Hello 1997

Chapter 2

Rajat aur Sonu jab Mohit ke ghar aaye to ghar me ghup andhera tha. Aas-paas haathon se cheezein tatolkar Sonu jaise taise ek plastic kursi par baithi, kucch tootne ki aawaz aayi.

"Kya hai ye?" Dar ke maare Sonu chillayi.

Tabhi Mohit ki aawaz jaane kahaan se aayi, "Tum chips par baith gayi. Pata hai kal hi mujhe tuition padhaane ke paise mile the aur usse maine Uncle Chips aur Fanta ki bottles khareedi thin ham sabke liye."

"To mujhe kya pata tha? Normal log table par khaane ki cheezein rakhte hain, kursiyon par nahin."

"Mohit!" Rajat ne dheeme se kaha.

"Hmm..."

"Light kyon nahin jal rahi? Mere ghar mein to batti aa rahi hai..."

"Are vo, chalo tum log picture dekho," Mohit jhenpte huye hasne laga.

Sonu aur Rajat ne ek doosre ki taraf dekha fir Mohit ki taraf halanki us andhere mein kucch bhi dikh nahin raha tha.

Mohit ne sambhalkar jisse vo andhere mein gir naa jaye, VCR ki or gaya aur usme tape ko insert kiya, tabhi bijli kadakne ki aawaz aayi.

"Baarish hone lagi kya?" Sonu ne khidki ki taraf dekhkar kaha.

"Sonu, TV se aawaz aa rahi hai," Rajat bola.

Aur TV par kaale background mein nakhoonon se khurcha jaa raha tha- Shaitaan ki beti.

Dono Mohit ke jaal mein itni aasani se fas jayenge, ye to Mohit ko bhi nahin pata tha. Ab jaise jaise hi picture mein daraawne scene aayenge, dar ke maare Sonu aur Rajat zor zor se chillayenge aur Mohit, saal bhar unhe uski yaad dilaakar unka mazaak banayega. Video parlour vale bhaiyya se specially ye bolkar ki use sabse daraawni picture chahiye, ye wali picture li thi. Video parlour vaale bhaiyya ne kaha bhi ki beta koi is picture ko aadhe ghante se zyada nahin dekh paata, par Mohit kisi cheez se nahin darta tha. Aaj vo Sonu ko dikha dega ki vo sabse strong hai...

Aur aadhe ghante baad:

Mohit bathroom mein ulti par ulti kare jaa raha tha. Sonu ek haath se Mohit ki peeth sehla rahi thi aur ek haath se uske maathe par parne vaale baalon ko hata rahi thi.

Tabhi Rajat ne lights on ki aur kitchen se Mohit ke liye Paani ka glass la hi raha tha ki usne Sonu ko kehte huye suna, "Ab theek lag raha hai na tumhe." Aur Sonu dheeme dheeme Mohit ke baalon par haath fer rahi thi. Sach poocho to is samay Rajat ko dono is samay bilkul gudde-gudiya ki tarah lag rahe the, sundar-salone aur saari duniya se bekhabar...Chalo ab Rajat ko apne dil ki baat chhupaane ke liye zyada mehnat nahi karni hogi. Rajat ne dheere se paani ka glass zameen par aise rakha ki Sonu ko vo dikh jaye aur ek udaas muskan ke saath khidki ki ot mein khada ho gaya.

"Jab itna dar lagta hai to aisi picture ka video tape laye hi kyon?" Mohit sir jhukaye baitha tha aur Sonu use daante jaa rahi thi. "Poori picture mein tum dar ke kaaran rote chillate rahe aur fir bhi man nahi bhara to ulti karne lage."

"Scene dekha tha tumne? Usme heroine ke neele aankhon vale dost ke gale ke andar se Zameen se nikle haath ne uska dil, kaleja, poora digestive aur respiratory system nikaal liya tha. Chhi...raat ko kaise soungaa main?"

"Vaise tum to picture ko kaafi enjoy kar rahi thi," Rajat ne muskurate huye Sonu se poocha.

"Haan, to aisi movies matlab horror movies pasand hain mujhe," Sonu jhenpte huye boli."

"Tabhi chudail ki tarah din bhar ham sabka khoon choosti rehti ho. Bhooton ko to bhootiya picture hi acchi lagegi na," Mohit ne ulaahna diya.

"Ab ek shabd aur bola na tumne, Mohit," Sonu daant peeste huye boli, "To tumhare sapne mein vo picture vali shaitaan ki beti aaye na aaye, main zaroor aaungi tumhara gala dabaane."

"Vo to tum vaise bhi aati ho?"

"Kya bola tumne?"

"Arey, mera matlab roj mere saath sapnon mein tum chudailon vaali harkatein karne aati ho."

"Tumko to main..."

Aur Rajat kab unhe cchorr kar apne ghar chala gaya, dono ko pata nahi laga.