One Step Closer • jinkook ( Eden Contest )

2

[Unicode]

အမှတ်မထင် တွေ့ခဲ့သည့် ထိုလူနှင့် တစ်ရက်တာ အတူတူအချိန်ကုန်ဆုံးခဲ့သည့် အမှတ်တရဟာ ဂျောင်ကု၏ အခက်ခဲဆုံးအချိန်တွေအတွက် စိတ်ဖြေသိမ့်စရာ ရုပ်ရှင်ကားတစ်ခုလိုဖြစ်ပေးသည်။ဇန်နဝါရီ လအစကတည်းက ကိုယ့်အမိမြေမှာလည်း ထိုဗိုင်းရပ်စ် စတင်ဝင်ရောက်လာပြီဟု နားစွန်းနားဖျားကြားနေခဲ့သော်လည်း သေဆုံးသူတွေ ဆယ်ယောက်မပြည့်ခဲ့။
သိပ်ဆိုးရွားလာပြီး လူတွေအသက်တွေကို နုတ်ယူသွားနိုင်မည်မဟုတ်ဟု ဂျောင်ကုခပ်ပေါ့ပေါ့တွေးခဲ့သည်။ထိုအရာဟာ သိပ်မှားခဲ့သည်။ဇန်နဝါရီ ၂ဝ ကစလို့ ဗိုင်းရပ်စ် ပျံ့နေပြီဟု ကြေညာပြီးသည့်နေ့ကစ၍ လူတွေရဲ့ အသက်တွေကို နုတ်ယူရတာ မကျေနပ်နိုင်သည့် ထိုဗိုင်းရပ်စ်ဟာ လူတွေရဲ့ အနာဂတ်တွေကို အမှောင်ထုထဲ တွန်းပို့သည်။အသက်ရှင်ကျန်ရစ်နေသူတွေကို ရှင်လျက်နဲ့မသေရုံတမယ် နှိပ်စက်နေခဲ့သည်။
အလွန်ဆုံးငါးလ လို့ သူတွေးခဲ့သည်ကို အခုချိန် သူကိုယ်တိုင် ကြောက်စိတ်များနှင့် ပြန်လှောင်ရယ်မိသည်။

ကိုဗစ်ပိုးဟာ လေထုထဲပျော်မွေ့နေသလောက် လူတွေကတော့ ​အသက်ရှူဖို့ကိုပင် ကြောက်သည်အထိ ကြောက်လန့်ခြင်းတွေပွေ့ပိုက်ကာ ဖြတ်သန်းနေခဲ့သည်မှာ တစ်နှစ်ကျော်ခဲ့ပြီဖြစ်သည်။ထောင်ချီသော အသက်တွေကို နုတ်ယူရတာကို မတင်းတိမ်နိုင်သေးသည့် ကိုရိုနာဗိုင်းရပ်စ်ကြီးဟာ ၂၀၂၀ သြဂုတ်လလောက်တွင် တစ်ဖန် ဒုတိယလှိုင်းအနေဖြင့် ပြန်အသက်ဝင်လာခဲ့သည်။

ကျောင်းတက်ရလို့ အနာဂတ်လမ်းကအလင်းရောင်ကို မြင်နေရပြီဟူ၍ ပျော်နေသည့်ကလေးတွေ၏ မျှော်လင့်ချက်တွေအားလုံးကို ချိုးဖျက်ခဲ့သည်။
ကုမ္ပဏီတွေ၊တစ်ခြားသောကိုယ်ပိုင်လုပ်ငန်း၊တစ်နေ့လုပ်တစ်နေ့စား သမားတွေ၏ မျှော်လင့်ချက်ယဲ့ယဲ့လေးတွေကို အပြင်းထန်ဆုံးရိုက်ချက်များနှင့် ပယ်ဖျက်စေခဲ့သည်။ကမ္ဘာကြီးတစ်ခုလုံး တိတ်ဆိတ်ငြိမ်သက်သွားပြီး ပိုဆိုးရွားသော ဝေဒနာတွေ ဆုံးရှုံးမှုတွေကို ခံစားခဲ့ရသည်။တိတ်သက်နေခဲ့သည့် ကမ္ဘာကြီးမှာ လူတွေ၏ ရှိုက်ငိုသံတွေ၊နာကျည်းချက်တွေဟာ မီးခိုးငွေ့တွေအလား ဖုံးလွှမ်းကာ ကမ္ဘာကြီးရဲ့ သဘာဝအလှပတွေကို မှေးမှိန်စေခဲ့သည်။