"ခါးဆိုဒ်က..."
မင်းဆက် ဆက်မပြောဖြစ်တော့...။ သူမက ဘောင်းဘီကိုကိုင်ကာ သူ့ရှေ့မှာခြေဖျားထောက်ရပ်ကာ လည်ပင်းကို သိုင်းလိုက်သည်။ မင်းဆက် တကယ်အံ့ဩသွားမိပြီး သူမကိုငုံ့ကြည့်ပေမယ့် ချာတိတ်မကတော့ မျက်မှောင်ကုပ်လျက်...
" ဟေ့ လူကြီး... ခါးနည်းနည်းကိုင်းပေးအုံးလေဗျာ... ဒီမှာခြေဖျားထောင်တာတောင် အရပ်ကမမီဘူး"
မင်းဆက် အသာခေါင်းကိုရှေ့ကိုင်းပေးတော့ သူမက သူ့ပခုံးကိုကျော်ကာ နောက်ကိုကျော်ကြည့်ပြီး
" ဒီတစ်ထည်နဲ့ ကိုက်လောက်တယ်... လင်း You Tubeမှာကြည့်ဖူးတယ်... ခါးဆိုဒ်မသိရင်ဒီလိုတိုင်းရတယ်တဲ့"
သူမက ဘောင်းဘီကိုပြန်ယူသွားကာ အေးအေးဆေးဆေးပင်... မင်းဆက်မှာသာ ရင်ဘက်ထဲမှာ ဝုန်းဒိုင်းကျဲလို့...
" အမ ဒီဘောင်းဘီနဲ့ အင်္ကျီသုံးထည်ယူမယ်နော်။ တွက်ပေးပါအုံး..."
"ဟုတ်ပြီ ညီမလေး..."
အရောင်းဝန်ထမ်းက အထည်တွေယူကာ အိတ်နဲ့ထည့်နေသည်။
" ကလေးအတွက်ရော... မဝယ်တော့ဘူးလား"
သူမက နှာခေါင်းလေးအသာရှုံ့ပြရင်း ခေါင်းခါသည်။
" ဟင့်အင်... အရင်ကိုကြီးဝယ်ပေးထားတာတွေတောင် တစ်ခါမှမဝတ်ရတာတွေရှိသေးတယ်"
သူမက ပြောပြီး ငွေရှင်းကောင်တာမှာ ငွေရှင်းပြီး အထုပ်တွေဆွဲလာသည်။ ဆိုင်အပြင်ဘက်ထွက်လာကြတော့ မင်းဆက်က သူမလက်ထဲကအထုပ်တွေပြောင်းယူလိုက်ရင်း...
" အဲဒီအင်္ကျီတွေ ဘာလို့မဝတ်တာလည်း... လှရဲ့သားနဲ့"
ချာတိတ်မက သူ့ကိုမော့ကြည့်ကာ သွားစေ့ရယ်ပြသည်။ တကယ့်ကြောင်မလေးလို...
" တအားကြီး လှနေလို့ပေါ့။ အဲဒီဂါဝန်တွေနဲ့ စကပ်တွေက လင်းရဲ့စတိုင်မဟုတ်ဘူး"
မင်းဆက် ဘာမှမပြောတော့ပဲ သူမဦးဆောင်ရာနောက် လိုက်ခဲ့သည်။ ဂျင်းစကပ်တိုလေးရယ်... အင်္ကျီအစင်းကျားတီရှပ်ပွကြီးရယ်... ဆံပင်နှစ်ဖက်ခွဲစည်းလေးနဲ့ သူ့ရှေ့က ပုတက်တက် ကောင်မလေး။ ဝေါကင်းရှူးကလေးစီးပြီး ဂျင်းသားလွယ်အိတ်လေးကို လွယ်ထားတဲ့ ချာတိတ်မလေးကို ၁၀တန်းကျောင်းသူလို့ပြောလည်း ယုံကြမှာ။ ၈တန်းကျောင်းသူလို့ပြောလည်း ယုံကြမှာ...
YOU ARE READING
နှလုံးသားစေရာ
RomanceZawGyi code is below. About a girl who chasing dream. Finally she follows her heart and decides to fall in love. But she never gives up her dreams.
