_____________________
بقولوا الضامنك بجهلك ، و دا الحاصل معاي ، راشد ضامن اني مهما عمل معاي و مهما ظلمني و مهما ما شاورني في حاجه ما حـ أزعل منو و ما حـ اتجادل معاهو ، يمكن سكوتي هو الخلى حقوقي تنهضم ، في الوقت الأنا مظلومه فيهو كلهم شايفين ظالمه! ...خطافة راجل و وسخه زي ما بتقول علي حبوبه .....طيب انا بشر يخوانا ، عندي مشاعر عندي طموحات و راشد كان واحد من الطموحات دي من لمن كنت صغيره في احساس جواي إتكون اتجاهو ، كبرت و الإحساس دا كبر جواي و تقريباً معظمهم عارفين راشد بالنسبه لي شنو ، انا أول وحده حبتو و انا أكتر وحده احترمتو و ما كنت بناقشو في حاجه ، لمن عرس مها ماف زول جا سأل مني ماف زول جا واساني و قال لي انتي بتستاهليهو أكتر منها ، ربنا وحدو عالم بالأيام و الليالي المرت علي من يوم عرسو لغاية اللحظه دي ، وصلت لـ مرحله إني بقيت بدعي إني أموت و ارتاح من وجع القلب دا ، أكتر حاجه صعبه و مميته الحب البكون من طرف واحد و الأصعب انو البتحبو دا ما يكون عارف انت شايل ليهو شنو جواك و بتنظر ليهو من أي زاويه ، راشد بالنسبه لي حاجه عظيمه شديد و دائماً كنت بدعي انو يكون من نصيبي ، بس لمن عرس مها حطمني و دمرني على الآخر مع ذلك انا ما عاديتها ما حاولت اقرب منو تاني و بيتهم ذاتو بقيت ما بجيهو ، قعدت في بيتنا و إنطويت على نفسي و حتى ناس إسراء بقيت ما بمشي ليهم بس لسه كان جواي بصيص أمل صغير بطمني انو ممكن تحصل حاجه تغير حياتي 180 درجه و فعلاً دا الحصل ، لمن أبوي قال لي إنو راشد طالب يدك لو ما خجلت من أبوي في نفس اللحظه كنت وافقت لأني ما مشيت ليهو هو الجاني ولأنو اساساً في مشاكل بينو و بين مها فما كنت شايفه سبب يمنعني من الموافقه خاصة إنو راشد بخصني أنا ما مها ، بعد أسبوع قلت لأبوي موافقه و انا لغاية اللحظه دي ما فاهمه راشد ليه فجأه كدا قرر يعرسني ، لحدي يوم العرس كنت مبسوطه و طايره من الفرح رغم الكلام الجانبي البسمعو بس ما اشتغلت بزول بس فرحتي دي كلها اتلاشت لمن في يوم العقد كان راشد بسأل من مها!!! انا ما قدرت افهم راشد دا تصنيفو شنو! ما راعى لي أنا و حسسني كأني الجبرتو علي و ما احترم اني قاعده جنبو من غير خجله بقى يسأل عن مها قدامي ، قلت عادي ما مشكله المهم انو حيكون حقي و حأكمل باقي عمري معاهو، طمنت قلبي بالكلام دا و اتفائلت بالخير بس خاب ظني بعد العرس ، يمكن انا أول عروس يعقدو عليها و راجلها يخليها مع أمو و يمشي يشوف شغلو أو مرتو القديمه! حسيت بالرخصه و بالذله و عدم الإحترام بس عمتي إشراقه اقنعتني إنو مها عملت ليهو حاجه ، في البدايه صدقت كلامها بس مع الأيام اتأكدت إنو راشد عندو ليها حاجه و هو من عندو بتصرف كدا من غير ما يأثر عليهو أي زول، هو الما شايفني، هو الما مقدرني، هو الما بحبني 💔
بكيت و شكيت كتير لـ أمي و كل مره بتقول لي اعملي و اعملي و اعملي بس ماف شي نفع معاهو ، بس اليوم لأول مره احس إني مرتو! في البدايه زعلت شديد لمن قال لي ما تمشي بس ما جادلتو قلت ليهو طيب و كنت حـ ادخل بس هو وقفني و قال لي تعالي أوصلك ، فرحت شديد من جوه قلبي، لأول مره أحسو مهتم بي لأول مره يعمل حاجه عشاني ، لمن وصلنا بيت ناس أمي هو ذاتو نزل معاي لمن استغربت بس بالجد انبسطت ، دخلنا سلمنا عليهم و قعدنا نتونس معاهم في الحوش لغاية ما بعد العشا حتى رجعنا البيت ، قلت ليهو راشد عايزا اسألك ، قال لي اسألي ، قلت ليهو انت عرستني ليه؟
اتنهد و قال لي عارف اهمالي و تقصيري في حقك هو سبب سؤالك دا بس بإذن الله ما حـ أظلمك معاي ، قلت ليهو انا ما قادره اتخيل شكل حياتنا حيكون كيف لأنو لغاية اللحظه ما حسستني إني مرتك لغاية اللحظه نحنا ما بنتعامل زي أي زوج و زوجتو! ....أخد نفس عميق و قال لي الفتره دي انا مضغوط شديد و في حاجه في بالي محتاج فتره عشان انفذها و أخلص شغلي بعدها حـ اتفرغ لـ حياتي الزوجيه و افكر في المستقبل ، قلت ليهو دامها فتره محدده ما عندي مشكله حـ انتظرك ، قعد معاي مسافه و بعدها طلع و انا لأول مره أحسو أنصفني 💜
