#البطل_المغمور2 "زهور القمر"
#جمان_فريد
#الجزء_الثالث_والعشرين ".سقوط الأقنعة2"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
(الاحداث تدور في ليبيا لكن في زمن وظروف مختلفة عن الواقع الحالي..كلها من وحي الخيال )
💐💐💐💐💐💐💐💐💐💐💐💐💐💐💐💐
عثمان محمد خير الله...
اسم اب راجح المدرج في هالقائمه..
قائمة اسماء رجال الدوله ورجال الأعمال والضباط المتعاونين مع المنظمه...
اكثر شي اثار استغراب رضوان ان المده المكتوبه قدام اسم اب راجح كانت مايقارب ال17عام..يعني اب راجح تعاون معاهم مرة وحده بس..
هيثم؛راجح..
راجح غمض عيونه ومسح بيده ع وجهه بعدين حطه ع فمه وفتح عيونه ورجع يشوف للإسم...
غير عيونه عنه وقال بصوت مبحوح:معليش معاليك تسمحلي..نطلع شويه ناخد نفس...
رضوان حرك راسه بالموافقه...
وراجح ناض من مكانه ومشي بسرعه طلع...
هيثم بعد ماتبعه بعيونه شبح لرضوان وقال؛اسم مني اللي لقاه في القائمه..
رضوان تنهد ورفع حواجبه بعدين نزلهم؛بوه..
ضيق هيثم عيونه بأسف شديد..
ورضوان رجع يشوف باقي الأسماء الموجوده...
وماهي الا لحظات وخش راجح ووجهه وشعره عليهم اثر ميه...
طول مشي قعمز ع الكرسي تنحنح بعدين قال:واضح ان الاسماء هادي كلها خدمتهم ع مدار 20سنه اللي فاتت..
هيثم قعد يشوفله بضيق..
ورضوان بعد كان يشبحله شبح للشاشه وقال:هدا الواضح المهم توا تأكدنا ان بشر واحد من الاذرع القويه للمنظمه هادي..
راجح؛وقاعد يسجل عليهم في كل شي بش يأمن نفسه..
الضابط؛مازال في ملف تاني معاليك..
رضوان اشر ع الشاشه وقال:افتحه..
طلع من ملف القائمه وخش ع التاني..
ولما فتحه..
طلعتله صورة شخص..تحت اسمه بالكامل..
الصفه متاعه مكان تواجده..وتاريخ وفاته..
رضوان؛هدا الأعرج مات من سنين طويله في اشتباك بين الشرطه وبين افراد المنظمه..
راجح؛سمعت عنه قبل..
الضابط قعد يركب في الصورة..
لين بان غيرها..
كان لوحده...
موجود اسمها..والصفه متاعها..
رضوان؛جميله الباسطي..الملقبه بالوردة...
الضابط؛الله يسامحه اللي لقبها هاللقب.
ابتسم راجح غصب عنه..
رضوان؛من قبل نعرفوا اماكن تواجدها بين هني وتونس والمغرب..وصدقا هادي اول مرة نشوف شكلها..
راجح؛مافي حد شايفها قبل عندها قدرة غريبه ع التخفي..
هيثم؛زي الولد اللي كان معاه زياد...
راجح:صح..
رضوان؛شوف غيرها..
الضابط ركب الصورة فوق...
طلعتلهم صورة اسعد..
راجح؛حبيبنا اللزم...شوف اللي بعده...
ركب من جديد الصورة...
وطلع هالمرة تعريف من غير صورة..
قرب رضوان اكثر وهو يقرا في الاسم..
راجح:عبدالكريم عبدالجبار*****
مكان تواجد ليبيا...هو هدا بس!!؟
رضوان؛اول مرة نسمع بيه الاسم هدا!...
قعدوا ساكتين لحظه وهما يفكروا..
بعدين قال راجح؛مسعود الرايس..معقوله الاسم هدا يطلع اسم حركي..
رضوان:وارد جدا وكنا متوقعين الشي هدا زمان..ع العموم اني ولا مرة صدقت قصة موته وكنت متأكد انها معلومه الغرض منها التضليل..
الضابط؛شوف معاليك...
كلهم شافوا للشاشه...
بانت عليهم خريطه البلاد كلها..وفي اماكن معلم عليها بنقاط حمراء..
راجح؛هادي الاماكن اللي ينشطوا فيها بالعاده..بس شوف المنطقه المعلمه بالأزرق هادي في الجنوب..
الضابط؛مرات الرايس يكون فيها..هما يختاروا في مناطق الاجهزه الامنيه فيها ضعيفه وتكون بعيده كل البعد ع العاصمه ومساحتها شاسعه..
راجح:صح..
رضوان هز راسه وقال:الاسماء الموجوده في القائمه كلها تنحط تحت المراقبه وتتحروا عنها تحري دقيق جدا...
والاماكن الموجوده ع الخريطه تمشوا تتحروا عنها حتى هي كويس وردوا بالكم الوضع خطير جدا...مش متحمل اي اخطاء..ولازم يحسوا ان الوضع عندنا مشتت لازم يفهموا اننا شبه عاجزين قدامهم...بش يرتاحوا اكثر..
التفت لهيثم وقاله؛بشر لو اكتشف اختفاء الفلاش هدا حيوصل في نوال فتحي طول وكل شي متوقع منه ينسى تماما انها ام صغاره..لازم تختفي الفتره هادي وتقعد في مكان مايتوقعش انها تكون موجوده فيه..
هيثم؛فكرت في الحاجه هادي..
راجح؛لازم توصله معلومه انها سافرت برا البلاد وماتوصلش منها..وحني حندبرولها حكايه السفر..
هيثم؛لحظه..هو هكي حيوصل فيها برا بسهوله ..
رضوان؛كيف؟
هيثم؛ساهل عليه يعرف وينها لوطلعت برا.
راجح ابتسم وقال:مش حتطلع حتقعد هني..هدا كله تمويه..
ضحك هيثم نص ضحكه وقال:فهمت..
ناض رضوان وجاه وهيثم وقف..
رضوان مد يده وهيثم صافحه...
حط رضوان يده ع يد هيثم وقال:اللي درته هدا واجب وطني قليل من يبادروا ويديروه بسبب الخطر اللي فيه..
هيثم:يستاهل المخاطره..عشت اللي مر بيه ولدي زياد واني نتخيل في حال هلبه شباب هلكتهم وقاعده تهلك فيهم المخدرات ودمر في مستقبلهم وتقضي عليهم..نتمنى لو نقدر نخلصهم كلهم من اللي هما فيه ونجنب اهاليهم مآسي الفقد اللي ترافق البنادم لأخر لحظه في حياته..
رضوان وهو يتفكر في خوه هز راسه موافقة لكلام هيثم...
▪▪▪▪▪
◇بطوله...لا مش بطوله هدا
