NotWithStanding...(မည်သို့ပင်ဖြစ်စေ... ) (Completed)

Episode - 7

တီ..တီ..တီ..

'' ဟယ်လို ဆရာ ကလေးတွေ ဖြေနိုင်ရဲ့လား ''

'' အင်း ဖြေနိုင်ကြတယ် ညီ ရွေးပေးလိုက်တာတွေ အကုန်တိုးကြတယ် ''

'' ဟုတ်လား ဆရာ တော်သေးတာပေါ့ ''

'' အင်း သိပ်လည်း စိတ်ပူမနေပါနဲ့ ညီ့ တပည့်တွေက တော်ပြီးသားပါ ။ ကျန်းမာရေး ဂရုစိုက်ပြီး ညီ့ စာမေးပွဲကိုပဲ အာရုံ စိုက်တော့။ စာမေးပွဲ ကာလအတွင်းသုံးရအောင်လို့ ဆရာ ပိုက်ဆံထပ်လွှဲ ပေးလိုက်မယ် ''

'' ဟုတ်ဟုတ် ဆရာ ။ ဆရာလည်း ဂရုစိုက်ပါ ''

အသက် ၂၇နှစ်သာရှိသေးသော ခွန်း၏ဆရာ စိုင်းထွဋ်ခေါင်မင်း မှာ ခွန်း ၈တန်း ကျောင်းသားအရွယ်ကပင် ခေါ်ယူ စောင့်ရှောက်ထားပေးခြင်းဖြစ်သည်။ မိဘဟုခေါ်အပ်သော ပုဂ္ဂိုလ် များ သူ့အား ထားသွားစဥ်တွင် ဆရာမှ နေ၍ တာဝန်ယူ ထိန်းကျောင်းပေးခဲ့သည်မှာ ယနေ့တိုင်ထိဖြစ်သည်။

စိုင်းထွဋ်ခေါင်မင်း တွင် အမေ မရှိတော့ပါ။ ကျန်ခဲ့သော ညီငယ်လေးနှင့် အဖေဖြစ်သူအား စောင့်ရှောက်ကာ သည်ရွာလေးတွင်သာ ဘဝကို မြုပ်နှံထားသည်။
ထို့ကြောင့်လည်း တစ်ရွာလုံး အားကိုးရသော ကာလသားခေါင်းဆောင်လည်း ဖြစ်နေပြန်သည်။ အိမ်ခြေမများသော သည်ရွာလေးတွင် ဆရာစိုင်းထွဋ်ခေါင်မင်းအား မလေးစား မချစ်ခင်သူ မရှိပေ။

.....................

'' ကိုခွန်း ကော်ဖီသောက်လေ ''

ကော်ဖီဆိုင်တွင်ဖြစ်သည်။ သည်ကနေ့ တက္ကသိုလ် ဝင်စာမေးပွဲများ ၏ စာမေးပွဲနောက်ဆုံးနေ့ဖြစ်သည်။ ကော်ဖီဆိုင်သို့လျှောက်လာသည့် လမ်းတစ်လျှောက်တွင် ရွာမှ ကလေးများနှင့် ဖုန်းပြောလာခဲ့သည်။
တစ်ဖက်မှ ကလေးများ အကုန်ဖြေနိုင်ကြသည်ဟု ကြားရ၍ ခွန်း မျက်နှာတွင် ပျော်ရွှင်မှု အဖြာဖြာ ဝေနေခဲ့သည်။ ကော်ဖီဆိုင် သို့ ရောက်၍ ဖုန်းချလိုက်သည်အထိ အကောင်းပင်။

ဖုန်းတွင် မက်ဆေ့ချ် တစ်စောင် ဝင်လာပြီး ထိုစာအား ဖတ်ပြီးမှ သိသိသာသာ ​ငြိမ်သက်သွားခြင်း ဖြစ်သည်။

'' ဪ အင်း ဆောရီး တိမ်တိုက် ကိုယ်နည်းနည်း အတွေးများသွားလို့ ''