سيد القمر الاسود للكاتبة زينب مصطفى

الفصل 25

جلس عمر في غرفة مكتبه بشركته بالقاهره برفقة نادر و رؤساء كبرى شركاته التنفيذيين يتناقش معهم في خطواتهم التاليه قبل ظهور نتيجة المناقصه ..

عمر بجديه بعد انتهاء مناقشتهم..

= وبما اننا خلصنا مناقشة كل خطواتنا الجايه.. تليفونتكم واجهزة الكمبيوتر بتاعتكم تتسلم لنادر بيه واتفضلوا معاه هتاخدو اجازه لمدة يومين هتقضوهم في قريه من قرانا السياحيه ..

احدى المدراء بدهشه..

= أجازه ليه يا عمر باشا و احنا المفروض مضغوطين جدا ومستنين نتيجة المناقصه..

عمر بحزم..

=الي قلته يتنفذ انت مش هتخاف على شغلي اكتر مني ..وإلي عنده اعتراض يتفضل يكتب استقالته ويعتبر نفسه بره الشغل من دلوقتي..

امتقع وجه المدراء وهم يهمهمون بموافقه سريعه..ويهرعون لتسليم اجهزة هواتفهم واجهزة الحاسب المحمول الخاصه بهم..

في حين تابع عمر بجديه..

=نادر هايتصل ببيوتكم وهايعرف عائلاتكم انكم هتغيبوا يومين تلاته علشان عندكم شغل مهم .. ودا طبعا علشان ميقلقوش..وانتم كمان تبقوا متطمنين عليهم..

ثم اشار بيده لباب مكتبه

= ودلوقتي اتقضلوا نفذوا الي قلت عليه..

هز نادر رأسه موافقآ وهو يفتح باب المكتب ويظهر من خلفه بعض رجاله الاشداء الذين قادوا مدرائه للخارج وهم يفرضون عليهم حراسه مشدده..

اغلق نادر الباب خلفهم ثم قال بجديه..

= انت بتبعدهم ومقلتلهمش ليه على نتيجة المناقصه... انت شاكك فيهم والا ايه..

عمر بحزم

=لاء طبعا ولو شاكك في اي حد منهم ولو واحد في الميه كنت رميته بره الشركه بعد ماخدت حقي منه ..بس انا بعمل كل احتياطتي ومش عاوز اسيب اي حاجه للصدفه..

ثم تابع بجديه..

= المهم عاوزك تنفذ كل الي قلتلك عليه وبنفس الترتيب الي اتفقنا عليه مش عاوز اي غلطه..

نادر بابتسامه واثقه..

= عيب يا عمر بيه كل الي انت عاوزه و اكتر هيتنفذ وبمنتهى الدقه..

عمر بابتسامه ممتنه ..

= انا متأكد من كده انا عارف ان ضهري مسنود بيك يا صاحبي ....

ابتسم نادر وهو يقول بهدوء

= طول ما انا عايش هيفضل ضهري في ضهرك والي يحاول يئذيك كأنه بيئذيني انا بالظبط..انت عارف ان انت بالنسبالي مش صاحب شغل ولا حتى صاحب عادي ..انت بالنسبالي اخ.

ابتسم عمر وهو يربت على كتفه بموده وثقه .. في حين ابتسم نادر بموده هو ايضا الا انه عقد حاجبيه فجأه وهو يتلقى اتصالا في سماعة الاذن..