Cāi Cāi || ချိုက်ချိုက် || [ မြန်မာဘာသာပြန်] (Completed)

Chapter (26)

အနည်းဆုံးတော့ သူသာသေသွားခဲ့ရင် တစ်ခြားသူတွေ သူ့ကိုသနားနေတာကိုလည်း သူမြင်ရမှာမဟုတ်တော့ဘူး။  လောင်းကစားစွဲနေတဲ့ သူ့မိဘတွေ ဘယ်ကိုထွက်ပြေးသွားကြတာလဲကို သိစရာမလိုတော့သလို သူ့ဆရာတွေနဲ့ အတန်းဖော်တွေကလည်း သူ့အတွက် ခဏလောက်တော့ ဝမ်းနည်းပေးကြမှာပေါ့! ကျန်ရှိနေတဲ့ သူ့ဘ၀အကြွေးအတွက်တော့ ရဲဦးလေးကြီးက ရှာဖွေဖော်ထုတ်ပေးလိမ့်မယ်။

ဒါပေမယ့် အခုသူက အသက်ရှင်နေသေးပြီး လေလေးတစ်ချက်မှုတ်လိုက်မိတာနဲ့ ကျကွဲနိုင်လောက်တဲ့ ကြွေပုလင်းလေးလို လူတိုင်းက ဂရုတစိုက် စောင့်ကြည့်နေကြ၏။

သူ သူ့ခြေချင်းဝတ်များကို လှည့်ကြည့်လိုက်သည်။

အကသမားတစ်ဦးအနေနှင့် သူသည် ခန္ဓာကိုယ်ရှိကြွက်သားတိုင်းနှင့် အရိုးတစ်လက်မချင်းစီတိုင်းကို အကျွမ်းတဝင်ရှိနေကာ ပြောင်းလွယ်ပြင်လွယ်ရှိသည့် ခြေဖဝါးများနှင့် လှပသောခြေလှမ်းများက သူ့ခန္ဓာကိုယ်ကို မည်သို့ပံ့ပိုးပေးနိုင်သည်အား သေချာနားလည်ထားလေသည်။

သို့သော် ယခုသူ့ခြေချင်းဝတ်မှာ အကန့်အသတ်ရှိနေရုံသာမက မိုးရွာသည့်နေ့တိုင်းလည်း နာကျင်နေသေးသည်။

သူသည် ရေသူမလေးနှင့်တူ၏။  ရေသူမလေးက မင်းသားလေးရဲ့အနမ်းတစ်ခုနဲ့ နိုးထဖို့စောင့်နေပေမယ့် အဲ့အချိန်အတွင်းမှာပဲ ဓားတွေနဲ့မှန်ကွဲစတွေအပေါ် လှဲအိပ်နေတုန်းပင်။

ရှန်းချိုက်သည် စကားတစ်ခွန်းမှမပြောဘဲ တိတ်တဆိတ်သာနေနေလျက် သူ့ခြေထောက်များကို စစ်ဆေးနေခဲ့သည်။

သူဘာစကားမှမပြောသော်လည်း  သမုဒ္ဒရာကြီး၏အခြားတစ်ဖက်ရှိ လူတစ်ယောက်ကတော့ တိတ်ဆိတ်စွာနှင့် စိတ်ရှည်ရှည်ပင် စောင့်ပေးနေခဲ့သည်။

ကောင်လေး၏အသက်ရှူသံမှာ တိမ်ဝင်နေပြီး စကားပြောလိုက်သည့်အချိန်တိုင်း ပျောက်ကွယ်သွားတော့မတတ် ဖြစ်နေသည်။

တစ်နည်းနည်းနှင့်တော့ ထန်ယီမင်က ကောင်လေးအတွက် စိုးရိမ်နေမိသည်။

သူတို့ အကြိမ်ကြိမ်စကားစမြည်ပြောဖူးပေမယ့် သူတို့၏စကားဝိုင်းများက အရမ်းမနက်နဲခဲ့ဘဲ လက်တွေ့ဘ၀အကြောင်းနှင့်ပတ်သတ်၍လည်း မရှိသလောက် ရှားလေသည်။ ထန်ယီမင်သည် သူ့ ID အား နှစ်ဖက်မြင်လောကနှင့် သုံးဖက်မြင်လောကအကြား သေချာစွာခွဲခြားထား၏။ သူသည် အလွန်တင်းကျပ်စွာ ကွယ်ဝှက်ထားပြီး အခြားသူများ၏ဘ၀အကြောင်းကိုလည်း စိတ်မဝင်စားချေ။