****
" 6435 "
လျှို့၀ှက်ဖုန်းထဲ၀င်ရောက်လာသည့် နံပါတ်တစ်ခုအား ဟန်နရီက ခဏတာမျှစူးစိုက်ကြည့်ရင်း သူ့ရုံးခန်းထဲမှ ထွက်ခွာဖို့ဟန်ပြင်လိုက်၏။
" ဘယ်သွားမလို့လဲ သားကြီး "
အလုပ်ရောက်တာမကြာသေးသော်လည်း ဟန်နရီက ပြန်လည်ထွက်ခွာဖို့ပြင်နေတာကြောင့် သုတကနားမလည်စွာမေးလိုက်ခြင်းဖြစ်သည်။
" အရေးကြီးကိစ္စလေးပေါ်လာလို့ကွာ ဒီနေ့ငါအလုပ်ပြန်လာဖြစ်တော့မယ်မထင်ဘူး အရေးကြီးကိစ္စရှိရင် ငါ့ကိုဖုန်းဆက်လိုက် "
ဟန်နရီက အကြောင်းပြချက်ရေရေရာရာမပေးပဲ ထွက်ခွာသွားတာမို့ သုတကအီလည်လည်ဖြင့်သာကျန်ခဲ့၏။ဟန်နရီရဲ့မျက်နှာက တစ်စုံတစ်ခုအပေါ်အာရုံစူးစိုက်နေသည့်အနေအထားမှာရှိပြီး အဆောက်အဦးတစ်ခုဆီသို့ ခရီးဆက်သွားတာဖြစ်သည်။
.
.
.
.
" Boss "
ကားထဲမှ အလိုမကျစွာဆင်းလာသည့်ဟန်နရီကိုမြင်သည်နှင့်
အနောက်တိုင်း၀တ်စုံပြည့်၀တ်ဆင်ထားသည့် လူလေးယောက်လောက်က ပြာပြာသလဲဖြင့် ထွက်ကြိုကြသည်။
" သူရောက်နေပြီလား "
" ဟုတ်ကဲ့Boss အထဲမှာနေရာယူခိုင်းထားပါတယ် "
ဟန်နရီက အနည်းငယ်ရွဲ့စောင်းနေသော သူ့အင်္ကျီကော်လံကို သေသပ်စွာပြန်တည့်ကာ အသက်၀၀ရှုလိုက်၏။ဟီရို၏ မိတ်ဆွေတစ်ယောက်နှင့် လုပ်ငန်းသဘောတူ စာချုပ်ချုပ်ဆိုရတာ သူ့အတွက်မပြောပလောက်သော်လည်း လက်ရှိတွင်ဟီရိုဗစ်တာ၏စောင့်ကြည့်ခြင်းကို ခံနေရသည့်အချိန်ကာလသာရှိသေးတာမို့ အလုပ်အပေါ်ပြတ်သားစွာလုပ်တတ်ရမှာဖြစ်သည်။ဟန်နရီဗစ်တာ၏ဗီဇက ဗစ်တာမျိုးရိုးထဲတွင် အထက်မြတ်ဆုံးဟူသောဂုဏ်ပုဒ်ကို ဟီရိုထံမှ အသိမှတ်ပြုခံချင်သေးတာကြောင့် သူ့အနေဖြင့် တစ်စုံတစ်ရာလွဲချော်သွားလို့မရပေ။
" တွေ့ရတာ၀မ်းသာပါတယ် အန်ကယ် "
ဟန်နရီက သူ့ရုံးခန်းထဲတွင်စောင့်နေသော လူတစ်ယောက်အား လက်ဆွဲနှုတ်ဆက်ကာ အစပြုလိုက်၏။
" မင်းက ဗစ်တာပဲဖြစ်မယ်ထင်တယ် "
" အန်ကယ့်အထင်က မလွဲမှားနေတာတော့ ၀မ်းသာစရာပဲ"
