Cāi Cāi || ချိုက်ချိုက် || [ မြန်မာဘာသာပြန်] (Completed)

Chapter (37)

-- "တေးဂီတပြဇာတ်ရုံဌာနက အဆင့်ခုနစ်ချီကျိ၊ ၅၈.၅ ကီလိုဂရမ်!"

ဤစာသင်နှစ်၌လည်း ချီကျိသည် ကိုယ်အလေးချိန် "ထူးထူးခြားခြား စွမ်းဆောင်မှု" ဖြင့် ကျောင်းဝင်းအတွင်း အောင်ပွဲခံခဲ့ပြန်သည်။

သူမ၏ကိုယ်အလေးချိန်သည် သာမန်လူများနှင့်ယှဥ်ပါက အနည်းငယ်အဆင်ပြေသည်ဟု ယူဆနိုင်သော်လည်း အကကျောင်းတွင်တော့ အလွန်စွဲမက်ဖွယ်ကောင်းလွန်းလှသည်။

တီချယ်ချူပင်းက "ကျင်းချီကျိရေ. . . တီချယ်တို့ဌာနက တစ်ခြားဌာနတွေလို ကိုယ်အလေးချိန်မကန့်သတ်ထားပေမယ့် မင်းကတော့ ကိုယ်စားသောက်တာကို ကန့်သတ်လို့ရတယ်လေ..."

ခါတိုင်းလိုပဲ ချီကျိကတော့ ကောင်းကောင်းမွန်မွန် ကတိတွေတသီကြီးပေးခဲ့ပြီး တစ်ဖက်လှည့်လိုက်သည်နှင့် သူမကတိပေးခဲ့သည်များကို ပြန်မေ့သွားတော့သည်။

သူမ၏ကိုယ်အလေးချိန်ကို တိုင်းတာပြီးနောက် ရှန်းချိုက်ကိုရှာတွေ့သွား၏။

သူမသည် ဤနွေဦးပွဲတော်အတွင်း အလွန်ခံစားခဲ့ရပြီး သူမ၏ဝမ်းနည်းပူဆွေးမှုများကို အစာစားချင်စိတ်အဖြစ်သာ ပြောင်းလဲနိုင်ခဲ့သည်။ သူမတစ်ကယ်မေးချင်နေမိသည်မှာ အွန်လိုင်းပေါ်ကချစ်သူကောင်မလေးကို ဘယ်လိုများရှာတွေ့သွားတာလဲဟုပင်။

ရုပ်ပိုင်းဆိုင်ရာစစ်ဆေးမှုပြီးနောက် ရှန်းချိုက်သည် ယခင်ကထက် အနည်းငယ်ပို၍ပြည့်လာပြီး သူ့မျက်နှာလေးသည် ပိုမိုဝိုင်းစက်လာသည်။ သူ၏တစ်နေ့တာလေ့ကျင့်ခန်းပမာဏကလည်း အရင်ကထက် အများကြီး လျော့နည်းသွားသည့်အပြင် ကံကောင်းထောက်မစွာဖြင့် သူသည် အလွယ်တကူကိုယ်အလေးချိန်မတက်နိုင်သောကြောင့် သူ့အလေးချိန်သည် ကျိုးကြောင်းဆီလျော်သောအတိုင်းအတာအတွင်း ရှိနေသေးသည်။

"ဂုဏ်ယူပါတယ်" ရုပ်ပိုင်းဆိုင်ရာ စစ်ဆေးရေးဆရာမက ပြောလာသည်။ " ပြီးခဲ့တဲ့စာသင်နှစ်ကထက် ၂စင်တီမီတာ ပိုမြင့်လာတယ်နော် "

ရှန်းချိုက်သည် သူ၏ သေးငယ်သော လက်ကောက်ဝတ်များကိုငုံ့ကြည့်လိုက်ကာ သူ့ဘယ်ဘက်လက်ကောက်ဝတ်ကို ညာဘက်လက်ဖြင့် မသိစိတ်က ဆုပ်ကိုင်ထားမိသည်။