محاسن الصدف 💗

الحلقه 4

#الكاتبة_ژوژو_الطشهه

#محاسن_الصدف

#الحلقه_4

#لايك_قبل_ما_تقري👍🏻

{ديري متابعه لي إيميلي عشان مجرد ما أنزل الحلقه تطلعلك طوووول}

(طلب وليس أمر ياريت بدال الملصقات تعلقن بي تعليق تعطي فيه رأيك وتوقعاتك ع الحلقه ع الأقل سطرين مانبيش أكثر من هك لاكن نجي نبي نقرا التعليقات نلقاهن اغلبيتهن ملصقات نكتب بالساعات  وحلق طويلة يعني عطني حقي 🥺♥️)

*******
في الحلقه الي فاتت وقفت ع حدث دار بين محمد خديجه بعدها جبت بعد يومين ما حبيتش نحكيه في الحلقه الي فاتت لي سبب فلذلك ح نحكيه توا...

الساعه 10 في الليل خديجه كانت تسمع في محمد يحكي في الحديقة بعدها سكر المكالمه جاته
خديجه :رتاج خليها تكون سكرتيرتك
محمد أنصدم :رتاج ؟
خديجه : اي رتاج نفسها الي تخدم هنا بنت ماشاءالله عليها ذكيه وعندها خبرة مع إنه بطلت لعند ثانيه ثانوي بس مشاء الله كانت تجيب في امتياز بس الله غالب نصيبها المهم انا ننصحك بيها احترام وذكاء ح تفيدك واجد ياريت تفكر شويا والله تكون ساعدتها واجد لأنه خدمة البيوت والتنظيف والله ما تليق بي بنت كيفها والله لو نحكي عليها من توا للصبح مش ح نعطيها حقها من الي عاشاته مسكينه وهدا كله محافظه ع روحها وتاكل بالحلال واحترام وأدب
محمد تنهد بي استغراب وكان خاطره يعرف رتاج أكثر قصتها يعني جاء فضول يعرف قصتها من كلام خديجه قصتها بس رآه!!!
محمد :احم عمتي خديجه انتي غالية عليا واجد ولك معزه خاصه عندي وانتي مش اليوم نعرفوك لنا أكثر من 8 سنين وأنا واثق مدام قلتي هك معناها تمام خليني نفكر اليومين أهنا ونرد عليكي
خديجه بي فرحه :ربي يحفظك وليدي ويرزقك من عنده يا زينة الشباب
محمد ابتسم وحك حاجبه :تصبحي ع خير
ركب فوق لي داره وقعد يفكر في كلام خديجه بعدها جت بين عيونه صورة رتاج وهيا تبكي هيا لابسة خمار بس كانت واضحه وصوت عبرتها ينسمع بعدها جا بين عيونه طارق وهوا يحلف بالكبد تنهد بي غضب وقعد يحرك في ايديه في بعض بي توتر من حقارة طارق كان من قبل مش راضي عليه بس لما أخته وافقت ما حبش يدخل توا وجعاته أخته الي تحبه بس قال توا ولا بعدين يعني مزال خطيبها بس خير ما تزوجاته وعرفاته ع حقيقته!!
تنهد بي تعب ورقد بعد يوم طويل شغلل....
--------------
خلاص هدا الي صار في الحلقه 3 وحكيته بعدها جبت ...

بعد مرور يومين 🔥🔥🔥🔥🔥

الي صار في ه اليومين كيف ما متعودات ع طريقة سردي ح نختصرة لكن...

محمد لاهي شغله والايام هدي ضغط عليه واجد عشان متعاقد مع شركات جديدة يطلع الصبح يروح الليل...

رتاج ردت تشتغل في ه اليومين وخديجه ما باتش تحكيلها لعند تشوف رد محمد ورولا كانت طول الوقت تكشر عليه وتشوفلها بي نظرات حقد ورتاج كانت عاذرتها وفي نفس الوقت متجاهتلها...