HE=MY FIRST LOVE [ကိုယ့်အချစ်ဦး ](Completed)

အချပ်ပို (၅) အပိုင်း (၁)- CEOရဲ့အသည်းအသက်လေး

အနက်ရောင်ဝတ်စကုတ်လေးနဲ့ဒူးအထိဖုံးတဲ့အနက်ရောင်စကပ်လေးကိုဝတ်ဆင်ထားတဲ့မျက်နှာဝိုင်းဝိုင်းလေးနဲ့အရောင်းစာရေးမလေးသည် ချောမောကြည့်ကောင်းသောလူငယ်လေးရှိရာဆီသို့တန်းတန်းမတ်မတ်လျှောက်လာပြီးနောက် သူမ၏လက်၂ဖက်ကိုရှေ့ဖက်သို့သွယ်ယှက်ထားလျက် တရိုတသေနဲ့စကားဆိုလာခဲ့ပေသည်။

"CEOရှင့် CEOမှာထားတဲ့လက်စွပ်လေးတွေရပါပြီတဲ့..
ပုံသွင်းထားတဲ့လက်စွပ်လေးတွေစိတ်တိုင်းကျမကျကြည့်ပေးဖို့အတွက် သူဌေးကကျမကိုခေါ်ခိုင်းလိုက်ပါတယ် "

နက်ပြာရောင် Suitနဲ့လူငယ်လေးသည်သူမစကားကိုကြားတော့မျက်လုံးပင့်ကြည့်လာကာတည်ငြိမ်စွာနှင့်ခေါင်းအသာငြိမ့််ပြလာသည်။ ထိုလူငယ်လေးက သူ၏ခြေတံရှည်တွေကိုချလျက်ထရပ်လိုက်လေသော် သူ့ရဲ့အရပ်ကအရောင်းစာရေးမလေးထက်ခေါင်း၂လုံးစာမကပိုရှည်နေကာအရောင်းစာရေးမလေးမှာခေါင်းမော့ကြည့်နေရ၍ဇက်နာသွားတော့သည်။

တောက်ပြောင်တဲ့လယ်သာရှူးဖိနပ်ကနေ
ဟိန်းထွက်လာတဲ့ဖိနပ်ခွာသံက အဖြူရောင်စကျင်ကျောက်ပြားတွေခင်းကျင်းထားတဲ့လက်ဝတ်ရတနာအရောင်းခန်းမထဲတွင်အရှိန်အဝါအပြည့်နှင့်ပျံ့နှံ့ရိုက်ခတ်သွား၏။

နက်ပြာရောင် Suitနဲ့လူငယ်လေးမှာအရပ်190 cmနီးပါးရှည်ပြီးကျယ်ပြန့်သော
ပုခုံးပြင်တို့နဲ့အတူတောင့်ဖြောင့်ရှည်သွယ်သောခြေတံရှည်တို့ရှိ၏။ သူကနက်မှောင်ထူထဲတဲ့ဆံသားတို့ကို ဂျယ်နဲ့အတူအနောက်ဘက်သို့တည်ကြည်ခန့်ညားစွာသပ်တင်ထားပြီး စူးရှရှည်လျားသောမျက်ဝန်းတွေကတော့နက်ရှိုင်းတောက်ပပေမယ့်လို့အေးစက်စက်အငွေ့အသက်တို့ဖြာထွက်လို့နေလျက်။

သူ၏နှုတ်ခမ်းလွှာတို့ကိုတင်းတင်းစေ့ပိတ်ထားတာကြောင့်ကကြီးပုံရေးရေးလေးကွေးနေပြီး လှပသောနှုတ်ခမ်းတစ်လွှာကိုပိုင်ဆိုင်ထားသည့်အပြင်ပေါ်လွင်ဖြောင့်စင်းတဲ့နှာတံနဲ့ တစောက်မတ်မတ်တက်နေတဲ့ပိတုန်းရောင်မျက်ခုံးသားတို့ကြောင့် တည်ငြိမ်ရင့်ကျက်ခြင်းတို့နဲ့အတူ တော်ဝင်ဆန်ပြီးထည်ဝါသည့်အလင်းရောင်တို့ကထိုလူငယ်လေးလမ်းလျှောက်လာသည့်ခြေလှမ်းတိုင်း၌လင်းထင်းစွာဖြာထွက်တောက်ပနေ၏။