على جرف الذكريات

part 35

زهراء: لادخلونـي بينكم حلوو مشاكلكم بعيد عني انتو مينعرفلكم ساعه اصحاب ساعه اعداء ومن احد يحجي گبل تتفقون ثنينكم عليه

نور:  يلله يـاااابه لاتظلون تسولفون گوووموو ناكل
أنــــي جوعـانـههه

قصي: هو أنتي من شفتج وشفتيني جوعانه أم خشم هم عاد لو يبين بيج

گعدنـه نتعشا ومرتضى ينطنط ساعه
بحضني ساعه بحضن أمي وساعه
بحضن سيف كل لگمة بحضن واحد
خلصنا العشا شلت المواعين ذبيناها ع السنگ
ورجعنا نشتغل،،،

وقصي وسيف گامو يحسبون جماعتهم
منو يعزمون دگ جهاز أمي خالي حيدر
شوية وسدته امي بس حسيتها ضاجت

گتلها خير

گالت أم مرتضى بيها كورونا وحالتها خطرة
ورايده تحجي وي مرتضى بالتلفون بس تريد
تسمع صوته هزيت ايدي واندرت اكمل شغل
مرتضى شاف الكل سكت وصار هدوء هو هم
سكت وظل يتصفن بالوجوه،،،

بعدين راح بحضن سيف أباوعله يباوع
علينا بنضرات ضايعه وخايفه متت قهر
عليه للـ 1:30 بليل خلصت والكوشه
صارت جاهزة صعدت جبت ملابس من
سيف لقصي بدل ونامو هو وسيف وامي
هم نامت انـي بيوم ألي يبات يمنه قصي
مااصعد لغرفتي انام جوة يم أمـي خاف
يحتاج شـي،،،،

طبعاً علاقتـي ويـا بالبداية جانت علاقة
صداقه اكثر مـن ما مخطوبين،،،

جان هو يتعامل ويايه بكل بساطه وبدون
أي قيود عكسي تماماً جنت اتعامل ويا
بتحفظ ومتقيدة أكثر من مرة گال

_ ليش هيج تتصرفين ليش بعيده عني ومتكتمه عبالك صديقج مو مخطوبين وبينا عقد شرعي

بـس بعدين حاول يتقبل فكرة أنه تأذيت هواية ويحتاجلي وقت حتى أگدر أرجع أثق وأحب من جديد ومن وكتها قرر يكسبني بالبداية كصديقه وبمرور الأشهر  الصداقه تحولت وبديت أتأقلم واعيش أجواء الخطوبة،،،

كلما اعرف طبعه واتقرب منه كلما احس بالأمان بأسلوبه گدر يزرع بگلبي بذرة من الأمان والثقة وشوية شوية كبرها،،،

كان عباره عـن كتاب مفتوح دائماً يحجيلي على اطباعه اشياء يحبها اشياء ميحبها اشياء يفضلها بشريكة حياته واشياء يكرهها حتى بدون ماأسأله يحجي بـس من هو يسألني اجاوب على گد السؤال ومرات مااجاوب اگوله عوف هذا الموضوع ولاتحجي بي صح يضوج بـس يمشي الموضوع وميحجي بي مرة ثانيه ،

بيوم سألنـي

قـصي: انتي ليش متحجيلي عن نفسج اشياء تحبيها تكرهيها اشياء تضوجج انتي حتى من تضوجين تنعزلين متحاولين تشاركيني همومج وافراحج عكسي تماماً اني بكلشي مشاركج معقولة لليوم مگدرت ازرع بيج ولو شوية حب وامان واهتمام بعدج ماخذه نفس الأفكار الغلط عنـي؟