#البطل_المغمور2 "زهور القمر"
#جمان_فريد
#الجزء_الثامن_عشر "حب صافي1"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐
"مالا جمعه مايبيش يتغدا معانا"
جيهان وهي تحول في وشاحها؛جمعه بيتغدا في حوش عمه ..
عواطف؛بروحه!
جيهان؛منه ليه قبل يبي يشوفهم..
عواطف:مش مفروض يعزموك..
جيهان مشت علقت وشاحها وشنطتها وهي تقول:مفروض..هو قالي تمشي معاي قتله مايجيش نمشي من غير عزومه ونخش عليهم وايدي فاضيه حطني عند امي نتغدا عندها وخلاص..
عواطف :غريبين عجيبين متاعينك من برا تشوفيهم تقولي ماشاء الله ومن داخل يعين الله..
جيهان بلا مبالاة:اي شي..بنمشي للحمام..
عواطف:بري مابين درت القهوة وصبيتهالك في الفناجين الجدد..فناجين تحفه خيال من ايطاليا لكوجينة امك..
ضحكت جيهان وقال:تمام...
ومشت للحمام..وعواطف مشت للكوجينه دير القهوة...
🍁جيهان بعد خشت للحمام وطلعت عيونها جو ع دار نوم امها وبوها...قعدت تشبحلها شويه بعدين مشتلها..
بهدوء خشتلها وسكرت عليه...
مررت نظرها عليها..بعدين مشت للزيانه طبست وقعد دور في أدراجها الاخيره..
مالقتش اللي تبيه..
وقفت ع حيلها وشافت للدولاب..
مشتله..فتحت باب امها وقعدت دور زين...
لين طاحت في شنطة الذهب متاع امها...دارت الرقم السري انفتحت...
شافت فوسطها...رفعت حاجبها وضمت شواربها القدام بإستياء...تنهدت بعدين سكرتها وردتها لمكانها..
سكرت الدولاب ومشت بهدوء طلعت من الدار وسكرتها وراها..
🍁🍁🍁🍁
"هاه شن تحسي توا"
دانيه وهي تشبح للفراغ بعيون غرقوهم الدموع وتحت هالات سود..ووجه شاحب قالت بصوت متعب:كويسه..
رتاج سكتت وهي تشبحلها ودموعها في عيونها...
هدا كله صاير..ومجيد غارق في النوم..ومقبوله كعادتها تتسمع...
وخرت عن الباب لما سمعت باب الشقه دق..
مشت طول ولت لدارها ووقفت قدامها...
••ورشيد فتح باب الشقه..
راجح بإبتسامه؛اوو رشيد شن جو..
رشيد؛تمام..
راجح:مجاهد قاعد..
رشيد:لا قاعد في الزاويه..
غير راجح عيونه للدروج بعدين شبح لرشيد وقال:مش مشكله انت موجود..
رشيد؛تفضل..
ابتسم راجح وقال؛يزيد فضلك..
خش راجح ورشيد سكر الباب..
حول من رجليه ورشيد قال:تفضل..ووجهه للمربوعه..
وراجح مشي خش ورشيد معاه...
وهدا مقبوله كانت تشوف فيه وسدينه كذلك وهي فم الكوجينه ع طلعة رتاج من الدار وفي يدها طاسة ميه..
رتاج؛خيرك يام واقفه هني..
سدينه بضيق؛خطيب اختك برا..شكله جي بينهيها..
رتاج بضيق؛احسن..لكن هو من معاه توا..
سدينه؛رشيد خوك...
•••••••
رشيد؛اني مش فاهم شن صار بالزبط..لكن اللي نعرفه ان اختي وامي في من وجعهم من عيلتك انت..
راجح وهو مضيق عيونه:كيف فهمت الحاجه هادي؟
رشيد؛خل نقولك حاجه وتسامحني فيها..اني شفت امك لما جتنا اخر مرة كيف كانت تتصرف وهي راكبه الدروج..تعرف جرس الشقه ضربت عليه بكنينكس مغطيه بيه صبعها..
راجح مط شواربه لداخل بقوة وهو يحاول يتمالك اعصابه..
رشيد؛هي شكلها ماتعرفش تفرق بين الوسخ والفقر...
تعابير رشيد ماكانتش منتقاة بعنايه قليل من هم في عمره يعرفوا شن يقولوا...
بس معنى الكلام وصل لراجح وفهمه وخلاه يعصب هلبه..
راجح هز راسه وقال؛باهي نقدر نشوف اختك ونفهم منها..
رشيد؛في وجودي..
ابتسم راجح ع جنب وقال؛اكيد..
رشيد ناض ومشي طلع من حداه..
وراجح بدي يهز في رجله وشبك صوابعه في بعض بقوة من العصبيه..
🍁في دار البنات..
دانيه بنفاذ صبر؛مانيش طالعه لحد..قراري وخديته وتم طلعوله حاجاته وريحوني..
رتاج؛مايجيش هكي يادانيه هو مادام طلب يشوفك معناها يبي يتفاهم معاك..
دانيه بإنفعال؛واني مانبي نتفاهم مع حد..
سدينه؛خلاص خلاص..اني تو نتصرف...
سكتت رتاج وهي مضايقه...
ودانيه غمت روحها بالشرشاف ورشيد يشوفلها..
بعدين شبح لأمه لقاها ترتب الحاجات في كيسه كبيره مناسبه..
خدتها وفيدها باكو دبل ومشت طلعت ورشيد وراها..
ودانيه حطت راسها تحت المخده وانهارت بالبكي..
ورتاج تشوفلها بحزن وخوف عليها..
••خشت سدينه بالحاجات للمربوعه..
سدينه؛السلام عليكم..
راجح لما شافها هي ومعاها الحاجات قلبه قعد يدق بقوة خاف بمعنى هالكلمه هالمره..رد وعيونه ع باكو دبل:وعليكم السلام...
حطت السدينه الباكو ع الطاوله...
والكيسه جنب الطاوله ومشت قعمزت..
ساوت وشاحها بتوتر..بعدين حطت ايديها فوق بعض ع رجليها وشبحتله وقالت؛احمم..بلعت ريقهاوقالت...ولدي..انت لما جيت تخطب في بنتي اهلك كانوا راضيين..
هو شبحلها شويه وقال؛لو مش راضيين كيف جو؟
سدينه ابتسمت وقالت؛ماهو ياولدي مرات جو بش يرضوك انت...مرات يسايروا فيك مسايرة..يقولوا نخلوه توا يدير ماببي وبعدين نديروا حتي مانبوا..
راجح اربكه كلامها قعد يشبحله وهو يدور في رد مناسب ع كلامها ورشيد يشبحله..
راجح بضحكه تعجب؛يعني مش فاهم شن اللي خلاك تقولي هكي؟
سدينه تنهدت وقالت:شوف ولدي..في حاجات الرجاله مرات مايقوفوش عندها هلبه يشوفوا فيها هكي..تافهه ..مش مهمه..لكن هالحاجات هادي وين تنحط ع بعضها تولي مشكله كبيره معاش تنحل..يعني كيف بنفهمهالك!؟..
راجح :شن شفتي منهم بالزبط..
هي ابتسمت وقالت؛بالزبط مانقدرش نقولك اللي نقدر نقوله ان امك ماتبيش بنتي..ماتبيش تناسبنا بكل...تشوف فينا مش لبعضنا...ومرات عندها حق..
راجح كور قبضة يده بقوة وهو يحاول يتحكم في غضبه..
سدينه؛ولدي..انتي عندي راس هالبنتين وكل اللي نبيه اني نشوفهم عايشات متهنيات..وقاعده ندعي ربي يكتبلهم يعيشوا مرتاحات مش شقيانات..ودانيه بالذات بعد مرضت كان نلقى نشوفها فرحانه ومرتاحه طول الوقت وين ريت شن يدير فيها السكر لما تتغشش ولا تصيرمعاها مشكله مانبيش نرمي بنتي لنار نشوف فيها بعيوني...
راجح جي بيتكلم.
هي قاطعاته وقالت؛ولدي نصيبك مش هني..
قعد يشبحلها بنظرات عيون باين فيهم الألم..بس ملامح وجهه زي ماهي جاده...
سدينه بإبتسامه؛وننصحك..لو جيت بتتزوج خود اللي ماليك راضين عنها لأنها بتاخد انت وياهم مش بروحك..
هو قعد يفرك في سبابة يده اليمين بالأبهام بقوة..
ورشيد يشوف ليده..
بلع ريقه..بعدين ناض ومشي طلع من باب المربوعه...
هي بعد تبعاته بعيونها قعدت تشبح للباب بحزن..
رشيد ناض وراها لقاه طلع..
سدينه تنهدت بألم وناضت ومشت طلعت من المربوعه..
اما رشيد التفت للحاجات خداهم ومشي طلع بيهم من الشقه..
🍁طلع راجح من العمارة وهو مايفرز في شي..
ولما جي بيركب..
"راجح"..
التفت..
شاف رشيد جاي بالحاجات:ماعندنا مانديروا بيهم..
هو شبح للحاجات هلبه..بعدين فتحت باب السيارة الخلفي..
وجي لرشيد خداهم ولوحهم في السيارة..
رشيد لف ومشي..
وراجح بعد ماسكر الباب بقوة...ركب للسيارة..
وشغلها وتحرك طول..ودموعه عبوا عيونه...
🍁🍁🍁🍁
"وخيره ديما هدا اللي يعطي في البنج مافيش طبيب تخدير غيره ياشذى"
شذى"صديقة رنيم":وين نندري عليهم اني المهم حني نخدموا خدمتنا ونروحوا..
رنيم قعدت ساكته وهي تفكر..
شذى:رنيم وين سافرتي!؟
شبحتلها وقالت؛هي تعالي نمشوا للدكتور زمانه يدور علينا..
مشوا الزوز مع بعض ورنيم مازال عقلها مع طبيب تخدير ديما يمسك في الحالات متاع النساوين..
من لما خدمت في المستشفى ماارتحتلاش نظراته ذكروها بنظرات جلال الوافي...
وين تجي تحكي لشذى عنه تقوللها قصتك سببتله العقده..
ولأن الكلام هدا يوجع معاش بدت تحكي هلبه عن هواجسها ليها..
وكان حكت او لمحت يقابلها هالرد البارد منها..
خافت رنيم ع نفسها فعلا لتكون صايرتلها عقده نفسيه وانها بسببها قاعده تظلم في الراجل..
بس في احساس قوي في داخلها يقول ان في شي غلط قاعد يصير...
🍁🍁🍁🍁
"هو مجمع عيادات يخدموا فيه اطباء من جميع التخصصات"
سارة وهي تشرب الشاهي:امم..مجاني؟
هيثم؛لا مش مجاني بس الكشف حيكون بسعر رمزي يقدروا عليه الناس في النهايه المجمع يبي تمويل...
سارة:وانت بابا حتكون اداري بس؟
هيثم؛لا اني مش اداري في غيري حيكون مدير للمجمع اني حنمارس مهنتي بس..
سارة بإبتسامه؛استاحشت ايام كنت فيهم دكتور..هكي نحسك لما تخدم خدمتك تنور ونفسيتك ترتاح..
رفع حواجبه وقال:جديات!؟ كنت نحسابكم تكرهوا خدمتي..
سارة بضحكه:مش كره غيره..لأنها كانت واخداتك منا..
رفع حواجبه ونزلهم وهو مبتسم وقعد يشرب في الشاهي..
وهي تشرب كذلك والصمت ساد المكان..
ماجده مش موجوده مشت تتغدى في حوش ولد خوها اللي عزمها وهيثم هو اللي اصر انها تمشي ماباش يخليها تقعد مربوطه بيهم ديمه..
حط طاسة الشاهي ع الطاوله وقال:ايه بابا...شن اخبار المدرسه مافيش جديد..
سارة:عادي زي قبل..
هز راسه بعدين قال:والجامع..قادرة توفقي؟
سارة:الحمد لله...نراجع في المدرسه مرات والمعلمه مساعدتنا هلبه...اليوم نختموا جزء عم..
هيثم؛حلو...
ابتسمت سارة..
شبحلها هيثم شويه بعدين قال؛وموضوعنا هداكا شن صار فيه..
وجه سارة انخطف لون والدمعه عينها وبوها لاحظ..
تماسكت وقالت؛هو هو رايي بابا ماتغيرش..
هيثم ضيق عيونه بعدين هز راسه وقال؛براحتك بابا براحتك..
سارة ناضت خدت طاسته وقالت:تبي حاجه تانيه؟
هيثم ؛لا..بري شوفي شن عندك وديريه..
يدوب ابتسمت سارة وهو معاها بعيونه ويفكر في حالتها..
▪▪▪▪▪▪
◇ايه اكيد ملاحظ عليها..مفروض نكون قريب ع بنتي ونلاحظ عليها كل شي في غياب امها..زي مافي قصة البنتين اللي عبالهم سيدنا موسى الميه..من خلال الايات وكيف ربي حكاه وصف الموقف وصف جميل جدا وركز ع حاجات مهمه...
اولهم شهامة سيدنا موسى ونخوته وتعففه عن طلب المقابل حتى كلمة الشكر ماباش يسمعها...في المقابل جاب مشهد وحده فيهم لما جاته تمشي ع استحياء..في اول الموقف وصف عفة البنات وعدم مخالطتهم للرجال بس ولما جي كلمهم ماقالش ردت بإستحياء..بس بعدين وصف المشهد اللي بعده بهالكلمه...لسبب واحد البنت لما شافت اخلاقه وحساناته اعجبت بيه هدا علاش جاته تكلم فيه بإستحياء...
في المشهد تاني البنت نفسها مدحت سيدنا موسى لبوها..ولان اب حقيقي وكاين قريب لبناته لاحظ عليها ان في نفسها شي اتجاهه وقاللها بري ناديه...ولما جاه قاله نزوجك وحده من بناتي وكان يقصد نفس البنت وهالشي مااقدمش عليه الا لما تأكد من اخلاق موسى عليه السلام..
واني هدا اللي مشيت بيه في قصة مجاهد مع سارة وتوقعت توافق..بس فاجئني رفضها..ووقتها حسيت ان في شي صاير..بس قلت مادام هي ماحكتش مش حنضغط عليها بش تحكي..في النهايه كله حيبان...
▪▪▪▪
🍁🍁🍁🍁🍁
وروح مجاهد مع العصر لطرابلس...
صلى العصر في احد المساجد..
بعدين مشي طول لحوشهم..درس تحت العمارة ورن ع اخته بس تنزل لأنه بيرفعها للجامع...
🍁فوق..
رتاج بقلق؛خليك اليوم ارتاحي دانيه..
دانيه شدت الدوسي وقالت؛مش تعبانه بش نرتاح..
ومشت طلعت من الدار ورتاج وراها وقلبها موجوع عليها...
طلعت دانيه من الحوش..
ورتاج مشت لأمها في الصاله وقالت؛شفتيها يام..
سدينه برضا؛خليها ماشية لبيت الله غادي بس ترتاح بنتي...
🍁وصلت رتاج لوطا..
ركبت السيارة..
مجاهد طول تحرك...
شبحلها وشاف حالة وجهها شبح القدام وقال:خيرك دانيه مريضه؟
دانيه:تعب عادي ومشي ع حاله..
مجاهد؛كان قعدتي في الحوش خيرلك..
قعدت ساكته مابتش ترد..
هو رجع شافلها بعدين شبح القدام...
دانيه:شيشة المية هادي تبيها؟
مجاهد؛لا..
هي خدتها وفتحتها وقعدت تشرب..
سرقلها النظر..لقاها كملت شرب وردت الشيشة لمكانها لاحظ يدها اليمين فاضيه...فحب يمازحها ويغير جوها...
مجاهد بضحكه؛نسيتي الدبله..
هي شبحت ليدها وقالت؛لا مانسيتهاش حولتها..
مجاهد؛علاش ممنوع ؟
دانيه تنهدت وقالت؛لا حولتها بكل..
هو عقد حواجبه ودرس السيارة ع تركينه..
شبحلها وقال:احكي شن صاير طول من امس واني ملاحظك مش مزبوطه بكل..
دانيه بضيق؛استعجلت..
مجاهد؛في شني؟!
دانيه شبحتله وعيونها تعبوا دموع وبدت تحكيله في اللي صار كله...
مجاهد بصدمه؛هدا كله يصير واني اخر من يعلم!!؟
دانيه قعدت ساكته ودموعها ينزلوا..
مجاهد؛مفروض اتصلتوا بيا جيت طول واني اللي تفاهمت مع الراجل..قعمزت معاه خدينا وعطينا رانا تفاهمنا مرات نوصلوا لحل ولو ماوصلناش لحل..امور زي هادي بدوها الرجاله ينهوها الرجاله مش هكي..
دانيه ولاكلمه تبكي وبس..
مجاهد شبح القدام وخبط الدومان بيده بعدين قال:استغفر الله واتوب اليه استغفر الله..لكن تعرفي ..اكبر غلط يفتحوا معاكم مواضيع الزواج وانتم في السن هادي مازال مش راكزات مازال حتى لو قريتوا الف كتاب ...
دانيه قعدت تشبحله حست الهموم تخلطت عليه وقصته مع سارة مأثرة عليه..
شغل السيارة وكمل بيها الطريق وهما ساكتين لين وصلها للجامع..
نزلت ومشت خشت..
وهو لف بالسيارة وجي بيروح...بس تراجع في اخر لحظه
درس بعيد شويه عن الجامع وقعد مقعمز في السيارة
وضعها ماطمناش خاف تصيرلها حاجه فقرر يكون قريب..
🍁🍁🍁
خشت دانيه ع حلقة التحفيظ..
شافت سارة مقعمزة قدام المعلمه وباديه تعطي فيها سورة النبأ..
دانيه:السلام عليكم..
البنات وفاطمه ردوا عليها:وعليكم السلام..
مشت قعمزت وقعدت تسمع في المعلمه كيف تقري في سارة...
بعد ماكملت مع سارة نادتها...
ناضت دانيه ومشت قعمزت قدامها..
وفاطمه مركزه عليهم الزوز بنظرها...
🍁🍁🍁🍁
ع باب كل دار في المهجع كان موجود ملصق فيه ذكر وعليه حديث شريف يبين فضله..بش كل واحد تجي عينه ع ذكر يقوله..
صاحب المبادره كان...
فاتح؛فكرت فيها واني في الانفرادي..وين كنت نقرا في المصحف اللي عطتيهولي كان في ع الهامش احاديث خديتهم..
زياد بإبتسامه:الانفرادي ولى عليك بفايده..
فاتح؛هلبه والله..
سراج؛معليشي نسألك انت علاش كنت مدمن..
فاتح ابتسم بأسف وين تفكر الماضي بعدين قال؛عادي...ياسيدي اني كنت عايش حياتي بالطول وبالعرض الدنيا كلها كانت بين ايديا...فلوس..سفر...هياجه...شن نبي يكون قدامي مرات قبل نطلبه..
مراد؛وشن خلاك تخش ع الادمان وانت عايش في جنه؟
فاتح ضحك وقال؛جنه!...تنهد بحرقه وقال..اقسملك بالله مافي يوم عرفت فيه شن هي السعاده..كنت ندور فيها نجري في جرتها وهي تهرب..ع قد مادرت وين مامشيت الحفلات شبه يوميا...شربت وكنت نقول وين نشرب نولي حر وسعيد وننسى همي..عرفت بنات اشكال الوان من كل الجنسيات..اللي في خاطري درته...وانب بعد هدا كله نلقى السعاده...ابدا..حط يده ع صدره وقعد يمشي عليه وهو يقول..شي هني فاضي فاضي ومغموم غم..لما خشيت ع المخدرات غرتني لحظة النشوة اللي يعيشيها الواحد بعد يتعاطى...قلت خل نعيشها حتى اني سعاده لحظيه صح بس المهم عندي نعيشها...وبعد وليت مدمن سمعوا بيا ماليا وتفكروني...هوب قاموني من حوايجي ولوحوني في مصحة في سويسرا..مصحه فيها كل شي..تعالجك غصب عنك..عالجتني..لكن المكان الفاضي اللي هني ماقدرتش تعبيه..هدا علاش بعد طلعت وليت مرة تانيه للمخدرات..وردوني نتعالج وبعدين وليت مرة تانيه..ولأني مليت وكرهت حياتي...قررت ننهيها...بس ربك ماباش..في الاول قلت علاش ربي كارهني هكي علاش يبيلي العذاب وبس...ابتسم وقالت..لكن بعدين عرفت انه كان ياخد بيدي للسعاده اللي كنت ندور فيها..حط يده ع كتف زياد..عرفت هدا..بعدين عرفت بوه...الراجل هدا اثر فيا بشكل غيرني 180 درجه...
ابتسم زياد...شبحله وائل وقاله؛بوك انت يازياد ومع هذا خشيت ع المخدرات..
خالد ركز بنظره ع زياد وعقيل سكر المصحف وقعد يسمع فيهم..
زياد بأبتسامه اسف:وجود امي كان مخلي وجوده مش واضح في حياتي..امي كانت ماليه مكانها ومكانه...وبعد ماربي خدي امانته...الحياة اللي كانت ماليتها امي فجأة فضيت...ظلمت..معاش وليت نشوف في شي بعدها..وماكنتش متوقع يجي يوم وحياتي تنور مرة تانيه ونرجع نشوف من جديد..الشمس اللي غابت وبعدها ظلمت حياتي...طلع في مكانها القمر...
عقيل:الله ع التعبير الجميل الله لافض فوك..
شبح زياد.لعقيل وابتسمله..
وخالد كان يشوف لزياد وهو مبتسم بحسرة
وائل بإبتسامه؛تفكرت مرة قريت عن نوع من انواع الزهور يتفتح لما يطلع يطلع القمر بس..
سراج؛زهور القمر...شبح لفاتح وزياد وابتسم...
🌼وغيرهم من كانت حياته ظلام دامس كان يدور ع طريق يطلع منها للنور...وع ضي القمر لقي طريقه وقاعد يكمل فيها..
خليل...اللي توا قاعد في داره يقرا في القرآن...
وخوه اللي بعد سنين العمى ابصر ....وجاته فرصه كان يبي يستغلها بس كان من يرشده ويشجعه...
ولقاه وشجعه وخلاه يدير خير قاعد يجاهد في نفسه بس يتمه ع احسن وجه..
جهاد..اللي كان مروح بيها من خدمتها ع طريقه وقاعدين في السيارة ياكلوا ميلكا ويشربوا في الحليب..
جهاد بضحكه؛والله مليحه..
مريم ؛بش تعرف مانحبش حاجه مش حلوة اني..
ابتسم وكمل ماكله وهي تشوفله بحب....
حتى سر سعاده مريم الحاليه كان هو سبب فيها بعد ماانزاح من ع قلبها حمل هم كبير...
زي رنيم اللي توا مقعمزة تشرب في القهوة مع عيلتها وسط اجواء من الحب بعد ماتحسنت علاقتها بخوتها حتى هي سبب راحتها كان هو...
🌼وفي من كانت حياتها باهته من غير الوان..لياليها ظلامها سرمدي مافيهاش قمر..لين خش هو حياتها..
ورجعت سنين للخلف...لأيام وقفت فيها حياتها وكأنها توا قاعده تستأنف فيها...
نوال..اللي كانت تقرا في اخر صفحه من كتاب البدايه والنهايه...
كملاته وتمنت لو ماتمش ع قد ماحباته وتعلقت بيه...
سكراته وتنهدت من وسط قلبها بعدين شبحت القدام وسرحت بتفكيرها وهي تتذكر فيه...في اخر لقاء جمعها بيه..
🔺️في وقت سابق.....
هيثم:اني نقدر نساعدهم بروحي لكن زي ماتعرفي واخد منهم يمنعني...
نوال :باهي واني كيف نقدر نساعدهم..
نزل رجليه وضم ايديه في بعض وقال:ام زوج اختي..سبق وحكيتلك عنها كان تذكري ع حسب مانعرف انها زمان كان تخدم في التطييب للمناسبات وكانت مطلوبه هلبه من الناس ع حسب مايقولوا..هي الخدمه هادي خدمتها بطلتها بعد ماكبروا ولادها..بس توا بحكم الظروف الحاليه ولتلها وللأسف مش زي قبل..يعني من مراة طيب في المناسبات لمراة تغسل في الماعين...صدقا ضايقني الشي هدا ومارضيتاش فيها..
رفعت حاجبها تلقائيا..
هيثم؛واختي مدرسه درجتها عاشرة ليه سنين تقري وتخصصها جغرافيا لطلبة الثانويه العامه..وبعدين خدمت مشرفه في مدرسه ابتدائيه والكل يشهد يكفائتها وبحكم الظرف الحالي كذلك...اضطرت تخدم في روضه قسم حضانة اطفال...
نوال بأسف:شي مؤسف..
هيثم:جدا...واني زي مانعرف انك تملكي مدرسه خاصه مشهورة وفيها كفاءات عاليه...اختي مكانها غادي...
ابتسمت ..
هيثم؛وبالنسبه لأم زوجها..مرر نظره غ المكان وقال..زي مانشوف توا ان عندك معارف بهالخصوص متأكد انك حتنفعيها..
نوال هزت راسها وقالت؛اكيد..واني نتمنى نديرلك شي نردلك بيه شويه من جميلك واللي طلبته ساهل جدا وبسيط ومايجي شي قدام اللي انت درته..
هيثم؛هو ربي اللي دار مش اني..بس كويس بش مانحسش اني مديون ليك خلي هذه بتلك..وهكي تصافينا..
نوال بإبتسامه؛زي ماتبي دكتور.
هيثم هز راسه وقال؛جزاك الله خير..
نوال؛وإياك..بس يعني في عندي سؤال ممكن يكون جريء شويه...
عقد حواجبه وقال؛شن هو؟
نوال؛يعني فهمت انك تبي تساعد اختك..بس ام زوجها وعندها ولاد كبار مش هما اولى بهالشي..
هو ابتسم وقال؛سؤال صريح واجابتي حتكون اكثر صراحه.
نوال حست بقلبها انقبض وانتابها شعور خوف من هالآجابه..
هيثم؛عفاف كانت محبوبه عند زوجتي الله يرحمها...واللي كانت تحبه هي اني نعزه...
صدمت نوال الآجابه كانت عكس كل توقعاتها اجايه ع قد ماهي حلوة..وجعتلها قلبها ع الأخر..
تماسكت بكل قوة وهي تقول بأبتسامه جاده؛الله يرحمها..
هيثم هز راسه وقال:اللهم آمين..
🔺️في الوقت الحاضر..
استاقضت نوال لما حست بدمعه قاعده تنزل ع خدها..
مسحتها بأطراف اصابعها وشافتلهم..شافت للدمعه وهي تتسائل..دمعة شنو هادي!؟
🍁"يابابا ياحبيبتي ربي يهديك اكتبي ع السطر"
جنان؛حاضر بابا..
هو مسح ع شعرها وباس خدها وقال؛اسف بابا..ترا هاتي بنتي نوريك كيف تكتبي كويس ع السطر..
وبدي يكتب بالقلم وهي مركزة معاه..
هيثم؛هاه شفتي كيف..ترا حاولي..
جنان؛ماتعصبش كان غلطت باهي؟
هيثم بضحكه؛باهي..هي خودي واكتبي..
خدت منه القلم وبدت تكتب...
ريحان؛شوف بابا..
خدي هيثم كراساتها وقال؛ممتاز..كملي...
ابتسمت ريحان وخدت الكراسه..
جنان:هاه شوف..
شاف هيثم الكراسه وقال؛ايوه بابا احسنتي..هي كملي...
وكملت جنان كتيبه
وهيثم وخر وقعد يحرك في ظهره ورقبته بعدين شاف الساعه في معصم يده..
ريحان:كملت بابا..
نزل يده وقال:ترا هاتي...
🍁🍁🍁🍁
"احسن الله اليك"
ابتسمت البنت ومشت ولت لمكانها..
فاطمه؛اليوم كملنا بكري خل ندردشوا مع بعض..في وحده عندها سؤال استفسار استشارة..
وحده منهم قالت:اني معلمتي..
فاطمه؛قولي ريحانتي..
تنهدت وقالت:معلمتي اني في حيره ماعالم بيها الا ربي..
فاطمه؛ان شاء الله خير..
:شن بنقولك...اني معلمتي تقدمتلي خاطب والخاطب هدا قريبي..ولد خالتي وامي تبيني نوافق بالسيف واني معلمتي مانبيشي..
فاطمه؛الاسباب..
:هو كويس الحق اخلاقه كويس ومحترم..لكن يعني مش ملتزم عادي يصلي صح بس يعني متهاون في هلبه حاجات تانيه...واني بصراحه مش هدا الراجل اللي نتمناه...شيخ حامل كتاب الله متفقه في الدين راجل يناسبني..
فاطمه؛صار في بينكم كلام..
:ايه طلب يشوفني وقعمزت معاه وتكلمنا قتله اللي عنده كله..وهو قالي اخترتي انتي بالذات بش تساعديني وتعاونيني ع نفسك بالك حالي يصلح ع ايديك..
فاطمه بإبتسامه؛هو هكي قالك..نبيك تعاونيني ع نفسي؟!
البنت هزت راسها..
تنهدت فاطمه بإبتسامه وقالت:ذكرتيني بقصه وحده...ملتزمه ومن عيله ملتزمه..بوها شيخ معروف امها معلمة قرآن وخوتها ملتزمين..كانت راسمه في بالها مواصفات لفارس احلامها..تبيه حتى هي متفقه فالدين رجل صالح حامل كتاب الله يعلمها من علمه..يراجع هو وياها القرآن يوميا تصححله ويصححلها...ياخد بيدها لله وهي تاخد بيده ليه...
تقدمولها خطاب كلهم كانوا ملتزمين بس كل واحد كان ناقصه فيه حاجه من المواصفات اللي هي تبيهم تردهم طول..لين في مرة تقدملها خاطب عيلتها كلها من بوها لخوها الصغير كانوا قعدوا يقنعوا فيها بيه..والمفارقه انه ماكانش ملتزم..كان عامي زي مانقولوا..بس ع خلق والدها كان يعز هلبه...اقعنوها تشوفه وتقعمز تهدرز معاه وهي مبيته النيه انها طفشه...ضحكت وكملت تقول..لما قعمزت معاه وعطاته فرصه يتكلم هو الأول قال...تعرفي انك حلم حياتي..
البنات كلهم ابتسموا..
فاطمه بإبتسامه وعيونها معبيات دموع؛قال صح اني مش زيك نصلي ونعبد في ربي بس مش زيك انتي واني نبي ناخدك بش تعاونيني ع نفسي تعاونيني ونولي زيك واحسن منك..البنت خشت بحاله وطلعت بحالة تانيه نبرة الصدق في كلامه اللي كان طالع من قلبه ووصل لقلبها خلاها توافق عليه طول...وتزوجوا..واكتشفت بعد الزواج انه خلوق بشكل لايوصف وكان يحترم فيها ايما احترام...وهي كذلك..كانت تقدر فيه وعمرها ماحسساته انها خير منه حتى لما تعلم فيه كانت تعلم بطريقه غير مباشرة ماتنقص شي من هيبته..لما بدي يحفظ قرآن هي كانت تراجعله..لما مايعرفش حاجه يسألها عليها ويتناقش هو وياها لين يفهمها ولو هي كانت ماتعرفش كانت تبحث هي وياه وهدا كله كان يزيد الحب اكثر واكثر..حفط القرآن وقرر يقرا علم الحديث ورفعها للمدينه المنورة قري غادي وتخرج بتفوق وولى متفقه في دينه وهي بدت تتعلم منه..بعد ماروحوا للبلاد كان في منغصات تنغص عليها هي فهالسعاده بس هو كان يعرف يضحكها وينسيها همها....وتوا تدعي الله سبحانه وتعالى ليل نهار يرزقها منه بالذريه الصالحه اللي قاعدين يستنوا فيها ليهم 4سنوات..
البنات ارتسمت ع وجوههم ملامح الحزن..
فاطمه مسحت دمعتها وهي مبتسمه وقالت:ادعولنا يابنات..
سارة مسحت دموعها وهي تقول:ربي يرزقكم بالذرية الصالحه عاجلا غير آجل..
كلهم قالوا؛آمين..
رشفت فاطمه وقالت؛المهم توا اني مانبيش نأثر ع رايك..نبي بس نقولك ان الزواج السليم مش ضروري يكون فيه الزوج هو فارس الأحلام..ركزي بس ع اخلاقه...الأخلاق قبل كل شي..الدين يكمل بالأخلاق والاخلاق تكمل بالدين..ولو من داخل حسيتي روحي مرتاحه وفي داخلك ميول...توكلي ع الله..حتى تكسبي فيه اجر...
البنت ابتسمت وقالت؛تو نزيد نستخير وربي يقدم اللي فيه الخير..
فاطمه:احسنتي استمري ع الإستخاره والدعاء وربي يختارلك الخيره من امرك...ابتسمت وقالت..تقدروا تنصرفوا توا..نشوفكم غدوة ع خير إن شاء الله..
البنات ناضوا وهما يلقوا في السلام..
فاطمه؛سارة ودانيه خليكم شويه..
الزوز وقفوا بدون مايشبحوا لبعض..
فاطمه؛ترا تعالوا قعمزوا قدامي..
الزوز جوها وقعمزوا قدامها..
هي ربعت ايديها وقالت؛من ثلاثه ملاحظه شي...في اليوم الاول قلت بالك نتخيل..اليوم التاني قلت مرات اللي في بالك صح يافاطمه بس عديها غدوة يتصلح الحال..اليوم الثالث قلت لا القصه كبيرة لكن خلي يعدوا هالثلاته ونشوفوا بالك يتصلح الحال..واهم عدوا تلاته ايام ومافي شي تغير..
الزوز عيونهم لوطا وهما ساكتات وبادي ع وجوههم ملامح الضيق..
فاطمه؛لايهجر المسلم اخاه المسلم فوق ثلاثة ايام عارفين الشي هدا ولا..
سارة دموعها غلبوها..ودانيه متحتفظه بصمتها..
فاطمه؛نقدر نعرف شن في؟
دانيه رفعت راسها وقالت:نحكيلك وانتي احكمي...
وحكت دانيه القصه كلها بالتفصيل وسارة وهي تحكي كانت تشبحلها والدموع سيل..
فاطمه:سارة..كنتي تقدري ترفضي بأسلوب احسن من هكي الراجل جاك من الباب وكلم والدك مفروض ترفضيه بإحترام..
سارة معاش قدرت تتحمل قعدت تبكي..
ودانيه تشوفلها بحزن واستغراب في نفس الوقت..
فاطمه؛في حاجه تانيه سارة ولا؟
سارة ببكي:ايه..وشدت يد دانيه وقالت..نحلفك بالله يادانيه ماتقوليش لخوك بالله عليك..
دانيه خافت وهي تقول؛شن في..
سارة هدت شويه وقالت؛ريتي ولد جيرانا خو تهاني..
دانيه:خيره..
سارة؛مش عارفه كيف عرف ان خوك يبي يخطبني هددني وقال لو توافقي عليه نقتله...
انصدمت دانيه..
فاطمه:الله المستعان!
سارة بدموع:اليوم هداكا هددني ع الصبح يادانيه قالي نخليك تبكي عليه نخلي امه تعيط عليه..
دانيه حطت يدها ع قلبها اللي انقبض بقوة..
سارة ببكي:اني والله فرحت لما قالي بنخطبك طرت من الفرحه اقسم بالله ليله بحالها مارقدت...بس الشيطان هدا خربلي فرحتي وقتلها...
دانيه دموعها قعدوا ينزلوا..
سارة؛اهون عليا ياخد وحده تانيه ولاتصير فيه حاجه بسببي..ربي يوفقه مع غيري يارب...
فاطمه؛كيف هكي هدا مفروض ينحطله حد ياسارة!
سارة:انتي ماتعرفيش معلمه فاطمه هدا مايخافش من ربي بكل يدير اي شي ومايقدر حد يحطله حد..
دانيه بصدمه؛علاش ماقتليش من الاول علاش دسي عليا وتتحملي هدا كله بروحك..
سارة؛خفت تقولي لخوك خفت هو يتصرف غلط خفت هلبه خفت..خفت حد تاني يعز عليا يموت معاش نتحمل اني يادانيه معاش نتحمل..
دانيه قلبها وجعها ع صاحبتها نست همها وضمت بقوة وسارة ضمتها وقعدت تبكي..
فاطمه بأسف؛الله المستعان ولاحول ولاقوة الا بالله..
🍁🍁🍁🍁
"اهو توا بيجي قال في الطريق"
عواطف وهي مقعمزة في الصالون مع بنتها:قوليله ينزل يشرب قهوة مع بوك..
جيهان:ان شاء الله...
فجأة انفتح باب الحوش...
شبحوله...
شافوا راجح خاش وع وجهه باديه ملامح الغضب..
وفيده الكيسه والتانيه فيها باكو الدبل...
قدم بيهم وحدفهم عند رجلين امه...
جيهان صدمتها الحركه..
وامه قعدت تشبح للحاجات بعدين شبحتله هو برفعة حاجب..
راجح بغضب:ارتحتي توا...تهنيتي...بعد ماخربتيها...
جيهان؛شن صار ياراجح!؟
راجح:اسألي امك تقولك...
ع طلعة بوه وهو مستغرب فيه قال:خيرك شن جاك علاش صوتك عالي هكي..
راجح وهو يشوف لأمه:اسمع يابوي اني من اللحظه اللي نطلع فيها من الباب الحوش هدا معاش خاشله..شبحله وقال..وياريت ماتحاولش معاي ماتخلنيش نكسفك...
القى ع امه نظرة اخيره حاده بعدين لف ومشي طلع من الحوش..
وبوه غير عيونه عن الباب للحوايج الملوحات عند رجلين مرته والدبل اللي طايحات ع الأرض...
فهالوقت رن تليفون جيهان..
انفجعت وقاماته شافت المتصل فزت من مكانها...
جيهان وهي مرتبكه:جمعه..جمعه بابا..بالسلامه..
ومشت طلعت من الحوش وبوها بعد ماكان معاها بعيونه شبح لمرته وقال:توا نبي نعرف شن صار بالتفصيل مادرقي عليا شي..
وهي تشبحله بإمتعاض وفي وذانها مازال كلام راجح يرن..
🍁🍁🍁
برا..
طلعت جيهان لجمعه...
ركبت السيارة وقالت:السلام عليكم..
جمعه:وعليكم السلام..خيره خوك شن جاه وهو طالع نكلم فيه نكلكسله شبحني ولاعبرني..
جيهان بلعت ريقها وقالت:نادوه من العمل وشكله صايرة حاجه كبيرة طلع من حدانا مستعجل حتى سلام عليا ماسلمش..
جمعه رفع حواجبه ونزلهم..بعدين تحرك بالسيارة بدون تعليق..
وهي تشبحله بقلق ...وتتسائل في نفسها بخوف لو يعرف اللي صار شن يدير!!؟
#أذكار_الصباح
#حب_صافي
#البطل_المغمور2
....يتبع....
