နှာတရှုံ့ရှုံ့ဖြစ်နေသောဂျောင်ကုကို ဘေးနားကအဘိုးအိုက သတင်းစာဖတ်နေရင်းလှည့်ကြည့်လာသည်။
ဂျောင်ကုကတော့ အပြင်ဘက်ကိုငေးနေသည်မို့ သူ့ကိုကြည့်နေမှန်း သတိမထားမိ။
" ဘယ်ကလဲ လူလေး "
အီတလီသံခပ်ဝဲဝဲနှင့်အင်္ဂလိပ်လိုမေးလာသော အဘိုးအိုကို ဂျောင်ကုလှည့်ကြည့်ကာ အရင်ဆုံးပြုံးပြလိုက်သည်။
" ကိုရီးယား ...တောင်ကိုရီယားကပါ "
အဘိုးအိုက ခေါင်းတငြိမ့်ငြိမ့်လုပ်နေပြီး ဂျောင်ကုကတော့ စကားဆက်ပြောရမလား၊ဘာဆက်လုပ်ရမလဲ မသိဘဲ ကြောင်စီစီပြုံးကာသာ ကြည့်နေသည်။ရထားဘူတာရုံအရှေ့ ဘတ််စ်ကားရောက်ခါနီးပြီမို့ တကြွကြွလုပ်နေသော ဂျောင်ကုကိုကြည့်ကာ သူဒီမှတ်တိုင်တွင် ဆင်းရတော့မည်မှန်း အဘိုးအို သိလိုက်သည်။
" ဒီမှတ်တိုင်မှာဆင်းရမယ်ထင်တယ် ... "
" ဟုတ်ပါတယ် "
ထိုင်ခုံဘေးချထားသော အထုပ်တစ်ထုပ်အားယူပြီးလက်ထဲပိုက်ကာ ကားပေါ်ကဆင်းရန် အသင့်ဖြစ်နေသော ဂျောင်ကုအား အဘိုးအိုက တစ်ဖန်စိုက်ကြည့်နေပြန်သည်။ထိုကဲ့သို့ကြည့်နေမှန်း သတိထားမိသည့် ဂျောင်ကုက တွန့်ဆုတ်ဆုတ်ဖြင့် အဘိုးအိုထံလှည့်ကြည့်သည်။နှာစီးနေသလိုခံစားရနေသည်မို့ နှာတရှုံ့ရှုံ့ဖြစ်နေသေးသည့် ဂျောင်ကုအား အဘိုးအိုက တစ်ခုခုပြောချင်နေသလိုလို မေးချင်နေသလိုလိုပုံပေါ်နေသည်။
" အခု တရုတ်နိုင်ငံ ဝူဟန်မြို့က ပျံ့လာတဲ့ရောဂါပိုးက ကြောက်စရာကောင်းတယ် ... သတိထားအုံး "
ဂျောင်ကု ဘာပြောရမှန်းမသိတော့ဘဲ ပြူးကြောင်ကြောင်သာကြည့်နေမိသည်။ဘတ်စ်ရပ်သွားတော့မှပဲ အဘိုးအိုကို ပြုံးပြ၍ ခေါင်းငြိမ့်ပြကာ ကားပေါ်ကနေ မြန်မြန်ဆင်းလာခဲ့သည်။
ထိုရောဂါပိုးပျံ့နေကြောင်း၊တစ်ချို့နိုင်ငံတွေမှာလည်း ထိုရောဂါပိုးကူးစက်ခံရသူတွေတွေ့နေရကြောင်းကို ဂျောင်ကု သိတော့သိသည်။လူတွေ အချိန်ခဏလေးမှာပဲ သေဆုံးသွားကြခြင်းကြောင့် ထိုရောဂါပိုးကြီး ကမ္ဘာအနှံ့ပျံ့သွားမည်ကိုလည်း ဂျောင်ကု စိုးရိမ်နေသည်။အခုတော့ ထိုအဘိုးအို၏အပြောကြောင့် ဂျောင်ကု စိတ်ထဲ ခိုးလိုးခုလုဖြစ်ကုန်တော့သည်။အခုသွားမည့် အီတလီ မီလန်မြို့မှ ဆွစ်ဇာလန် ဇူရက်မြို့သို့ သွားမည့် ခရီးစဥ်ကို ပျော်ပျော်ပါးပါးသွားဖို့ကိုပင် ဂျောင်ကုမရဲတော့ပေ။ဒါပေမဲ့လည်း ဆိုးဆိုးရွားရွားကြီး ဖြစ်လာမည်မဟုတ်၊ အလွန်ဆုံးကြာ ငါးလ လောက်ပေါ့ဟု ခပ်ပေါပေါ့တွေးကာ စိတ်ထဲက လေးပင်မှုတွေကို ဖြေလျှော့လိုက်သည်။
ВИ ЧИТАЄТЕ
One Step Closer • jinkook ( Eden Contest )
Фанфіки• Kim SeokJin ♡ Jeon Jung Guk • (Eden Contest - Harmless World)
