رواية معشوقتي المجنونة
للكاتبه ابتسام محمود الصيري
الحلقه الخامسه عشر
نط عمرو بلياقه عاليه و جرى بسرعه جدا و اي ضربة كان بيتفاداها لحد ما وصل عند البسين
عمرو : الحجني يا باشتنا رچالتك عايزين يخلصو عليا
ابراهيم طلع من البسين بص للحرس : انتو رجاله انتو اطلعو بره "و بص ل عمرو " انت مين؟
عمرو يظبط هدومه و ب إبتسامه : انا و العياذ بالله من جولت انا
ابراهيم بعصبيه : انت جاي تهزر هنا
عمرو يمثل بخوف : ابو الرچوله يا باشا
ابراهيم بصله
عمرو يشاور ع نفسه : اسمي ابو الرچوله
ابراهيم بحده : انت ازاي تتجرأ و تدخل بيتي
فيه بنت كانت سانده راسها ع حرف البسين طلعت نشفت نفسها
عمرو : انا لجيت هيلمان بره جولت مچاتش عليا و لازم اشتغل مع جنابك ايتها حاجه
ابراهيم : انت عبيط ماخفتش من كل الحرس و داخل عشان تشتغل كده عادي
عمرو : لجمت العيش يا باشا
ابراهيم : انت عايز ايه بالظبط يلا؟
عمرو : بص يا باشا ارميني في ايتها شغلانه و انا هعچبك واصل ، ان شالله ابجى الحارس الشخصي ل چنابك
البنت حطت ايدها ع عين عمرو المتعوره : و يا ترى دي ايه يا اللي عايز "و تقلد كلامه "تبجى الحارس الشخصي لجنابه
عمرو يمثل الجديه : دي وحمه يا مودام
البنت بضحك : و حطت ايدها جامد ع عينه
عمرو يمثل الوجع : أي
البنت بضحك : شكل الوحمة بتوجع
عمرو يمثل القوه : الكدب ع الله خيبه انا دخلت خناجه اولت اولت امبارح و دخل عليه عشر رچاله فضلت فيهم طراااخ طراااخ لحد ما چبتهم كله ع الارض
البنت ضحكت جامد : كل اللي في عينك ده و انت اللي نزلت فيهم طراااخ طرااخ
عمرو : ما واحد ابن لذينه غفلني
البنت بصت ل ابراهيم : والله لذيذ سيبه معانا، حتى يضحكنى و قامت نزلت البسين
ابراهيم : وريني بطاقتك
عمرو : ما جولتلك اسمي ابو الرچوله المجدع الشديد اووي
ابراهيم بنرفزه : و ده اسم برده
عمرو : لا صفه اصل احنا عيله جويه
ابراهيم قام : لا ماهو واضح ،،هات بطاقتك يلا
عمرو حط ايده في جيبه و فضل باصص ل ابراهيم
ابراهيم : هي مش معاك
عمرو بثقه طلع كيسه سوده و طلع منها البطاقه : اهي ، هو حد يمشي اليومين دول من غير بطاجه، الحكومة مش راحمه يا باشا
ابراهيم بصله اوووي و اخد البطاقه يكشف عنها بعد شوية عنه و كلم واحد و قاله: اسمه حميدو حميدو تربة
البنت سندت راسها ع البسين و فضلت تبصله جامد عمرو حرك حواجبة ليها
اللي بيكلم ابراهيم : هبقى اكلمك اقولك كل تفاصيله
ابراهيم : براحتك خالص و قفل
وراحله انت هتشرف معانا هنا لحد الصبح و بعد كده نتكلم
عمرو : معاك لسنه جدام بس شوفلنا اي وكل همووت من الجوع
ابراهيم شاور ع فرد امن : خده اوضة الضيوف و خلي الخدم يحضرو ليه اكل
عمرو : تسلم يا يا بشتنا هي دي الرچولة و المچدعه ع حق
*********
يوم جديد
مهيمن يطلع من اوضة توتا شكله متضايق جدا نايا كانت في المطبخ عدى من جنبها و محدش كلم التاني طلعت الاكل ع السفره و دخلت اوضتها
دانيه اتصلت عليها
نايا بزهق و صوت مخنوق : الو
دانيه : ازيك يا نايا
نايا : تمام
دانيه بصوت طفولي : مالك يا صابحتي
نايا بضيق : تعبانه اووي يا دانيه خلاص مش قادره استحمل اي حاجه
دانيه : مالك يا نايا انتي بقيتي تخبي عليا
نايا بدموع : والله ابدا بس ماحبتش اضايقك و انتي حامل وتعبانه لوحدك
دانيه : نايا انتي قلقتيني عليكي ،،تعالي اقعدي معايه يا اما قوليلي انتي فين و انا اجيلك
نايا : حبيبتي انتي حامل و تعبانه انا هبقى كويسه
دانيه : والله لو مش جيتيلي انا اللي هجيلك
نايا : خلاص يا دانيه هجيلك كمان شوية
دانيه : و انا هستناكي مش هفطر غير لما تيجي
نايا : يابنتي افطري و انا هجيلك والله
دانيه بتصميم : والله مش هحط حاجه في بقي غير لما تيجي
نايا : ماشي يا دانيه هجيلك
***
بره في الصاله
ديرو بدلع : هيمو سوري ع اللي حصل في الفرح انا واخده ع كده ماكنتش اعرف انك هتضايق
مهيمن بلامبالاه و بيشرب القهوه : و اديكي عرفتي ابقى اشوفك بترقصي مع اي راجل تاني او وقفه
ديرو : لا خلاص مش هتحصل تاني
مهيمن : تمام
ديرو بدلع : ممكن اروح ل بابا انا زهقانه اووي
مهيمن بصلها و فضل يفكر في حاجه : تمام روحي
ديرو باسته ع خده : ميرسي
نايا طلعت من الاوضه و شافتها قلبها وجعها و كأن حاجه كهربتها دخلت من غير ولا كلمه اوضة توتا شالتها وهي نايمه و طلعت و وقفت و ادت ضهرها ل مهيمن و من غير ما تبص عليه : انا رايحه ل دانيه
مهيمن فضل يبصلها من غير ما يتكلم ثواني
وقال بصوت مخنوق : ثواني اوصلك
نايا بجمود : شكرا بعرف الطريق ل وحدي
شاورلها انها تروح
جواه كان بركان لكن مافيش اي مشاعر واضحه عليه رفع راسه و غمض عينه جامد حط ايده ع عينه و مسح عينه بعصبيه
نايا بصتله : يعني ماردتش
مهيمن دور وشه و بصوت حزين : اتفضلي روحي
نايا حست بصوته فيه بحه غريبه و عينه بتلمع زي ما يكون فيها دموع كان نفسها تروح تاخده في حضنها و تقوله مالك لكن جمدت قلبها و نزلت
ديرو طلعت : انا جاهزه يالا عشان توصلني
مهيمن قام وقف في الشباك : ورايا حاجات انزلي روحي بعربيك
ديرو اضايقت جدا : انت لسه زعلان مني
مهيمن بهدوء و عكس البركان اللي جواه : هعمل حاجات قبل ما انزل لو مستعجله انزلي
ديرو قعدت : لا مش مستعجله
مهيمن كان نفسه يكون لوحده يطلع كل الطاقه السلبيه اللي جواه لكن وجود ديرو زودها اكتر مسك اللاب فضل يعمل اي حاجة ظهرتله صور نايا و هي عامله نفسها نضال فضل باصص فيها كتير اتضايق اكتر قفل اللاب جامد و وقف : يالا
ديرو : يالا
*******
عند دانيه
الباب خبط قامت فتحت : فافا بحسبك نايا و حضنتها وحشاني يا نيله كده مش بتسألي ع اختك الحامل
فريده : والله وحشاني معلش بقى مشغوله في الفيلا و تقول بسهوكه و مع شادي
دانيه : ادخلي يا مسهوكه يا بتاعة شادي
فريده بفرحه : دي ضحكته بترج قلبي وبتهز الوريد يا دندونه مكنتش متخيله اني احب كده
دانيه : بنت انتي هي مراره واحده اهمدي كده و بطلي نفخ و سهوكه
الباب يخبط
دانيه : دي اكيد نايا و تفتح
نايا : دانيتي عامله ايه
دانيه : بخير يا قلب دانيتك ،، مين دي نفسي اعرف
نايا : هدخلها تكمل نوم و هقولك ع كل حاجه و اول ما دخلت لقت فريده و بفرحه : ايه ضاااه فافا هنا هدخل توتا و اجيلكم
اول ما طلعت
فريده : وحشتني ايام زمان تعالي بسرعه نلحق النم من اوله
نايا بضحك : هي قعدة الصحاب حلوه اه بس جهنم ولعه وحشتوني يا اندااال،، عامله ايه مع شادي
فريده تسرح و بسهوكه : شادي ...
دانيه : بااااس انا مش ناقصه نفخ اديني نكد يا نايا عايزه حاجه توجع قلبي مش طالبه محن منك خالص
فريده : والله فقر و تموتي في النكد
نايا سكتت و عينها دمعت
فريده : لا ،، حتى انتي ،، طيب هي و حامل و مكفره الراجل معاها انتي خير مالك
نايا بدموع : ماتشغلوش بالكم
دانيه : الاول مين البنت دي
نايا قالتلها كل حاجه عن توتا
دانيه : و مين بقى البنت اللي المحروس جوزك كان شايلها في الفرح
نايا : دي بقى سبب نكدي نفسي امسكها اقتلها
فريده : هي مين دي اوعي تكون نفس البنت بتاعة الكافيه
نايا بضيق : هي
دانيه : هي تبقاله ايه
نايا : مراته
فريده تنحت : ازاي ده بيحبك جدا
دانيه : والله انا قلت كلهم خاينين محدش صدقني
فريده : بقولك ايه يا ست روتانا نكد مش طالبه و بصت ع نايا طيب انتي سألتيه اتجوز ليه
نايا تمسح دموعها : مش راضي يقول
فريده تفكر : نايا ممكن متجوزها عشان حاجه في الشغل
نايا : ايه ده تصدقي ماجاش في بالي حاجه زي كده بس لأ لما بيكون فيه حاجه بيقضو يوم معاهم مش بيتجوزوهم و اذا كده ولا كده بتوجع يا فريده
فريده : نايا مهيمن بيحبك و اكيد في سبب يعمل كده استحملي عشان حبك
دانيه : انتي بتقولي ايه يعني تيجي ع كرامتها و تذل نفسها عشان المحروس يتجوز و يتبسط
فريده : نايا ماتسمعيش كلامها، اكيد فيه سبب عشان يتجوز و هو بيحبك و جدا و ميقدرش يستغنى عنك
نايا بدموع : المشكله اني تعبت بيخاف عليها بطريقه رهيبه تتخيلي ادخل عليه الاقيه بيظبط ليها هدومها اللى هتلبسها
دانيه : شوفي الواطي
فريده : نايا جوزك فيه سبب و ممكن عايز يكسب ثقتها فيه
دانيه : بت يا نايا ابعدي و اديله بالجزمه هو اللي هيجري وراكي
نايا بدموع : انا قلبي مابقاش مستحمل انا خلاص بنهار من جوايا
دانيه : اطلبي الطلاق
فريده : دانيه احنا ع فكره ضيوف عندك ادخلي هاتلنا حاجه ناكلها ولا نشربها
دانيه : انا حامل و انتم مش غرب
فريده قامت و مسكت ايد دانيه شدتها : احنا هنعمل الفطار و انتي اياكي تيجي ورانا يا خرابة المراكب السايره
دانيه ببراءه : انا؟ ده انا حتى بقول حكم
فريده : ياريت تطلعي الحكم دي من دماغك خالص و دخلت مع نايا المطبخ
فريده : والله والله والله اي راجل فالدنيا زي الطفل بالظبط ،،كلمة تجيبه وكلمة توديه بالهدوء والحنية
دانيه تدخل : لو مجاش يبقي بالخناق عادي
فريده : امشي اطلعي بره
دانيه بضحك : خلاص مش هتكلم
فريده : احتوي الطفل اللي جواه بالرفق واللين والمودة والمحبة
دانيه : لو منفعش يبقي زي ابنك بردو بالشبشب واديله واحرميه من الدلع
فريده بصتلها : والله و بصت ل نايا ماتنيمهوش زعلان منك والله هيشلهالك طول عمره
دانيه : هو اينعم المفروض يتفلق بس بردو انتي الكبيرة بس لو ساق فيها ومرضيش يصالحك صدري الوش الخشب اسبوع
فريده مرضتش تبصلها و كملت كلامها : حاولي ترضيه عشان هو فعلا بيحبك
دانيه : أينعم هو خاين بس معلش عشان خاطري انا
فريده مسكت دانيه من هدومها : انتي جوزك مستحملك ازاي يا شيخه بطلي فقر و نكد شويه حرام عليكي انتي حامل في بومه؟
نايا فضلت تضحك : والله فادي كتر خيره معاكي
دانيه : طب بس انتو الاتنين ده انا مشبعه فادي دلع و ..
فريده اقاطعها : لو بالشكل ده يبقى ابوس ايدك اقعدي صامته في البيت هتطفشي الراجل و احنا ماصدقنا نلاقي راجل خدمني و خدم امك و خدم نايا و خدم البشريه كلها و ظلم نفسه بجوازك
نايا فضلت تضحك : بالله عليكي فادي ده غالي عليا اهمدي و بطلي هبد ع دماغه
دانيه : والله محدش مقدر قيمتي بكره هتتمنو تقعدو معايا و انا اللي هتبرى منكم
فريده و نايا فضلو يضحكو
فريده : ابوس ايدك من دلوقتي اتبري مننا
دانيه بهزار : طيب اطلعو بره بيتي يا كلاب السكك مش عايزه اعرفكم تاني
نايا بضحك : و النبي ل تحلفي و نفذي
دانيه فضلت ترمي عليهم لمون
فريده و نايا طلعو يجرو
YOU ARE READING
معشوقتي المجنونة الجزء الثاني مكتمل
General Fiction"لا تلومني على عشقي المجنون له، كيف تلوموني وهو نبض قلبي وروحي التي تحيا به، نعم أنا مجنونة هواه، وتحملت ما لا يتحمله بشر في حبي له، تحملت أن أجد غيري بين يديه. فأي عقل يصدق ما رأته عيناي؟! لكنني وقفت، وصمدت، وتحديت كل مشاعري من أجله هو فقط، تحديت غ...
