعمزت سدينه وقالت؛برا حدا امك وليدي...
الولد مشي لأمه وين وصل فيها قعدت ضم فيه وتبوس وتقول؛محلاه وليدي..ياعمري قداش استاحشتك..
والولد ساكت وخلاص..
سدينه؛قداش بتقعدي المرة هادي..
رتاج؛اسبوعين بس..
سدينه هزت راسها وقعدت ساكته....
شويه وسمعوا باب الحوش انفتح ...
دانيه بإبتسامه؛رشيد روح...
رتاج قعدت تشبح لمدخل الصالون وتراجي في خشته..
شويه وبان عليها...شاب طويل عريض لابس بدله رسميه شبابيه ابتسم وهو متفاجئ لما شافها وقال:امتى جيتي انتي!؟
ناضت رتاج وهي تقول بضحكه؛بكري شويه..
وصل فيها وحضنوا بعض وهو يقول؛حمد الله ع السلامه..انستي ونورتي...
رتاج؛بوجودك حبيبي..
بعد عنها وقال:شن حالك وشن حال عبدالحميد ماجاش..
قعمزت وهو قعمز جنبها وهي تقول؛المرة هادي انشغل ماقدرش يجي...
رشيد:ربي يعاونكم..
رتاج؛آمين...ايه قولي شن هالاخبار الحلوة اللي نسمعوا فيها والكلام المليح اللي نقروا فيه..مررت نظرها عليهم وهي تقول..اخباره واصله لغادي اسم رشيد مجذوب ولا معروف بين رجال الاعمال الليبين الكبار اني مانصدق نسمعهم يحكوا عنه طول نقوللهم خوي..
دانيه بإبتسامه غرور مصطنعه؛مالا اني شن نقول وين نشوف حد شاد مجلة اقتصاديه ع غلافها صورته يولي خشمي في السمي..
سدينه؛الله يبارك على ولدي..
ابتسم وهو يقول؛المدح في الوجه مذمه...ناض وهو يقول..بنركب نبدل حوايجي وننزلك عندي معاك هدرزة طويله..
رتاج بإبتسامه؛قدامك اسبوعين هدرز لين تعيا...
رشيد بضحكه؛كويس..
ومشي طلع من حداهم ....
ورتاج وهي معاه بعيونها قالت:الله يبارك...
🍁🍁🍁🍁🍁
"شن درتي"
جنان وهي تشتغل ع طريزة متاع مفرش:تارت كريمه مزين بالفراوله...
ريحان قعمزت ع السرير وهي تقول؛منورة جنجوني..
ابتسمت جنان..
ريحان؛خل نوض نصلي المغرب وبعدين نبدا نقرا ونفتك من صداع سارة..
وناضت ومشت طلعت من الدار..
وجنان وهي مبتسمه رجعت ركزت مع المفرش..
🍁وفي الدار اللي فجنب دارهم...
كانت سارة مقعمزه ع المصلية تقول في اذكار بعد الصلاة..
بعد ماكملتهم شبحت للآيباد متاعها المحطوط ع الطاوله...
خدت نفس ومشت قعمزت ورا الطاوله..
خدت الآيباد وفتحاته..
عضت ع شاربها...وخشت ع الفيس...
ومنه ع صفحه ما...شافت فيديو جديد نازل..
فتحاته طول...
(السلام عليكم....مسائكم ورد...ان شاء الله تكونوا بخير جميعا...
اليوم درت الفيديو هدا استثنائي بش نرد ع اسئله جتني ع الخاص...طبعا خديت الاسئله المهمه...
وحده قالتلي فاتح الريحان ولا الحبق يندار في المبكبكه عادي..
ايه هو صح سؤال اجابته معروفه بس تكرر عليا اكثر من مرة من بعد اخر فيديو نزلته للزرده اللي درناها في المعهد وطيبت فيها المبكبكه للفرنسيس متفكرين شن قالوا عليها ولا...ضحك وقال..لليوم درتلهم وحده تانيه..لو تسمعوهم كيف يقولوا مبكبكه...ضحك وقال.. خلونا في المهم...ايه يندارلها وتطلع مش عاديه...انتم جربوها وادعولي....ربي يعطيني اللي في بالي بس...وااه من اللي فبالي...
في جماعة قصقاصه لخوتنا العرب..فضوليين ..حشريين...يسألوا فيا شن هو اللي في بالك يافاتح..كان نبي نقوله راهو قلته....فوتوا القصقصه وادعولي وخلاص.. )
ارتسمت ع وجهها ابتسامه خجل..وقعدت تتفرج ع باقي الفيديو لين تم...
اختفت ابتسامتها وحلت محلها ملامح الحزن...
"سارة"
انفجعت وحطت الآيباد ع الطاوله وهي تقول؛جايه بابا..
وناضت بسرعه وحولت ملايتها وعلقتها ع الشماعه ومشت طلعت من الدار وهي تقول؛بابا...
هيثم؛السلام عليكم..
سارة؛وعليكم السلام..
هيثم مدلها كياس وقال؛هدا العشي اللي قلتي عليه..
ع جية ريحان؛بابتي حب حياتي..
وجاته حاوطاته وباساته من خده..
هيثم:امتى روحتي..
ريحان؛بكري شويه..
هيثم؛قريتي..
سارة بحده؛مافي مشي معانا لحوش عمي خالد قبل تقري قرايتك..
بعدت ريحان وهي تقول:باهي ياجبروت انتي..
هيثم؛ريحان..
سارة؛شكلها خاطرها تتعاقب ليها وقت ع العقاب..
ريحان نزلت راسها وهي مضايقه ومشت وهي تقول؛هاني ماشيه نقرا...
هما الزوز تبعوها بعيونهم بعدين قال هيثم؛ماتعطلوش غادي..
سارة شبحتله وقالت؛ان شاء الله بابا..
ومشي من حداها...وهي خشت للكوجينه...
🍁🍁🍁🍁🍁
الساعه التاسعه والنصف ليلا..
خشت نسيبه للصاله وهي تشوف في الاجواء اللي دارتها تهاني قالت؛ياعيني ع الاجواء السمحه..يابخت اللي بياخدك يابنت انتي...
تهاني بضحكه؛حق حلو؟
قعمزت نسيبه وهي تقول؛يقتل مش حلو بس..
فجأة رن جرس الحوش..
تهاني:جو...ومشت بسرعه طلعت من حداها..
ونسيبه ابتسمت وهي توزع في نظرها ع المكان وقعدت تردد في الصلاة الابراهيميه اللي لزمتها هلبه فهالشهر...
🍁برا...
عرفه كان داير روحه ينظف في سيارة جهاد..
وتهاني فتحت الباب لسارة والتوأم..
تهاني؛ياهلا ياهلا...
سارة؛هلا بيك..
سكرت تهاني الباب وريحان تقوللها:شن جو دكتورة..
تهاني؛مليح ياكابتن..
جنان؛كيف حالك تهاني..
تهاني بإبتسامه؛الحمدلله..
جنان مدتلها البوكس وقالت:تفضلي...
تهاني بإيتسامه؛شن دايرتيلنا المرة هادي..
سارة؛غير دخلينا وبعدين اسأليها..
ضحكت تهاني وهي تقول؛خشوا خشوا ياحناتي خشوا..
ومشوا خشوا كلهم مع بعض وعيون عرفه وهو مقعمز في السيارة معاهم...وع وجهه مرسومه ابتسامه حلوة...
🍁🍁🍁🍁
"مش معبراته ولاقايماته من ارضه"
رتاج؛لكن عيونك يقولوا عكس هكي..
دانيه؛لاعيوني ولا وذاني ريحي جمالك..
رتاج بضحكه:لكن والله طلع يحبك جديات دنوش..
دانيه؛اللي يحب حق يجي للحوش من بابه..
رتاج؛وهو جاه من بابه وانتي رفضتني...
دانيه؛مش هو اللي جاه امه..وبعد عرفت حقيقته شن دار!؟
رتاج:ماتنسيش اللي اني درته بعدين..
دانيه؛لو ع اللي درتيه معناها هدا مش صادق نيته جيهتي يبي يضيع وقت ويكسد وخلاص..
رتاج؛برغم اني مش حاسه انه هكي..
دانيه؛باهي ريتا شن رايك تسكري هالسيرة..
رتاج.بضحكه:حاضر هاه سكرناها خل نفتحوا غيرها...قاعد جمعه يلحق فيك..
فنصت دانيه وهي تقول؛حي ماقتلكش..المتخلف طلق جيهان..
رتاج بضحكه؛طيح سعده ومزاله يحساب كان دار هكي بترضي بيه ناسي من يكون الباشا...
ابتسمت دانيه بتهكم وهي ساكته...
🍁🍁🍁🍁
"اممم يسلموا هالايدين يلتفوا بالحرير"
جنان بإبتسامه؛صحتين عمتو..
نسيبه بعتتلها بوسه طايرة وهي ردتها..
سارة؛ايه حقه تهاني سمعتي بالمحاضرة اللي بيديرها دكتور منذر الشوابكه..
تهاني؛ايه بعد اسبوعين بتحضريها..
سارة:اكيد..
نسيبه؛انتم امتى تكملوا..
تهاني:بعد ثلاته شهور ...
سارة؛زعمه يديرولنا حفل تخرجنا مع الدفعه اللي قبلنا..
تهاني:اللي سمعته قالوا انهم بيديروها للدفعه اللي قبلنا اخر الشهر هدا حني نص السنه الجايه ان شاء الله..
نسيبه وهي تشبح في الفراغ:دفعة خليل وزياد..
شبحولها كلهم بعدين قالت تهاني:ايه...
تنهدت وابتسمت بحسرة..
وعيون تهاني امتلوا بالدموع...
نسيبه حست ان التقعميزة حتنقلب نكد غيرت الموضوع:ايه حقه صاحبتك جاها موضوع جديد صكتله الأزرق..
ريحان وقفت ماكلة الشيبس وهي تقول:عريس!
نسيبه؛ايه..
تهاني؛زيه زي غيره يعني...
ريحان؛رفضتيه ولا..احسن...
جنان شبحتلها وفنصت فيها...وسارة تفنص من بعيد وهي ولامعبرة ومكمله تقول...اصبري شويه لين تتخرجي ويجيب نصيب زي العسل..
تهاني بضحكه؛عندك ليا عريس..
ريحان؛ايه..
سارة تنحنحت بصوت عالي..
ريحان من الربكه ضحكت وهي تقول؛نبصر عليك راجي.تكملي بعدين فكري في المواضيع هادي..
نسيبه بضحكه؛تو انتي ياقمله تعطي في النصايح هادي..
ريحان؛ايه نعطيها عمتو شن ناقصني ايد ولارجل..بعدين الجكمه مش مربوطه بسن معينه..
نسيبه؛حكم يامحكم...
قعدوا يضحكوا..
وريحان ولت تاكل في الشيبس وهي هاربه بعيونها عن سارة..
بس هروبها مؤقت....
••••••••
سارة بحده:اني كم مرة خرفت دوة الكبار معاش تخشي فيها وديري كنترول ع لسانك وماتوليش ثرثاره...
ريحان:كلهم هالكلمتين اللي قلتهم درتيني ثرثارة ومش عارفه شني..
سارة:نزلي عيونك ونقصي صوتك..
ريحان نزلت عيونها وشدت ع قبضة يدها..
سارة:تعاودي تصرفاتك هادي مرة تانيه تتعاقبي عقاب مايخطرش لعقلك...
ريحان؛اسفه...
سارة شبحتلها شويه بعدين قالت؛تطفوا الضي وترقدوا نفوت من قدام الدار نسمع حسكم تشوفوا شن يصير فيكم..مررت نظرها عليهم وقالت؛تصبحوا ع خير...
ومشت طلعت وراها ريحان سكرت الضي وباب الدار وهي تقول بهمس؛ديكتاتورة طاغيه..
جنان بنفس الهمس؛اسكتي فكينا...
وكل وحده فيهم خشت سريرها بترقد...
لحظات وريحان بهمس قالت:جنان..
جنان؛رقدت خلاص..
ريحان:حي ع ام الكذب..
جنان:ارقدي وفكيني من سوك..
ريحان بنفس الهمس؛جبانه...
قعمزت جنان وهي تقول بهمس؛جبانه!؟ باهي كانك مراة قولي كلمة جبانة بصوت عالي.
ريحان بضحكه؛اني بنت مش مراة...ومدت لسانها ورقدت وعطتها بالظهر..
وجنان قلبت عيونها ورقدت وهي عاطيتها بالظهر...
🍁🍁🍁🍁
بعد منتصف الليل...
كانت نسيبه في الصاله متاع الحوش تصلي في القيام...
لما وصلت في ركعة الوقت...بعد الركوع قالت..
سمع لمن حمده...ربنا ولك الحمد...
ورفعت ايديها وبدت تدعي...
"ياربي ياحي ياقيوم يارحمن يارحيم ياذا الجلال والاكرام يارب العرش العظيم...ارني عجائب قدرتك في تحقيق ماأتمنى يارب ارني عجائب قدرتك في جبري..يارب ارزقني فرحة تجعلني اسجد لك باكيه يارب العالمين..ياالله يارب يارب يارب..ياربي...بشرني بماأتمناه ياحبيبي يارحمن"
🍁🍁🍁🍁
حبيبي انت رحماني...
انا ان تبت مناني وان اذنبت رجاني
وان ادبرت نادانى وان اقبلت ادناني
وان احببت والانى وان اخلصت ناجانى
وان قصرت عافانى وان احسنت جازانى
حبيبي انت رحمانى
اليك الشوق من قلبي على سري واعلانى
فيا اكرم من يرجي وانت قديم احسانى
وما كنت على هذا اله الناس تنسانى
لدي الدنيا ولك العقبى على ما كان من شاني
حبيبي انت رحماني...
"الله عليك يادكتور صوتك راحه"
خليل من شباك الباب متاع داره؛تسلموا ...
"بالله يادكتور قرآن قرآن عطينا الجرعه بش نرقدوا"
ابتسم وقال؛حاضر...
تنحنح...بعدين تعوذ بالله من الشيطان من الرجيم...
وبدي يقرا في سورة الفتح....
¤إنا فتحنا لك فتحا مبينا○ليغفر لك الله ماتقدم من ذنبك وماتأخر ويتم نعمته عليك ويهديك صراطا مستقيما...¤
ومن المهجع في سجن بو سليم اللي يصدح بقراءة خليل الخاشعه...
🍁لدار في شقة...
في وسط عمارة موجوده في العاصمة البريطانيه لندن..
كانت مريم مقعمزة ع صلايتها تقرا في نفس السورة...
¤وينصرك الله نصرا عزيزا○هو الذي انزل السكينه في قلوب المؤمنين ليزدادوا إيمانا مع إيمانهم ولله جنود السماوات والأرض وكان الله عليما حكيما¤
ومن هالدار اللي في الشقه هادي...
لحوش في نفس البلاد..ونفس العاصمه...
في الصاله متاعه كانت نوال مقعمزة تقرا في نفس السورة..
¤ليدخل المؤمنين والمؤمنات جنات تجري من تحتها الأنهار خالدين فيها ويكفر عنهم سيئاتهم وكان ذلك عند الله فوزا عظيما¤
رجوعا لأرض الوطن..
وين كان هيثم في داره فاتح المصحف ويقرا من ورا النظارات في نفس السورة اللي وصل في آخرها
¤وعد الله الذين أمنوا وعملوا الصالحات منهم مغفرة واجرا عظيما¤
هيثم:رب اجعلني منهم..اللهم اجعلني منهم...
تنهد وسكر المصحف وهو يقول..سبحانك اللهم وبحمدك اشهد أن لاإله إلا انت استغفرك واتوب اليك...
حط المصحف ع الكامدينو وحول نظاراته وحطهم جنبه...
بعدين تمدد...وقعد يفكر للحظات لعند ماخداه النوم ورقد...
وجابله عالم الاحلام...
حلم ليه مده طويله ماحلمش زيه...
شاف وكأنه يتفرج ع مكان مافيش في جماله.....
كام وكأنه الجنه في مواصفاته...
قعد يمرر في نظره عليه وهو يشوف في ناس مش واضحه ملامحهم لابسين لبس اخضر جميل مبهر..
وكانوا زوز زوز ...ذكر وانثى....
وهو يمرر في نظره عليهم...ثبتوا عليها....
اسيمه...وهي لابسه نفس الثوب ومقعمزة جنب نهر تتفرج ع الميه متاعه...بعدين قامت عيونها وشبحتله ..
وابتسمت ابتسامه حلوة...تفرفح القلب من صفائها وحلاوتها...
ماحسش بروحه الا وهو فايق...وابتسامه مرسومه ع وجهه
تداخلت مع ملامح الابتسامه هادي ملامح الاستغراب...
وهو يفكر...شن معنى هالحلم اللي شافه!؟
🍁🍁🍁🍁🍁
تاني يوم....
كان الإربعاء...
الساعه الثامنه الاربع صباحا...
طلعوا التوأم من الحوش بطريقهم للباص..
في الوقت اللي طلع فيه عرفه من حوش خالد..
ابتسم اول ماجت عينه عليهم..
وجنان سمعت باب حوش خالد انفتح وتسكر عرفاته هو طلع ابتسمت ابتسامه خفيفه..
ريحان؛سمعي عليا النص جنونه حاسه روحي مش حافظه..
جنان:سمعي ترا..
وقعدت ريحان تسمع وجنان تسمع فيها..
وهو فات من حداهم وكمل القدام...
شبحوله بعدين قالت ريحان؛هاه شنو؟
جنان وهي تشوف لعرفه؛حافظه..
ريحان زفرت وقالت؛الحمد لله..ان شاء الله مانلخبطش قدام الأبله...
وطلعوا من الزنقه لقوا الباص قدامهم ركبوا فيه...
وجنان جت جهة الروشن وهي تشوف لعرفه كيف واقف ع الطريق يراجي في تاكسي وجعها قلبها عليه...
فات الباص من قدامهم وهو لحقه بعيونه بعدين ابتسم ورجع يشوف للطريق لين فاتت تاكسي وقفها وركب ورفعاته للمدرسه..
🍁قبل عام ونص توفت الحاجه صالحه بمرض..وصت ع عرفه قبل موتها وقالت لعفاف تخليه معاها...بعد موتها حاولت ملاك تاخد خوها عندها لكن هو رفض رفض قاطع وقعد في حوش خالد عايش معاهم وكأنه ولدهم لدرجة انه بدي ينادي في عفاف امي..وعفاف تحبه زي عيونها...🍁
🍁🍁🍁🍁
في حوش هيثم...
وهما مقعمزين ع طاوله الاكل في الكوجينه يفطروا..
سارة؛معناها رسمي الكلام زي ماقالت تهاني..
زياد؛وشن عرفها الاستاذة تهاني!
هيثم؛معلومه ووصلتها زيها زي اي حد..
زياد؛لا.مش هكي اني اللي نعرفها سمعتها من واحد من الشكالات اللي يقروا معاها..
هيثم:وحتى هذا شي طبيعي..
زياد هز راسه وقال:ايه طبيعي طبيعي..
وسارة شاده ضحكتها..
هيثم؛نبي نعرف حاجه وحده بس انت تبيها البنت هادي بصدق؟
فنص زياد بصدمه..
هيثم:ماتشبحليش هكي..راهو فاهم وعارف كل شي وقداش ليا ساكت قلت تو يجيني بروحه ويقولي يابوي برا اخطبهالي لكن انت تماطل ومش عارف علاش..شورك تراجي فيها لين ياخد واحد تاني ودرس قدام صالة عرسها بعدين وخبط راسك ع الدومان..
سارة تضحك بكتمان وهي مغمضه عيونها..
وهو قال بإبتسامه صدمه؛صل ع النبي يابروف...وهدي..بإذن الله مش صاير شي من اللي قلته كله واني ناوي الخير معاها..
هيثم؛شوف اني بنعطيك مهله باهي من هني لنهاية السنه مادرتش حل بنمشي نكلمها بروحي وقعد اعذر من انذر..
زياد؛هو هدا بروف اني نراجي فيها تكمل مانبيش نشوش تفكيرها توا..
هيثم؛باهي كان هدا قصدك باهي..وع العموم الميه تكذب الغطاس..
سارة بضحكه؛لازياد غواص محترف...
رفع حاجبه وهو يشوفلها...
وهيثم قال؛انتي اسكتي احسنلك..
تلاشت ضحكة سارة وزياد شبحلها بإبتسامة شماته...
وهي تشوف لبوها وفهمت قصده من كلامه...
🍁سارة تقدمولها هلبه خطاب وهي ترفض...ورفضها الدائم حسس الاب ان بنته ناوية تعزف عن الزواج لأنها ماتحبش حتى تتكلم فيه...وهالشي خوفه عليها وخلاه يفكر في اتخاذ قرار حازم فيه بس بعد ماتكمل ماقعدلها في سنة الامتياز🍁
🍁🍁🍁🍁🍁
في مستشفى الرازي..
ماشيه في واحد من الممرات وهي لابسه البالطو الابيض...
وقفها واحد من زوار المشفى لما سألها:معليشي دكتورة..
هي وقفت وقالت؛تفضل..
"بالله وين وين قسم الباطنه واني ندور عليه رحت..
دانيه؛تمام تو نقولك..وبدت تنعتله...
وهو اللي جاي من اخر الممر لابس سكراب فوقه اليونيفورم الابيض..
شافها واقفه ع واحد تكلم فيه..
مشالها طول...ولما قرب يوصل فيهم الراجل مشي وهو وقف عليها وقال بحده؛اني شن قلت ع الكلام مع الحالات..
دانيه بفجعه:هدا مش حاله...هدا واحد يسأل عن قسم الباطنه..
الشايبي؛ومالقاش غيرك يسأله !؟
دانيه؛ايه ماكانش في حد غيري هني...
الشايبي؛وانتي عاد لازم ديري خير وتساعديه دانيه؛الراجل وقفني يبيني ندله ع قسم في المستشفى وواضح عليك مريض ورايح ومش عارف شن يدير تبيني نفوته ونخليه يزيد يتبهدل مسكين!
الشايبي؛ماهو لو كنتي فوتيه راهو طلعله اني ودليته هالمسكين ياذكيه..
رفعت حواجبها وهي تشوفله..
وهو هز راسه تأكيدا لكلامه..
نزلت حواجبها وقالت؛مش شباحه اني بش نعرف انك جاي وراي..
رفع حاجبه وقال؛اممم...ع العموم اخرلك مرة ياشباحه انتي..وهي تعالي وراي..
مشي وهي مشت وراه وتشبحله بنظرات حاده..
هو التفت هي نزلت عيونها..
رجع شاف القدام وهو مبتسم ع جنب..
🍁ومن جهة ثانيه...
في حجرة بيها مجموعه من المرضى..
كانت واقفه تكلم في واحد من المرضى كبير في السن..
وهو كان فايت من قدام الحجرة شافها وهي واقفه تكلم في المريض وتبتسمله قلبه ولعت فيه النار...
وقف حدا الباب وهو يراجي فيها تطلع...
شويه وطلعت..مشت..
وهو مشي وراها وقعد يقول؛لو سمحتي..
هي سمعت صوته قلبها دق بقوة شدت ابتسامتها واخفتها..
وقفت..
وهو وقف قدامها وقال:في تصرفات لازم نبهك عليها..
تهاني بإستغراب؛تصرفات شني دكتور؟
زياد؛الابتسامات والهدرزة مع المرضى الذكور تحديدا مالهاش معنى وممكن تنفهم غلط..
تهاني عقدت حواجبها وقالت؛شن قصدك!؟
زياد؛قصدي واضح حطي تنبيهاتي في عقلك وراك تنسيها..
ومشي وخلاها وهي تشوفله بصدمه وعيونها تعبوا دموع..
بعدين ومشت وهي تقول بصوت منخفض؛والله مايستاهل...
🍁🍁🍁🍁🍁
الساعه الواحده والنصف بعد الظهر..
خشت للحوش بالسيارة بعد ماوصلت ولدها للمدرسه..
نزلت من السيارة ومشت خشت للحوش وهي مستعجله..
وصلت في الكوجينه وقالت؛عمتي درتي الغدي!
عفاف؛ايه هداكا هو بنتي معاش في وقفت..
نسيبه هزت راسها وقالت؛باهي بنمشي نصلي بعدين نجي نكمل عنك..
ومشت بسرعه بدلت حوايجها..
بعدين توضت وصلت...ومشت للكوجينه تكمل باقي الغدي...
ضمت الكوجينه..وقعد غداها ع نار..
قعمزت ع الكرسي...وربعت ايديها وحطتهم ع الطاوله..
وهي تتفكر في صحاب ولدها كيف كانوا مع ابائهم لما جابوهم للمدرسه...وولدها الوحيد اللي كانت معاه امه..
شافت في عيون ولدها نظرة وجعت قلبها عليه..
هي ديما تكلم فيه ع بوه وتحكيله عنه والولد كل يوم يشتاق لبوه اكثر من اليوم اللي قبله ويتلهف لشوفته...
نزلوا دموعها وهي تحسب ماقعدله من العقوبه مازالوا ثلاثه سنين كيف تقدر تصبر فيهم ولدها عن شوقه الشديد للقاء بوه ويعيش معاه زيه زي اقرانه...
رفعت عيونها وقالت:يارب في وقت هالإستجابه بشرني باللي نتسنى فيه منك يارب....
🍁🍁🍁🍁
"خود نفس......طلعه"
نزل السماعه وقال؛لا الحمد لله وضعك احسن..
:الحمد لله..يعني خلاص نوقف دوا..
خليل؛ايه خلاص وقفه بس حافظ كويس الشتي بيخش ماتعرضش صدرك لأي شي ممكن يضره قعاد بحوايج مبلوله شرب ميه مصقعه لا...
:حاضر دكتور...
خليل:يانسيم..
فتح العنصر باب مكتب المستوصف وخش خدي السجين وطلع..
وهو يشوف في الكتاب اللي يخص تخصصه قدامه ويقرا فيه...
ع خشة واحد من الضباط قال:دكتور.
خليل سكر الكتاب وشبحله وقال؛نعم..
؛مدير السجن طالبك..
خليل شبحله شويه بعدين هز راسه بإيجاب...
حول بالطوه وعلقه ع الكرسي..
ومشي مع الضابط...
وصلوا لغرفة مدير السجن...
وخشوا عليه...
خليل:ان شاء الله خير ياأفندي..
مدير السجن بإبتسامه:خير خير..تعالى خود الورقه هادي واقراها..
قدم خليل...خدي الورقه وقعد يقرا فيها..
كانت قائمه فيها اسماء...عيونه جو ع اسمه بعدين رفعهم شويه لأعلى الورقه كان مكتوب عليها..
قائمه بأسماء الذين اصدر بحقهم عفو من قبل رئيس الجمهوريه..
شبح لمدير السجن وهو مصدوم..
مدير السجن بإبتسامه؛مبارك..
خليل ضحك بصدمه ودموعه في عيونه ورجع شاف للورقه مرة تانيه وهو يقرا المكتوب اعلاها ويقرا في اسمه اكثر من مرة بش يصدق....
🍁🍁🍁🍁
"امورها تمام يامعلم ولت عروسه"
:بارك الله فيك ياجهاد..
جهاد؛فيك بارك الله مافي شي نخدم فيه بلاش..
:ربي يفتح عليك...السلام عليكم..
جهاد؛وعليكم السلام..
طلع من حداه الزبون...تليفونه رن..
طلعه مم جيب سرواله وشاف المتصل...
كان رقم السجن...رد بسرعه من الخوف..
جهاد؛ايوه....
🍁🍁🍁🍁🍁
وفي مكان تاني في هالعالم..
تحديدا لندن عاصمة بريطانيا..
في واحد.من مطاعمها..
نوال؛انت شن رايك..
ابتسم وقال؛وتبيلها سؤال هادي نونو وافقي طول اساسا انتي قعدتي تخططي بش توصلي هني وهاك وصلتي..
نوال؛يعني نسافر..
هو بإبتسامه.قال:سافري...
🍁قدام باب المطعم...
كانت مريم جايه هي وخوها ومرته...
🍁تزوج خو مريم من سنه واستقر هو مرته في بريطانيا بش يكمل قرايته..ومريم كملت قرايه بدعم متواصل من نوال🍁
اللي لما خشوا للمطعم شافتها...
خوها؛فلوسي كلهم بنحطهم اليوم...
مرته.بضحكه؛مش خسارة فينا..
ضحكت مريم وقالت؛بروا قعمزوا انتم واني تو نجي بنمشي نسلم ع المراة..
خوها؛ok...ومشي هو ومرته للطاوله المحجوزة..
وهي مشت طول لنوال..
وصلت فيها وقالت؛السلام عليكم..
نوال بإبتسامه؛وعليكم السلام اهلا مريم كيف الحال..
مريم؛الحمد لله استاذه ..كيف حالك انتي؟
نوال؛الحمد لله... هو بإبتسامه شقيه قال؛عرفينا نونو..
مريم شبحتله بإستنكار..
ونوال فنصت فيه وقال بإبتسامه ارتباك؛هادي الدكتورة مريم حكيتلك عنها قبل..
هو بإبتسامه؛ايه متفكر اني شايفها قبل..
نوال:امم...مريم هدا ولدي اسيد..
مريم اندهشت لما سمعتها قالت ولدي مش باين عليها بكل يكون عندها صغار كبار هكي..
اسيد بضحكه:انصدمت مسكينه..عيونها قريب طلعوا ..
امه فنصت فيه وهي تضحك بإحراج بعدين قالت؛شن اخبار الخدمه؟
مريم تنحنحت وقالت؛الحمد لله ماشيه تمام..هي مانعطلش عليك تستأذن..
نوال:اذنك معاك..
ومشت مريم...
نوال ضربت ولدها ع يده وقال؛شن تشبح فيها قدامك!!؟ بنت محترمه وانت تتسهوك وتخفف في دمك...
اسيد بإبتسامه استعباط؛شن قلنا ولا شن درنا؟!
نوال:لاتقول ولادير رد بالك خليك في خدمتك ومشاريعك..
هو ضحك وحرك راسه يمين ويسار ورفع طاسة الميه شرب منها.....
(اسفه جدا ماقدرتش نكمله تعرفوا العمله اللي صارتلي هدا اللي قدرت عليه توا)
#راجعين_ياهوى
#البطل_المغمور2
....يتبع.....
