ADDAN iti aringgawis dagiti kawayan ti raya ti init ngem saan pay laeng a nakaluto iti pammigat ni kumarek a Marvina, maysa a nagsardengen a maestra a kaarrubami. Ginagarak a sinarungkaran iti balayda. Agsingsingir ngaminen ti kompania a nakautangak iti telebision a hulugan ket adu unayen ti patongnan ken dandani payen a maguyod, kasapulanen a saan agbayag a mabayadak. Naisem a pinasangbaynak ti kumadrek ngem saan a nailinged ti kellaat a reaksionna.
Nagdaydawayak. Diak ammo no apay a dinamagko nga umuna ti sidaenda pangal-alaak iti tiempo a mangipasig iti gagarak ta saan met a nakababain unay. Ibagakto lattan nga adda sakit ti anakna iti buniag ta pautangannak. Payless a binettakanna iti itlog a nalaokan iti tallo kalep-ak a bulong ti marunggay ti madama a lutlutuenna, nakadasaren ti naiprito a longganisa. Inyawisna ti panagpasarmi. Nairana nga awan ti asawana ta napan nakireunion. Pati ti kaduada a ni Rona, dati a kaayan-ayat ti misterko ket awan ta day off-na.
Iti ballaet ti panagngatingatko, inestoriak ti sayangguseng a nalabsak sakbay a nakadanonak iti balay da komadre. Ti panaggiddan da Rona ken ni Nelson, nga asawa ni Marvina, a nagluas. Bininsirko ti reaksion ti komadrek. Nagarko ti kidayna. No saannak laeng nga agmadmadaras simmardengnak a dimngeg pay a nabaybayag ti saritaanda. Atapek met nga adda relasionda. Ngem nabilbileg ti gagarak.
"Ti kinapudnona, mare, ipaspasigko kadin a, bareng no adda naidulinmo dita uray lima a ribu laeng. Masapulmi para iti tsek-up ti anakmo iti buniag," inyasugko. Ammok a dakes ti inubrak ngem ania ti maaramidak no isu laeng ti pakailawlawagan iti dakkel a parikutko. Saanko met kayat a maammuan manen ti lakayko nga adda sadiay Manila a naigastok ti inpaw-itna a bayad koma iti TV-mi aglalo ta agawid inton sumaruno a bakasionna. Delikado no masangpetanna nga awanen ti pinagrigatanna.
"Kasta kadi, mare? Madi pay lang limmaing iti saksakitenna? Agurayka ta leppasenta’t mangan sakto iyawat," madanagan a nangibakal ti imatangna iti bimmalkat a rupak.
Inyisemko ti panagyamanko ta saanna madlaw ti panagulbodko. Ti kinabaknang ti kumarek, baria laeng daytoy. Saanko masapul a makonsensia.
Apagwarsi ti buggomi, inyawatnan ti kuarta. Nakasamsam-it ti yamanko a nagpakada; ti dina ammo sadiay kompania ti tinurongko. Sakbayna, saanko a naigawidan ti ngiwatko nga inulit nga impadamag ti maipapan iti kaingungottna ken iti kaduada iti balay. Linapdak ti reaksionna, ta tingtingitingenna pay no pudno ti insawangko. Impariknak ti nauneg kampay a sennaayko. Kalpasanna, inyalikakakon ti parikutko ket uraynak la nakaanges a nasayaat idin ta kinunada a naipalpaskon ti utangko.
YOU ARE READING
MIMOSA
Short Storymaysa kadagiti kadawyan a nasaknap a parikut wenno pasamak a masarakan iti uneg ti timpuyog a mang-tignay iti rikna ken puso dagiti agbabasa.
