إمرأة بطعم الوجع

الجزء الأخير

#إمراة_بطعم_الوجع
الجزء الأخير

مشكلتي زي مشاكل بيوت مصرية كتير مالهاش حل ومعقدة الطلاق صعب والاستمرار في حياتي معاه اصعب قبل ماشغلكم باللي وصلت له لازم تعرفوا ايه اللي حصل بعد ما امجد راح خطب غيري وباع اللاب توب بتاعه عشانها طبعا زعلت واتاثرت جدا وحسيت قد ايه انا رخيصة بالنسبة له وماليش تمن قالي بعدها :
هي منقبة وماكنش في حل غير الخطوبة الرسمي
انا .. هههههه صح هي بنت ناس وانا بنت ستين *** اني عرفتك وصدقت انك بتحبني

امجد … مانا خلاص سيبتها لاني بحبك انتي
انا .. مامتك مش عايزاني حاسه من كلامها معايا ببرود
امجد .. ورد لوسمحتي خلينا نختار نفسنا لمرة واحده وسيبك منهم انا هقنعهم مع الوقت ..
صدقته تاني ووافقت رضيت بيه بعد كل اللي عمله فيا ماعرفش ليه بنتخان ونتظلم مره ورا التانية وبنكمل برضو كأننا مغيبين المهم خطبني وسافر تاني سنة كاملة ماشوفتش حد من أهله غير لما أبوه كلمني ونزلت قابلته :
أبوه .. انتي لسه مكمله مع امجد برضو ؟
انا .. ايوا
أبوه .. ليه مع أنك عارفه موقف والدته منك
انا .. من غير سبب ولما تعرفني هتحبني
أبوه .. انتي اللي بتصرفي علي بيتكم من شغلك في المولات صحيح ؟
انا .. عمي الشغل مش عيب وبعدين انا بصرف علي نفسي مش ع البيت دا معناه اني بنت قد المسؤولية ويعتمد عليا
الحوار بينا انتهي بتحدي كبير وعند كل كلامه كان تجريح فيا والاهلي عايز يفهمني اني مش قد المقام وأنهم مستوي تاني ماعرفش علي ايه ؟ ابنهم لسه لحد النهاردة ماكونش نفسه ولا عارفين هنسكن فين ؟
كلمني احمد أننا هناخد انترية مامته القديم ونفرش أوضة النوم ونلم الدنيا وافقت برضو وخدت علي دماغي كمان بابا كان رافض ومع ذلك اقنعته رجع من السفر معاه مبلغ قولت له ماتجيبش عنه سيرة لحد عشان لو احتاجنا لفلوس يبقي معانا ومانستلفش قالي ماشي وبعد اول يوم ليه في مصر قالي امي خدت الفلوس :
انا لطمت علي وشي منه
يالهوي يا امجد ليه طيب مش قولتلك ماتقولش
امجد .. اهو اللي حصل
انا.. كدا كتير عليا انا عروسة ومن حقي افرح واحس أن ورايا راجل بجد
امجد .. غصب عني والله عشان ترضي عننا وتوافق علي الفرح
انا في سري ..ابقي قابلني الام اللي تقبل تاخد شقي ابنها تحت اي ظرف ماتبقاش ام ولا تعرف معني الرحمة ☹️😑
_____________
كنت واقفه معاه زي الراجل ودي مشكلتي استلفت عشانه ولسه  بستلف كل اهله اتخلوا عننا واشترينا أوضة النوم بالقسط واتجوزونا كل المؤشرات بتقول لا وكملت جت أمه بعد فترة زيارة لينا وكان كل كلامها تريقة :
أمه .. هو دا مطبخ ..! انتي ماجبتيش مطبخ ولا ايه ؟
كنت بطبخ علي لوح خشب واصفي المواعين علي الانبوبة اتخنقت منها بعد ماطبخت وتعبت نفسي طول النهار عشانها كانت دي شكرا بتاعتها ..
بقلم #أماني_عنان
البطاطس عايزا ملح

المطبخ عليكي هو فين
فاض بيا فرديت : والله ياحماتي فلوس المطبخ حطيتها مع ابنك في أوضة النوم ماتتكلم يا امجد
أمجد بياكل وساكت .. امممم مالوش كلمة ولاصوت قدام أمه
امجد عدي الرد باي كلام وقال : باركيلنا ياماما ورد حامل
أمه سابت الاكل وقالت ..  اكيد ولد احنا عيلتنا مابتجيبش بنات
انا .. كله بتاع ربنا مش بايد حد
أمه … ههههه انا بعرفك بس ماهو قدامك جايبه أربع رجالة يسدوا عين الشمس ..
عديت واستحملت كل دا بطني كبرت وبشتغل في المول زي مانا عشان اسدد الديون معاه مستحمله وماقولتش كلمة لحد مافي يوم جه زميل قديم بس مش محترم طلب يقرب مني وقال :
زميلي .. انتي مش خلاص اتجوزتي ؟
انا .. ساكته وببص له وهو بيقوب ويكسر مساحتي الشخصية
زميلي .. افهمي بس
زقيته وشتمته .. انت اكيد مجنون انا متجوزه وحامل اتقي الله
زميلي وانا مديرك هنا ولو ماسمعتيش كلامي هتتعبي
.. اعوذ بالله والله لو هموت ماغضب ربنا ابدا
زميلي بعد وخلف أنه مش هيسيبني وفعلا يومها طلعلي شغل من تحت الارض وفضلت اشيل وأحط في المخزن لحد مانزل عليا دم فكرت الجنين نزل لما روحت للدكتور قالي البقاء لله في جنين نزل ولسه فاضل واحد ..
منه لله كان السبب في خسارة ابني وماحدش عرف باللي شوفته ومريت بيه لا اهلي ولا امجد ..
خلفت ابني وقعد من الشغل عشان اراعية عمر اتولد عنده نقص في الحنجرة وماكنش بينام غير علي كتفي لو حطيته علي السرير شوية يتخنق ووشه يزرق فضلت ع كدا سنتين لوحدي ولا ام ولا اخوات لحد ما حملت تاني وجبت توأم بنت وولد ماشيه الحياة بالعافية والمصاريف قليلة وبمشي اموري مابقيتش البنت الشيك الرايقة بتاعت زمان بقيت مهمومه ووحيدة وتعبانه ..
_________
في ليلة صحيت من النوم ودخلت الحمام بالصدفة سمعت جوزي بيتكلم بصوت هادئ وحنين بيقول لها :
انتي قمر اوي وصوتك جميل
وقفت مكاني متسمره
امجد .. وانا كمان بحبك
انا ماتكلمتش استنيته نام وفتحت تليفونه وقرأت كل المحادثات البيه ماشي مع واحده متجوزة وبينهم علاقة الله اعلم وصلت لحد فين ؟
راجل غيره كان حمد ربنا عليا وعلي عياله عنده البنات والولاد وزوجه مخلصه وجميلة مش وحشه عشان يخوني .. كسرني منه لله
علي قد المرار اللي شوفته مع السنين ماتوجعتش قد الليلة دي …
صحيته زي المجنونه :
امجد قوم فز كلمني
صحي مفزوع .. ايه في ايه ؟
انا .. طلقني ياخاين يادون بعد كل دا تخوني ومع مين مع واحده واطيه زيك متجوزة بتسرق في انصاص الليالي ..
امجد .. احترمي نفسك وفهميني في ايه بطلي عبط
رميت الفون في وشه .. اهو الدليل اهو
بعد خناقة طويلة طلقني وجالي سؤال من جوايا : ها ارتاحتي ؟
بقيتي مطلقة وام معيلة في رقبتك تلت عيال ولدين وبنت منهم ولد تعبان بتعالجي فيه لحد النهاردة
الإجابة … لا لسه تعبانه وزاد وجعي اكتر
اخدت عيالي ومشيت ماحدش رحب بينا امي اتهربت بالكلام وقالت انتي مكبره الموضوع ليه ماعادي مجرد كلام  شوفي انتي مقصرة في ايه وغيري من نفسك ….
انا ..كل حاجة انا حسبي والله ونعم الوكيل في كل ظالم
عارفه نفسي ماليش لا أهل ولا سند بعد ابويا الله يرحمه
جه امجد بعد فترة حاول يرجعني وانا رفضت ردت اختي : يكون في علمك انتي كدا مطلقة يعني مالكيش غير نفقة عيالك وبس
بصيت لها باستغراب .. انتي معايا ولا معاه في ايه ؟ كلكوا عايزيني امشي وخلاص ارجع لناره وترتاحوا مني ومن عيالي وخلاص ..
حسيت اني عريانه في عز البرد ضهري اتكشف بجد  مابقاش ليا حبيب أو حد يتفهم مشاعري واللي بمر بيه وافقت ارجع بعد ماشوفت هجومهم عليا وعدني هيتغير وكان كلام من يومها مش عارفه اعيش صدقوني انا مت وكل لحظة معاه عذاب كبير اوي بدعي أن ماحدش يشوفه احساس العجز وقلة الحيلة وحش بقيت تايهه ولا عارفه ارجع ورد الجميلة البشوشة اللي بتعدي كل المشاكل ولا عارفه اطلق وابعد عن عيالي لأن صعب اخدهم هصرف علي تلت عيال منين ومين هيقعد بيهم لو نزلت اشتغل امي كتر خيرها قاعده بعيال اختي الكبيرة اللي بتشتغل وللعلم بعد مارجعت بيتي بشهرين اختي شربت من نفس الكاس جالها تليفون :
الو
اختي .. ايوا مين ؟
انا ابن عم جوزك
اختي .. اهلا وسهلا
الوقت كان متأخر طلب يجي ياخد ورق العربية ضروري عشان جوزها اتاخد مخالفة قالت هنزل معاك فرفض بحجة العيال وهما ساعة زمن وهيرجعوا ولما صممت سابها وفي القسم قالولها
جوزك متاخد اداب …!!
اتقبض عليه ومعاه بنت في العربية ماستحملتش وقامت قيامته ازاي تخوني وبعد كل اللي عملتهولك وفي ثانية كانت خالعه واختارت نفسها ورمته في الزبالة أما أنا فماليش حق الاختيار مجبره علي حياتي ومش عارفه انا صح ولا غلط واعمل ايه ؟
ممكن حلول وآراء منطقية اعملها عشان اخلص من عذابي وحيرتي دي لأن جوزي لسه بيعرف عليا ستات والله اعلم بيعمل ايه تاني وعايشه مديونه وبناكل ونشرب بستر ربنا حتي عيالي مش كل حاجة نفسهم فيها بعرف اشتريها بقت الفاكهه بحساب وتخطيط وهو عايش لنفسه ورغباته وماعندهوش اي طموح للمستقبل ومافيش بينا حاجة مشتركة بعدنا وكرهت ريحته ونفسه حواليا بعد حب السنين ….

*******
خلصت القصة والبطلة معانا وهتتابع الكومنتات ياريت نحط نفسنا مكانها ونكون واقعيين ولو مافيش حلول ادعوا لها .. دي كانت قصة حقيقية ويعلم الله مدي امانتي فيها كملتها بعد فترة غياب احتراما للقراء والناس اللي طلبت مني اكملها 🌹🌹

أما بخصوص الرواية الجديدة #الطبيبة_والمغرور دي خيالية بحته من تأليفي وان شاء الله هنكملها مع الوقت لو عندك اي مشكلة ابعتوالي ع رسائل البيدج دي 👇👇
https://www.facebook.com/emy7080

هنكمل عليها الروايات ونعرض بعض القصص الحقيقية ونتناقش فيها وياريت تبعتولي نماذج تفرح مش كله نكد وبؤس الله يكرمكم 😂😀  هنا اكونت شخصي للبوستات العائلية في الغالب واخر اخبار كتاباتي الورقية والضحك والأصدقاء وشكرا للصبر علي الوصول لنهاية الرغي دا كله 💟
صحيح ماتنسوش المتابعة للبيدج والصفحة الشخصية 😘

#أماني_عنان
" سيدة الواقعية "