ရည်းစားဟောင်းက ငါ့ကိုမျက်စိကျနေပြန်ပြီ (ဘာသာပြန်)

52

လေးထပ်၊ သုံးထပ်၊ နှစ်ထပ်.....

ရန်ကျားလိသည် မိမိ၏ ရင်ဘတ်ထဲတွင် နှလုံးသားက အပြင်းအထန် ခုန်ပေါက် လှုပ်ရှားနေသည်ကို ခံစားနေရသည်။

ဤအဆောက်အအုံကသာ ထွက်နိုင်လျှင် သူသည်လည်း စိတ်လွတ်ကိုယ်လွတ်နှင့် ပြေးသွားနိုင်တော့မည်ဖြစ်သည်။

ထို့နောက် ရပ်ကွက်ငယ်လေးက ပြေးထွက်လာပြီး မိမိအား လာကြိုသည့် ကားပေါ်သာ တက်သွားနိုင်မည်ဆိုလျှင် ကားတံခါး ပိတ်သည်နှင့် ယဲ့ထင်ဆိုသူလည်း တာ့တာပဲ!

အဆောက်အအုံ အပေါက်ဝနှင့် နီးလာလေလေ၊ ရန်ကျားလိ၏ နှလုံးခုန်သံမှာလည်း မြန်ဆန်လာလေလေ ဖြစ်နေသည်ဟုသာ ခံစားနေရသည်။ လွတ်လပ်မှုကို အလွန်အမင်း တောင့်တနေခြင်းသည် အာနိသင် အရှိဆုံး စိတ်ကြွဆေး၏ ထိုးနှက်ချက်နှင့် တူ၏။ ထို ထိုးဆွချက်ကြောင့် သူ၏ မျက်လုံးအစုံမှာ တဖျက်ဖျက် လင်းလက်လာပြီး တစ်ကိုယ်လုံးရှိ ကြွက်သားစိုင်များမှာလည်း တင်းကျုံ့သွားကာ သွေးများပါ ပွက်ပွက်ဆူလာလေ၏။

ဒုတိယထပ်၏ လှေကားအကွေ့ကို ကျော်ဖြတ်ပြီးသောအခါ သူတစ်ချက် မော့ကြည့်သည်နှင့် အဆောက်အအုံ အဝင်ဝမှ အလင်းရောင်ကိုပင် မြင်နေရပြီဖြစ်သည်။

သူသည် အသက်အောင့်ထားပြီး ခြေလှမ်းများကိုသာ အရှိန်တင်လိုက်သည်။

လှေကားဆုံးသွားသည့် တစ်နေရာအရောက် ရန်ကျားလိ ခြေချလိုက်သည့် အချိန်တွင် မူလက တိတ်ဆိတ်နေသော စင်္ကြန်လမ်းမှာ ရုတ်တရက် မီးခြစ်ကို နှိပ်ချလိုက်သည့် အသံတစ်သံ ထွက်ပေါ်လာ၏။

မှောင်မိုက်သော ညဥ့်နက်ကြားတွင် မီးလျှံတစ်ပွင့် ထွန်းတောက်လာပြီး လောင်ကျွမ်းသွားသော စီးကရက်မီးတိုမှာလည်း နီကြင်ကြင် ဖြစ်နေ၏။

ထိုအခိုက်မှာပင် စင်္ကြန်လမ်းမှ မီးလုံးများ ပွင့်လာကာ ပတ်ဝန်းကျင်မှာ တစ်မုဟုတ်ချင်း လင်းလက်သွားပြီး ထိန်ထိန်သာနေတော့သည်။ ရန်ကျားလိသည် အသက်ရှူကျပ်သွားပြီး မသိစိတ်၏ စေ့ဆော်မှုအရ မျက်လုံးများကို ကာထားမိလိုက်သည်။

ယဲ့ထင်သည် လက်ချောင်းများကြားတွင် စီးကရက် တစ်လိပ်ကို ကိုင်ထားပြီး အဆောက်အအုံ အဝင်ဝရှိ နံရံကို မှီကာ ရပ်နေသည်။ ခန္ဓာကိုယ်ပေါ်တွင် နေ့လည်က ဝတ်ဆင်ထားသော အနက်ရောင် အင်္ကျီနှင့် ဘောင်းဘီရှည်ကို ဝတ်ဆင်ထားဆဲဖြစ်ပြီး မျက်ခုံးတန်းမှာ ထင်ထင်ရှားရှား ကွေးညွတ်နေပြီး မျက်ဝန်းတစ်စုံသည်လည်း ပင်လယ်ကဲ့သို့ နက်ရှိုင်းနေ၏။