حواديت روان أحمد«نِجُوم»♥️✨

2 - حدوتة حرامى القهوة

#حدوتة_حرامى_القهوة

- تعرف أنك حرامي !
بصلي و أبتسم بسخرية
- عشان سرقت قلبك صح !
- قلب أية و أقرف ايه سرقت القهوة بتاعتي اللى حسين بيعملها .
حمحم بحرج و هو بيبص للناس اللى بدأت تبُص علينا
- يا أنسة وطي صوتك عيب كدا قهوة أية !
بصيتله بنرفزة من بروده و لا كأنه شرب القهوة اللى حسين عملهالى مثلًا !
- اللى أنت بتطفحها دي بقولك أية أنا عايزة قهوتى !
- طيب خلاص أقعدى و هطلبلك قهوة تانية !
ربعت أيدي قدامى و قولت
- ما حسين مِشي و أنا عايزة أشرب القهوة أعمل أية أنا دلوقتى لازم تطافس و تشربها !
ضحك و هو بيتريق على كلامى
- أطفس ! طيب يا ستى أنا هجبلك قهوة بكرة من اللى حسين بيعملها على حسابي خلاص!
رفعت حاجبي و قولتله بنصاحتى المُعتادة طبعًا
- و أنا أضمن منين أنك تيجي بكرة !
- لا يا ستى جاى، مُمكن أمشي بقا عشان عندى شغل ؟
قبل ما يكمل جملته كُنت مشيت من قدامه عشان أروح
_________________

دخلت البلكونة الساعة 2 بليل و أنا مشغلة أغنية الجو هادى خالص و الدنيا هُس هُس و مندمجة و بشرب قهوتى و يخرابي عالروقان
- جو أية اللى هادى هادي أنا عايزة أنام !
بصيت بصدمة لقيته هو الحقير اللى قابلته فى الكافية الصبح هو كل شوية أشوفه !
- أنت تانى !
- يا رب صبرني يعنى يا أنسة أحرجتينى الصبح فى الكافية و خلتينى أتأخر عن شغلى و كمان مش عارف أنام بذمتك دا يرضي مين !
- يرضيني أنا و بعدين أنا بحب أقعد أسمع اغانى الساعة 2 بليل مش عاجبك و الله الباب يفوت جمل .
- هو بيتك أبوكى دا بيتى و من حقى كجار مش عايز أزعاج بليل !
بصيت بصدمة من وقحته و قولت بغيظ
- و لا أنا سكتالك من الصبح تعرف تسيبنى أركز فى مذاكرتى !
- حد يذاكر الساعة اتنين بليل و كمان على أغنية عبيطة زي دي !
- و أنت مالك !
- تصدقى أنا غلطان أن بتكلم معاكِ أنا جاى أشتكى لأبوكى على اللى بتعمليه كل شوية .
كُنت فكراه بيهزر فقولت بسذاجة طفلة فى تانية ابتدائي
- قوله أديك رقمه يا عسل !
رفع حاجبه و هو بيتريق - عسل!، بقا كدا طيب .
لقيت بالفعل دخل و شكله جاى على أبويا يا نهار أحوس، أنا منى لله لا لا أنا لازم أشغل دماغى أبتسمت بمكر و أنا بخطط لشىء دخلت بسرعة و جبت جردل ماية بتاعت الغسيل و أول ما لمحته مِعدى لباب عمارتنا دلقت جردل الماية و جريت
دخلت و أنا فى قمة أنشكاحى و عمالة أغنى اللى قادرة على التحدى و على المواجهة و عافية ذوووق و إذا بباب الشقة بيخبط و بابا بيروح عشان يفتح و جملة سلم على الشهدا اللى معاك سلم على كُل اللى هناك هى اللى بتتردد فى ودنى الله يرحمنى كُنت عبيطة .
- نعم يا أستاذ حد يخبط الساعة 2 الفجر بالشكل دا !
عملت نفسي لسه صاحبة و دخلت و أنا بزعق
- أية الاستهتار دا حد يستحمى بهدومه يا بابا دا باينه مجنون و الله شايف حد يستحمة بهدومه يا بابا يا حبيبي
بصلي بغيظ و تجاهل كلامى و قال لبابا
- أزي حضرتك يا عمى أنا عُمر
وقبل ما يكمل جملته قفلت الباب فى وشه و أنا بقوله
- معندناش بنات للجواز .
بابا بصلى بأستغراب و هو بيضرب كف بالتاني
- جواز أية و عبط أية دا باينه مجنون فعلًا زي ما قولتى يا تقى .
أبتسمت بفرحة أنه معرفش يحكى لبابا حاجة و مثلت دور البريئة
- أعملك شاى يا بابا يا حبيب قلبى !
- لا أنا داخل أنام كفاية المجنون اللى قلق منامى روحى نامى يا حبيبتى .
دخلت الأوضة و أنا عمالة أرقص بفرحة كبيرة أبويا معرفش حاجة و بالتالى عرف أنه مجنون و مش هيصدق كلامه و جرت الأمور كما خططت لها .
- قسمًا عظمًا لولا أنك بنت كُنت عرفتك مقامك .
- يلا يا مجنون ياللى بتستحمى بهدومك يا مجنون .
لسه كان هيرد قفلت باب البلكونة بسرعة و أنا منشكحة أقسم بالله دماغى دي قمر ياريت كانت تنفع فى المذاكرة .
________________________