سيد القمر الاسود للكاتبة زينب مصطفى

الفصل الرابع عشر

فتحت حبيبه عينيها بتعب لتجد نفسها مستلقيه في فراش عمر وهي تنام بأمان بين زراعيه فتملكها شعور بالارتباك والصدمه وذهنها يعيد عليها كل ماحدث لها سابقآ فأغمضت عينيها بألم وهي تهمس لنفسها باستنكار

= انا ليه ما مشيتش لحد دلوقتي ..

وبعمل ايه في سرير واحد بيكرهني ويحتقرني واتجوزني غصب عنه ..

كفايه اوي لحد كده المفروض اختفي وابعد بعيد عن كل الوجع والتعب ده

لتغمض عينيها وهي تهمس بألم

=بس انا خايفه ..خايفه أوي امشي وصادق ده يئذيني وعمر الوحيد الي بيقدر يحميني منه ..

ثم ابتسمت بوجع..

=انتي هتكدبي على نفسك كمان يا حبيبه.. انتي ممشتيش عشان مش بس خايفه من صادق ليئذيكي لا ..انتي بتحبي عمر وبتعشقيه ..بتعشقيه حتى وانتي عارفه ومتأكده انه بيكرهك و بيحتقرك وبيحب واحده تانيه غيرك برضه مش قادره تبعدي عنه وتسيبيه..

ثم تابعت بتصميم

=يبقى على الاقل ابعد عنه واحط حدود ما بينا كفايه وجع و لعب بمشاعري لحد كده ..

فحاولت رفع زراعه التي تحيطها بتملك و الانسلال بهدوء خارج الفراش..

الا انها تفاجأت بيده تشتد من حولها تمنعها من التحرر وتعيدها مره اخرى الى احضانه وهو يقول بهدوء

=رايحه على فين احنا لسه الفجر والصبح لسه مطلعش

حبيبه بارتباك

=هروح انام هناك على الكنبه

مرر عمر يده في خصلات شعرها وهو يقول بحنان

=ليه ..المكان هنا مش مريحك ..تحبي اخليهم يغيرو السرير والا نغير الجناح خالص

حبيبه بتوتر

=لا الجناح كويس ..والسرير مريح وكل حاجه بس انا هرتاح هناك اكتر وعلشان انت كمان تعرف تنام وترتاح في سريرك

ضمها عمر اليه أكثر وهو يقبل عنقها بحنان ويزيد من قوة ضمها اليه..

= مين اقلك اني مش مرتاح بالعكس دا اول يوم انام فيه كده بعمق وراحه..

تململت حبيبه وهي تحاول الابتعاد عنه ..

=معلش خليني اروح انام هناك احسن

ابتعد عمر قليلا عنها ثم اضاء نور الغرفه ونظر اليها بعبوس

=في ايه يا حبيبه..مالك

ابتعدت حبيبه عنه وجلست وهي تقول  بتوتر

=مفيش حاجه ..انا بس قلقانه وعاوزه اعرف مصيري معاك ايه ..انا متلخبطه انت شويه تعاملني كويس وشويه تعاملني وحش وانا حقيقي تعبت..