#البطل_المغمور2 "زهور القمر"
#جمان_فريد
#الجزء_الحادي_والأربعين "منح الثقه"
رمضانكم مبارك
عَنْ أَبِي ذَرٍّ، قَالَ: قَالَ لِيَ النَّبِيُّ صَلَّى اللهُ عَلَيْهِ وَسَلَّمَ: ( لَا تَحْقِرَنَّ مِنَ الْمَعْرُوفِ شَيْئًا، وَلَوْ أَنْ تَلْقَى أَخَاكَ بِوَجْهٍ طَلْقٍ) رواه مسلم
💐💐💐💐💐💐💐💐💐💐💐💐💐💐💐💐
اول أيام الشهر الكريم..
اليوم...
وغير انه اول ايام شهر رمضان..
تميز هاليوم بأحداث مهمه تانيه..
ابرزهم...جلسة منح الثقه للحكومه الجديده بقيادة صنع الله المقرحي من قبل البرلمان..
ع الإفطار...
كانوا عيلة هيثم مقعمزين يفطروا في الكوجينه..
والشاشه مقابلتهم ويتفرجوا..
سارة؛اول رمضان مايفطرش فيه بابا معانا اول يوم من غير سو..
زياد؛لأربعه سنين القدام ان شاء الله حيغيب علينا في هلبه مناسبات وايام عاديه..بالنسبه ليا كل اللي يهمني انه يكون مرتاح في اللي يدير فيه ويحبه..ساد اللي عاشه ومر بيه السنين اللي فاتوا..بوي تحمل فوق طاقته..وتحدى نفسه وطبعه وطبيعته كشخص ع خاطرنا...وتنازل عن كل شي يحبه ع خاطرنا مفروض نخلوه توا بعيش حياته زي مايريحه هو..
فهمت سارة قصده من كلامه هزت راسها موافقة ليه وهي تفكر..
ممكن سارة وصلت لمرحلة من التضج تخليها تتقبل هلبه امور كانت رافضتها وان كان هالتقبل ع مضض..
بس التوأم رافضينه رفض تام...
لهدا هما الزوز ماعجبهمش كلام زياد الأخير وبان هالشي ع وجوههم..
وبعد الصمت..
قعدوا منتبهين مع التلفزيون وبرامجه..
لين جي الاعلان التوعوي عن المخد.رات...
زياد خدي الريموت وعلا الصوت وقال:اهوا..
وخواته ركزوا ع التلفزيون...بالذات سارة..
وين شافت اسم صاحبة الفكره ..
وكلمات الاغنيه..حنين الزايدي..
بدت الاغنيه مع الاعلان..
اللي كان متصور بطريقه ابداعيه اجمل من ماتخيلاته صاحبة الفكرة نفسها..
مثل دور الشاب المدمن..ممثل مشهور وليه شعبيه كبيرة...
اول ماظهر في الدعايه ظهر وكأنه كئيب ومحبط ومضايق من الدنيا وفجأة طلع في يده نوع من انواع المخد.رات قعد يشبحله بخوف ويسمع في اصوات تشجع فيه ياخده...وخداه وبدي يعيش حالة التشوة وهو منعزل عن العالم وشويه وشويه والدنيا ظلمت حواليه....
و بدت لوحات زياد المرسومه ع الرمل تبان حواليه وكأنها خلفيه.
وحده ورا ورا وحده..وكلها تشرح مشاعر زياد لما كان مدمن..
والمغني يأدي في مقطع يحكي قصة زياد..
وبان زياد في المشهد متاعه وهو يرسم ع الرمل بكل شعوره..
وجنبه شريط حبوب مخد.ره والحبوب متناثرة حواليه..
وطلع اسمه...د.زياد الكاتب...مدمن سابقا....
وبعدين وروا الممثل مكمل طريقه وهو عايش حالة النشوة...
وهني بدي المغني يقول في المقطع اللي يخص قصة فاتح..
وبان فاتح وهو لابس اسود..
ويشوف قدامه في طاوله..
محطوط عليها شيش خمر..ومخد.رات بودرة وابر....
وجنبهم حبل مشنقه ع نفس الطاوله..
نظرات فاتح كانت كلها كره وملامحه استنكار والم في نفس الوقت...
كانت نظرات حقيقيه يحسها اللي يشوفها..
شويه وقام عيونه وشاف الشاب قدامه وهو عايش حالة عاشها زمان وتأسف ع حاله...
وكذلك كتبوا جنب اسمه..الشيف فاتح الشيباني..مدمن سابقا
وسارة ونوال ونوارة ونرجس وزهير..وكل حد يعز فاتح تفرج ع المقطع متاعه وهو يحس بمشاعر مختلطه...
من بعد هالمشهد..
الشاب يكمل طريقه تنقطع عنه لحظه النشوة ويبدا يدور بجنون ع جرعة تانيه...
لين يلقى مروج يبيع فيهم..
عطاه سلسال يلبسوه نساوين كبار في السن..ومعاه خاتم زواج..ومعاه حلق طفله رضيعه..
خداهم المروج وعطاه المخد.ر..
شويه وسمعوا صوت سيارة الشرطه جايه هربوا الزوز كل حد في طريق..
واللقطه جت ع خليل اللي كان لابس بدلة سوداء حتى هو...
ويمشي وهويتكلم في مقطع من الاغنيه كلام ع القافيه
مؤثر وفيه رساله للمروجين..
وظهر اسمه...د.خليل خالد جمعه..مروج وتاجر سابقا...
وبعد ماكمل المقطع متاعه..
رجعت اللقطه ع الشاب بعد ماخدي جرعه تانيه وخش حالة النشوة..
والمغني كمل غني اخر مقطع وهو كتحذير للي مازال مكمل في الطريق وهو مسكر عيونه عن عواقبها...
لين وصل الشاب في حاجز ارتطم فيه بقوة..
استاقظ..
وشاف قدامه قبر حقيقي محطوط عليه حجر كبير مكتوب عليه فؤاد الزايدي..وتاريخ ميلاده مع تاريخ وفاته..
عمره لم يتجاوز العشرين سنه...
وكتبوا فوقه سبب موته وامتى مات ووين لقوه ميت...
في احدى مكبات القمامه وهو ياخد في الجرعة اللي ادت لوفاته...
وانتهت الاغنيه..
وجي بعدها صوت احد الدعاة الشباب مشهور ...وهو يقول في حديث الرسول...
رَوَى ابْنُ حِبَّانَ وَالتِّرْمِذِىُّ فِى جَامِعِهِ أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ (لا تَزُولُ يَوْمَ الْقِيَامَةِ قَدَمَا عَبْدٍ حَتَّى يُسْأَلَ عَنْ أَرْبَعٍ
عَنْ عُمُرِهِ فِيمَا أَفْنَاهُ
وَعَنْ جَسَدِهِ فِيمَا أَبْلاهُ
وَعَنْ عِلْمِهِ مَاذَا عَمِلَ فِيهِ
وَعَنْ مَالِهِ مِنْ أَيْنَ أَخَذَهُ وَفِيمَا أَنْفَقَهُ)
وينتهي الاعلان بظهور اسم المخرج..
وتحته اسماء الجهات الراعيه للإعلان
🌼صوت تصفيق حار من التوأم وهما يعبروا عن اعجابهم بالإعلان ودور خوهم فيه..
ريحان؛مش غادي دورك فضيع والاغنيه عجبتني...عيش ملك..قويه هلبه..
جنان وهي تمسح في دموعها متأثرة:الكلمات قويه هلبه بالذات المقطع متاعك..
سارة؛هي نفسها صاحبة الفكرة كاتبه الاغنيه؟
زياد؛ايه نفسها تأثرنا حتى حني لما سمعناها..
هزت سارة راسها وهي ساكته..
زياد؛ماسمعتش رأيي..
ابتسمت وقالت؛مش محتاج رأيي زيزو الاعلان كله قوي وحلو هلبه..
تتكلم هكي وفي داخلها نار غيرة شاعله من صاحبة الفكرة وهي تذكر في اليوم اللي شافتها فيه مع فاتح..
🍁🍁🍁🍁
نوال؛خرافي الاعلان مانوقعتاش يكون بالقوة هادي..
فاتح؛اهم شي انه يدير نتيجه..
نوال؛ان شاء الله...المهم انتم درتوا واجبكم..
فاتح هز راسه بابتسامه وقال؛امتى بتطلعي..
نوال؛توا..بس قلت نحضر معاك الاعلان بعدين نمشي..
فاتح قربها ليه وباس راسها بعدين قال؛موفقه بإذن الله..
نوال؛آمين..
ومشت بإتجاه الباب وطلعت من الحوش..
وفاتح تنهد ومشي لداره..
خشلها وقعمز فيها وفتح الفيس يشوف اصداء الاعلان..
ولقي الدنيا مقلوبه عليه...وولى تريند في فترة قصيرة...
كانت ع وجهه ابتسامه حلوة وهو يقرا في آراء الناس..
بس خفتت هالابتسامه وين حس ان فرحته بهالنجاح ناقصه
من غير مايسمع رأيها هي فيه...
بس هو عارفها مش حتقول كلمة طيبه ..
ومع هذا كان يبي يسمع صوتها...
طلع من الفيس..واتصل بيها...
وهي فهالوقت تبخر في الحوش وخواتها يغسلوا في الماعين..
سمعت تليفونها رن..
حطت البخارة ع الطاوله ومشت لدارها..
خشتلها وخدت التليفون من ع الزيانه وشافت الرقم..
تنهدت وحطاته صامت...ومشت طلعت من الدار وسكرت الباب...
وهو بعد قعد الخط ينادي لين فصل..نزل التليفون وقال؛عارفها بدير هكي..
رجع خش ع الفيس بيشوف اراء الناس..
بس النيه طارت..
ناض وحط تليفونه في جيبه ومشي طلع من داره ومنه طلع من الحوش..
🍁🍁🍁🍁
"ايوه يانجم النجوم حركات وجو"
خليل بضحكه وهو يحط في عطر بش يمشي للجامع؛ماتخلنيش نندم..
عطاته نسيبه الساعه وقالت؛وعلاش بتندم!؟
خليل وهو يلبس في الساعه؛مرات تغرني الشهره وننحرف..
نسيبه؛بش نقص رقبتك..
خليل قعد يضحك..
نسيبه وهي تشوفله ع جنب؛خل نمشي نشوف خلوده..
خليل حرك راسه يمين ويسار وهو يضحك قال؛عليك مراة...
🍁وشويه ونزلوا لوطا..
سمع من امه جميع انواع المديح..لين خاف ع نفسه من التغرير...انسحب طول وطلع هو وولده من الحوش للمسجد..🍁لما وصلوا غادي..
صلى خليل تحية المسجد وولده معاه...
بعدين قعدوا يراجوا قي اقامة صلاة العشاء..
شويه جي زياد قعمز جنبه وقال؛السلام عليكم..
خليل؛وعليكم السلام..
زياد؛ولد العمه شن جو..
خالد؛مليح ياولد الخال شن جوك انت..
زياد؛ميه ميه يازعيم..
وخليل يسمع فيهم ويضحك...
فجأة بدت الاقامه...
بدوا المصلين يتجهزوا لتنظيم الصفوف وخليل وزياد كانوا في اول صف...
كمل الشيخ الاقامه بعدين التفت لخليل ومشاله وهو مبتسم..
وقال؛هي تقدم ياشيخ
هو شبحله بعدم استيعاب وقاله:نعم!
ضحك وقاله:تقدم انت الامام من اليوم..
هو بصدمه:قصدك....
ضحك تاني وقال وهو يهز في راسه بإيجاب:ايه ايه تقدم...
هو قعد يشبحله للحظات يبي يستوعب اللي يسمع فيه..
بعدين التفت ومرر نظره ع المصلين كان عدد كبير هلبه..
غير عيونه عنهم وشاف لمحراب الإمام...
حس بشعور لايوصف..
شعور الرجل العادي اللي ينصبوه ملك في لحظه غير متوقعه..
قدم خطوة...وتبعتها التانيه...
لين وصل في المحراب...
غمض عيونه وخدي نفس عميق..وقال همسا
"لاحول ولاقوة الا..بالله"
فتح عيونه واستجمع نفسه...وقال...
استووا...اعتدلوا..حادوا بين المناكب والاقدام.....
بعدين رفع ايديه...وقال بقلب حاضر....
هزم كل المستحيلات وصنع المعجزات...
ودار العجائب...بكلمه وحده....
كلمه تثبتلنا كلنا ان مافيش مستحيل..
وان احلامنا وطموحاتنا لو سعينا بش نوصلولها تتحقق مهما كانت الظروف العواقب...
لو آمنا وتيقنا ووثقفنا بالكلمه اللي قالها توا بقلبه المؤمن....
"الله أكبر"
وكلهم بصوت واحد الله اكبر..
من دنيا ومافيها..
من نعيم زائل..وسعاده قصيرة..
من حزن شديد..وكرب مهما كان عظيم..
من كل ذنب اذنبناه نشوفوا فيه كبير هلبه وصعب يغتفر.
من كل ظالم نزل بينا ظلمه..
من كل طاغي ناوي يبطش بينا..
من كل شرير يمكرلنا مكر سيء بش يؤذينا..
من كل معوق واقف بينا وبين احلامنا..
من العنوسه..
من العقم...
من الفقر..
من العوز...
من الخسارة...
الله اكبر..الله اكبر...
🍁🍁🍁🍁🍁
الساعه الحادية عشر ليلا...
في مقر البرلمان في العاصمه طرابلس..
حضر كل اعضاء المجلس دون غياب اي حد منهم في اهم جلسه يعقدها البرلمان كل اربعه سنوات..
لمنح الثقه لحكومة جديده...
كانت منقوله ع كل القنوات الليبيه الرسميه منها والخاصه...
كانوا موجودين في جهة بروحهم اعضاء الحكومه برئيسهم مقعمزين..
يسمعوا لكلمة رئيس البرلمان...
بعد ماكمل الكلمه قالت عضوة من اللي يكونوا موجودين قراب ع رئيس البرلمان قالت..
والآن مع كلمه رئيس الحكومه المنتهيه ولايته عبدالله الأبرق...
••من وراء الشاشات..
كانت سلسبيل زوجة صنع الله مقعمزة تتفرج هي وصغارها وتراجي امتى راجلها يجي دوره ويقول الكلمه متاعه..
🍁وصنع الله يسمع لرئيس الحكومه السابق وهو حاط يده ع خده ومركز معاه في كل كلمه يقول فيها..
بعد ماكمل كلمته القاعه كلها حياته بالتصفيق..
وهو رجع لمكانه وهو يحي فيهم بحركة اليد...
بعدين عطي رئيس البرلمان الإذن للتصويت ع منح الثقه للحكومه الجديده..
وبدوا الاعضاء يصوتوا من الاجهزة الموجوده قدام كل واحد فيهم..
▪▪▪▪▪
◇رجعت وعشت نفس المشهد مرة تانيه بس كان فهالمرة كل شي مختلف بالنسبه ليا..كل شي...واولهم رئيس الحكومه...
شاب اربعيني عنده طموحات عريضه وطاقه وحماس رهبين وحكمة نادرا مانشوفها عند رجل في عمره..
من قبل مايتولى مهامه وهو يخدم ويواصل الليل مع النهار...
خلانا كلنا متحمسين زيه ومستعدين نعطوا كل ماعندنا...
▪▪▪▪▪
بعد ماانتهي التصويت بلحظات..
اعلنوا ع النتيجه...
وكان كل من موجوده في القاعه مصوت بنعم...ومنحت الثقه لحكومة صنع الله...ومن هني كانت البدايه..
:والآن مع كلمة رئيس الحكومة الجديده..صنع الله المقرحي...
ناض صنع الله من مكانه...والقاعه تصدح بأصوات التصفيق..
وصل في المكان اللي بيتكلم منه..وقف واراه وقال...
السلام عليكم ورحمة الله وبركاته..
بسم الله..والحمد لله...والصلاة والسلام ع اشرف الانبياء والمرسلين نبينا محمد وعلى آله الابرار الغر الميامين
اما بعد..مافيش كلام مكتوب ولا خطبة مجهزة..لأن اللي بنقوله مايعبيش نص صفحه..اني بس هني بنقول شي واحد
حني حنسعوا جاهدين بش نكملوا اللي بنوه الناس اللي جت قبلنا...حنديروا كل اللي نقدروا عليه بش نخدموا البلاد هادي..بلادنا والناس اللي فيه..
مش حنوعدكم بأي شي غير اننا لو ماحققناش اي نتيجه تذكر خلال عام حتستقيل الحكومه ونخلوا الطريق لغيرنا لعلهم يقدروا يديروا اللي حني ماقدرناش نديروه..
وشكرا لحسن استماعكم..
وعلي صوت التصفيق في القاعه...
بعدين بدي أداء القسم...
••نسيبه:الحق اول حكومه نتفائل بيها هكي..
عفاف:ماكثرش دوة ولاقال بندير ولابنفعل وكأن يقول شوفوا بعيونكم واحكموا..
تهاني:صح..حتى اني هكي فهمت..
سارة؛بابا مدح فيه هلبه..وقال عارف روحه شن يبي وشخصيته قياديه..
نسيبه:واضح...
ورجعوا شافوا للتلفزيون في الوقت اللي ماشيه فيه نوال بش تأدي القسم..
كانت جذابه..بحضورها وقوة شخصيتها البارزة..ولبسها المحتشم الأنيق...
وقفت ورا الطاوله وبدت تأدي في القسم..
وعيون هيثم عليها..
▪▪▪▪▪
◇بننكر مش حننكر...نوال خشت في حياتي غصب عني... وحركت مشاعري اللي توقعت انها ماتت مع اسيمه الله يرحمها..خلتني ولأول مرة في حياتي تعجبني مراة غير اسيمه..بس اني كنت اقوى من مشاعري اتجاهها ديما..ومانعرفش اذا كانت تحس اتجاهي بشعور ما او لا...
وفي النهايه اني جدا نقدرها..ونحترمها ونكنلها في نفسي شعور خاص جدا...
▪▪▪▪▪
وسارة تتفرج عليها من ورا الشاشات وتتفكر في حالة بوها من سنين لما كانت نوال موجوده في حياته..
كانت مستنكره تحرك مشاعره اتجاهها بعد امها..
بس توا لما عاشت نفس الحاله حست ببوها..
ومع هذا معاش ينفع توا يصير بينهم أي شي..
دمعوا عيونها لما شافت بوها ماشي بيأدي القسم
وتذكرت قبل اول مرة لما استلم هالوزارة ماكانتش حاسه بشي غير النفور من بوها..
بس توا حاسه بالفخر والحب والاعجاب الشديد..
🌼وكل فتاة بأبيها معجبه🌼
🍁🍁🍁🍁🍁
طالعين من مقر البرلمان..
هي كانت تشبحله ومترددة توقفه بس بعدين حسمت امرها..
نوال:دكتور هيثم..
وقف والتفتلها وهو ورافع حواجبه..
نوال؛كيف حالك دكتور...
هيثم حط ايديه ورا ظهره وقال:الحمد لله..كيف حالك انتي..
نوال:الحمدلله...نبي نحكي في موضوع ضروري يخص ولدي وبنتك..
هيثم؛نسمع فيك..
نوال؛سارة مجبورة ع فاتح..
هيثم:لا..
نوال؛باهي لوكانت مش مجبورة علاش تتعامل معاه هكي..تبان مش طايقاته نهائي..
هيثم:فاتح شكالك..
نوال؛ابدا والله اني شفت بعيوني كل شي واضح..
هيثم؛مش مهم انتي شن تشوفي ولدك لما يجي يشكيلك وقتها نتفاهموا..
نوال ابتسمت بأسف وقالت؛اسلوبك مستحيل يتغير..
هيثم وزع نظره حواليه بعدين قال:اسف..مش قصدي اللي وصلك..
نوال؛مش مشكله..بس اني نبي نقولك ان ولدي مش مجبور يتحمل بنتك وتقلباتها النفسيه حتى هو بشر..
هيثم فك ايديه وقال بغضب:مافي حد ضرب ولدك ع يده وقاله تعالى خود بنتي بنتي مش محتاجه حد يتحملها اني نتحملها عمري كله ومانخلي مخلوق يمن عليها ويركبها جميل...كلامك هدا مفروض ماانقاليش اني مفروض مشيتي وقلتيه لولدك يامعالي الوزيرة....
ومشي وخلاها وهو معصب ع الاخر ونوال معاه بعيونها وهي مصدومه وخايفه من ردة فعله...
كان في سحور لأعضاء الحكومه جماعي في حوش صنع الله..
وهيثم كان ناوي يحضره بس بعد الكلام اللي صار بينه وبين نوال غير رايه...وركب سيارته وتوجه طول لمطعم فاتح..
🍁🍁🍁🍁
في مطبخ المطعم الخاص بفاتح...
فاتح؛ان شاء الله خير دكتور..
هيثم؛طلق بنتي..
فاتح ضيق عيونه وقال؛نعم!
هيثم:اللي سمعته..
فاتح ضحك بعدم فهم وقال :دكتور شن في!؟اقسم بالله مافاهم حاجه..
هيثم؛ياولدي من البداية قتلك موضوعك انت وياها مايصيرش منه...واني والله من اصرارك وافقت وحتى بعد خديتها نشوف في الوضع مش مزبوط ونتغاظى ونقول يتفاهموا في بعض..وحتى لما ادخلت شن قتلك قلت لو معاش تبي معذور..
فاتح وهو عاقد حواجبه قاطعه يقول؛واني قتلك حول الفكره هادي من راسك وانساها..وبعدين معليشي دكتور سارة توا مرتي نتفاهموا اني وياها نتعاركوا هدا شي بيني وبينها ارجوك معاش نبي حد يدخل ...
هيثم؛تمام قول الكلام هدا لأمك...
فاتح بإستغراب:امي!؟
هيثم؛شوف يافاتح اني نعرفك كويس راجل بمعنى الكلمه..بس والله يافاتح لو عرفت انك اذيت بنتي او جرحتها بكلمه والله ماحتقعد ع ذمتك ثانيه وحده...
ولف ومشي طلع من حداه...
وخلاه واصل لأقصى مراحل الغضب..
🍁🍁🍁🍁
"كلمتك..شكيتلك!؟"
نوال ودموعها في عيونها؛ماتحملتش معاملتها ليك..
فاتح بإنفعال:انتي شن دخلك شن دخلك... مادخلكش...ارجوك ارجوك ماتعاوديش دمريلي حياتي مرة تانيه خليني في حالي ومعاش تدخلي فيا..
نوال ودموعها ينزلوا:حاضر اسفه..
هو شبحلها شويه..بعدين قربلها وباس ع راسها ومشي بدون مايتكلم..
وخلاها تبكي بقهر..
🍁🍁🍁🍁
بينما هيثم طلع من داره بعد ماقري ورده من القرآن..
لقي سارة في الكوجينه مقعمزة تقرا في القرآن بعد ماضمت الكوجينه..
وهو يشوفلها مر قدام عيونه ذكريات مؤلمه عاشتها بنته..
اولها موت امها..واللي صار فيها بعد موتها..
وبعدين يوم موت مجاهد والحالة اللي جتها هداكا اليوم...
ومن بعدها سارة تغيرت تغير كبير..
ولت قاسيه وفي نفس الوقت ديما قلقه وخايفه..
ديما تترقب في شي تتوقع انه حيصير..
وين تخش عليه لداره بش تتأكد اذا كان يتنفس ولالا كان يحرص كل الحرص مايحسسهاش انه فايق بيها..
بش يجنبها الاحراج..
ممكن هو غلط لما دار هكي ..كان لازم يخليها تواجه حقيقة مرضها بش يكون عندها استعداد انها تعالجه..
بس للأسف مسايرتها خلت حالتها تطور..
مشالها وين وصل فيها طبس وباسها ع راسها..
هي وقفت قرايه وقالت بإبتسامه؛تبي حاجه بابا؟
هيثم؛سلامتك بابا كملي قرايه كملي..
ومشي طلع من حداها وهي معاه بعيونها بعدين تنهدت ورجعت كملت قراية وردها..
🍀🍀🍀🍀
ومرت ايام الشهر المبارك من بعد هداكا اليوم بهدوء...
هيثم استلم وزاراته وباشر اعماله وولى اغلب وقته يقضيه برا الحوش..
وصغاره تعودوا وعاذرينه ومش محسسينه انه مقصر في حقهم وهدا اللي مريحه...
🍁اما نوال..
بإعتبارها ماسكه حقيبة الخارجيه فبدت بشغلها مباشرة وبدت تسافر من بلاد لبلاد..بش تعرف حكومات الدول الاخرى بالحكومه الليبيه الجديده..
من جهة تانيه...
كان فاتح عايش حياة الشهرة بكل قوة .
عنده برنامج طبخ يقدم فيه ع وحده من القنوات وكان ناجح جدا...وماتفوتش ع سارة منه حلقه...وفي وصفات يديرهم كانت تاخد فيهم منه ودير فيهم..
وفي نفس الوقت نجاح الاعلان خلاهم ضيوف ع اكثر من قناة وحنين معاهم في كل لقاء..
وفي كل لقاء كانت تحكي ع اول لقاء بينها وبين فاتح وفاتح يكمل معاها في القصه وهما منسجمين...وسارة تهري وتنكت في نفسها ع قولت المصاروة من الغيره...
🍁وخوها جي موعد بيانه...
ومااجمل تهاني هديكا الليله...بكل تفاصيلها الهاديه والناعمه والبريئة..
بفستانها البترولي اللماع وشعرها المضموم من فوق ومفرود من تحت ع طوله..
بزينتها البسيطه البعيده عن المبالغه اللي زادت برزت جمال عيونها...
واللي حواليها فرحانين بيها هلبه...
وهالمرة زياد كان يبي يشوفها بس طبعا رفض يخش يلبسها قدام النساوين..لهدا طلعوهاله لدار جديده داروها للتقعميز هي سابقا كانت دار عرفه قبل ينتقل لداره اللي دارهوله برا جنب المربوعه...
••••••••
سارة بضحكه وبصوت هامس؛هيا خشي..
تهاني بنفس الصوت؛لالا مش خاشه توا بري قوليله ماتبيش تطلع...
عضت سارة ع شاربها وقالت بضحكه:حي عليك حي..
تهاني؛تي غير هيا خشي..
ضحكت سارة وقالت؛باهي..
وغيرت ملامح وجهها وخلتها جديه..ومشت خشت عليه..
سارة؛زياد..
زياد وهو واقف وحاط ايديه في جيوب سرواله اشرلها براسه يسأل.. "شني"
سارة؛قالت مش طالعه...
رفع زياد حاجبه وقال؛تمام بري خشي داخل..
سارة هزت راسها وطلعت وهي شاده ضحكتها قالت بهمس؛ننصحك تخشيله توا زياد ونعرفه كان خدي منك موقف ياويلك..
تهاني؛هو ياخد موقف عادي لكن اني لا..
سارة:شورك تفاهمي انتي وراجلك ماليش علاقه..
تهاني خافت خدت نفس ومشت خشت..
وسارة ولت للصاله وهي تضحك..
🌼لما خشت تهاني ع زياد..
ضحك وقال؛معاش تعاوديها تمام..
تهاني؛اسمع ما خفتش منك راهو من الاول اصلا بنديره فيك مقلب..
زياد عقد حواجبه وقال بإبتسامه؛عارف عارف..مرر نظره عليها وقال..وليتي وصار منك..
فنصت عيونها وقالت؛شن قصدك!؟ قصدك اني مش حلوة!.
زياد؛معدله..باين تعبوا عليك بش طلعتي هكي.
رفعت حاجبها واحمروا خدودها من الغضب اللي حاولت تخفيه وهي تقول بثقه؛اني جميله شفت هدا لاو ماشفتاش
اني نعرف روحي كويس..
قدملها وشد شعرها وقال؛ليا قريب 16عام ماشفتاش..اكثر حاجه حبيتها فيك..
زادت دقات قلبها بقوة وهي تشوفله بنظرات كلها حب..
زياد وهو يشوف لشعرها؛حتى الرسم ماكنتش قادر نرسمه غرت عليه من اي عين تشوفه بعد ماغطتيه..
وتهاني تسمع ورايحه في عالم تاني مع سحر نبرة صوته الخشنه وهو يتكلم بهدوء لأول مرة..
شبحلها وقال؛عندك علم اني ماكنتش مركز هلبه في ملامحك..تعلمت من بوي اني ماندققش في وجه اي مراة غريبه عني..وامي كانت تقول اللي ماترضاه لسارة ماديراش لبنات الناس...يابال انتي بنت جيرانا..بس مع هذا ماقدرتش نمنع قلبي عليك...كنت نشوف فيك كيف رغم ظروفك بنت محترمه ولاعمري شفت عليك غلط..حتى الحجاب لبستيه في سن صغير...ومعاش تطلعي من غير عبايه برا الحوش...
هدا كله خلاك في عيوني ديما ليك بريق طاغي يسلب العقل..تعرفي شن مسمي اي لوحه نرسمها ليك..
تهاني مش قادره ترد تبي تسمعه وبس..
زياد بإبتسامه؛الجمان..لانك كنتي هكي ديما...
طلع تليفونه من جيبه وحط ع صورة ومدهولها..
هي خداته وقعدت تشوف فيها...
كانت لوحه حلوة مرسوم فيها محارة باللؤلو متاعها....
وسط بحر غريق الظلام غالب عليه...وكاتب جنبها بخط جدا جميل اسمها...تهاني...
قامت عيونها وقعدت تشبحله وعيونها تعبوا دموع..
زياد؛اول مرة نشوف فيهم عيونك بتركيز زمان..لما امك تعبت ورفعوها المستشفى وامي الله يرحمها لحقتها...متفكر لما طلعتي انتي وامي كانت اثار الدموع قاعده في عيونك..
هديكا كانت اول مرة نشوف فيهم عيونك زين..
تهاني؛قصدك انت من هداكا الوقت..
زياد؛من قبله...من لما جينا وسكنا في الشارع هدا...
من لما كنتي تلبسي في سروال ازرق عليه بلوزة موردة تتفكري..
تهاني ضحكت من بين دموعها وهي مندهشه بعدين قالت؛داس هدا كله انت!؟ ياجبروتك!..
ضحك وقال؛هي خلاص سادك لعند هني..وهاتي التليفون..
مدتهوله وهي تضحك..
حطه في جيبه وقال:هاتي يدك..
مدتها...طلع الدبله من جيبه..وبدي يلبس فيها وهي تشوفله بحب..
بعد لبسها قرب طبع قبله ع جبينها..بعدين قال:راجي..
والتفت خدي باكو فيه سلسال تعليقته فيها حبة لولو طبيعي..
طلعه وجاها وقال التفتي..ماتمسيش شعرك..
وقربلها حوله هو بروحه وقال..شديه..
شداته وهي تضحك...وهو قعد يلبس فيها ويقول؛كله ذوقي يابنت انتي راهو..
تهاني بضحكه؛يهبلوا..
زياد؛انتي اهبل..
تهاني؛طبعا عاد ماتكملش معاك لازم تتبرد..
قعد يضحك بعدين خدي شعرها وفرده ع ظهرها وهو يقول:الله يبارك...اهتمي بيه ديما تقصيه ياويلك..تصبغيه نعدمك..
تهاني بضحكه؛باهي..
لفت وشبحتله وهي تقول؛حتي اني خديتلك حاجات يوصلولك مع سارة..
زياد؛ايه قعدت حاجه...التفت ومشي وخدي بوكس كبير شويه...
قامه ومدهولها وقال:طلعي اللي فيه..
هي خدت الباكو وفتحاته وطلعت منه مزهريه صغيره وحلوة مكتوب عليها اسمها..
زياد؛خدمت عليها في الحبس تعبت فيها هلبه راهو..
تهاني؛تجنن تجنن...ياربي...قداش طلعت حلو يازياد ظلمتك هلبه..
زياد هز راسه وقال بضحكه؛مسامحك مسامحك...بس اسمعي مش ديما هكي اني راهو في المناسبات الرسميه بس كثرة الكلام الحلو تزهق الحياة الزوجيه..
تهاني بضحكه؛اللي سمعته اليوم سادني عمر القدام..
رفع حاجبه اليسار وقال؛اشك والله..انتوا النساوين ماتشبعوش من الكلام الحلو..
تهاني؛لا اني نشبع مادورش..
زياد هز راسه وهو يضحك بعدين قال؛خلاص بنطلع..ماتبي شي..
تهاني؛بنقولك حاجه وحده بس..
زياد؛شن هي..
تهاني:انت غالي عليا هلبه..
زياد ابتسم ع جنب وقال؛وانتي اكثر..
ومشي طلع من حداها..
وهي تشوفله بحب وفرح...وبعدين مشت قعمزت بالمزهريه وهي تتفرج عليها بنظرات كلها حب غارقه في الدموع...
🍁🍁🍁🍁🍁
وفي الايام الاخيره من رمضان..
الليالي العشر..
كانت هلبه قلوب تعانق دعواتها السماء...
راجيه من الخالق انه يديم عليها سعاده عايشة حاليا كل تفاصيلها...
دانيه...ونادر...
وقلوب راجيه يكمل عليها السعاده وتعيش تحت سقف واحد مع من تحب..
تهاني...وزياد..
وقلوب راجيه يعطيها الطمأنينه وحياة مستقرة وهاديه...
مريم..
وقلوب تبي تشوف من تحب عايش مرتاح ومتهني وسعيد..
هيثم..ونوال..وسدينه...وعفاف...
وقلوب...
متعذبه...راجيه منه يريحها من هالعذاب...
هو يبي قلبها يستخرله يحن عليه ويقربه..
وهي تبيه يبعد...ويعيش سعيد بعيد عنها....
والله هو الأدرى باللي فيه الخيره لكل عباده...
وحيستجيب باللي فيه الخير لكل داعي....
يتبع في التكمله....
