روايه حكاية قلب ل ريما عباس

الحلقه الأولى

بسم الله  نبدأ.. 💙

*حِكـاية قَـلب
للكاتبة ريما عباس

"في كل قلب هناك قصة ، ولقلبي حكاية هيا لنرويها معاً  "
___________

ذات ظهيرة اتلاقيت مع صحبتي رسيل كنت مواعداها اني ح ابيت معاها ف اليوم دا ، بما ان بكره جمعه وكدا ، اتغدينا سوا وقعدنا نتكلم  وندردش رسيل صحبتي من سنتين وشويه بنقرا سوا انسانه هاديه وراقيه شخصيتها رهيبه وبالها طويل معاي انا ب الذات ، نفس عمري 19 سنة ، الاتنين بنقرا هندسة ديكور .
قالت لي:
-نحنا لينا سنتين بنعرف بعض وعمري م سمعتك  بتحكي عن اهلك؟ ولا بتحكي لي تفاصيل عنك ، ليه م واثقه فيني
-لاأ مش الفكره بس انا ما بحب احكي عنهم اصلا ، غير كدا انتي م سألتيني عنهم اصلا
- انا لو سألتك سؤال حتجاوبي لي بصراحه ؟؟
-قلت ليها اسالي  طوالي
سكتت مسافه وبعدها قالت لي :
-إنتي ليه جيتي هنا ؟ لية سبتي اهلك وناسك وجيتي تعيشي هنا  وانتي فاهمه قصدي؟ اكيد في سبب قوي وانا واثقه من كدا ! ليكي حريه مطلقه ب انك م تجاوبي بس بما اني صحبتك مفروض اعرف البحصل معاك شنو صح؟؟ وانا معاك ماح اتخلي عنك .
رديت ليها :
-كلكم بتقولو  كدا ، ماف زول بفضل معاك للاخر ، مجرد م انت يحصل ليك حاجه ماحتلاقي ولا احد جمبك خليك عارفه كدا حتي انا م تضمنيني ، اهلي م وقفو معاي حتقيفي معاي،انتي،؟
ردت لي :
-مفروض انا ازعل هسسي واتحمق واخاصمك بس انا قلبي طيب ماح اعمل كدا ، وحتحكي لي الحاصل معاك كلو
رديت ليها ب فتور وب رغبه ف ان النقاش دا يخلص :
-خلاص ظابط بليل بحكي ليك 

رسيل سكتت بس لانها منتظراني احكي ليها او م كانت حتسكت كدا وغيرت الموضوع كمان ،المساء اول م وصلنا وريحنا شويه جابت اكل وجات وقالت لي:
- اخلصي اكلي علشان  تحكي لي
- ي رسيل ، الكلام كتييير وانا فترانه 
- ريم بطلي حركاتك دي احكي لي انتي وعدتيني..
-طيب ي ستي حاضر ..  

(ابتديت احكي ليها من البداية :)

اسمي ريم علي من اسره كبيره جدي  اسمو الشيخ حسن ، عندو تلاته اولاد وابوي واحد فيهم واصغر وحده بنت اللي هي عمتي رقيه الانا قاعده معاها دي .. جدي بني ل اولادو التلاته كل واحد بيت كلهم جمب بعض وقسم ليهم حلالو كلو الدكاكين والاراضي وعمتي كتب ليها قطعتين ارض براها ، ابوي اتزوج امي وياهوو جاب منها
(ولد وتلاته بنات مدثر ، فاطمه ورتاج وانا آخر وحده ريم ) ، أبوي بطبعو زول م بحب النقه الكتيره اصلا الرجال بيكونو اغلب يومهم برا البيت ، وبليل بجوو ويتعشو مع جدو والنسوان مع حبوبه زينب وبعدها كل زول يمش بيتو اتربينا اولاد وبنات كلنا سوا  .
-امي اسمها انتصار بعد م ولدتني اتفرغت لنفسها  وأبوي تقريبا كان وعدها ب انو حيفتح ليها بزنس خاص بيها ف فتح ليها حضانه كبيره مجهزه بمستوي عاليي ، بعدها آنا اترميت ف بيت حبوبتي وبقت مهملاني اكتر ..