وصالك سهدي

الفصل الثاني

دخلت الغرفة خلف أفنان وأغلقت الباب كما قالت لها الأخيرة.. نزعت عنها الاسدال وهي تتجه لفراش أفنان تقذف عليه جسدها وهي تقول للتي تجلس أمامها بمرح :
- مالك يا ست فينو.. أدينا عبرنا المخاطر في نص الليل علشان عيونك.. .

ابتسمت أفنان بسمة لم تصل لعينيها وهي تقول :
- كنتي عايزة تعرفي مين الكراش!.. .

نفضت خلود ملامح المرح عنها ورمقتها باهتمام تومئ رأسها بنعم.. فتنهدت أفنان بصعوبة وعيناها قد اغرورقت بالدموع :
- الرزل.. اخوكي الرزل هو الكراش.. .

برقت خلود عينيها بصدمة لثوانٍ قبل أن تطلق صياح مذهول :
- بتهزززري... بتكلمي بجد يا أفنان.. .

تهدل كتفي أفنان وقد انسابت دموعها على وجنتيها بصمتٍ وصوتها يخرج بتحشروج:
- معرفش أزاي.. بس صدقيني الشعور دا بيقتلني من جوا.. .

كانت خلود تستمع لها بقلب يتراقص لحب صديقتها لأخيها كما يفعل.. ولكن هدأ بفتور بعد جملتها الأخيرة..
لم تفهم فحواها وتألمت لأخيها.. ولكنها يجب أن تدعم صديقتها ومعرفة ما مشكلتها.. احتوت كفها بين قبضتها وهي تقول بحنو :
- طيب ليه الشعور دا.. المفروض أن الحب مفيش زيه ينعش القلب ويخليه فرحان ومبسوط.. ليه حاسه وكأنه ذنب.. .

بلعت لعابها بصعوبة وهي تقول بتحشرج:
- لأني مش عايزة أكون النسخة التانية من ماما.. .

- بس فادي مش هيتجوز عليكي ولا هيرميكي أنتِ وبنتك في شقة صغيرة ويرميلك مصروف كل أول شهر.. فادي مش باباكي.. .

هزت رأسها عدة مرات توافقها على حديثها وقالت بعدما لعقت شفتيها :
- عارفة ومتأكدة أنه مش أشرف.. ولا عمره هيكون زيه.. بس أنا متلغبطة.. أنا بحب واحد معرفش هو بيحبني ولا لا.. معرفش نظرته ليا إيه غير أنه بيعتبرني أخته.. وليكن أنه بيحبني.. هيطلب ايدي من مين.. وهل يا ترى أشرف هيوافق ولا هيمارس عليا دور الأب.. وتفتكري مامتك هتوافق أنه يتجوزني.. .

انهت حديثها ودموعها تسقط على وجنتيها تاركة أثرها محفور وكأنه معبر لباقي دموعها وألمها.. ربتت خلود على كفها المسجون بين قبضتها وهي تقول بحنان وتعقل:
- أول حاجة خلينا متفقين عليها أنك بنت أي راجل يتمناها زوجة وحبيبة وأم لأولاده.. وبعدين خليكي فمشاعرك وبس.. ملكيش دعوة بماما أو بباباكي.. فكري فحبك وفي فادي.. هو بيحبك ولا لا.. دا المهم عندك دلوقتي.. نشوف هو بيحبك ولا لا وبعدين نفكر في الباقي.. .

طالعتها بعينين متألمتين تسألها بخفوت :
- ولو مبيحبنيش!!.. .

- ولو بيحبك!!.. متخليش الأفكار السلبية تستولى عليكي.. وبلاش تحطيها في المقام الأول.. وبعدين يا أستاذة يا مختمرة الرسول صلى الله عليه وسلم بيقول تفائلوا بالخير تجدوه.. .