Cāi Cāi || ချိုက်ချိုက် || [ မြန်မာဘာသာပြန်] (Completed)

Chapter (18)

ဤနားကြပ်များသည် အင်္ဂလိပ်စာ၊ တေးဂီတနှင့် နံနက်ခင်းရေဒီယိုတို့ကိုနားထောင်ရန် သင့်တော်သော်လည်း နတ်ဘုရားကြီးဝမ်ချင်းယွမ်၏အသံကို နားထောင်ရန်တော့ မထိုက်တန်ဟု ရှန်းချိုက်ထင်မြင်မိသည်။

နားကြပ်တွင်ကပ်ထားလေသော တိပ်များကိုတွေ့လိုက်ရစဥ် ချီကျိတစ်ယောက် အနည်းငယ်ခံစားသွားရပြီး ​ " ငါ့မှာ နားကြပ်အပိုရှိတယ်၊ နင်အဲ့ဒါကို ယူထားလိုက်ပေါ့ " လို့ ပြောလိုက်၏။

"... အဲ့ဒါတွေက စျေးကြီးတယ်မလား?? " ချီကျိ၏ ဒေါ်လာထောင်ချီတန်သော Apple အမှတ်တံဆိပ်ဖုန်းကို ရှန်းချိုက်သတိရသွား၏။ 

"စျေးမကြီးပါဘူး၊ ဒါတွေက အော်ရဂျင်နယ်မဟုတ်ဘူးလေ. .   နှစ်ရာသုံးရာလောက်ပဲ ကျတာပါဟ "  ချီကျိကလည်း သူ့ကိုပေးမည်ဟုသာ အခိုင်အမာ ပြောနေခဲ့၏။

ကြင်နာတတ်သောသူမသည် ရှန်းချိုက်၏ ယွမ် ၈၀၀ တန်ဖုန်းလေးကို သူ့အဖေက ပို့ပေးထားမှန်းလည်း မသိခဲ့ပေ။ ဖုန်းကို ၂ နှစ်လောက်သုံးနိုင်ဖို့ အခိုင်အမာပြောထားရပြီး သူသည် တစ်လလျှင် ၁၉ ယွမ်ပြန်ပေးရ၏။

ရှန်းချိုက်သည် နားကြပ်ကို ချီကျိထံမှပင် ငှားယမ်း၏။ သူသည် ကျောင်း၌နေ၍ ကျောင်း၌စားသောက်ကာ သူ့ယူနီဖောင်းများနှင့် လေ့ကျင့်ရေးအ၀တ်အားလုံးသည် ကျောင်းမှပေးထားခြင်းဖြစ်သည်။ ထို့အပြင် သူ၏ကောင်းမွန်လှသော အမှတ်စာရင်းများကြောင့် ကျောင်းသည် သူ့အား ကျူရှင်ခမယူသည့်အပြင် တစ်လလျှင် ၈၃ ယွမ်နှုန်းဖြင့် ပညာသင်ဆုအဖြစ် တစ်နှစ်လျှင် ယွမ်၁၀၀၀ ပေး၏။ နောက်ထပ် သုံးလလောက်အကြာတွင် သူဖုန်းဖိုးကို အကုန်ပြန်ပေးနိုင်တော့မည်ဖြစ်သည်။

နားကြပ်ကိုလက်ခံလိုက်ပြီး ထောင့်တစ်နေရာကို တိတ်တိတ်လေးရှာလိုက်ကာ ကေဘယ်ကို သူ့ဖုန်းနှင့်ဂရုတစိုက် ချိတ်ဆက်လိုက်၏။

သူဆိုသည်မှာ ကမ္ဘာပေါ်ရှိ တစ်ကိုယ်ကောင်းအဆန်ဆုံး လူတစ်ယောက်လို့တောင် ထင်နေမိ၏။ ချီကျိကတော့ သူ့ကို အရမ်းကောင်းသည့်နားကြပ်များ ပေးခဲ့ရပြီး သူကတော့ ဤအစမ်းသရုပ်ပြအား သူမကိုတောင်မပြဘဲ တိတ်တဆိတ် ကြည့်နေမိသည်။ သို့သော် ယွမ်တာ့ပြောသည့် ဤအစမ်းသရုပ်ပြကို မျှဝေလို့မရဘူးဆိုသည်နှင့်သာ ကျိုးကြောင်းဆီလျှော်စွာဖြင့် သူ့ကိုယ်သူ နှစ်သိမ့်လိုက်၏။ ​